Kico Dios Ta Rekeri di Nos?
“Esaki ta loke e amor di Dios ta nificá, pa nos warda su mandamentunan; i tog su mandamentu no ta un carga pisá.”—1 JUAN 5:3.
1, 2. Pakico no ta un sorpresa cu Dios tin rekisitonan pa esnan cu kier ador’é den un forma aceptabel?
“MI TA contentu cu mi religion!” Esei no ta loke hende ta bisa hopi bes? Sin embargo, bon mirá e pregunta mester ta, “Mi religion ta agradá Dios?” Sí, Dios tin rekisitonan pa esnan cu kier ador’é den un forma aceptabel. Esei mester sorprendé nos? Eigenlijk no. Suponé cu bo ta doño di un bunita cas, unu cu bo a caba di haci hopi gastu pa renobá. Lo bo permití ken cu ta biba den dje? Claro cu no! Cualkier potencial huurdó lo mester cumpli cu bo rekisitonan.
2 Mescos tambe, Jehova Dios a percurá e hogar terenal aki p’e famia humano. Bou dje gobernacion di su Reino, pronto e tera lo ser “renobá”—transformá den un bunita paradijs. Jehova lo realisá esaki. Haciendo un sacrificio grandi, el a duna su Yu unigénito pa haci esaki posibel. Siguramente, Dios mester tin rekisitonan pa esnan cu lo biba ei!—Salmo 115:16; Mateo 6:9, 10; Juan 3:16.
3. Con Sálomon a resumí loke Dios ta spera di nos?
3 Con nos por haña sa kico ta e rekisitonan di Dios? Jehova a inspirá e sabí Rey Sálomon pa resumí loke E ta spera di nos. Despues di a refleccioná riba tur loke el a core tras di dje—incluyendo rikesa, proyectonan di construccion, interesnan musical i amor romántico—Sálomon a yega n’e realisacion aki: “E conclusion dje asuntu, despues di a tende tur cos, ta: Teme e Dios berdadero i warda su mandamentunan. Pasobra esaki ta henter e obligacion di hende.”—Eclesiástes 12:13.
“Su Mandamentunan No Ta un Carga Pisá”
4-6. (a) Kico ta e nificacion literal dje palabra griego traducí como “carga pisá”? (b) Pakico nos por bisa cu e mandamentunan di Dios no ta un carga pisá?
4 “Warda su mandamentunan.” Básicamente, esei ta loke Dios ta spera di nos. Esei ta demasiado p’e pidi di nos? Di ningun manera. Apostel Juan ta bisa nos algu masha trankilisante tocante e mandamentunan, of rekisitonan di Dios. El a skirbi: “Esaki ta loke e amor di Dios ta nificá, pa nos warda su mandamentunan; i tog su mandamentunan no ta un carga pisá.”—1 Juan 5:3.
5 E palabra griego traducí como “carga pisá” literalmente ta nificá “pisá.” E por referí na algu cu ta duru pa cumpli cuné of difícil pa realisá. Na Mateo 23:4, e ta ser usá pa describí e “carganan pisá,” reglanan i tradicionnan cu hende a traha, cu e escriba i fariseonan a pone riba hende. Bo ta capta e sentido di loke Juan, e apostel di edad avansá, ta concluyendo? E mandamentunan di Dios no ta un carga pisá, ni nan no ta muchu difícil pa nos cumpli cu nan. (Compará cu Deuteronomio 30:11.) Al contrario, ora nos ta stima Dios, cumpliendo cu su rekisitonan ta haci nos felis. Esei ta duna nos un oportunidad precioso pa demostrá nos amor pa Jehova.
6 Pa demostrá nos amor pa Dios, nos tin cu sa specíficamente loke e ta spera di nos. Laga nos considerá awor cincu rekisito di Dios. Segun cu nos ta haci esei, tene na mente loke Juan a skirbi: ‘E mandamentunan di Dios no ta un carga pisá.’
Gana Conocimentu di Dios
7. Riba kico nos salbacion ta dependé?
7 E promé rekisito ta pa gana conocimentu di Dios. Considerá e palabranan di Jesus registrá na Juan capítulo 17. E marco di circunstancia tabata e último anochi di Jesus su bida como hende. Jesus a dedicá gran parti dje anochi preparando su apostelnan pa su morto. E tabata preocupá tocante nan futuro, nan futuro eterno. Hisando su wowonan na shelu, el a haci oracion pa nan. Na versículo 3, nos ta lesa: “Esaki ta nificá bida eterno, cu nan ta ganando conocimentu di bo, e único Dios berdadero, i di esun kende bo a manda, Jesucristo.” Sí, nan salbacion a dependé di cu nan ta “ganando conocimentu” di tantu Dios como Cristo. Esei ta aplicá na nos tambe. Pa haña salbacion, nos tin cu gana tal conocimentu.
8. Kico ta nificá ‘gana conocimentu’ di Dios?
8 Kico kier men ‘gana conocimentu’ di Dios? E palabra griego traducí aki como “ganando conocimentu” ta nificá “yega na conocé, reconocé” of “comprendé completamente.” Tuma nota, tambe, cu e traduccion “ganando conocimentu” ta implicá cu esaki ta un proceso continuo. Pues gana conocimentu di Dios ta nificá yega na conoc’é, no superficialmente sino íntimamente, desaroyando un amistad di comprension cuné. Un relacion continuo cu Dios ta duna nos un conocimentu di dje cu ta sigui aumentá. E proceso aki por sigui pa semper, pasobra nunca nos lo yega di siña tur loke tin di sa tocante Jehova.—Romanonan 11:33.
9. Kico nos por siña tocante Jehova for dje buki di creacion?
9 Con nos ta gana conocimentu di Dios? Tin dos buki cu por yuda nos. Un di nan ta e buki di creacion. E cosnan cu Jehova a crea—tantu animá como inanimá—ta duna nos un comprendimentu penetrante dje clase di persona cu e ta. (Romanonan 1:20) Considerá algun ehempel. E boroto di un waterval mahestuoso, e zonido ruidoso dje olanan durante un tempestad, e bista di un shelu yen di strea riba un anochi sin nubia—cosnan asina no ta siña nos cu Jehova ta un Dios “vigoroso den poder”? (Isaías 40:26) Un mucha cu ta hari ora e ta wak un cachó chikitu core tras di su mes rabu of un pushi chikitu hungando cu un bala di lana—esei no ta duna idea cu Jehova, “e Dios felis,” tin un sentido di humor? (1 Timoteo 1:11) E sabor di un cuminda delicioso, e holó agradabel di flornan den un sabana, e colornan bibu di un barbulete delicado, e zonido di paranan cu ta canta den tempu di primavera, e abraso caluroso di un ser kerí—nos no ta dicerní for di cosnan asina cu nos Creador ta un Dios di amor, cu kier pa nos disfrutá di bida?—1 Juan 4:8.
10, 11. (a) Ki cosnan tocante Jehova i su propósitonan nos no por siña for dje buki di creacion? (b) Contesta riba cua preguntanan nos por haña solamente den Bijbel?
10 Sin embargo, tin un límite na loke nos por siña tocante Jehova for di e buki di creacion. Pa ilustrá esaki: Kico ta Dios su nomber? Pakico el a crea e tera i pone hende riba dje? Pakico Dios ta permití maldad? Kico e futuro ta encerá pa nos? Pa contesta riba preguntanan asina, nos mester bai n’e otro buki cu ta comunicá conocimentu di Dios—Bijbel. Den su páginanan, Jehova ta revelá cosnan tocante su mes, incluyendo su nomber, su personalidad i su propósitonan—informacion cu nos no por obtené for di ningun otro fuente.—Exodo 34:6, 7; Salmo 83:18; Amos 3:7.
11 Den e Scritura, Jehova ta comunicá tambe conocimentu vital tocante otro personanan cu nos mester sa di dje. Por ehempel, ken ta Jesucristo, i ki papel e ta hunga den e realisacion di Jehova su propósitonan? (Echonan 4:12) Ken ta Satanas e Diabel? Den ki maneranan e ta engañá hende? Con nos por evitá di ser engañá dor di dje? (1 Pedro 5:8) E contestanan salbador-di-bida riba e preguntanan aki ta ser hañá únicamente den Bijbel.
12. Con lo bo splica pakico no ta un carga pa gana conocimentu di Dios i di su propósitonan?
12 Ta un carga pa gana tal conocimentu di Dios i su propósitonan? Di ningun manera! Bo por corda con bo a sinti ora pa promé bes bo a siña cu Dios su nomber ta Jehova, cu su Reino lo restorá Paradijs riba e tera aki, cu el a duna su Yu stimá como un rescate pa nos picánan, i tambe otro berdadnan precioso? Esei no tabata mescos cu kita un velo di ignorancia i mira cosnan claramente pa promé biaha? Ganando conocimentu di Dios no ta un carga. E ta un deleite!—Salmo 1:1-3; 119:97.
Cumpliendo cu e Normanan di Dios
13, 14. (a) Segun cu nos ta gana conocimentu di Dios, ki cambionan nos tin cu haci den nos bida? (b) Dios ta rekerí pa nos abstené for di ki prácticanan impuru?
13 Segun cu nos ta gana conocimentu di Dios, nos ta realisá cu nos tin cu haci cambionan den nos bida. Esaki ta trece nos n’e di dos rekisito: Nos tin cu cumpli cu e normanan di Dios pa conducta corecto i aceptá su berdad. Kico ta e berdad? Realmente ta importá Dios kico nos ta kere i kico nos ta haci? Ta bisto cu awe hopi hende no ta kere esei. Un informe cu Iglesia di Inglatera a publicá na 1995 a indicá cu no mester mira bibamentu huntu sin casa como picá. “E frase ‘biba den picá’ ta marca un persona cu desonor i no ta yuda mashá,” un obispu di iglesia a declará.
14 Pues, anto, “biba den picá” no ta picá mas? Jehova ta bisa nos cu palabra bon cla con e ta pensa tocante conducta asina. Su Palabra, Bijbel, ta declará: “Laga matrimonio sea onorabel entre tur, i e cama di matrimonio sea sin contaminacion, pasobra Dios lo husga fornicadornan i adúlteronan.” (Hebreonan 13:4) Sex promé cu matrimonio kisas no ta un picá den bista di clero liberal i baidónan di misa, pero e ta un picá serio den bista di Dios! I mescos ta conta pa adulterio, incesto i homosexualidad. (Levítico 18:6; 1 Corintionan 6:9, 10) Dios ta rekerí pa nos abstené di prácticanan asina, cuanan e ta mira como impuru.
15. Con e rekisitonan di Dios ta enbolbé tantu e manera cu nos ta trata otronan como loke nos ta kere?
15 Sin embargo, no ta suficiente pa abstené for di prácticanan cu Dios ta mira como pecaminoso. E rekisitonan di Dios tambe ta enbolbé e manera cu nos ta trata otronan. Den e famia, e ta spera p’e esposo i esposa stima i respetá otro. Dios ta rekerí pa mayornan percurá p’e necesidadnan material, spiritual i emocional di nan yunan. E ta bisa yunan pa ser obediente na nan mayornan. (Proverbionan 22:6; Colosensenan 3:18-21) I kico di nos creencianan? Jehova Dios kier pa nos evitá creencia i custumbernan cu ta bini for di adoracion falsu of cu ta contrario cu e berdad puru cu Bijbel ta siña.—Deuteronomio 18:9-13; 2 Corintionan 6:14-17.
16. Splica pakico no ta un carga pa cumpli cu e normanan di Dios pa conducta corecto i pa aceptá su berdad.
16 Ta un carga pa nos cumpli cu e normanan di Dios pa conducta corecto i pa aceptá su berdad? No ora nos considerá e beneficionan—matrimonionan den cua esposo i esposa ta stima i confia otro en bes di matrimonionan cu ta kibra pa causa di infieldad; hogarnan unda yunan ta sinti nan stimá i kerí dor di nan mayornan en bes di famianan den cua yunan ta sinti cu nan mayornan no ta stima ni deseá nan i ta neglishá nan; un concenshi limpi i bon salú en bes di sintimentunan di culpa i un curpa ruiná dor di AIDS of algun otro malesa transmití sexualmente. Sin duda, Jehova su rekisitonan no ta priva nos di nada cu nos mester pa disfrutá di bida!—Deuteronomio 10:12, 13.
Mustra Respet pa Bida i Sanger
17. Con Jehova ta mira bida i sanger?
17 Segun cu bo ta pone bo bida na armonia cu e normanan di Dios, bo ta yega na apreciá ki precioso bida berdaderamente ta. Laga nos considerá awor un di tres rekisito di Dios. Nos tin cu mustra respet pa bida i sanger. Bida ta sagrado pa Jehova. E mester ta, pasobra Dios ta e Fuente di bida. (Salmo 36:9) Sí, asta bida di un yu cu no a nace ainda i cu ta den barica di su mama ta precioso pa Jehova! (Exodo 21:22, 23) Sanger ta representá bida. P’esei, sanger tambe ta sagrado den bista di Dios. (Levítico 17:14) No mester ta un sorpresa anto cu Dios ta spera di nos pa mira bida i sanger manera é ta mira nan.
18. Kico Jehova su punto di bista di bida i sanger ta rekerí di nos?
18 Kico respet pa bida i sanger ta rekerí di nos? Como cristiannan, nos no ta tuma rísico innecesario cu nos bida djis pa excitacion. Nos ta interesá den siguridad i p’esei ta haci sigur cu nos auto i cas ta den bon condicion. (Deuteronomio 22:8) Nos no ta usa tabaco, kou riba ‘betelnoot,’ of usa droga adictivo of cu ta bruha e mente, pa placer. (2 Corintionan 7:1) Debí cu nos ta obedecé Dios ora e ta bisa pa ‘abstené for di sanger,’ nos no ta permití transfusion di sanger den nos curpa. (Echonan 15:28, 29) Aunke nos ta stima bida, nos lo no purba salba nos bida actual kibrando e ley di Dios i asina peligrá nos prospecto di bida eterno!—Mateo 16:25.
19. Splica con nos ta saca beneficio dor di mustra respet pa bida i sanger.
19 Ta un carga pa nos trata bida i sanger como sagrado? Di ningun manera! Pensa un ratu. Ta un carga pa ta liber di cancer di pulmon causá dor di humamentu di tabaco? Ta un carga pa scapa di adiccion mental i físico na droganan dañino? Ta un carga pa evitá di contraé AIDS, hepatítis of algun otro enfermedad for di un transfusion di sanger? Claramente, e echo cu nos ta evitá hábitonan i custumbernan perhudicial ta pa nos mes bon.—Isaías 48:17.
20. Con un famia a saca beneficio dor cu nan tabatin e punto di bista di Dios tocante bida?
20 Considerá e experencia aki. Algun aña pasá, un señora Testigo cu tabatin rond di tres luna i mei na estado a cuminsá sangra riba un anochi i nan a pura hib’é un hospital. Despues cu un dokter a samin’é, el a tende e dokter bisa un dje verpleegsternan cu nan lo tabatin cu terminá e embaraso. Sabiendo con Jehova ta mira bida di un yu cu no a nace ainda, el e rechasá un aborto firmemente, bisando e dokter: “Si e ta bibu, lagu’é!” E muher a sigui sangra un tiki de bes en cuando, pero vários luna despues el a duna lus prematuramente na un yu homber salú, kende awor tin 17 aña di edad. E señora a splica: “Nos a conta nos yu homber tur esaki, i el a bisa cu e tabata contentu cu e no a ser tirá afó. E sa cu e único motibu pakico e ta na bida ta pasobra nos ta sirbi Jehova!” Sin duda, teniendo e punto di bista di Dios tocante bida no tabata un carga p’e famia aki!
Sirbiendo Huntu cu Jehova Su Pueblo Organisá
21, 22. (a) Jehova ta spera pa nos sirbié huntu cu ken? (b) Con e pueblo organisá di Dios por ser identificá?
21 Nos no ta e úniconan cu ta haci cambionan necesario pa pone nos bida na armonia cu e normanan di Dios. Jehova tin un pueblo aki riba tera, i e ta spera pa nos sirbié huntu cu nan. Esaki ta trece nos na e di cuater rekisito. Nos tin cu sirbi Jehova huntu cu su organisacion dirigí pa spiritu.
22 Pero con e pueblo organisá di Dios por ser identificá? Segun e normanan describí den e Scritura, nan tin berdadero amor entre nan mes, nan tin respet profundo pa Bijbel, nan ta onra e nomber di Dios, nan ta predicá tocante su Reino i nan no ta parti dje mundu malbado aki. (Mateo 6:9; 24:14; Juan 13:34, 35; 17:16, 17) Tin solamente un organisacion religioso riba e tera aki cu tin tur e marcanan aki di berdadero cristianismo—Testigonan di Jehova!
23, 24. Con nos por ilustrá cu no ta un carga pa sirbi Jehova huntu cu su pueblo organisá?
23 Ta un carga pa sirbi Jehova huntu cu su pueblo organisá? Claro cu no! Al contrario, ta un privilegio precioso pa tin e amor i apoyo di un famia mundial di rumannan cristian. (1 Pedro 2:17) Imaginá cu bo ta sobrebibí un naufragio i ta haña bo mes den awa, luchando pa keda riba awa. Ora bo sinti cu bo no por wanta mas, un persona for di un boto salbabida ta saca un man pa bo. Sí, tin otro sobrebibientenan! Den e boto salbabida, abo i e otro personanan ta rema beurt pa beurt bai costa, pikiendo otro sobrebibientenan na caminda.
24 Nos no ta den un situacion similar? Nos a ser sacá for dje “awanan” peligroso dje mundu malbado aki i hincá den e “boto salbabida” di Jehova su organisacion terenal. Den dje, nos ta sirbi lado a lado segun cu nos ta bayendo p’e “costa” di un hustu mundu nobo. Si e presionnan di bida mester pone cu nos ta cansa na caminda, ki gradicidu nos ta p’e yudansa i consuelo di berdadero compañeronan cristian!—Proverbionan 17:17.
25. (a) Ki obligacion nos tin pa cu esnan cu ainda ta den e “awanan” dje mundu malbado aki? (b) Ki rekisito di Dios lo ser considerá den e siguiente artículo?
25 Pero kico di otronan—hende di curason onrado cu ta den “awa” ainda? Nos tin un obligacion di yuda nan drenta e organisacion di Jehova, no ta berdad? (1 Timoteo 2:3, 4) Nan mester di yudansa pa siña loke Dios ta rekerí. Esaki ta trece nos n’e di cincu rekisito di Dios. Nos mester ta proclamadornan leal dje Reino di Dios. Loke esaki ta enbolbé lo ser considerá den e siguiente artículo.
Bo Ta Corda?
◻ Pakico e mandamentunan di Dios no ta un carga pisá?
◻ Den ki manera nos ta gana conocimentu di Dios?
◻ Pakico no ta un carga pa cumpli cu e normanan di Dios pa conducta corecto i aceptá su berdad?
◻ Kico Dios su punto di bista tocante bida i sanger ta rekerí di nos?
◻ Dios ta spera pa nos sirbié huntu cu ken, i con nan por ser identificá?
[Plachinan na página 18]
Nos ta siña tocante Jehova for dje buki di creacion i for di Bijbel
[Rekonosementu]
Crocodil: By courtesy of Australian International Public Relations; oso: Safari-Zoo of Ramat-Gan, Tel Aviv