Yunamentu A Bai for di Moda?

“MI TA yuna tur dialuna for di tempu mi ta un tiener,” Mrudulaben, un muher indio próspero di 78 aña di edad, ta bisa. Esaki tabata un parti di su adoracion, un manera pa garantisá cu e tabatin un bon matrimonio i yunan saludabel, i tambe proteccion pa su esposo. Siendo un biuda awor, e ta sigui yuna riba dialuna pa keda salú i p’e prosperidad di su yunan. Mescos cuné, mayoria muher hindú ta haci yunamentu regular un parti di nan bida.

Prakash, un comerciante di edad mediano cu ta biba den un suburbio di Mumbai (Bombay), India, ta bisa cu e ta yuna tur aña riba dialuna di Sawan (Shravan). Esaki ta un luna di importancia religioso special riba e calender hindú. Prakash ta splica: “Mi a cuminsá yuna pa motibunan religioso, pero awor mi ta haña un incentivo adicional pa sigui pa propósitonan di salú. Ya cu Sawan ta bini na fin di monsun [temporada di bientu cu yobida pisá na India], e ta duna mi curpa un chens di limpia su mes di malesanan cu ta presentá den e temporada di awaceru.”

Algun hende ta kere cu yunamentu ta yuda un persona físicamente, mentalmente i spiritualmente. Por ehempel, Grolier International Encyclopedia ta declará: “Investigacion científico recien ta indicá cu yunamentu por ta saludabel i, ora e ser hací cuidadosamente, por promové mayor conciencia i sensibilidad.” Hende ta bisa cu e filósofo griego Plato tabata yuna pa dies dia of mas i cu e matemático Pitágoras tabata pone su studiantenan yuna promé cu e duna nan les.

Pa algun hende, yunamentu ta nificá abstinencia total for di cuminda i awa pa un periodo fiho di tempu, miéntras cu otronan ta tuma líkido durante nan yunamentu. Hopi hende ta considerá salta cierto ora di come of abstené for di un tipo particular di alimento como yunamentu. Pero yunamentu pa un tempu largu sin supervision por ta peligroso. E periodista Parul Sheth ta bisa cu despues cu e curpa caba di usa su suministro di carbohidrato, e ta pasa pa combertí proteina di músculo den glucose i despues ta cuminsá usa e vet dje curpa. Cambiando vet den glucose ta los productonan tóxico yamá elementonan ketona. Segun cu esakinan ta acumulá, nan ta move bai n’e celebro, causando daño n’e sistema central di nervio. “Aki ta ora yunamentu por bira peligroso,” segun Sheth. “Bo por bira turdí, desorientá i otro cos pió. . . . [E por causa] coma i cu tempu morto.”

Un Instrumento i un Ritual

Yunamentu a ser usá como un instrumento poderoso pa finnan político of social. Un persona prominente cu a manehá e arma aki tabata Mohandas K. Gandhi na India. Siendo altamente respetá dor di cientos di miyones di hende, el a usa yunamentu pa ehercé un influencia poderoso riba e pueblo comun hindú di India. Describiendo e resultado di su yunamentu pa resolvé un disputa industrial entre obreronan di fábrica i doñonan di fábrica, Gandhi a bisa: “E resultado final di dje tabata cu un atmósfera di bon boluntad a ser creá cu tur persona enbolbí. E curason dje doñonan di fábrica a ser conmoví . . . E trahadornan a para e welga despues cu mi tabatin tres dia so ta yuna.” Presidente di Sur Africa, Nelson Mandela, a participá den un welga di hamber di cincu dia durante su añanan como prezu político.

Sin embargo, mayoria di esnan cu tin custumber di yuna ta haci esei pa motibunan religioso. Yunamentu ta un ritual prominente den hinduismo. E buki Fast and Festivals of India (Ayuno i Fiestanan di India) ta declará cu riba cierto dianan “nan ta tene un ayuno completo . . . ni un poco awa nan no ta bebe. Tantu hende homber como muher ta tene un ayuno estricto . . . pa garantisá felicidad, prosperidad i pordon di transgresion i picánan.”

Yunamentu ta ser practicá ampliamente den e religion jain. The Sunday Times of India Review ta informá: “Un muni [sabio] jaino na Bombay [Mumbai] a bebe solamente dos glas di awa herebé pa dia—pa 201 dia. El a perde 33 kilo.” Algun asta ta yuna te n’e punto di muri di hamber, convencí cu esaki lo trece salbacion.

Pa adultonan en general cu ta sigui islam, yunamentu ta obligatorio durante e luna di Ramadan. Henter e luna nan no ta come nada ni bebe awa for di ora solo sali te ora e baha. Cualkier hende cu ta malu of di biahe durante e tempu aki mester yuna un otro tempu pa compensá e dianan di yunamentu. Cuaresma, e periodo di 40 dia promé cu Pascu di Resureccion, ta un tempu di yunamentu pa algun hende den cristiandad, i hopi órden religioso ta yuna riba otro dianan specífico.

Yunamentu siguramente no a caba na nada. I ya cu e ta un parti di asina tantu religion, nos por puntra, Dios ta rekerí yunamentu? Tin ocasionnan ora cristiannan por dicidí di yuna? Esaki por ta beneficioso? E siguiente artículo lo considerá e preguntanan aki.

[Plachi na página 3]

E religion jain ta mira yunamentu como un manera pa alcansá salbacion dje alma

[Plachi na página 4]

Mohandas K. Gandhi a usa yunamentu como un instrumento poderoso pa finnan político of social

[Plachi na página 4]

Den islam, yunamentu ta obligatorio durante e luna di Ramadan

[Rekonosementu]

Garo Nalbandian