Scol di Galad Ta Manda Su di Shen Klas pa Estranheria

E SCOL Bíblico di Galad di Watchtower a hunga un papel importante den e proclamacion global dje Reino di Dios den e tempu actual. For di tempu cu Scol di Galad a cuminsá entrená misionero na 1943, su graduadonan a sirbi den mas cu 200 pais. Dia 2 di mart, 1996, e di shen klas a gradua.

E studiantenan a asistí n’e scol durante un periodo den cua mas cu dos meter di sneu a cai den e área dje Centro Educacional di Watchtower na Patterson, New York. No tabata un sorpresa cu sneu tabata cai riba e dia di nan graduacion. No obstante, e auditorio tabata completamente yená, i salanan yen yen di hende a scucha na Patterson, Wallkill i Brooklyn—2.878 persona na tur.

Theodore Jaracz, miembro dje Comité di Siñansa dje Cuerpo Gobernante, a sirbi como presidente. Despues di un caluroso bon biní n’e invitadonan presente for di hopi pais, el a invitá tur pa lanta para i canta cantica number 52. E auditorio a resoná cu alabansa na Jehova segun cu nan a canta “E Nomber di Nos Tata,” for dje buki Canta Alabanza na Jehova. E cantica ei, combiná cu e comentarionan dje presidente tocante usamentu di educacion pa alabá Jehova, a crea e ambiente p’e programa cu lo a sigui.

Conseho Bíblico for di Hombernan di Edad

E promé parti dje programa a consistí di discursonan breve cu un cantidad di sirbidornan di Jehova di hopi tempu a duna n’e klas cu a gradua. Richard Abrahamson, miembro dje famia di Betel kende a cuminsá su sirbishi di tempu completo na 1940, a insta e klas: “Sigui Ser Reahustá.” El a recordá nan cu ya nan a pasa caba dor di vários periodo di reahuste den nan bida como cristian, incluyendo nan cincu lunanan di educacion na Galad. Pues pakico nan mester sigui ser reahustá?

E orador a splica cu e expresion cu apostel Pablo a usa na 2 Corintionan 13:11 “ta implicá un proceso progresivo, un sumision continuo na Jehova su formacion of refinamentu, un pólishmentu, pa bo cumpli cu e normanan mas exigente di Jehova.” Den nan asignacion den estranheria, e klas cu a gradua lo enfrentá desafionan nobo pa nan fe. Nan lo tin cu siña un idioma nobo, ahustá na un cultura i condicionnan di bida diferente, i adaptá na diferente tipo di teritorio. Tambe nan lo bai trata cu diferente personalidad den nan cas di misionero i den nan congregacion nobo. Si nan aplicá cuidadosamente e principionan di Bijbel na tur e situacionnan aki, cu un disposicion pa ser reahustá, e ora ei, manera apostel Pablo a skirbi, nan tambe por “sigui alegrá.”

John Barr, un dje cincu miembronan dje Cuerpo Gobernante cu tabatin parti den e programa, a saca su tema for di 1 Corintionan 4:9. El a recordá su oyentenan cu cristiannan ta un espectáculo p’e angelnan i pa hende. “Sabiendo esaki,” el a bisa, “ta agregá hopi importancia na un cristian su curso den bida, specialmente ora e realisá cu dor di loke e bisa i haci, e por tin un efecto profundo riba esnan cu ta mirando, no solamente riba observadornan humano sino tambe riba e angelnan. Mi ta kere cu esaki ta algu cu lo ta masha bon pa boso tur corda, rumannan stimá dje di shen klas di Galad, segun cu boso ta bai n’e skinanan di mas leu dje tera.”

Ruman Barr a urgi e 48 studiantenan pa tene na mente, segun cu nan ta yuda hende semehante di carné siña e berdad, cu “goso ta lanta den e angelnan di Dios pa un pecador cu repentí.” (Lucas 15:10) Refiriendo na 1 Corintionan 11:10, el a mustra cu bo actitud relacioná cu areglonan teocrático ta afectá no solamente nos rumannan cu nos ta mira sino tambe e angelnan cu nos no ta mira. Ta ki beneficioso pa tene e punto di bista mas amplio aki na mente!

Un otro miembro dje Cuerpo Gobernante, Gerrit Lösch, e mes siendo un graduado di Scol di Galad, a considerá textonan manera Salmo 125:1, 2; Zacarías 2:4, 5; i Salmo 71:21 pa mustra cu Jehova ta ‘rondoná su pueblo.’ E ta duna nan proteccion for di tur banda. Dios lo duna tal proteccion solamente durante e tribulacion grandi? “No,” e orador a contestá, “pasobra Jehova ta caba un ‘muraya di candela,’ un proteccion pa su pueblo. Na 1919, e aña despues di guera, e resto di Israel spiritual a deseá ansiosamente pa predicá e bon nobo dje Reino rond mundu como un testimonio pa tur nacion. Nan tabata representantenan dje Jerusalem figurativo den shelu. Jehova ta garantisá proteccion divino dje representantenan aki como grupo durante e tempu di fin. Ken realmente anto por stop nan? Ningun hende.” Ki trankilisante esei ta pa nan i pa tur cu ta asociá estrechamente cu nan den hacimentu dje boluntad divino!

Ulysses Glass, e miembro di mas edad cu ta duna les n’e scol, a animá e klas pa ‘caba di traha nan nicho den Jehova su organisacion mundial.’ Un nicho ta un situacion of un actividad specialmente adaptá na un persona su abilidadnan of caracter. “Boso, futuro misioneronan, a haña boso nicho den e organisacion mundial di Testigonan di Jehova,” el a declará. “Pero, pa balioso cu e ta awor, e ta solamente e principio di boso bida como misionero.” Nan lo mester haci esfuerso diligente pa usa nan abilidadnan bon i pa pas den e asignacionnan special cu Jehova i su organisacion tabata dunando nan.

Wallace Liverance, miembro dje facultad di Galad kende a sirbi pa 17 aña na Bolivia, a duna e discurso final den e parti aki dje programa. “Boso lo pone Dios na prueba?” el a puntra e studiantenan. Con nan lo mester haci esei? E nacion di Israel a pone Dios na prueba den e manera incorecto. (Deuteronomio 6:16) “Obviamente, poniendo Dios na prueba dor di keha of murmurá of tal bes dor di mustra un falta di fe den su manera di atendé cosnan ta robes,” e orador a declará. “Ora boso yega den boso asignacion nobo, resistí e inclinacion ei,” el a urgi. Con, anto, ta e manera corecto pa pone Dios na prueba? “Esei ta dor di kere loke e ta bisa, dor di haci exactamente loke e ta bisa, i despues laga e resultado den su man,” Ruman Liverance a splica. Manera nos por mira na Malakías 3:10, Jehova ta invitá su pueblo: “Probá mi, por fabor.” El a primintí cu si nan trece nan diesmo fielmente den e mangasina dje tempel, lo e bendicioná nan. “Pakico no mira boso asignacion como misionero den un manera similar?” e orador a puntra. “Jehova kier pa boso tin éxito den dje, p’esei pon’é na prueba. Pega na boso asignacion. Haci e ahustenan cu e kier pa boso haci. Perseverá. Mira si lo e no bendicioná boso.” Ki un conseho excelente pa tur persona cu ta sirbiendo Jehova!

Despues di un cantica e programa a cambia for di discurso pa un seri deleitabel di entrevistanan.

Expresionnan Práctico for dje Veld

Mark Noumair, miembro nobo dje facultad di Galad, a invitá e studiantenan pa relatá nan experencianan cu nan tabatin den e ministerio di veld segun cu nan tabata asistí n’e scol. Esakinan a resaltá e balor di mustra iniciativa den e ministerio i a duna e auditorio ideanan práctico cu nan por a usa.

Durante nan semester di scol, e studiantenan den e klas di Galad aki a beneficiá specialmente di por a asociá cu miembronan di Comité di Sucursal for di 42 pais, cu tambe tabata n’e Centro Educacional na Patterson pa entrenamentu special. Hopi di nan a gradua for di Galad den añanan anterior. Durante e programa, tabatin entrevista cu representantenan dje klasnan 3, 5, 51 i 92, i tambe for dje Extension di Scol di Galad na Alemania. Ki beneficioso nan comentarionan tabata!

Nan a conta con misioneronan a sinti ora nan a mira e cantidad di alabadornan di Jehova den nan asignacion aumentá for di un man yen te na dies di miles. Nan a conta dje contribucion cu nan a duna pa hiba e bon nobo na casnan leu for di otro den e Cerunan di Andes i na pueblonan n’e fuentenan di Riu Amazona. Nan a papia di dunamentu di testimonio na hende cu no por lesa ni skirbi. Nan a conta di nan propio lucha pa siña idiomanan nobo i kico e graduadonan realísticamente por a spera pa loke ta con lihé nan lo por duna testimonio i discurso den un idioma manera chines. Nan asta a duna demostracion di algun presentacion na spañó i chines. Nan a enfatisá cu misioneronan ta mas eficas ora nan siña no solamente e idioma sino tambe conocé e mentalidad dje pueblo. Nan a papia tocante e frecuente condicionnan severo di bida den paisnan pober i a declará: “Misioneronan mester reconocé cu hopi biaha e situacion aki ta existí pasobra otronan a probechá inhustamente dje pueblo. Un misionero ta haña mihó resultado si e ta sinti mescos cu Jesus—e tabatin duele dje hendenan, kende tabata manera carné sin un wardador.”

Despues di un cantica e programa a continuá cu un discurso na encargo di A. D. Schroeder, miembro dje Cuerpo Gobernante. E tabatin e privilegio di tabata un dje promé instructornan na Scol di Galad ora esaki a habri na 1943. Como un final apropiado n’e programa el a considerá e tema “Aclamando Jehova como Señor Soberano.” E discurso interesantísimo di Ruman Schroeder basá riba Salmo 24 a impresioná tur den auditorio cu simplemente ki un magnífico privilegio e ta pa aclamá Jehova como Señor Soberano.

Despues di partimentu dje diplomanan, i un cantica final, Karl Klein dje Cuerpo Gobernante a concluí cu un oracion di curason. Ki un programa práctico i spiritualmente refrescante esei tabata!

Den e dianan despues dje graduacion, e 48 miembronan dje di 100 klas a cuminsá biaha pa asignacionnan di misionero den 17 pais. Pero nan no tabata solamente cuminsando nan ministerio. Ya caba nan tabatin un registro sólido di ministerio cristian di tempu completo. Ora nan a inscribí na Galad, nan tabatin, como promedio 33 aña di edad i a dedicá mas cu 12 aña n’e ministerio di tempu completo. Algun di nan tabata miembro dje famia global di Betel dje Sociedad Watch Tower. Otronan a sirbi como superintendente biahero. Un cantidad dje studiantenan a participá caba den un of otro forma di sirbishi den estranheria—na Africa, Europa, Sur América, e islanan di laman, i entre e gruponan di idioma straño den nan pais natal. Pero awor nan ta uniendo nan mes cu e hopi otro misioneronan cu tabatin e deleite di por a bisa, ‘Nos lo sirbi unda cu ta den e mundu caminda tin mester di nos.’ Nan deseo sincero ta pa usa nan bida pa engrandecé Jehova.

[Kuadro na página 27]

Estadísticanan dje Klas:

Cantidad di pais representá: 8

Cantidad di pais na cua nan a ser asigná: 17

Cantidad di studiante: 48

Edad promedio: 33.75

Promedio di aña den e berdad: 17.31

Promedio di aña den e ministerio di tempu completo: 12.06

[Plachi na página 26]

E di 100 Klas di Graduadonan dje Scol Bíblico di Galad di Watchtower

Den e lista aki bou, e rijnan ta numerá for di dilanti bai patras, i e nombernan di robes pa drechi den cada rij.

(1) Shirley, M.; Grundström, M.; Genardini, D.; Giaimo, J.; Shood, W.; Phair, P.; Buchanan, C.; Robinson, D. (2) Pine, C.; Kraus, B.; Racicot, T.; Hansen, A.; Beets, T.; Berg, J.; Garcia, N.; Fleming, K. (3) Whinery, L.; Whinery, L.; Harps, C.; Giaimo, C.; Berg, T.; Mann, C.; Berrios, V.; Pfeifer, C. (4) Randall, L.; Genardini, S.; Kraus, H.; Fleming, R.; D’Abadie, S.; Shirley, T.; Stevenson, G.; Buchanan, B. (5) Robinson, T.; Garcia, J.; Harps, P.; Racicot, D.; D’Abadie, F.; Phair, M.; Stevenson, G.; Shood, D. (6) Beets, L.; Pfeifer, A.; Berrios, M.; Pine, J.; Mann, L.; Randall, P.; Grundström, J.; Hansen, G.