Cristianismo di Prome i Estado

UN PAR di ora promé cu su morto, Jesus a bisa su disipelnan: “Boso no ta parti dje mundu, sino ami a scoge boso for dje mundu, pa causa di esaki e mundu ta odia boso.” (Juan 15:19) Sin embargo, esaki ta nificá cu cristiannan lo adoptá un actitud hostil pa cu e autoridadnan dje mundu aki?

No Mundano Pero No Hostil

Apostel Pablo a bisa e cristiannan cu tabata biba na Roma: “Laga tur alma sea sumiso n’e autoridadnan superior.” (Romanonan 13:1) Di manera similar, apostel Pedro a skirbi: “Pa causa di Señor someté boso na tur creacion humano: sea na un rey como unu superior of na gobernadornan como esnan cu el a manda pa duna castigu na malechornan pero pa elogiá hacidornan di loke ta bon.” (1 Pedro 2:13, 14) Sumision na Estado i na su representantenan debidamente nombrá tabata claramente un principio aceptá entre e cristiannan di promé. Nan a haci esfuerso pa ser ciudadanonan cu ta cumpli cu ley i pa biba na pas cu tur hende.—Romanonan 12:18.

Bou dje tópico “Iglesia i Estado,” The Encyclopedia of Religion ta declará: “Den e promé tres

siglonan AD e iglesia cristian tabata considerablemente isolá for dje comunidad oficial romano . . . No obstante, lidernan cristian . . . a siña obedencia na ley romano i lealtad n’e emperador, dentro dje límitenan cu e fe cristian ta fiha.”

Onor, No Adoracion

Cristiannan no tabatin un actitud hostil pa cu e emperador romano. Nan a respetá su autoridad i a dun’é e onor merecí debí na su rango. Durante e gobernacion di Emperador Nero, apostel Pedro a skirbi n’e cristiannan cu tabata biba na vários parti dje Imperio Romano: “Onra hende di tur clase, . . . duna onor n’e rey.” (1 Pedro 2:17) E palabra “rey” a ser usá den e mundu di abla griego no solamente pa reynan local sino tambe p’e emperador romano. Apostel Pablo a consehá cristiannan cu tabata biba den e capital dje Imperio Romano: “Rindi na tur loke ta debí na nan, . . . na esun cu ta exigí onor, tal onor.” (Romanonan 13:7) E emperador romano casi sigur a exigí onor. Cu tempu, el a asta exigí adoracion. Sin embargo, aki e cristiannan di promé a hala e liña.

Na ocasion di su huicio dilanti un proconsul romano den siglo dos E.C., segun informe, Policarpo a declará: “Mi ta un cristian. . . . Nos ta ser siñá pa duna na tur e debido onor . . . n’e podernan i autoridadnan cu ta ordená dor di Dios.” Sin embargo, Policarpo a preferá di muri en bes di adorá e emperador. E apologista di siglo dos, Teófilo di Antiokia a skirbi: “Lo mi mas bien onra e emperador, siguramente no ador’é, sino resa p’e. Pero Dios, e Dios bibu i berdadero mi ta adorá.”

Oracionnan apropiado relacioná cu e emperador siguramente no tabata conectá cu adoracion di emperador of cu nacionalismo. Apostel Pablo a splica nan propósito: “P’esei mi ta urgi, foral, pa súplica, oracion, rogamentu, ofrenda di gradicimentu, ser hací en cuanto tur sorto di hende, en cuanto reynan i tur esnan cu ta den puesto haltu; pa nos por sigui hiba un bida calmu i ketu cu pleno debocion piadoso i seriedad.”—1 Timoteo 2:1, 2.

“Na Rand dje Sociedad”

E conducta respetuoso aki di parti dje cristiannan di promé no a trece pa nan e amistad dje mundu den cua nan tabata biba. E historiador frances A. Hamman ta conta cu e cristiannan di promé “tabata biba na rand dje sociedad.” En realidad nan tabata biba na rand di dos sociedad, esun hudiu i esun romano, encontrando di ámbos hopi prehuicio i malcomprendimentu.

Por ehempel, ora apostel Pablo a ser acusá falsamente dor dje lidernan hudiu, el a declará den su defensa dilanti e gobernador romano: “Mi no a cometé ningun picá ni contra e Ley dje hudiunan ni contra e tempel ni contra César. . . . Mi ta apelá na César!” (Echonan 25:8, 11) Conciente cu e hudiunan tabata tramando pa mat’é, Pablo a apelá na Nero, reconociendo asina e autoridad dje emperador romano. Siguientemente, na su promé huicio na Roma, ta parce cu Pablo a ser absolvé. Pero mas despues el a ser encarcelá atrobe, i segun tradicion el a ser ehecutá riba órden di Nero.

Relacioná cu e posicion difícil dje cristiannan di promé den e sociedad romano, e sociólogo i teólogo Ernst Troeltsch a skirbi: “Tur ofishi i empleo cu tabatin cualkier coneccion cu adoracion di ídolo, of cu e adoracion dje emperador, of cu tabatin cualkier coneccion cu dramamentu di sanger of cu pena capital, of cu lo a trece cristiannan den contacto cu inmoralidad pagano, a ser excluí.” E posicion aki no a laga ningun lugá pa un relacion pacífico i mutuamente respetuoso entre cristiannan i Estado?

Pagando Na César Loke Ta “Debí” na Dje

Jesus a duna e fórmula cu lo a goberná conducta cristian pa cu Estado romano of, realmente, cualkier otro gobiernu, ora el a declará: “Paga bek na César e cosnan di César, pero na Dios e cosnan di Dios.” (Mateo 22:21) E conseho aki na Jesus su siguidornan tabata na contraste skerpi cu e actitud di hopi hudiu nacionalista cu a carga rencor contra dominacion romano i a disputá e legalidad di pagamentu di belasting na un poder stranhero.

Mas despues, Pablo a bisa e cristiannan cu tabata biba na Roma: “P’esei tin motibu obligatorio pa boso ser sumiso, no solamente pa motibu dje rabia ei sino tambe pa motibu di boso concenshi. Pasobra p’esei mes tambe boso ta paga belasting; pasobra nan [“autoridadnan superior” gubernamental] ta sirbidornan público di Dios cu ta sirbi constantemente pa net e propósito aki. Rindi na tur loke ta debí na nan, na esun cu ta exigí belasting, belasting; na esun cu ta exigí tributo, tributo.” (Romanonan 13:5-7) Aunke cristiannan no tabata parti dje mundu, nan tabata obligá pa ser ciudadanonan onesto i pagadornan di belasting, pagando e Estado p’e servicionan cu e ta rindi.—Juan 17:16.

Pero e palabranan di Jesus ta limitá na pagamentu di belasting? Siendo cu Jesus no a definí exactamente e cosnan di César i e cosnan di Dios, tin casonan dudoso riba cua nos mester dicidí segun e circunstancia of segun nos comprendimentu di henter e Bijbel. Cu otro palabra, pa dicidí ki cosnan un cristian por paga na César tin biaha lo enbolbé e concenshi cristian, manera el a ser instruí dor di principionan bíblico.

Un Balansa Cuidadoso Entre Dos Rekisito Contrario

Hopi hende tin tendencia di lubidá cu despues di declará cu e cosnan di César mester ser pagá bek na dje, Jesus a agregá: “Pero [paga bek] na Dios e cosnan di Dios.” Apostel Pedro a mustra unda e prioridad pa cristiannan ta sinta. Inmediatamente despues di a consehá sumision n’e “rey,” of emperador, i su “gobernadornan,” Pedro a skirbi: “Sea como hende liber, i tog tene boso libertad, no como un disfras pa maldad, sino como esclabo di Dios. Onra hende di tur clase, tene amor pa henter e asociacion di rumannan, keda den temor di Dios, duna onor n’e rey.” (1 Pedro 2:16, 17) E apostel a mustra cu cristiannan ta esclabonan di Dios, no di un gobernante humano. Aunke nan ta mustra debido onor i respet pa representantenan di Estado, nan tin cu haci esei den e temor di Dios, kende su leynan ta supremo.

Añanan anterior, Pedro no a laga duda pa loke ta e superioridad dje ley di Dios riba esun di hende. E Sanedrin hudiu tabata un cuerpo administrativo na cua e romanonan a otorgá tantu autoridad civil como religioso. Ora el a ordená e siguidornan di Jesus pa stop di siña den nomber di Cristo, Pedro i e otro apostelnan a contestá respetuosamente pero firmemente: “Nos mester obedecé Dios como gobernante mas bien cu hende.” (Echonan 5:29) Claramente, e cristiannan di promé tabatin cu mantené un balansa cuidadoso entre obedencia na Dios i sumision apropiado na autoridadnan humano. Tertuliano a bis’é asina aki na cuminsamentu di siglo tres E.C.: “Si tur cos ta pertenecé na César, kico lo sobra pa Dios?”

Compromiso cu Estado

Cu pasamentu di tempu, e posicion cu e cristiannan di promé siglo a adoptá en relacion cu Estado a debilitá gradualmente. E apostasia cu Jesus i e apostelnan a predicí a florea den siglo dos i tres E.C. (Mateo 13:37, 38; Echonan 20:29, 30; 2 Tesalonicensenan 2:3-12; 2 Pedro 2:1-3) Cristianismo apóstata a haci compromiso cu e mundu romano, a adoptá su festivalnan pagano i su filosofia, i a aceptá no solamente servicio civil sino tambe servicio militar.

Profesor Troeltsch a skirbi: “For di siglo tres padilanti e situacion a bira mas difícil, pasobra e cristiannan a aumentá na cantidad den e clasenan mas haltu di Sociedad i den e profesionnan mas prominente, den e ehército i den círculonan oficial. Den vários pasashi den e skirbimentunan cristian [no-bíblico] tin protestanan di indignacion contra participacion den e cosnan aki; n’e otro banda, tambe nos ta haña intentonan pa haci compromiso—argumentonan diseñá pa calma concenshinan molestiá . . . For dje tempu di Constantino e dificultadnan aki a disparcé; friccion entre cristiannan i paganonan a terminá, i tur funcion den Estado a bira disponibel pa ser ocupá dor di esnan cu a profesá di ta cristian.”

Yegando na fin di siglo cuater E.C., e forma adulterá i transigente aki di cristianismo a bira e religion estatal dje Imperio Romano.

Atrabes di su historia, cristiandad—representá dor di Iglesianan católico, ortodox i protestant—a sigui haci compromiso cu Estado, birando mas profundamente enbolbí den su política i apoyand’e den su gueranan. Hopi miembro sincero di iglesia cu a ser di shok dor di esaki sin duda lo ta contentu pa sa cu awe tin cristiannan cu ta pega n’e posicion dje cristiannan di promé siglo den nan relacion cu Estado. E siguiente dos artículonan lo considerá e asuntu den mas detaye.

[Plachi na página 5]

César Nero, di ken Pedro a skirbi: “Duna onor n’e rey”

[Rekonosementu]

Musei Capitolini, Roma

[Plachi na página 6]

Policarpo a preferá di muri en bes di adorá e emperador

[Plachi na página 7]

Cristiannan di promé tabata ciudadanonan pacífico, onesto i pagador di belasting