Informe di Proclamadornan di Reino

Obranan Excelente Cu Ta Glorificá Jehova

DEN su Sermon Riba Ceru, Jesus a bisa su disipelnan: “Laga boso lus briya dilanti hende, pa nan por mira boso obranan excelente i duna gloria na boso Tata cu ta den shelu.” (Mateo 5:16) Di igual manera, cristiannan berdadero awe ta participá den “obranan excelente” cu ta glorificá Jehova.

Kico e obranan excelente aki ta? Nan ta incluí e predicacion dje bon nobo, pero nos conducta ehemplar tambe ta un parti importante di obranan excelente. Hopi bes ta nos bon conducta cu inicialmente ta atraé hende na e congregacion cristian. E siguiente experencianan ta ilustrá con Testigonan di Jehova na Martinique ta ‘lagando nan lus briya dilanti hende.’

◻ Tumando parti den e trabou di predicacion di cas-pa-cas, un Testigo di Jehova a bishitá un señora católico. Pa 25 aña e señora aki tabata bibando cu un homber cu ken e no tabata casá. E señora tabata conocí cu e siñansanan di Testigonan di Jehova, ya cu alrededor di shete aña promé, el a ricibí e buki Bo por biba pa semper den Paradijs riba tera.a E señora a bisa e Testigo: “Tin muchu hopi religion. Mi no sa ken pa kere meimei di tur e confusion aki.” E Testigo a splica cu e berdad por ser hañá solamente den e Bijbel i cu afin di hañ’é, e mester studia e Scritura cuidadosamente i haci oracion na Dios pa su spiritu i guia.

Pa un periodo di tempu, aunke interesá pa studia e Bijbel, e señora a nenga un cantidad di invitacion pa asistí na reunionnan cristian na e Salon di Reino di Testigonan di Jehova. Pakico? Pasobra e tabata masha tímido mes. Sin embargo, despues di haña un invitacion pa e Memorial di Cristo su morto, el a superá su timides i a asistí.

Loke a impresion’é mas tantu dje reunion tabata e ambiente amoroso den e Salon di Reino. Nunca el a experenciá tal amistad berdadero den su iglesia! Despues di e reunion ei el a cuminsá asistí na tur reunion dje Testigonan local, i pronto el a casa cu e homber cu e tabata bibando cuné. Awor e señora ta un miembro bautisá dje congregacion.

◻ E obranan excelente di un otro Testigo a producí bon resultadonan. E ruman muher aki tabatin un posicion di responsabilidad den un oficina. Despues cu un homber dje isla di Réunion a ser tumá na trabou, algun dje trahadornan a cuminsá haci bofon dje homber debí na su estatura corticu. El e bira obheto di harimentu. Na contraste, e Testigo semper tabata bondadoso i respetuoso cu e homber. Pronto e homber a puntr’é pakico e tabata asina diferente.

E Testigo a splica cu su conducta respetuoso tabata resultado di principionan bíblico cu el a siña for di Testigonan di Jehova. Tambe e Testigo a mustr’é loke e Scritura ta bisa tocante Dios su propósito i e speransa di un mundu nobo. E homber a aceptá un studio di Bijbel, a cuminsá asistí na reunionnan cristian, i a casa cu e muher cu e tabata bibando cuné.

Cu tempu e homber a bolbe n’e isla di Réunion. Den pasado, e tabatin dificultadnan cu su famianan, specialmente cu famia di su casá. Pero awor nan tabata masha impresioná cu su excelente conducta cristian. E homber a ser bautisá i actualmente ta un sirbidor ministerial. Vários miembro dje famia, incluyendo su esposa i dos yu muher, tambe ta sirbi den e congregacion cristian como publicadornan dje bon nobo dje Reino di Dios.

[Nota]