Bibando Segun e Ley di Cristo

“Sigui wanta e carganan di otro, i asina cumpli cu e ley di Cristo.”—GALATIONAN 6:2.

1. Pakico nos por bisa cu e ley di Cristo ta un influencia poderoso pa promové loke ta bon awe?

NA Ruanda, e Testigonan di Jehova hutu i tutsi a risca nan bida pa protehá otro for dje matansa étnico cu recientemente a asotá e pais ei. Testigonan di Jehova na Kobe, Hapon, cu a perde miembronan di famia den e temblor devastador a keda aplastá dor di nan pérdida. Sin embargo, nan a mobilisá mesora pa rescatá otro víctimanan. Sí, ehempelnan conmovedor for di rond mundu ta demostrá cu e ley di Cristo ta na accion awe. E ta un influencia poderoso pa promové loke ta bon.

2. Con cristiandad a faya di capta e sentido dje ley di Cristo, i kico nos por haci pa cumpli cu e ley ei?

² Na mésun tempu, un profecia di Bijbel tocante e “último dianan” crítico aki ta ser cumplí. Hopi hende tin “un forma di debocion piadoso” pero ta “resultá falsu na su poder.” (2 Timoteo 3:1, 5) Specialmente den cristiandad, religion hopi biaha ta un asuntu di formalidad, no di curason. Esei ta pasobra ta demasiado difícil pa biba segun e ley di Cristo? No. Jesus lo no a duna nos un ley cu nos lo no por a sigui. Cristiandad simplemente no a capta e sentido dje ley di Cristo. E no a haci caso dje palabranan inspirá aki: “Sigui wanta e carganan di otro, i asina cumpli cu e ley di Cristo.” (Galationan 6:2) Nos ta “cumpli cu e ley di Cristo” dor di wanta e carganan di otro, no dor di imitá e fariseonan i sin hustificacion aumentá e carganan di nos rumannan.

3. (a) Cua ta algun mandamentu cu ta incluí den e ley di Cristo? (b) Pakico lo ta incorecto pa concluí cu ta solamente e mandamentunan directo di Cristo e congregacion cristian mester tin i ningun otro regla?

³ E ley di Cristo ta incluí tur e mandamentunan di Cristo Jesus—sea esakinan ta predicá i siña, mantené e wowo puru i senciyo, traha pa mantené pas cu nos próhimo, of eliminá impuresa for dje congregacion. (Mateo 5:27-30; 18:15-17; 28:19, 20; Revelacion 2:14-16) En berdad, cristiannan ta obligá pa warda tur mandamentu den Bijbel cu ta ser dirigí n’e siguidornan di Cristo. I tin mas factor. E organisacion di Jehova, i tambe congregacionnan individual, tin cu establecé reglanan i proceduranan necesario pa por mantené ordu. (1 Corintionan 14:33, 40) Sí, cristiannan lo no por ni sikiera reuní huntu si nan no tabatin regla pa loke ta ora, lugá i manera pa tene e reunionnan ei! (Hebreonan 10:24, 25) Cooperacion cu instruccionnan razonabel establecí dor di esnan cu a ricibí autoridad den e organisacion tambe ta un parti di cumpli cu e ley di Cristo.—Hebreonan 13:17.

4. Kico ta e forsa motivador tras di adoracion puru?

⁴ No obstante, cristiannan berdadero no ta permití nan adoracion bira un structura sin nificacion di leynan. Nan no ta sirbi Jehova meramente pa motibu cu un of otro individuo of organisacion ta bisa nan haci esei. Mas bien, e forsa motivador tras di nan adoracion ta amor. Pablo a skirbi: “E amor di Cristo ta obligá nos.” (2 Corintionan 5:14, nota) Jesus a manda su siguidornan pa stima otro. (Juan 15:12, 13) Amor di sacrificio propio ta e base dje ley di Cristo, i e ta obligá of motivá cristiannan berdadero tur caminda, tantu den e famia como den e congregacion. Laga nos mira con.

Den e Famia

5. (a) Con mayornan por cumpli cu e ley di Cristo na cas? (b) Kico yunan mester for di nan mayornan, i ki obstáculonan algun mayor mester vence pa por duna esei?

⁵ Apostel Pablo a skirbi: “Esposonan, sigui stima boso esposanan, mescos cu Cristo tambe a stima e congregacion i a entregá su mes p’e.” (Efesionan 5:25) Ora un esposo ta imitá Cristo i ta trata su esposa cu amor i comprension, e ta cumpli cu un aspecto vital dje ley di Cristo. Ademas, Jesus abiertamente a mustra cariño pa mucha chikitu, tumando nan den su brasanan, poniendo su mannan riba nan i bendicionando nan. (Marco 10:16) Mayornan cu ta cumpli cu e ley di Cristo tambe ta mustra cariño pa nan yunan. Ta cierto cu tin mayornan cu ta haña ta un desafio pa imitá e ehempel di Jesus den esaki. Algun no ta incliná na demostrá nan sintimentunan abiertamente. Mayornan, no laga pensamentu asina stroba boso di mustra boso yunan e amor cu boso ta sinti pa nan! No ta suficiente cu boso sa cu boso ta stima boso yunan. Nan tambe mester sa esei. I nan lo no sa esei aménos cu boso haña maneranan pa demostrá boso amor.—Compará cu Marco 1:11.

6. (a) Yunan tin mester di regla di nan mayornan, i pakico bo ta contestá asina? (b) Ki motibu fundamental pa reglanan di cas yunan tin cu capta? (c) Ki peligernan ta ser evitá ora e ley di Cristo ta prevalecé den e famia?

⁶ N’e mésun tempu, yunan tin mester di límitenan, locual ta nificá cu nan mayornan tin cu pone regla i tin biaha pone e reglanan aki na vigor mediante disiplina. (Hebreonan 12:7, 9, 11) Asta asina, mester yuda yunan progresivamente mira e motibu fundamental p’e reglanan aki: nan mayornan ta stima nan. I nan mester siña cu amor ta e mihó motibu pa nan obedecé nan mayornan. (Efesionan 6:1; Colosensenan 3:20; 1 Juan 5:3) Un mayor dicernidor su meta ta pa siña hóbennan usa nan “facultad di razoná” di manera cu, cu tempu nan lo tuma bon decisionnan riba nan mes. (Romanonan 12:1; compará cu 1 Corintionan 13:11.) Di otro banda, reglanan no mester ta muchu hopi i disiplina no mester ta muchu severo. Pablo ta bisa: “Boso, tatanan, no fada boso yunan pa nan no bira desanimá.” (Colosensenan 3:21; Efesionan 6:4) Ora e ley di Cristo ta prevalecé den e famia, no tin lugá pa disiplina duná cu rabia descontrolá of pa sarcasmo dañino. Den un hogar asina, yunan ta sinti nan sigur i animá, no cargá of abatí.—Compará cu Salmo 36:7.

7. Den ki maneranan casnan di Betel ta duna un ehempel ora ta trata di pone regla na cas?

⁷ Algun cu a bishitá casnan di Betel rond mundu ta bisa cu eseinan ta bon ehempel di balansa den e asuntu di reglanan pa un famia. Aunke casnan di Betel ta consistí di adultonan, e institucionnan ei ta funcioná mescos cu un famia.a E funcionamentu di Betel ta compleho i ta rekerí un cantidad considerabel di reglanan—siguramente mas cu e famia promedio lo rekerí. No obstante, e ancianonan cu ta hiba delantera den casnan di Betel, oficinanan i operacionnan di fábrica ta haci esfuerso pa aplicá e ley di Cristo. Nan ta mir’é como nan asignacion no solamente pa organisá e trabou sino tambe pa promové progreso spiritual i “e goso di Jehova” entre nan co-trahadornan. (Nehemías 8:10) P’esei, nan ta haci esfuerso pa haci cosnan den un manera positivo i animador i pa ta razonabel. (Efesionan 4:31, 32) Nada straño cu famianan di Betel ta conocí pa nan spiritu gososo!

Den e Congregacion

8. (a) Kico mester ta semper nos meta den e congregacion? (b) Tocante ki asuntunan algun a puntra ki regla tin of a purba di traha regla?

⁸ Den e congregacion nos tin e mésun meta pa animá otro den e spiritu di amor. (1 Tesalonicensenan 5:11) Pues tur cristian mester tene cuidou pa no aumentá e carganan di otronan dor di tuma riba nan mes pa imponé nan propio ideanan den cosnan di gustu personal. De bes en cuando, algun ruman ta skirbi e Sociedad Watch Tower puntrando pa regla riba cosnan manera ki punto di bista nan mester tin riba cierto película, buki i asta co’i hunga. Sin embargo, e Sociedad no ta autorisá pa scudriñá cosnan asina i pa publicá opinion riba nan. Den mayoria caso, esakinan ta asuntunan cu cada individuo of cabes di famia mester dicidí, basá riba su amor pa principionan di Bijbel. Otronan tin e tendencia di transformá e sugerencianan i instruccionnan dje Sociedad den reglanan. Por ehempel, den e edicion di E Toren di Vigilancia di 15 di mart, 1996, tabatin un artículo excelente cu a animá ancianonan pa haci bishita di pastoreo regular cerca miembronan di congregacion. E propósito tabata pa establecé reglanan? No. Aunke esnan cu ta capas pa sigui e sugerencianan ta haña hopi beneficio, algun anciano no ta den un posicion pa haci esei. Di igual manera, e artículo “Pregunta di Lector” den e edicion di E Toren di Vigilancia di 1 di april, 1995, a spierta contra baha e balor dje ocasion di bautismo dor di bai te den extremonan, manera haci fiesta descontrolá of organisá celebracionnan. Algun a hiba e conseho maduro aki te na un extremo, asta trahando un regla cu lo ta robes pa manda un tarheta di animacion p’e ocasion aki!

9. Pakico ta importante pa nos evitá di bira demasiado crítico i ser cla pa husga otro?

⁹ Considerá, tambe, cu si “e ley perfecto cu ta pertenecé na libertad” mester prevalecé den nos seno, nos mester aceptá cu no ta tur concenshi cristian ta idéntico. (Santiago 1:25) Nos mester sinti nos molestiá si hende tin preferencianan personal cu no ta violá principionan bíblico? No. Haciendo esei lo causa division. (1 Corintionan 1:10) Ora Pablo a spierta nos contra husga un compañero cristian, el a bisa: “Pa su mes doño e ta para of cai. En berdad, lo e hacié para, pasobra Jehova por hacié para.” (Romanonan 14:4) Nos ta core rísico di desagradá Dios si nos ta papia contra otro riba asuntunan cu nos mester laga n’e concenshi di cada ken.—Santiago 4:10-12.

10. Ken ta asigná pa vigilá e congregacion, i con nos mester apoyá nan?

¹⁰ Laga nos corda, tambe, cu e ancianonan ta asigná pa vigilá e tou di Dios. (Echonan 20:28) Nan t’ei pa yuda. Nos mester sinti nos liber pa acercá nan pa conseho, pasobra nan ta studiante di Bijbel i ta bon na altura di loke a ser tratá den e literatura dje Sociedad Watch Tower. Ora e ancianonan ta mira conducta cu probablemente lo hiba na un violacion di principionan bíblico, sin miedu nan ta ofrecé conseho necesario. (Galationan 6:1) Miembronan di congregacion ta sigui e ley di Cristo dor di cooperá cu e wardadornan stimá aki, cu ta hiba delantera den nan seno.—Hebreonan 13:7.

Ancianonan Ta Aplicá e Ley di Cristo

11. Con ancianonan ta aplicá e ley di Cristo den e congregacion?

¹¹ Ancianonan ta ansioso pa cumpli cu e ley di Cristo den e congregacion. Nan ta hiba delantera den predicá e bon nobo, duna instruccion for di Bijbel afin di alcansá curason i, como wardadornan amoroso i cariñoso, ta papia cu “almanan deprimí.” (1 Tesalonicensenan 5:14) Nan ta evitá e actitudnan no-cristian cu ta existí den asina tantu religion di cristiandad. Ta cierto cu e mundu aki ta degenerando rápidamente, i mescos cu Pablo, ancianonan por sinti ansiedad p’e tou; pero nan ta mantené balansa den atendé cu preocupacionnan asina.—2 Corintionan 11:28.

12. Ora un cristian ta acercá un anciano pa yudansa, con e anciano lo por respondé?

¹² Por ehempel, un cristian por deseá di consultá cu un anciano tocante un asuntu importante cu no ta ser cubrí dor di un of otro referencia bíblico directo of cu ta exigí pa balansá diferente principio cristian cu otro. Tal bes nan a ofrec’é un promocion na trabou cu tin un salario mas haltu pero mayor responsabilidad. Of e tata incrédulo di un cristian hóben por ta exigiendo cosnan di su yu homber cu lo por afectá su ministerio. Den situacionnan asina e anciano ta evitá di duna un opinion personal. Mas bien, probablemente lo e habri Bijbel i yuda e individuo razoná riba e principionan relevante. E por usa e Watch Tower Publications Index, si esei ta disponibel, pa busca kico “e esclabo fiel i discreto” a bisa tocante e tópico den e páginanan di E Toren di Vigilancia i otro publicacionnan. (Mateo 24:45) Kico si e cristian despues di esei tuma un decision cu no ta parce sabí p’e anciano? Si e decision no ta violá directamente principio of leynan di Bijbel, e cristian lo ripará cu e anciano ta reconocé e individuo su derecho pa tuma un decision asina, sabiendo cu “cada un lo hiba su mes carga di responsabilidad.” Sin embargo, e cristian mester corda cu “kico cu un hende sembra, esaki lo e cosechá tambe.”—Galationan 6:5, 7.

13. En bes di duna contesta directo riba preguntanan of duna nan propio opinion, pakico ancianonan ta yuda otronan razoná riba asuntunan?

¹³ Pakico e anciano experenciá ta actua den e manera aki? Pa por lo ménos dos motibu. Na promé lugá, Pablo a bisa un congregacion cu e no tabata ‘doño riba nan fe.’ (2 Corintionan 1:24) Dor di yuda su ruman razoná riba e Scritura i tuma su propio decision basá riba conocimentu, e anciano ta imitando e actitud di Pablo. E ta reconocé cu su autoridad tin límite, mescos cu Jesus a reconocé cu su autoridad tabatin límite. (Lucas 12:13, 14; Hudas 9) N’e mésun tempu, di buena gana ancianonan ta ofrecé conseho bíblico útil, asta fuerte unda ta necesario. Na di dos lugá, e anciano ta entrenando su compañero cristian. Apostel Pablo a bisa: “Cuminda sólido ta pertenecé na hende maduro, na esnan kende mediante uso tin nan facultadnan perceptivo entrená pa distinguí loke ta bon i loke ta malu.” (Hebreonan 5:14) P’esei, pa crece na madures, nos tin cu usa nos propio facultadnan perceptivo, no semper dependiendo riba un otro hende pa duna nos e contestanan. Mustrando su compañero cristian con pa razoná riba e Scritura, den e manera aki e anciano ta yud’é progresá.

14. Con esnan maduro por mustra cu nan ta confia den Jehova?

¹⁴ Nos por tin fe cu Jehova Dios pa medio di su spiritu santu lo influenciá e curason di adoradornan berdadero. Pues, cristiannan maduro ta purba apelá n’e curason di nan rumannan, instando nan, manera apostel Pablo a haci. (2 Corintionan 8:8; 10:1; Filemon 8, 9) Pablo tabata sa cu ta principalmente e inhustunan, no e hustunan, cu mester di leynan detayá pa tene nan den e caminda corecto. (1 Timoteo 1:9) El a expresá, no duda of desconfiansa, sino fe den su rumannan. El a skirbi na un congregacion: “Nos tin confiansa den Señor en cuanto boso.” (2 Tesalonicensenan 3:4) Pablo su fe i confiansa siguramente a contribuí hopi na motivá e cristiannan ei. Ancianonan i superintendentenan biahero awe tin metanan similar. Ki refrescante e hombernan fiel aki ta, segun cu nan amorosamente ta pastoreá e tou di Dios!—Isaías 32:1, 2; 1 Pedro 5:1-3.

Bibando Segun e Ley di Cristo

15. Cua ta algun pregunta cu nos por haci nos mes pa mira si nos ta aplicando e ley di Cristo den nos relacion cu nos rumannan?

¹⁵ Nos tur tin cu examiná nos mes regularmente pa mira si nos ta bibando segun e ley di Cristo i ta promoviend’e. (2 Corintionan 13:5) Realmente, nos tur por saca beneficio dor di puntra: ‘Mi ta gusta edificá of mi ta gusta criticá? Mi ta balansá of mi ta bai den extremo? Mi ta mustra consideracion pa otronan of ta insistí riba mi propio derechonan?’ Un cristian no ta purba dicta ki pasonan su ruman mester, of no mester, tuma den asuntunan cu no ta ser cubrí specíficamente den Bijbel.—Romanonan 12:1; 1 Corintionan 4:6.

16. Con nos por yuda esnan cu tin un punto di bista negativo di nan mes, cumpliendo asina cu un aspecto vital dje ley di Cristo?

¹⁶ Den e tempunan crítico aki, ta importante pa nos busca maneranan pa animá otro. (Hebreonan 10:24, 25; compará cu Mateo 7:1-5.) Ora nos ta mira nos rumannan homber i muher, nan bon cualidadnan no ta nificá muchu mas pa nos cu nan debilidadnan? Pa Jehova, cada un ta precioso. Desafortunadamente, hopi ruman tin un punto di bista negativo di nan mes. Hopi tin tendencia di mira solamente nan mes defectonan i imperfeccionnan personal. Pa animá personanan asina—i otronan—nos por purba papia cu un of dos hende na cada reunion, lagando nan sa pakico nos ta apreciá nan presencia i e aporte importante cu nan ta duna den e congregacion? Ta ki un goso pa aliviá nan carga den e manera aki i asina cumpli cu e ley di Cristo!—Galationan 6:2.

E Ley di Cristo Ta na Accion!

17. Den ki diferente maneranan bo ta mira e ley di Cristo na accion den bo congregacion?

¹⁷ E ley di Cristo ta na accion den e congregacion cristian. Nos ta mir’é diariamente—ora compañeronan Testigo ta compartí ansiosamente e bon nobo, ora nan ta consolá i animá otro, ora nan ta lucha pa sirbi Jehova apesar dje problemanan di mas difícil, ora mayornan ta haci esfuerso pa lanta nan yunan pa stima Jehova cu curason gososo, ora superintendentenan ta siña e Palabra di Dios cu amor i calor, incitando e tou pa tin un celo ardiente pa sirbi Jehova pa semper. (Mateo 28:19, 20; 1 Tesalonicensenan 5:11, 14) Ora nos como individuonan ta pone e ley di Cristo na accion den nos propio bida, cuantu Jehova su curason ta alegrá! (Proverbionan 23:15) E kier pa tur esnan cu ta stima su ley perfecto biba pa semper. Den e binidero Paradijs, nos lo mira un tempu ora humanidad ta perfecto, un tempu ora lo no tin kibrador di ley, i un tempu ora tur inclinacion di nos curason lo ta bou di control. Ki un recompensa glorioso pa biba segun e ley di Cristo!

[Nota]

Kico Bo Ta Pensa?

◻ Pakico cristiandad no a capta e sentido dje ley di Cristo?

◻ Con nos por pone e ley di Cristo na accion den e famia?

◻ Pa aplicá e ley di Cristo den e congregacion, kico nos mester evitá, i kico nos mester haci?

◻ Con ancianonan por obedecé e ley di Cristo den nan trato cu otronan den e congregacion?

[Plachi na página 23]

Bo yu tin un necesidad grandi pa amor

[Plachi na página 24]

Ki refrescante nos wardadornan amoroso ta!