Laga Tur Glorifica Jehova!

“Den e region di lus nan tin cu glorificá Jehova.”—ISAIAS 24:15.

1. Con Jehova su profetanan a considerá su nomber, na contraste cu ki actitud den cristiandad awe?

JEHOVA—e nomber ilustre di Dios! Cuantu e profetanan fiel di antigwedad a alegrá pa papia den e nomber ei! Cu húbilo nan a glorificá nan Señor Soberano, Jehova, kende su nomber ta identifik’é como e Gran Dios di propósito. (Isaías 40:5; Jeremías 10:6, 10; Ezekiel 36:23) Asta e asina yamá profetanan menor tabata masha expresivo den duna gloria na Jehova. Un di esakinan tabata Ageo. Den e buki di Ageo, cu ta consistí di solamente 38 versículo, Dios su nomber ta ser usá 35 biaha. Profecia asina ta falta vigor ora e nomber precioso Jehova ta ser reemplasá dor dje título “Señor,” manera e apostelnan superfini di cristiandad ta traducié den nan traduccionnan di Bijbel.—Compará cu 2 Corintionan 11:5.

2, 3. (a) Con un profecia remarcabel relacioná cu e restoracion di Israel a ser cumplí? (b) Den ki goso e resto hudiu i nan compañeronan a participá?

² Na Isaías 12:2, dos forma dje nomber ta ser usá.a E profeta ta declará: “Mira! Dios ta mi salbacion. Lo mi confia i no keda den miedu; pasobra Jah Jehova ta mi fortalesa i mi poder, i el a yega di ser e salbacion di mi.” (Mira tambe Isaías 26:4.) Asina ei, rond di 200 aña promé cu Israel su liberacion for di cautiverio na Babilonia, Jah Jehova mediante su profeta Isaías tabata dunando garantia cu e tabata nan Salbador poderoso. E cautiverio ei tabatin cu dura for di 607 te 537 P.E.C. Tambe Isaías a skirbi: “Ami, Jehova, ta haciendo tur cos, . . . Esun cu ta bisa di Ciro, ‘E ta mi wardador, i tur loke mi tin deleite aden lo e cumpli cuné completamente’; asta den loke mi ta bisa di Jerusalem, ‘Lo e ser reconstruí,’ i dje tempel, ‘Lo bo haña bo fundeshi poní.’” Ken tabata e Ciro aki? Remarcablemente, el a resultá di ta Rey Ciro di Persia, kende a conkistá Babilonia na 539 P.E.C.—Isaías 44:24, 28.

³ Na cumplimentu di Jehova su palabranan registrá dor di Isaías, Ciro a emití na Israel cautivo e decreto: “Ken cu tin entre boso di tur su pueblo, laga su Dios resultá di ta cuné. Pues lagu’e subi na Jerusalem, cu ta den Huda, i reconstruí e cas di Jehova e Dios di Israel—e ta e Dios berdadero—cu tabata den Jerusalem.” Un resto hudiu sumamente felis huntu cu e netineonan no-israelita i e yunan dje sirbientenan di Sálomon a bolbe bek na Jerusalem. Nan a yega na tempu pa celebrá e Festival di Cabaña na 537 P.E.C. i haci sacrificio na Jehova na su altar. E siguiente aña, den e di dos luna, nan a pone e fundeshi dje segundo tempel, meimei di gritunan fuerte di goso i alabansa na Jehova.—Esdras 1:1-4; 2:1, 2, 43, 55; 3:1-6, 8, 10-13.

4. Con Isaías capítulo 35 i 55 a bira un realidad?

⁴ Jehova su profecia di restoracion tabatin cu haña un cumplimentu glorioso den Israel: “E desierto i e region secu lo hubilá, i e yanura di desierto lo ta gososo i florecé manera asafran. . . . Lo tin esnan cu lo mira e gloria di Jehova, e splendor di nos Dios.” “Cu alegria boso lo sali, i cu pas boso lo ser trecé paden. E cerunan i e ceritunan mes lo alegrá dilanti boso cu un sclamacion gososo . . . I e tin cu bira pa Jehova algu famoso, un señal te na tempu indefiní cu lo no ser cortá.”—Isaías 35:1, 2; 55:12, 13.

5. Pakico e goso di Israel tabata di corto duracion?

⁵ Sin embargo, e goso ei tabata di corto duracion. Pueblonan bisiña a busca un aliansa mediante union di fe pa construccion dje tempel. Na promé instante e hudiunan no a cede, declarando: “Boso no tin nada di haber cu nos den construccion di un cas pa nos Dios, pasobra nos mes huntu lo construí pa Jehova e Dios di Israel, net manera Rey Ciro e rey di Persia a manda nos.” E nacionnan bisiña ei awor a bira opositornan amargá. Nan “continuamente tabata debilitando e mannan dje pueblo di Huda i desanimando nan pa construí.” Tambe nan a duna informacion falsu tocante e situacion n’e sucesor di Ciro, Artaherhes, kende a emití un prohibicion riba e construccion dje tempel. (Esdras 4:1-24) E trabou a para pa 17 aña. Lamentablemente, e hudiunan a cai den un curso di bida materialista durante e tempu ei.

“Jehova di Ehércitonan” Ta Papia

6. (a) Con Jehova a reaccioná riba e situacion na Israel? (b) Pakico e aparente nificacion dje nomber di Ageo ta apropiado?

⁶ Asina mes, Jehova a desplegá ‘su fortalesa i su poder’ na fabor di Israel mandando profetanan, particularmente Ageo i Zacarías, pa haci e hudiunan conciente di nan responsabilidadnan. E nomber di Ageo tin un conotacion festivo, pasobra aparentemente e ta nificá “Nacé Riba un Festival.” Apropiadamente, el a cuminsá profetisá riba e promé dia dje luna dje Festival di Cabaña, un tempu durante cua e hudiunan mester a “bira nada otro sino gososo.” (Deuteronomio 16:15) Mediante Ageo, Jehova a entregá cuater mensahe durante un periodo di 112 dia.—Ageo 1:1; 2:1, 10, 20.

7. Con e palabranan di introduccion di Ageo mester animá nos?

⁷ Introduciendo su profecia, Ageo a bisa: “Esaki ta loke Jehova di ehércitonan a bisa.” (Ageo 1:2a) Ken e “ehércitonan” ei lo por ta? Nan ta Jehova su multitud di angelnan, na cua Bijbel ta referí algun biaha como forsanan militar. (Job 1:6; 2:1; Salmo 103:20, 21; Mateo 26:53) Esei no ta animá nos awe cu e Señor Soberano Jehova mes ta usando e forsanan celestial invencibel aki pa dirigí nos trabou di restorá adoracion berdadero riba tera?—Compará cu 2 Reynan 6:15-17.

8. Ki punto di bista a afectá Israel, i cu ki resultado?

⁸ Kico tabata e contenido di Ageo su promé mensahe? E pueblo a bisa: “E tempu no a yega, e tempu dje cas di Jehova, pa e ser construí.” E construccion dje tempel, representando e restoracion di adoracion divino, no tabata nan promé preocupacion mas. Nan a cuminsá construí casnan manera palacio pa nan mes. Un punto di bista materialista a mengua nan entusiasmo p’e adoracion di Jehova. Como resultado, el a kita su bendicion. Nan terenonan no tabata fructífero mas, i nan no tabatin suficiente paña p’e friu severo di winter. Nan entradanan a bira poco, i tabata como si fuera nan tabata poniendo placa den un sacu yen di buracu.—Ageo 1:2b-6.

9. Ki amonestacion fuerte i edificante Jehova a duna?

⁹ Dos biaha, Jehova a duna e amonestacion fuerte: “Pone boso curason riba boso camindanan.” Evidentemente, Zorobabel, e gobernador di Jerusalem, i e sumo sacerdote Hosuéb a reaccioná i cu curashi a animá henter e pueblo pa “scucha e bos di Jehova nan Dios, i e palabranan di Ageo e profeta, pues Jehova nan Dios a mand’é; i e pueblo a cuminsá teme debí na Jehova.” Ademas, “Ageo e mensahero di Jehova a pasa na bisa e pueblo segun e comision di mensahero di Jehova, bisando: ‘“Mi ta cu boso,” ta e expresion di Jehova.’”—Ageo 1:5, 7-14.

10. Con Jehova a usa su poder na fabor di Israel?

¹⁰ Algun hende di edad den Jerusalem por a pensa cu e gloria dje tempel reconstruí lo tabata “nada” na comparacion cu esun dje tempel anterior. Sin embargo, rond di 51 dia despues, Jehova a impulsá Ageo pa declará un di dos mensahe. El a proclamá: “‘Sea fuerte, O Zorobabel,’ ta e expresion di Jehova, ‘i sea fuerte, O Hosué, yu di Jehózadak e sumo sacerdote. I sea fuerte, boso tur, hende dje tera,’ ta e expresion di Jehova, ‘i traha. Pasobra mi ta cu boso,’ ta e expresion di Jehova di ehércitonan. . . . ‘No tene miedu.’” Jehova, cu na su debido tempu lo a usa su forsa todopoderoso pa “sagudí shelu i tera,” a percurá pa tur oposicion, asta e prohibicion di Artaherhes riba construccion dje tempel, ser superá. Dentro di cincu aña e construccion dje tempel a ser completá den un manera magnífico.—Ageo 2:3-6.

11. Con Dios a yena e di dos tempel cu un ‘gloria mas grandi’?

¹¹ Un promesa remarcabel a ser cumplí e ora ei: “‘E cosnan deseabel di tur e nacionnan mester drenta paden; i lo mi yena e cas aki cu gloria,’ Jehova di ehércitonan a bisa.” (Ageo 2:7) E “cosnan deseabel” ei a resultá di ta e no-israelitanan cu a bin adorá n’e tempel ei, segun cu el a reflehá e gloria di Jehova su presencia mahestuoso. Con e tempel reconstruí aki tabata na comparacion cu esun construí den tempu di Sálomon? E profeta di Dios a declará: “‘Mas grandi e gloria dje cas mas despues aki lo bira cu esun dje anterior,’ Jehova di ehércitonan a bisa.” (Ageo 2:9) Den e promé cumplimentu dje profecia, e tempel reconstruí a permanecé mas tantu tempu cu e promé cas. E tabata pará ainda ora Mesías a aparecé na 29 E.C. Ademas, promé cu su enemigunan apóstata a mat’é na 33 E.C., Mesías mes a duna gloria n’e tempel ora el a predicá e berdad einan.

12. Ki propósito e dos promé tempelnan a sirbi?

¹² E promé i di dos tempel den Jerusalem a sirbi un propósito vital den prefigurá rasgonan importante dje sirbishi sacerdotal dje Mesías i den mantené e adoracion puru di Jehova bibu riba tera te n’e presencia real dje Mesías.—Hebreonan 10:1.

E Glorioso Tempel Spiritual

13. (a) Ki sucesonan relacioná cu e tempel spiritual a tuma lugá di 29 pa 33 E.C.? (b) Ki papel esencial e sacrificio di rescate di Jesus ta hunga den e desaroyonan aki?

¹³ Ageo su profecia di restoracion tin nificacion special pa tempunan mas despues? Sigur cu sí! E tempel reconstruí den Jerusalem a bira e centro di tur adoracion berdadero riba tera. Pero el a prefigurá un tempel spiritual muchu mas glorioso. Esaki a cuminsá funcioná na 29 E.C. ora, n’e bautismo di Jesus den Riu Jordan, Jehova a ungi Jesus como Sumo Sacerdote, i spiritu santu a baha riba dje manera un palomba. (Mateo 3:16) Despues cu Jesus a completá su ministerio terenal den morto sacrificial, el a ser resucitá na shelu, prefigurá p’e Santísimo dje tempel, i ei el a presentá na Jehova e mérito di su sacrificio. Esaki a sirbi como un rescate, cubriendo e picánan di su disipelnan, i a habri e caminda pa ungi nan, riba e dia di Pentecoste 33 E.C., como subsacerdote den Jehova su tempel spiritual. Nan ministerio fiel te na morto den e patio dje tempel riba tera lo a hiba na un futuro resureccion celestial, pa sigui cu nan sirbishi sacerdotal.

14. (a) Ki goso a compañá e actividad celoso dje congregacion cristian di promé? (b) Pakico e alegria aki tabata di corto duracion?

¹⁴ Miles di hudiu repentí—i despues gentilnan—a basha bai n’e congregacion cristian ei i a participá den declará e bon nobo di Dios su binidero mando di Reino riba tera. Despues di mas o ménos 30 aña, apostel Pablo por a declará cu e bon nobo a ser predicá “den tur creacion cu ta bou di shelu.” (Colosensenan 1:23) Pero despues di morto dje apostelnan, a lanta un gran apostasia i e lus dje berdad a cuminsá paga. Cristianismo berdadero a ser tapá dor dje sectanan di cristiandad, basá riba siñansa i filosofianan pagano.—Echonan 20:29, 30.

15, 16. (a) Con profecia a ser cumplí na 1914? (b) Ki recogementu a marca e cabamentu di siglo 19 i e cuminsamentu di siglo 20?

¹⁵ Siglonan a pasa. Anto den e añanan 1870, un grupo di cristian sincero a cuminsá enbolbé nan den un estudio profundo di Bijbel. For dje Scritura, nan por a señalá aña 1914 como e aña cu ta marca e conclusion di “e tempu señalá dje nacionnan.” Tabata n’e aña ei cu shete “tempu” simbólico (2.520 aña di mando humano semehante na bestia) a terminá cu e entronisacion celestial di Cristo Jesus—Esun cu tin “e derecho legal” como e Rey Mesiánico dje tera. (Lucas 21:24; Daniel 4:25; Ezekiel 21:26, 27) Particularmente for di 1919 padilanti, e Studiantenan di Bijbel aki, conocí awe como Testigonan di Jehova, ta participando den plama vigorosamente na tur parti dje tera e bon nobo dje Reino entrante. Tabata na 1919 cu algun mil Testigo a contestá e yamada na accion cu a ser emití na e congreso na Cedar Point, Ohio, Merca. Nan a aumentá na cantidad te n’e aña 1935 ora 56.153 persona a raportá sirbishi di veld. Den e aña ei, 52.465 a tuma parti dje emblemanan di pan i biña n’e Memorial anual di Jesus su morto, simbolisando asina nan speransa di bira sacerdote cu Cristo Jesus den e parti celestial di Jehova su gran tempel spiritual. Nan lo bai sirbi cuné tambe como rey socio den su Reino Mesiánico.—Lucas 22:29, 30; Romanonan 8:15-17.

¹⁶ Sin embargo, Revelacion 7:4-8 i 14:1-4 ta mustra cu e cantidad total dje cristiannan ungí aki ta limitá na 144.000, di cua hopi a ser recogé durante e promé siglo, promé cu e gran apostasia a lanta. For di fin di siglo 19 i te den siglo 20, Jehova tabata completando e recogementu dje grupo aki cu ta ser limpiá cu e awa di su Palabra, declará hustu pa medio di fe den Jesus su sacrificio expiador, i finalmente seyá como cristiannan ungí pa forma e cantidad completo di 144.000.

17. (a) Ki recogementu ta tumando lugá desde añanan 1930? (b) Pakico Juan 3:30 ta di interes aki? (Mira tambe Lucas 7:28.)

¹⁷ Kico ta sigui ora e cantidad completo di ungínan a ser scogé? Na 1935, na un congreso crucial na Washington, D.C., Merca, nan a duna di conocé cu e “multitud grandi” di Revelacion 7:9-17 tabata un grupo cu mester a ser reconocé “despues” dje recogementu dje resto dje 144.000 i kendenan su destino ta bida eterno den un paradijs riba tera. Despues di a identificá e Jesus ungí claramente, Juan Bautista, kende su resureccion lo ta riba tera como un dje “otro carnénan,” a bisa di Mesías: “Esun ei mester sigui aumentá, pero ami mester sigui mengua.” (Juan 1:29; 3:30; 10:16; Mateo 11:11) E trabou di Juan Bautista di prepará disipel pa Mesías tabata terminando segun cu Jesus e ora ei a tuma over e seleccion di un cantidad aumentante cu lo tabata entre e 144.000. Den añanan 1930 lo contrario a tuma lugá. Ménos hende a ser “yamá i scogí” pa ta entre e 144.000 miéntras cu un tremendo aumento a cuminsá den e cantidad dje “multitud grandi” di “otro carnénan.” E multitud grandi aki ta sigui aumentá segun cu e mundu su sistema malbado ta acercá su fin na Armagedon.—Revelacion 17:14b.

18. (a) Pakico nos por spera cu confiansa cu “miyones di hende na bida awor lo no muri nunca”? (b) Pakico nos mester haci caso di Ageo 2:4 cu entusiasmo?

¹⁸ Na cuminsamentu di añanan ’20, un discurso público special presentá dor di Testigonan di Jehova tabata titulá “Miyones di Hende na Bida Awor Lo No Muri Nunca.” Esaki tal bes a reflehá demasiado optimismo e tempu ei. Pero awe e declaracion ei por ser hací cu pleno confiansa. Tantu e lus aumentante riba profecia di Bijbel i e anarkia dje mundu muribundo aki ta indicá fuertemente cu e fin dje sistema di Satanas ta masha masha cerca! E informe di Memorial pa 1996 ta mustra cu 12.921.933 persona a asistí, di cua solamente 8.757 (0,068 porciento) a indicá di tin speransa celestial dor di tuma parti dje emblemanan. E restoracion di adoracion berdadero ta cerca di ser completá. Pero laga nos nunca floha nos mannan den e trabou ei. Sí, Ageo 2:4 ta declará: “‘Sea fuerte, boso tur, hende dje tera,’ ta e expresion di Jehova, ‘i traha. Pasobra mi ta cu boso,’ ta e expresion di Jehova di ehércitonan.” Laga nos ser determiná pa no laga ningun tendencia di materialismo of di mundu hamas fria nos celo p’e obra di Jehova!—1 Juan 2:15-17.

19. Con nos por participá den e cumplimentu di Ageo 2:6, 7?

¹⁹ Ta nos privilegio gososo pa participá den e cumplimentu actual di Ageo 2:6, 7: “Esaki ta loke Jehova di ehércitonan a bisa, ‘Un biaha mas ainda—ta poco tempu—i mi ta bai sagudí shelu i tera i laman i e suela secu. I lo mi sagudí tur e nacionnan, i e cosnan deseabel di tur e nacionnan mester drenta paden; i lo mi yena e cas aki cu gloria,’ Jehova di ehércitonan a bisa.” Golosidad, corupcion i odio ta na tur parti dje mundu di siglo 20 aki. E ta en berdad den su último dianan, i Jehova ya caba a cuminsá ‘sagudié’ dor di laga su Testigonan ‘proclamá su dia di vengansa.’ (Isaías 61:2) E sagudimentu preliminar aki lo culminá cu e destruccion di mundu na Armagedon, pero promé cu e tempu ei, Jehova ta recogiendo pa su sirbishi “e cosnan deseabel di tur e nacionnan”—e mansunan, hende dje tera semehante na carné. (Juan 6:44) E “multitud grandi” aki awor ta “rindiendo sirbishi sagrado” den e patio terenal di su cas di adoracion.—Revelacion 7:9, 15.

20. Unda nos ta haña e tesoro di mas precioso?

²⁰ Sirbishi den Jehova su tempel spiritual ta trece ganashi mas precioso cu cualkier tesoro material. (Proverbionan 2:1-6; 3:13, 14; Mateo 6:19-21) Ademas, Ageo 2:9 ta declará: “‘Mas grandi e gloria dje cas mas despues aki lo bira cu esun dje anterior,’ Jehova di ehércitonan a bisa. ‘I den e lugá aki lo mi duna pas,’ ta e expresion di Jehova di ehércitonan.” Kico e palabranan aki ta nificá pa nos awe? Nos siguiente artículo lo splica esei.

[Nota]

Preguntanan di Repaso

◻ Ki ehempel dje profetanan nos mester sigui relacioná cu e nomber di Jehova?

◻ Ki animacion nos ta ricibí for di Jehova su mensahe poderoso na Israel restorá?

◻ Ki glorioso tempel spiritual ta funcioná awe?

◻ Ki recogementunan a sigui otro den secuencia durante siglonan 19 i 20, i cu ki gran prospecto na bista?

[Plachinan na página 7]

Ehércitonan celestial di Jehova ta dirigí i ta sostené su Testigonan riba tera