‘Boso Mester Ta Santu Pasobra Ami Ta Santu’

“Boso mester resultá di ta santu, pasobra ami Jehova boso Dios ta santu.”—LEVITICO 19:2.

1. Cua ta algun persona cu e mundu ta considerá como santu?

MAYORIA dje religionnan principal di mundu tin esnan cu nan ta considerá santu. E famoso Mama Teresa di India hopi biaha ta ser considerá un santu debí na su dedicacion n’e pobernan. Papa di Roma ta ser yamá “Tata Santu.” Algun católico ta considerá José María Escrivá, fundador dje movementu católico moderno Opus Dei, un “modelo pa santidad.” Hinduismo tin su swaminan, of hombernan santu. Gandhi a ser venerá como un homber santu. Budismo tin su móniknan santu, i islam tin su profeta santu. Pero kico exactamente ta nificá ser santu?

2, 3. (a) Kico e palabranan “santu” i “santidad” ta nificá? (b) Cua ta algun pregunta cu mester ser contestá?

² E palabra “santu” a ser definí como “1. . . . asociá cu un poder divino; sagrado. 2. Mirá cu of digno di adoracion of veneracion . . . 3. Biba segun un sistema estricto of altamente moral i religioso of spiritual . . . 4. Specificá of apartá pa un propósito religioso.” Den e contexto bíblico, santidad ta nificá “limpiesa of puresa religioso; condicion sagrado.” Segun e buki di referencia bíblico Perspicacia para comprender las Escrituras, “e [palabra] hebreo original qoʹdhesh ta transmití e idea di ta separá, exclusivo, of santificá pa Dios, . . . un condicion di ta apartá p’e sirbishi di Dios.”a

³ Dios a manda e nacion di Israel pa nan ta santu. E Ley di Dios a declará: “Ami ta Jehova boso Dios; i boso tin cu santificá boso mes, i boso tin cu resultá di ta santu, pasobra ami ta santu.” Ken tabata e Fuente di santidad? Con e israelitanan imperfecto por a bira santu? I ki les nos por haña pa nos mes awe den Jehova su exigencia pa ta santu?—Levítico 11:44.

Con Israel Tabata Relacioná cu e Fuente di Santidad

4. Con Israel a sirbi como ehempel pa mustra Jehova su santidad?

⁴ Tur cos relacioná cu Israel su adoracion na Jehova Dios mester a ser considerá santu i tratá como tal. Pakico esei tabata asina? Pasobra Jehova mes ta e orígen i fuente di santidad. E relato di Moises dje preparacion dje tabernáculo santu i e furunan i decoracionnan ta concluí cu e palabranan: “Finalmente nan a traha e plachi briyante, e señal santu di dedicacion, di oro puru i nan a inscribí riba dje un inscripcion cu e grabacion di un seyo: ‘Santidad ta pertenecé na Jehova.’” E plachi briyante aki di oro puru a ser pegá n’e tulban dje sumo sacerdote, i esei a nificá cu el a ser apartá pa un sirbishi di santidad special. Segun cu e israelitanan tabata mira e señal inscribí aki briya den lus di solo, nan a ser recordá regularmente di Jehova su santidad.—Exodo 28:36; 29:6; 39:30.

5. Con e israelitanan imperfecto por a ser considerá santu?

⁵ Pero con e israelitanan por a bira santu? Solamente dor di nan relacion íntimo cu Jehova i nan adoracion puru na dje. Nan tabatin mester di conocimentu exacto di “e Santísimo” afin di ador’é cu santidad, cu limpiesa físico i spiritual. (Proverbionan 2:1-6; 9:10) P’esei e israelitanan tabatin cu adorá Dios cu un motibu puru i un curason puru. Cualkier forma hipócrita di adoracion lo tabata repugnante pa Jehova.—Proverbionan 21:27.

Pakico Jehova A Denunciá Israel

6. Con e hudiunan den tempu di Malakías a trata e mesa di Jehova?

⁶ E repugnancia aki a ser ilustrá claramente ora e israelitanan tabata trece na un manera desinteresá sacrificionan inferior i defectuoso n’e tempel. Mediante su profeta Malakías, Jehova a denunciá nan ofrendanan inferior: “‘Mi no tin ningun deleite den boso,’ Jehova di ehércitonan a bisa, ‘i mi no tin placer den e ofrenda di regalo di boso man.’ . . . ‘Pero boso ta profanando mi, ora boso ta bisa, “E mesa di Jehova ta algu contaminá, i su fruta ta algu cu mester ser despreciá, su alimento.” I boso a bisa, “Mira! Ki un cansancio!” i boso a causa cu hende a hala nan nanishi den desprecio p’e,’ Jehova di ehércitonan a bisa. ‘I boso a trece algu rancá, i e coho, i e enfermo; sí, boso a trec’é como regalo. Mi por tin placer den dje na boso man?’ Jehova a bisa.”—Malakías 1:10, 12, 13.

7. Ki accionnan profano e hudiunan a tuma den siglo cincu P.E.C.?

⁷ Dios a usa Malakías pa denunciá e custumbernan falsu dje hudiunan, probablemente durante siglo cincu P.E.C. E sacerdotenan tabata poniendo un mal ehempel, i nan conducta siguramente no tabata santu. E pueblo, cu a sigui e guia ei, no a pega na principionan divino, asta te n’e punto di divorciá di nan esposanan, posiblemente di manera cu nan por a tuma esposanan pagano mas yong. Malakías a skirbi: “‘Jehova mes a duna testimonio entre abo i e esposa di bo hubentud, cu cua bo mes a trata di un manera traicionero,b aunke e ta bo socio i e esposa di bo pacto. . . . I boso tin cu warda boso mes tocante boso spiritu, i no laga ningun hende trata e esposa di bo hubentud di un manera traicionero. Pasobra el a odia un divorcio,’ Jehova e Dios di Israel a bisa.”—Malakías 2:14-16.

8. Con algun ruman den e congregacion cristian a ser afectá p’e punto di bista moderno di divorcio?

⁸ Awendia, den hopi pais unda por obtené divorcio fácilmente, e proporcion di divorcio a subi bastante. Asta e congregacion cristian a ser afectá. En bes di busca yudansa dje ancianonan pa vence obstáculonan i purba pa nan matrimonio tin éxito, algun a divorciá muchu lihé for di nan partner. Hopi biaha e yunan tin cu paga un prijs emocional haltu.—Mateo 19:8, 9.

9, 10. Con nos mester refleccioná riba nos adoracion na Jehova?

⁹ Manera nos a mira anteriormente, en bista dje condicion spiritual deplorabel den tempu di Malakías, Jehova a condená rotundamente e adoracion superficial di Huda i a mustra cu lo e aceptá solamente adoracion puru. Esaki no mester haci nos refleccioná riba e calidad di nos adoracion na Jehova Dios, e Soberano Señor dje universo, e Fuente di berdadero santidad? Nos realmente ta ofreciendo sirbishi santu na Dios? Nos ta mantené nos mes den un condicion spiritualmente limpi?

¹⁰ Esaki no ta nificá cu nos mester ta perfecto, locual ta imposibel, ni cu nos tin cu compará nos mes cu otronan. Pero sí e ta nificá cu cada cristian mester ta rindiendo na Dios adoracion cu ta lo mihó den su circunstancianan personal. Esaki tin di haber cu e calidad di nos adoracion. Nos sirbishi sagrado mester ta lo mihó cu nos por duna—sirbishi santu. Con nos ta logra esei?—Lucas 16:10; Galationan 6:3, 4.

Curason Puru Ta Hiba na Adoracion Puru

11, 12. Di unda conducta profano ta originá?

¹¹ Jesus a siña claramente cu loke un persona ta bisa i ta haci ta revelá loke e tin den su curason. Jesus a bisa e fariseonan cu tabata hustu den nan mes bista, i tog profano: “Yunan di víbora, con boso por papia bon cosnan, miéntras cu boso ta malbado? Pasobra for dje abundancia di curason e boca ta papia.” Mas despues el a mustra cu accionnan malbado ta brota for di mal pensamentunan den e curason, of persona interior. El a bisa: “E cosnan cu ta sali for dje boca ta sali for dje curason, i e cosnan ei ta contaminá hende. Por ehempel, for dje curason ta sali mal razonamentu, matamentu, adulterio, fornicacion, ladronicia, testimonio falsu, blasfemia. Esakinan ta e cosnan cu ta contaminá un hende.”—Mateo 12:34; 15:18-20.

¹² Esaki ta yuda nos comprendé cu accionnan profano no ta djis spontáneo of sin un base previo. Nan ta e resultado di pensamentunan contaminante cu ta drumi warda den e curason—deseonan secreto i kisas fantasianan. P’esei Jesus por a bisa: “Boso a tende cu tabata bisá, ‘Bo no mag cometé adulterio.’ Pero ami ta bisa boso cu ken cu sigui wak un muher afin di tene pasion p’e a cometé adulterio cuné caba den su curason.” Cu otro palabra, fornicacion i adulterio a saca rais caba den e curason promé cu cualkier accion tuma lugá. Despues, den cierto situacion ora e oportunidad presentá, e pensamentunan profano ta bira conducta profano. Fornicacion, adulterio, sodomia, ladronicia, blasfemia i apostasia ta algun dje resultadonan cu ta bira evidente.—Mateo 5:27, 28; Galationan 5:19-21.

13. Cua ta algun ehempel dje manera con pensamentunan profano por hiba na accionnan profano?

¹³ E situacion aki por ser ilustrá den vários manera. Den algun pais, casinonan ta lantando manera ‘paddestoel,’ aumentando asina e oportunidad pa hunga wega di placa. Un persona por ser tentá pa recurí n’e aparente solucion aki pa purba resolvé su problemanan financiero. Razonamentu engañoso por influenciá un ruman pa rechasá of debilitá su principionan bíblico.c Den un otro ehempel, acceso fácil na pornografia, sea ta na television, video, computer of buki, lo por hiba un cristian na conducta profano. E tin cu solamente neglishá su armadura spiritual, i promé cu e sa, el a cai den inmoralidad. Pero den mayoria caso e caimentu den picá ta cuminsá den e mente. Sí, den situacionnan manera esakinan, e palabranan di Santiago ta ser cumplí: “Cada un ta ser probá dor di ser atraí i tentá pa su mes deseo. Anto e deseo, ora e bira fértil, ta duna lus na picá.”—Santiago 1:14, 15; Efesionan 6:11-18.

14. Con hopi persona a recuperá for di nan conducta profano?

¹⁴ Felismente, hopi cristian cu ta cometé picá debí na debilidad ta mustra berdadero repentimentu, i e ancianonan por restorá personanan asina spiritualmente. Asta hopi cu a ser expulsá debí na falta di repentimentu cu tempu ta haña nan sano huicio bek i ta ser reestablecé den e congregacion. Nan ta yega na realisá ki fácilmente Satanas a sorprendé nan ora nan a permití pensamentunan profano saca rais den e curason.—Galationan 6:1; 2 Timoteo 2:24-26; 1 Pedro 5:8, 9.

E Desafio—Enfrentá Nos Debilidadnan

15. (a) Pakico nos tin cu enfrentá nos debilidadnan? (b) Kico por yuda nos reconocé nos debilidadnan?

¹⁵ Nos mester haci un esfuerso pa conocé nos propio curason di un manera obhetivo. Nos ta dispuesto pa enfrentá nos debilidadnan, reconocé nan i caba traha pa vence nan? Nos ta dispuesto pa puntra un amigu franco con nos por mehorá, anto scucha n’e conseho? Pa permanecé santu nos tin cu vence nos faltanan. Pakico? Pasobra Satanas conocé nos debilidadnan. Lo e usa su mañanan sutil pa provocá nos na picá i conducta profano. Dor di su obranan astuto, e ta purba separá nos for dje amor di Dios di manera cu nos no ta santificá i útil mas p’e adoracion di Jehova.—Jeremías 17:9; Efesionan 6:11; Santiago 1:19.

16. Ki conflicto Pablo tabatin?

¹⁶ Apostel Pablo tabatin su propio pruebanan, manera el a declará den su carta n’e romanonan: “Mi sa cu den mi, esta, den mi carni, no ta biba nada bon; pasobra e facultad di deseá ta presente cu mi, pero e facultad di obra loke ta excelente no ta presente. Pasobra e bon cu mi ta deseá mi no ta haci, pero e malu cu mi no ta deseá ta loke mi ta practicá. . . . Realmente mi tin deleite den e ley di Dios segun e homber cu mi ta paden, pero mi ta contemplá den mi miembronan un otro ley cu ta haci guera contra e ley di mi mente i ta hibá mi catibu n’e ley di picá cu ta den mi miembronan.”—Romanonan 7:18-23.

17. Den ki manera Pablo a sali victorioso den su lucha contra debilidadnan?

¹⁷ Awor e punto vital den Pablo su caso ta cu el a reconocé su debilidadnan. Apesar di nan, e por a bisa: “Realmente mi tin deleite den e ley di Dios segun e homber [spiritual] cu mi ta paden.” Pablo a stima loke tabata bon i a odia loke tabata malu. Pero tog e tabatin un lucha, e mésun lucha cu nos tur tin—contra Satanas, e mundu i e carni. Pues con nos por gana e bataya pa permanecé santu, separá for dje mundu aki i su manera di pensa?—2 Corintionan 4:4; Efesionan 6:12.

Con Nos Por Permanecé Santu?

18. Con nos por permanecé santu?

¹⁸ Nos no ta alcansá santidad dor di sigui e caminda di ménos resistencia of dor di ser desenfrená. E clase di persona ei semper lo hustificá su conducta i purba pone e culpa otro caminda. Tal bes nos tin cu siña bira responsabel pa nos accionnan i no ser manera algun cu ta bisa cu antecedente di famia of característicanan hereditario a predestiná nan accionnan. E rais dje asuntu ta sinta den curason dje individuo. E ta stima husticia? ta anhelá pa ser santu? ta deseá e bendicion di Dios? E salmista a mustra claramente riba e necesidad pa ser santu ora el a bisa: “Apartá bo for di loke ta malu i haci loke ta bon; percurá pa haña pas i sigui tras di dje.” Apostel Pablo a skirbi: “Laga boso amor ser sin hipocresia. Odia intensamente loke ta malu, pega na loke ta bon.”—Salmo 34:14; 97:10; Romanonan 12:9.

19, 20. (a) Con nos por fortificá nos mente? (b) Kico studio personal eficas ta enbolbé?

¹⁹ Nos por “pega na loke ta bon” si nos ta mira asuntunan for dje punto di bista di Jehova i si nos tin e mente di Cristo. (1 Corintionan 2:16) Con nos ta logra esaki? Dor di studia i meditá regularmente riba e Palabra di Dios. Cuantu biaha e conseho aki no a ser duná? Pero nos ta tum’é suficiente na serio? Por ehempel, bo realmente ta studia e revista aki, buscando e textonan di Bijbel, promé cu bo bini reunion? Cu studiamentu nos no kier men djis marca liña bou di algun frase den cada paragraf. Bo por pasa riba-riba den un artículo di studio i marca liña den mas o ménos 15 minuut. Esei kier men cu nos a studia e artículo? Realmente, lo por tuma un of dos ora pa studia i absorbá e beneficio spiritual cu cada artículo ta presentá.

²⁰ Tal bes nos tin cu disipliná nos mes pa alehá for dje television pa algun ora tur siman i realmente concentrá riba nos santidad personal. Nos studio regular ta fortificá nos spiritualmente, impulsando e mente pa tuma e decisionnan corecto—decisionnan cu ta hiba na “actonan santu di conducta.”—2 Pedro 3:11; Efesionan 4:23; 5:15, 16.

21. Ki pregunta ta keda pa ser contestá?

²¹ E pregunta awor ta, Den ki áreanan mas di actividad i conducta nos como cristian por ta santu, mescos cu Jehova ta santu? E siguiente artículo lo presentá algun bon punto pa pensa cuidadosamente riba dje.

[Notas]

Bo Ta Corda?

◻ Con e Fuente di santidad a ser identificá den Israel?

◻ Den ki maneranan adoracion israelita tabata profano den tempu di Malakías?

◻ Unda conducta profano ta cuminsá?

◻ Pa ta santu, kico nos mester reconocé?

◻ Con nos por permanecé santu?