Lo Bo Ser Salbá ora Dios Actua?
“Aménos cu e dianan ei ser cortá, ningun carni lo ser salbá; pero pa causa dje scogínan e dianan ei lo ser cortá.”—MATEO 24:22.
1, 2. (a) Pakico ta normal pa ta interesá den nos futuro? (b) Interes natural por tabata enbolbí den ki preguntanan vital?
CUANTU interes bo tin den bo mes? Awe hopi hende ta hiba interes propio na extremonan, siendo egocéntrico. Tog, Bijbel no ta condená interes apropiado den loke ta afectá nos. (Efesionan 5:33) Esei ta incluí ser interesá den nos futuro. Pues lo ta normal cu bo ta deseá na sa kico bo futuro ta encerá. Bo ta interesá den esei?
2 Nos por ta sigur cu Jesus su apostelnan tabatin un interes asina den nan futuro. (Mateo 19:27) Probablemente esei tabata un motibu pa cua nan a haci un pregunta ora cuater di nan tabata cu Jesus riba e Ceru di Olijfi. Nan a puntra: “Na ki tempu e cosnan aki lo ta, i kico lo ta e señal ora tur e cosnan aki ta destiná pa yega na un conclusion?” (Marco 13:4) Jesus no a ignorá interes natural den e futuro—ni nan interes ni di nos. Bes tras bes el a resaltá con futuro sucesonan lo a afectá su siguidornan i kico e resultado final lo tabata.
3. Pakico nos ta relacioná e contesta di Jesus cu nos tempu?
3 Jesus su contesta ta describí un profecia cu un cumplimentu mayor den nos tempu. Nos por mira esaki for dje gueranan mundial i otro conflictonan den nos siglo, e temblornan cu a caba cu un cantidad incontabel di bida, e scarcedadnan di cuminda cu ta trece malesa i morto, i e plaganan—for dje pandemia di griep spañó di 1918 te n’e plaga actual di AIDS. Sin embargo, gran parti di Jesus su contesta tabatin un cumplimentu tambe cu a hiba na i a incluí e destruccion di Jerusalem dor dje romanonan na 70 E.C. Jesus a spierta su disipelnan: “Cuida boso mes; hende lo entregá boso na cortenan local, i boso lo ser sutá den snoanan i lo tin cu para dilanti gobernadornan i reynan pa mi causa, como un testimonio pa nan.”—Marco 13:9.
Loke Jesus A Predicí, i Loke A Sosodé
4. Cua ta algun spiertamentu cu ta incluí den e contesta di Jesus?
4 Jesus no solamente a predicí con otronan lo a trata su disipelnan. Tambe el a alertá nan con nan mes mester a actua. Por ehempel: “Ora boso haña bista dje cos repugnante cu ta causa desolacion pará unda e no mag (laga e lector usa dicernimentu), e ora ei laga esnan den Hudea cuminsá hui p’e cerunan.” (Marco 13:14) E relato paralelo na Lucas 21:20 ta bisa: “Ora boso mira Jerusalem rondoná pa ehércitonan den campamentu.” Con esei a resultá di ta exacto den e promé cumplimentu?
5. Kico a sosodé entre e hudiunan den Hudea na 66 E.C.?
5 The International Standard Bible Encyclopedia (1982) ta bisa nos: “E hudiunan tabata mas i mas inkieto bou dje dominio romano i e funcionarionan romano tabata mas i mas violento, cruel i desonesto. Rebelion abierto a lanta na A.D. 66. . . . E guera a cuminsá ora e zelotenan hudiu a capturá Masada i e ora ei, bou di Menahem, a marcha na Jerusalem. N’e mes momento, hudiunan den e stad dje gobernador di Cesarea a ser masacrá, i noticia dje atrocidad aki a plama rond e pais. Monedanan nobo a ser marcá Aña 1 te Aña 5 dje rebelion.”
6. E rebelion hudiu a producí ki reaccion dje romanonan?
6 E di Diesdos Legion Romano bou di Cesto Gallo a marcha bini for di Siria, a ruiná Galilea i Hudea, i despues a atacá e capital, asta ocupando e seccion mas ariba di “Jerusalem e stad santu.” (Nehemías 11:1; Mateo 4:5; 5:35; 27:53) Resumiendo e desaroyonan, e volúmen The Roman Siege of Jerusalem ta bisa: “Pa cincu dia e romanonan a purba atacá Jerusalem dor di subi su murayanan cu trapi, pero nan a ser strobá cada biaha. A lo largu, e defensornan, dominá dor dje awaceru di misil, a entregá. Formando un testudo—e método di hala cera nan escudonan riba nan cabes pa protehá nan mes—e soldatnan romano a debilitá e muraya i a purba cende e porta dje stad na candela. Un pánico teribel a apoderá dje defensornan.” E cristiannan parti paden dje stad por a corda e palabranan di Jesus i dicerní cu un cos repugnante tabata pará den un lugá santu.a Pero, cu e stad rondoná, con e cristiannan ei por a hui, manera Jesus a consehá?
7. Ora e romanonan tabata cerca di alcansá victoria na 66 E.C., kico nan a haci?
7 E historiador Flavio Josefo ta conta: “Cesto [Gallo], inconciente dje desesperacion di esnan cu a ser sitiá i dje sintimentunan dje hendenan, di ripiente a ordená e soldatnan pa para e atake, a legumai speransa di victoria aunke e no a sufri ningun derota, i actuando contra tur lógica, a retirá for dje Stad.” (The Jewish War, II, 540 [xix, 7]) Pakico Gallo a retirá? Sea cual sea e motibu, su retiro a permití cristiannan obedecé e mandamentu di Jesus i hui bai n’e cerunan i na un lugá sigur.
8. Kico tabata e segundo fase dje esfuerso romano contra Jerusalem, i kico e sobrebibientenan a experenciá?
8 Obedencia a salba nan bida. Pronto e romanonan a bini bek pa aplastá e rebelion. E campaña bou di General Tito a culminá den un sitiamentu di Jerusalem for di april te augustus 70 E.C. Bo curpa ta coge ril ora bo lesa e descripcion di Josefo dje manera con e hudiunan a sufri. Ademas di esnan cu a ser matá batayando contra e romanonan, otro hudiunan a ser matá dor di bandanan rival di hudiu, i sufrimentu di hamber a hiba na canibalismo. P’e tempu dje victoria romano, 1.100.000 hudiu a muri.b Dje 97.000 sobrebibientenan, algun a ser ehecutá mesora; otronan a ser sclabisá. Josefo ta bisa: “Esnan cu tabatin mas cu dieshete aña di edad a ser mará na cadena i mandá pa haci trabou forsá na Egipto, miéntras cu cantidadnan grandi a ser presentá dor di Tito n’e provincianan pa perecé den e teaternan dor di spada of dor di bestia salbahe.” Miéntras cu e proceso aki di determiná nan destino final tabata tuma lugá, 11.000 prizonero a muri di hamber.
9. Pakico e cristiannan no a experenciá e desenlace cu e hudiunan a experenciá, pero ki preguntanan ta keda?
9 Cristiannan por tabata gradicidu cu nan a obedecé e spiertamentu di Señor i a hui for dje stad promé cu e ehército romano a regresá. Asina nan a ser salbá for di un parti di loke Jesus a yama un ‘tribulacion grandi tal como no a sosodé desde principio di mundu te awor, ni lo no sosodé atrobe’ riba Jerusalem. (Mateo 24:21) Jesus a agregá: “Realmente, aménos cu e dianan ei ser cortá, ningun carni lo ser salbá; pero pa causa dje scogínan e dianan ei lo ser cortá.” (Mateo 24:22) Kico esei tabata kier men e tempu ei, i kico e kier men awor aki?
10. Con nos a splica Mateo 24:22 anteriormente?
10 Den pasado nos a splica cu e ‘carni cu lo ser salbá’ a referí n’e hudiunan cu a sobrebibí e tribulacion riba Jerusalem na 70 E.C. E cristiannan a hui, di manera cu Dios por a laga e romanonan trece un destruccion rápido. Cu otro palabra, pa causa dje echo cu e “scogínan” tabata fuera di peliger, e dianan dje tribulacion por a ser cortá, permitiendo algun “carni” hudiu ser salbá. Nos a haña cu e hudiunan cu a sobrebibí a prefigurá esnan cu lo sobrebibí e tribulacion grandi cu ta biniendo den nos tempu.—Revelacion 7:14.
11. Pakico ta parce cu e splicacion di Mateo 24:22 mester ser reconsiderá?
11 Pero e splicacion ei ta cuadra cu loke a sosodé na 70 E.C.? Jesus a bisa cu e “carni” humano lo a ser “salbá” for dje tribulacion. Abo lo usa e palabra “salbá” pa describí e 97.000 sobrebibientenan, en bista dje echo cu miles di nan a muri poco tempu despues di hamber of a ser matá den un teater? Josefo ta bisa tocante un teater na Cesarea: “E cantidad di esnan cu a perecé den combatenan cu bestia salbahe of den bringamentu contra otro of dor di ser kimá bibu a surpasá 2.500.” Aunke nan no a muri den e sitiamentu, nan siguramente no a ser “salbá.” I Jesus lo a considerá nan mescos cu sobrebibientenan felis dje binidero “tribulacion grandi”?
Carni Salbá—Den ki Manera?
12. Ken tabata e “scogínan” di promé siglo den cua Dios a mustra interes?
12 Pa 70 E.C., Dios no a considerá e hudiunan natural mas como su pueblo scogí. Jesus a mustra cu Dios a rechasá e nacion ei i lo a laga su stad capital, tempel i sistema di adoracion yega na un fin. (Mateo 23:37–24:2) Dios a scoge un nacion nobo, Israel spiritual. (Echonan 15:14; Romanonan 2:28, 29; Galationan 6:16) E tabata consistí di homber i muhernan di tur nacion i ungí cu spiritu santu. (Mateo 22:14; Juan 15:19; Echonan 10:1, 2, 34, 35, 44, 45) Algun aña promé cu e atake di Cesto Gallo, Pedro a skirbi na “esnan scogí segun e conocimentu di antemano di Dios e Tata, cu santificacion dor dje spiritu.” E hendenan ei ungí cu spiritu tabata “un rasa scogí, un sacerdocio real, un nacion santu.” (1 Pedro 1:1, 2; 2:9) Dios lo a hiba tal scogínan shelu pa reina cu Jesus.—Colosensenan 1:1, 2; 3:12; Tito 1:1; Revelacion 17:14.
13. Ki sentido e palabranan di Jesus na Mateo 24:22 por tabatin?
13 E identificacion aki dje scogínan ta un bon yudansa, siendo cu Jesus a predicí cu e dianan di tribulacion lo a ser cortá “pa causa dje scogínan.” E palabra griego traducí “pa causa di” tambe por ser traducí “pa motibu di” of “pa . . . motibu.” (Marco 2:27; Juan 12:30; 1 Corintionan 8:11; 9:10, 23; 11:9; 2 Timoteo 2:10; Revelacion 2:3) Di manera cu Jesus por tabata bisando, ‘Aménos cu e dianan ei ser cortá, ningun carni lo ser salbá; pero pa motibu di e scogínan e dianan ei lo ser cortá.’c (Mateo 24:22) A sosodé algu cu a beneficiá e scogínan cristian cerá den Jerusalem of a sosodé algu cu tabata ‘pa motibu di’ nan?
14. Den ki manera “carni” a ser salbá ora e ehército romano a retirá inesperadamente for di Jerusalem na 66 E.C.?
14 Corda cu na 66 E.C., e romanonan a pasa dor dje pais, a ocupá e seccion parti ariba di Jerusalem, i a cuminsá debilitá e muraya. Josefo ta comentá: “Si solamente el a perseverá cu e sitiamentu un poco mas lo el a capturá e Stad mesora.” Puntra bo mes, ‘Pakico e poderoso ehército romano a bandoná e campaña di ripiente i retirá “actuando contra tur lógica” ’? Rupert Furneaux, un specialista den interpretá historia militar, ta comentá: “Ningun historiador a logra duna un bon motibu pa Gallo su decision straño i desastroso.” Sea cual sea e motibu, e efecto tabata cu e tribulacion a ser cortá. E romanonan a retirá, cu e hudiunan atacando nan segun cu nan tabata bai. Kico dje “scogínan” cristian ungí cu tabata cerá den Jerusalem? Ora e sitiamentu a ser kitá, esei a nificá cu nan a ser salbá for di cualkier matansa cu a menasá durante e tribulacion. P’esei, e cristiannan ei cu a beneficiá dje echo cu e tribulacion na 66 E.C. a ser cortá tabata e “carni” cu a ser salbá, mencioná na Mateo 24:22.
Kico Bo Futuro Ta Encerá?
15. Pakico lo bo bisa cu Mateo capítulo 24 mester ta di interes particular den nos dia?
15 Un hende lo por puntra, ‘Pakico mi mester ta specialmente interesá den e comprendimentu mas claro aki di Jesus su palabranan?’ Wel, tin motibu amplio pa concluí cu Jesus su profecia mester a haña un mayor cumplimentu, mas ayá di loke a sosodé te cu i incluyendo 70 E.C.d (Compará cu Mateo 24:7; Lucas 21:10, 11; Revelacion 6:2-8.) Pa décadanan, Testigonan di Jehova a predicá cu e cumplimentu mayor cu ta tumando lugá den nos tempu ta proba cu nos por spera un “tribulacion grandi” na gran escala djis tras di porta. Durante esei, con e palabranan profético na Mateo 24:22 lo ser realisá?
16. Ki detaye animador Revelacion ta duna tocante e binidero tribulacion grandi?
16 Rond di dos década despues dje tribulacion riba Jerusalem, apostel Juan a skirbi e buki di Revelacion. Esei a confirmá cu tin un tribulacion grandi den futuro. I, siendo interesá den loke ta afectá nos personalmente, nos por haña un alivio sabiendo cu Revelacion proféticamente ta sigurá nos cu carni humano lo sobrebibí e binidero tribulacion grandi aki. Juan a profetisá di “un multitud grandi . . . for di tur nacion i tribu i pueblo i lenga.” Ken nan ta? Un bos for di shelu ta contestá: “Esakinan ta esnan cu ta sali for dje tribulacion grandi.” (Revelacion 7:9, 14) Sí, nan lo ta sobrebibientenan! Tambe Revelacion ta duna nos un comprendimentu penetrante den con cosnan lo desaroyá den e binidero tribulacion grandi i con Mateo 24:22 lo ser cumplí.
17. Kico e fase inicial dje tribulacion grandi lo incluí?
17 E fase inicial dje tribulacion aki lo ta un atake riba un prostituta simbólico yamá “Babilonia e Grandi.” (Revelacion 14:8; 17:1, 2) E ta representá e imperio mundial di religion falsu, cu cristiandad como e parti mas reprensibel. Segun e palabranan di Revelacion 17:16-18, Dios lo pone den curason dje elemento político e idea pa atacá e muher di mala bida simbólico aki.e Pensa con e atake por parce p’e “scogínan” ungí di Dios i nan socionan, e “multitud grandi.” Segun cu e atake devastador aki riba religion ta avansá, por parce cu lo e eliminá tur organisacion religioso, incluyendo e pueblo di Jehova.
18. Pakico por parce cu ningun “carni” lo ser salbá atrabes dje promé parti dje tribulacion grandi?
18 Esaki ta e tempu p’e palabranan di Jesus na Mateo 24:22 ser realisá na un escala grandi. Mescos cu e scogínan den Jerusalem a parce di ta den peliger, Jehova su sirbidornan por parce di ta den peliger di ser eliminá durante e atake riba religion, como si fuera e atake ei lo eliminá tur “carni” dje pueblo di Dios. Sin embargo, laga nos corda loke a sosodé aya na 66 E.C. E tribulacion cu e romanonan a causa a ser cortá, dunando e scogínan di Dios amplio oportunidad di scapa i permanecé bibu. Pues, nos por tin confiansa cu e atake destructivo riba religion lo no ser permití pa caba cu e congregacion mundial di adoradornan berdadero. Lo e avansá lihé, como si fuera “den un solo dia.” Sin embargo, di un manera of otro, e atake lo ser cortá, lo e no ser permití pa completá su obhetivo, di manera cu e pueblo di Dios por ser “salbá.”—Revelacion 18:8.
19. (a) Despues dje promé parti dje tribulacion grandi, kico lo ta evidente? (b) Na kico esaki lo hiba?
19 Otro elementonan di Satanas e Diabel su organisacion terenal despues di esei lo continuá pa algun tempu, lamentando cu nan no por trata mas cu nan amante religioso bieu. (Revelacion 18:9-19) Na un dado momento, nan lo ripará cu e berdadero sirbidornan di Dios a keda na existencia, “bibando den siguridad, nan tur bibando sin muraya” i cu a parce di ta víctima fácil. Ki un sorpresa ta warda e atacantenan! Reaccionando riba un berdadero atake of menasa di un atake contra su sirbidornan, Dios lo lanta den huicio contra su enemigunan den e parti final dje tribulacion grandi.—Ezekiel 38:10-12, 14, 18-23.
20. Pakico e segundo fase dje tribulacion grandi lo no pone e pueblo di Dios den peliger?
20 E segundo fase aki dje tribulacion grandi lo ta paralelo cu loke a sosodé cu Jerusalem i su habitantenan den e segundo atake dje romanonan na 70 E.C. Lo e resultá di ta “un tribulacion grandi tal como no a sosodé desde principio di mundu te [n’e tempu ei], no, ni lo no sosodé atrobe.” (Mateo 24:21) Sin embargo, nos por ta sigur cu e scogínan di Dios i nan socionan lo no ta den e zona di peliger, cu rísico di ser matá. Ma, nan lo no tin cu hui na un sitio geográfico. E cristiannan di promé siglo den Jerusalem por a hui for dje stad ei n’e region di ceru, manera Pella n’e otro banda di Jordan. Sin embargo, den futuro, na tur parti di mundu lo tin Testigonan fiel di Dios, pues siguridad i proteccion lo no ta basá riba sitio geográfico.
21. Ken lo ta bringando den e bataya final, i cu ki resultado?
21 E destruccion lo no ta dor di ehércitonan di Roma ni ningun otro agencia humano. Mas bien, e buki di Revelacion ta describí e forsanan di ehecucion como siendo for di shelu. Sí, e parti final ei dje tribulacion grandi lo ser efectuá, no dor di ningun ehército humano, sino dor di “E Palabra di Dios,” e Rey Jesucristo, asistí dor di ‘e ehércitonan cu ta den shelu,’ incluyendo cristiannan ungí resucitá. E “Rey di reynan i Señor di señornan” lo efectuá un ehecucion muchu mas cabal cu e romanonan a efectuá na 70 E.C. Lo e eliminá tur opositor humano di Dios—reynan, comandantenan militar, hende liber i esclabo, chikitu i grandi. Asta organisacionnan humano di Satanas su mundu lo topa nan fin.—Revelacion 2:26, 27; 17:14; 19:11-21; 1 Juan 5:19.
22. Den ki otro sentido “carni” lo ser salbá?
22 Corda cu “carni” di tantu e resto ungí como dje “multitud grandi,” lo a ser salbá caba ora Babilonia e Grandi ta ser destruí rápidamente i completamente den e promé parti dje tribulacion. Di igual manera den e parti final dje tribulacion, “carni” cu a hui n’e banda di Jehova lo ser salbá. Ki un contraste esaki lo forma cu e desenlace p’e hudiunan rebelde na 70 E.C.!
23. Kico “carni” cu ta sobrebibí ta spera cu anhelo?
23 Pensando riba e posibilidadnan pa bo propio futuro i esun di bo stimánan, tuma nota dje promesa na Revelacion 7:16, 17: “Nan lo no tin hamber ni sed mas, ni solo lo no bati nan ni ningun calor kimador, pasobra e Lamchi, cu ta meimei dje trono, lo pastoreá nan, i lo guia nan na fonteinnan di awa di bida. I Dios lo seca tur lágrima di nan wowo.” Siguramente, esei realmente ta nificá ser “salbá” den un sentido maraviyoso i duradero.
[Nota]
a Mira E Toren di Vigilancia di 1 di juni, 1996, página 14-19.
b Josefo ta bisa: “Ora Tito a drenta el a keda asombrá p’e fortalesa dje stad . . . El a sclama na bos haltu: ‘Dios tabata na nos banda; ta Dios a baha e hudiunan for dje fortalesanan aki; pasobra kico man of herment di hende por a haci contra torennan asina?’”
c Interesantemente, e texto di Shem-Tob di Mateo 24:22 ta usa e palabra hebreo ʽa·vurʹ, cu ta nificá “pa motibu di, pa causa di, afin cu.”—Mira e artículo anterior, página 13.
d Mira E Toren di Vigilancia di 15 di februari, 1994, página 11 i 12, i e cuadro na página 14 i 15, cu ta describí den columnanan paralelo e contesta profético di Jesus na Mateo capítulo 24, Marco capítulo 13 i Lucas capítulo 21.
e Mira Revelacion—su gran culminacion ta cerca!, página 235-58, publicá na 1990 dor di Watchtower Bible and Tract Society of New York, Inc.
Con Lo Bo Contestá?
◻ Cua dos fasenan e atake dje ehército romano riba Jerusalem tabatin?
◻ Pakico ta improbabel cu e 97.000 sobrebibientenan hudiu na 70 E.C. a forma e “carni” cu ta ser mencioná na Mateo 24:22?
◻ Den ki manera e dianan dje tribulacion di Jerusalem a ser cortá i den ki manera “carni” a ser salbá asina?
◻ Den e binidero tribulacion grandi, con e dianan lo ser cortá i con “carni” lo ser salbá?
[Plachi na página 16]
Moneda hudiu trahá despues dje rebelion. E letternan hebreo ta bisa “Aña dos,” nificando 67 E.C., e di dos aña di nan autonomia
[Rekonosementu]
Pictorial Archive (Near Eastern History) Est.
[Plachi na página 17]
Moneda romano trahá na 71 E.C. Na man robes tin un romano armá; na man drechi un muher hudiu lamentando. E palabranan “IVDAEA CAPTA” ta nificá “Hudea Cautivo”
[Rekonosementu]
Pictorial Archive (Near Eastern History) Est.