Pregunta di Lector

Kico apostel Pablo tabata kier men ora el a bisa cu e tabata “lubidando loke ta patras i forsando padilanti pa loke ta mas ayá”? (Filipensenan 3:13) Un persona por lubidá algu deliberadamente?

No, den mayoria caso nos no por kita deliberadamente un recuerdo for di nos mente. E realidad ta cu nos ta lubidá hopi di loke nos kier recordá i ta recordá hopi cos cu nos lo tin gana di lubidá. Kico, anto, Pablo tabata kier men ora el a skirbi e palabranan di Filipensenan 3:13? E contexto ta yuda nos comprendé.

Den Filipensenan capítulo 3, Pablo ta describí su “base pa confiansa . . . den carni.” E ta papia di su formacion hudiu impecable i su celo p’e Ley—cosnan cu lo por a dun’é hopi bentaha den e nacion di Israel. (Filipensenan 3:4-6; Echonan 22:3-5) Sin embargo, el a bira lomba pa tal bentahanan, considerando nan di poco balor manera un pérdida. Pakico? Pa motibu cu el a haña algu mihó—“e balor sobresaliente dje conocimentu di Cristo Jesus.”—Filipensenan 3:7, 8.

Pablo su meta principal tabata pa alcansá, no un posicion den e mundu aki, sino “e resureccion mas trempan for di morto.” (Filipensenan 3:11, 12) Pues, e ta skirbi: “Lubidando loke ta patras i forsando padilanti pa loke ta mas ayá, mi ta sigui den direccion dje meta p’e premio dje yamada pa bai ariba di Dios mediante Cristo Jesus.” (Filipensenan 3:13, 14) Ora Pablo a bisa cu e tabata “lubidando loke ta patras,” e no tabata kier men cu di un manera of otro el a ‘veeg’ “loke ta patras” for di su mente. Obviamente, ainda e tabata corda nan, siendo cu el a caba di mencioná nan. Ademas, den e idioma griego original, e ta usa un forma dje verbo cu ta indicá un accion den progreso, no completá. E ta bisa “lubidando,” no “despues di a lubidá.”

E palabra griego traducí como “lubidá” (e·pi·lan·thaʹno·mai) tin diferente matis di nificacion, di cua unu ta “ser despreocupá cu,” of “neglishá.” Segun e Exegetical Dictionary of the New Testament (redactá dor di Horst Balz i Gerhard Schneider), esaki ta loke “lubidando” ta nificá na Filipensenan 3:13. Pablo no a pensa constantemente riba e cosnan cu el a bandoná. El a siña mira nan como di poco interes. Nan tabata manera “un monton di basura” compará cu e speransa celestial.—Filipensenan 3:8.

Con Pablo su palabranan tin aplicacion awe? Wel, kisas un cristian, mescos cu Pablo, a haci sacrificio pa sirbi Dios. E por a bandoná un carera lucrativo p’e sirbishi di tempu completo. Of kisas e ta pertenecé na un famia ricu cu a stop di sosten’é financieramente debí cu nan ta rechasá e berdad. Sacrificionan asina ta encomendabel, pero nan no ta algu pa preocupá constantemente cuné. Un cristian ‘ta lubidá,’ ta stop di preocupá cu “loke ta patras” en bista dje glorioso futuro cu ta sper’é.—Lucas 9:62.

E principio tras dje palabranan di Pablo tal bes por ser aplicá den un otro manera. Kico di un cristian cu tabata enbolbí den mal conducta promé cu el a siña tocante Dios? (Colosensenan 3:5-7) Of suponé cu despues di a bira un cristian, el a cometé un picá serio i a ser disipliná dor dje congregacion. (2 Corintionan 7:8-13; Santiago 5:15-20) Wel, si e ta berdaderamente repentí i a cambia su maneranan, el a ser “labá limpi.” (1 Corintionan 6:9-11) Loke a sosodé ta pasado. Kisas e nunca por lubidá literalmente loke el a haci—en berdad, lo e ta sabí pa siña for dje experencia pa e no ripití e picá. Sin embargo, e ta ‘lubidá’ den e sentido cu e no ta reprendé su mes constantemente. (Compará cu Isaías 65:17.) Despues di a ser pordoná riba e base dje sacrificio di Jesus, e ta trata na pone e pasado su tras.

Na Filipensenan 3:13, 14, Pablo ta describí su mes como un coredor den un careda, “forsando padilanti” pa alcansá e meta. Un coredor ta wak padilanti, no patras. Di igual manera, un cristian mester wak n’e bendicionnan pa futuro, no n’e cosnan cu el a laga atras. Pablo ta bisa tambe: “Si boso ta mentalmente incliná di otro manera den un of otro sentido, Dios lo revelá e actitud mencioná anteriormente na boso.” (Filipensenan 3:15) Pues, pidi Dios den oracion p’e yudá bo cultivá e punto di bista aki. Yena bo mente cu e pensamentunan di Dios manera nan ta ser hañá den Bijbel. (Filipensenan 4:6-9) Meditá riba e amor di Jehova pa bo i riba e bendicionnan cu bo ta disfrutá di dje pa motibu di esei. (1 Juan 4:9, 10, 17-19) Anto, mediante spiritu santu Jehova lo yudá bo pa no preocupá cu loke bo a laga atras. Mas bien, mescos cu Pablo, lo bo mira padilanti n’e glorioso futuro nos dilanti.—Filipensenan 3:17.