Ora Prehuicio Lo No Existí Mas!

SEGUN informe, e científico Albert Einstein a bisa un biaha cu den e mundu tristu aki, ta mas difícil pa vence un prehuicio cu pa split un atom. Di manera similar, Edward R. Murrow, un periodista cu a bira famoso durante Guera Mundial II i cu despues tabata director dje Agencia Mericano di Informacion, a declará cu “ningun hende por eliminá prehuicio—solamente reconoc’é.”

E declaracionnan aki ta parce di ta berdad? Ta imposibel pa eliminá discriminacion i racismo? Kico Dios ta pensa di prehuicio?

Dios No Ta Parcial

Bijbel ta papia contra parcialidad. (Proverbionan 24:23; 28:21) E ta declará cu “e sabiduria djariba ta promé cu tur cos decente, anto pacífico, razonabel, cla pa obedecé, yen di misericordia i bon fruta, no ta haci distincion parcial, no ta hipócrita.” (Santiago 3:17) Tal sabiduria a ser enfatisá n’e

huesnan den Israel antiguo. “Boso no mester haci inhusticia den e huicio,” nan a ser instruí. “Bo no mester trata esun di condicion humilde cu parcialidad, i bo no mester preferá e persona di un hende importante.”—Levítico 19:15.

Jesucristo i su apostelnan Pedro i Pablo a enfatisá Bijbel su posicion firme contra mustramentu di parcialidad i prehuicio. Jesus tabata imparcial pa cu esnan cu “tabata soyá i plamá manera carné sin wardador.” (Mateo 9:36) El a instruí: “Stop di husga segun aparencia exterior, sino husga cu huicio hustu.”—Juan 7:24.

Pedro i Pablo ta trankilisá nos cu Jehova Dios mes no ta parcial. Pedro a declará: “Siguramente mi ta percibí cu Dios no ta mustra parcialidad, sino den tur nacion e hende cu ta tem’é i ta obra husticia ta aceptabel p’e.” (Echonan 10:34, 35) Apostel Pablo ta bisa nos: “Cu Dios no tin mustramentu di parcialidad.”—Romanonan 2:11.

Influencia di Bijbel Riba Hende

Bijbel tin poder pa cambia personalidad di esnan cu ta ser guiá dor di dje. Hebreonan 4:12 ta bisa: “E palabra di Dios ta bibu i ta ehercé poder.” Cu yudansa di Jehova un persona cu ta mustra prehuicio por asta cambia su manera di pensa i bira imparcial den su trato cu otronan.

Tuma por ehempel, e caso di Saul di Tarso. Segun e relato bíblico, na un tempu el a oponé e congregacion cristian violentamente debí cu e tabata sigui tradicionnan religioso rígido. (Echonan 8:1-3) Tradicion hudiu a convenc’é plenamente cu tur cristian tabata apóstata i enemigu di adoracion berdadero. Su prehuicio a hib’é na apoyá e matamentu di cristiannan. Bijbel ta bisa cu e tabata ‘respirando menasa i asesinato contra e disipelnan di Señor.’ (Echonan 9:1) Miéntras cu e tabata haci esei, el a imaginá cu e tabata rindiendo un sirbishi sagrado na Dios.—Compará cu Juan 16:2.

Sin embargo, Saul di Tarso tabata capas di deshací di su prehuicio extremo. El a asta bira un cristian e mes! Mas despues, como Pablo, un apostel di Jesucristo, el a skirbi: “Antes mi tabata un blasfemador i un persiguidor i un homber insolente. No obstante, mi a ser mustrá misericordia, pasobra mi tabata ignorante i a obra cu falta di fe.”—1 Timoteo 1:13.

Pablo no tabata e único cu a haci cambionan drástico asina den su manera di pensa. Den su carta na Tito, un compañero evangelisador, Pablo a amonestá cristiannan “pa no papia malu di ningun hende, no ser buscador di guera, sea razonabel, demostrando tur suavedad pa cu tur hende. Pasobra asta nos na un tempu tabata insensato, desobediente, siendo gañá, siendo esclabo di vários deseo i placer, ocupá den maldad i envidia, aborecibel, odiando un e otro.”—Tito 3:2, 3.

Kibrando e Bareranan di Prehuicio

Awe, cristiannan berdadero ta haci esfuerso pa sigui e conseho ei. Nan kier evitá di husga hende a base di impresionnan superficial. Esaki ta prevení nan di ‘papia malu’ di otronan. Nan ta disfrutá di un hermandad internacional cu ta crusa tur frontera nacionalista, étnico i racial dje mundu aki.

Considerá e experencia di Henrique, un brazileño color scur. Siendo e mes un víctima di discriminacion racial, el a desaroyá un odio profundo pa cu hende blancu. E ta splica: “Dos Testigo color cla a bini na mi cas pa papia tocante Dios su nomber. Na promé instante mi no kier a scucha pasobra mi no tabata confia hende blancu. Pero masha lihé mi por a mira cu nan mensahe tabatin e zonido di berdad. Wel, mi a aceptá un studio di Bijbel. E promé pregunta cu mi tabatin tabata, ‘Tin hopi hende pretu den boso misa?’ Nan a contestá, ‘Sí.’ E ora ei nan a mustrá mi e último plachi den e buki Mi buki di relato bíblico,a ilustrando hende yong di diferente rasa. Entre nan tabatin un mucha homber color scur, i esaki a animá mi. Mas despues mi a bishitá e Salon di Reino di Testigonan di Jehova, unda mi a mira hende di diferente rasa cu a trata otro cu respet. Esaki tabata masha importante pa mi.”

Awor, como un Testigo di Jehova, Henrique ta contentu pa pertenecé na un berdadero hermandad cristian. E ta comprendé cu e mérito no ta bai na ningun hende. E ta bisa: “Awe mi ta gradicidu na Jehova i Jesus pa tur loke nan a haci na mi fabor. Mi ta traha cu miyones di Jehova su sirbidornan leal di tur rasa, color i antecedente, uní den un solo propósito.”

Segun cu e tabata creciendo, Dario tabata un otro víctima di prehuicio. Cu 16 aña di edad, el a cuminsá studia Bijbel cu Testigonan di Jehova. El a remarcá: “Entre e Testigonan, mi a ripará cu no tin sintimentu di superioridad racial.” El a keda impresioná cu e atmósfera di amor genuino. Specialmente el a ripará cu individuonan di diferente rasa tabata sirbi den posicionnan di responsabilidad den e congregacion. Ki ora cu hende pafó dje congregacion somet’é na un of otro sorto di prehuicio of discriminacion, Dario ta corda cu Jehova ta stima hende di tur nacion, tribu i lenga.

Con pa Enfrent’é

Nos tur gusta pa ser tratá cu dignidad i respet. P’e motibu ei ora nos ta víctima di prehuicio, esei ta un prueba difícil pa wanta. E congregacion cristian no ta protehá nos contra tur influencia di actitud di prehuicio dje mundu malbado aki. Tanten cu Satanas e Diabel ta controlando asuntunan dje mundu, lo tin inhusticia. (1 Juan 5:19) Revelacion 12:12 ta spierta nos: “Ai di tera i di laman, pasobra e Diabel a baha cerca boso, masha rabiá, sabiendo cu e tin un periodo di tempu corticu.” Su intencion no ta pa djis causa incomodidad. E ta ser compará cu un animal feros. Apostel Pedro ta bisa nos: “Boso adversario, e Diabel, ta cana rond manera un leon cu ta gruña, buscando un hende pa devorá.”—1 Pedro 5:8.

Tambe Bijbel ta bisa nos: “P’esei, someté boso mes na Dios; pero oponé e Diabel, i lo e hui di boso.” (Santiago 4:7) Un yudansa excelente pa enfrentá prehuicio ta di acudí na Dios pa proteccion, manera Rey David a haci: “O mi Dios, percurá escape pa mi for di man dje malbado, for di plant’i man di esun cu ta actua inhustamente i opresivamente.” (Salmo 71:4) Nos por asta haci oracion manera e salmista: “Mustrá mi fabor, O Dios, pasobra hende mortal a busca pa gará mi. Haciendo guera henter dia, e ta sigui oprimí mi.”—Salmo 56:1.

Con Dios lo reaccioná riba oracionnan asina? Bijbel ta contestá: “Lo e libra esun pober cu ta sclama pa yudansa, tambe esun afligí i ken cu no tin yudante. Lo e sinti duele di esun di condicion humilde i di esun pober, i e almanan dje pobernan lo e salba.” (Salmo 72:12, 13) Ki bon pa sa cu n’e debido tempu Jehova lo trece alivio pa tur esnan cu ta víctima di inhusticia!

“Nan Lo No Causa Ningun Daño”

E gobiernunan dje mundu aki tal bes ta sigui combatí prehuicio cu nan leynan i programanan. Tal bes nan ta sigui primintí igualdad i imparcialidad. Pero nan no por logra. (Salmo 146:3) Dios so por i lo eliminá tur trato di prehuicio. Lo e transformá humanidad den un solo famia uní. “Un multitud grandi, cu ningun hende por a conta, for di tur nacion i tribu i pueblo i lenga” lo sobrebibí e fin dje mal sistema aki i disfrutá di biba den pas.—Revelacion 7:9, 10.

Jehova lo deshací di tur daño causá pa prehuicio racial i social. Imaginá bo, ningun hende lo ser tratá inhustamente! “Nan realmente lo sinta, cada un bou di su palu di wijndruif i bou di su palu di figu, i lo no tin ningun hende cu ta haci nan tembla.” (Mikéas 4:4) I Isaías 11:9 ta bisa: “Nan lo no causa ningun daño.”

Si bo ta un víctima di prehuicio awor, e maraviyoso speransa aki pa futuro lo fortalecé bo relacion cu Jehova. Lo e yudá bo wanta e inhusticianan dje sistema malbado aki. Segun cu bo ta lucha cu prehuicio i ta mira padilanti, sigui e conseho sabí di Bijbel: “Tene curashi, i laga boso curason sea fuerte, boso tur cu ta spera riba Jehova.”—Salmo 31:24.

[Nota]

[Rekonosementu pa Potrèt na página 4]

U.S. National Archives photo