Bo Ta Come Bon Spiritualmente?

“Un bon dieta ta e necesidad humano di mas básico. . . . Sin suficiente alimento, nos lo muri.”—Food and Nutrition (Alimento i Nutricion).

E BERDAD fundamental ei ta ser ilustrá gráficamente den e curpanan cueru cu wesu di homber, muher i muchanan cu ta sufriendo di hamber, kendenan ta ser nengá e “necesidad humano di mas básico” aki. Otronan te na cierto grado tin alimento, pero ainda nan ta seriamente desnutrí. Sin embargo, hopi cu lo por come bon hopi bes ta contentá nan mes cu junk food cu ta proveé masha poco berdadero nutricion. “Alimento,” segun Healthy Eating (Come Salú), “ta parce di ta un di nos posesionnan mas abusá.”

Mescos ta e caso cu alimento spiritual—e berdad hañá den e Palabra di Dios, e Bijbel. Algun hende ta falta asta e nutricion spiritual di mas básico; nan ta sufriendo di hamber spiritualmente. Otronan simplemente ta neglishá di saca probecho dje alimento spiritual cu tin disponibel. Ki tal di bo? Abo personalmente ta come bon spiritualmente? Of por ta cu bo ta privando bo mes di nutricion spiritual? Ta importante pa nos ta onrado cu nos mes den e asuntu aki pasobra nos tin mester di alimento spiritual asta mas cu nos tin mester di alimento físico.—Mateo 4:4.

Alimento pa Crecementu Spiritual

Food and Nutrition, un buki di instruccion cu ta considerá e importancia di tin un dieta apropiado, ta duna nos tres bon motibu pa come bon. Un ta cu nos tin mester di alimento “pa promové crecementu i pa compensá e deterioro gradual di celnan di curpa.” Bo tabata sa cu cada dia di bo bida, un biyon cel di bo curpa ta stop di funcioná i tin cu ser reemplasá? Bon crecementu i mantencion di curpa ta rekerí bon alimento.

Esei ta cierto tambe den sentido spiritual. Por ehempel, ora apostel Pablo a skirbi e congregacion na Efeso, el a enfatisá con cada cristian tin mester di bon alimento spiritual pa bira “un homber maduro.” (Efesionan 4:11-13) Ora nos ta alimentá nos mes apropiadamente cu alimento spiritual nutritivo, nos no ta manera baby débil mas, incapas di cuida nos mes, birando víctima di tur clase di peliger. (Efesionan 4:14) Mas bien, nos ta crece bira adultonan fuerte, capas di hiba un bataya duru pa e fe debí cu nos ta “alimentá cu e palabranan dje fe.”—1 Timoteo 4:6.

Esei ta cierto di bo? Bo a crece spiritualmente? Of ainda bo ta manera un baby spiritual—vulnerabel, totalmente dependiente di otro hende, i incapas di carga pleno responsabilidad cristian? Ta comprendibel cu poco di nos lo bisa unbes cu nos ta spiritualmente manera un baby, pero ta na su lugá pa haci un examinacion propio franco. Algun cristian ungí tabata manera baby spiritual den e promé siglo. Aunke nan mes lo mester tabata “maestro,” capas i dispuesto na siña otronan loke e Palabra di Dios ta bisa, apostel Pablo a skirbi: “Atrobe boso mester di un hende pa siña boso for di principio e cosnan elemental dje declaracionnan sagrado di Dios; i boso a bira manera hende cu mester di lechi, no cuminda sólido.” Si bo kier crece spiritualmente, cultivá un apetit pa alimento spiritual sólido i bon. No keda contentu cu cuminda spiritual di baby!—Hebreonan 5:12.

Nos tambe tin mester dje alimento spiritual sólido aki pa drecha cualkier daño causá pa pruebanan diario cu nos ta enfrentá den un mundu hostil. Esaki por debilitá nos fortalesa spiritual. Pero Dios por renobá e fortalesa ei. Pablo a bisa: “Nos no ta entregá, pero, maske e hende cu nos ta di pafó ta bai gastando, siguramente e hende cu nos ta di paden ta bai renobando su mes dia tras dia.” (2 Corintionan 4:16) Con nos ta ser ‘renobá dia tras dia’? En parte, dor di alimentá regularmente dje Palabra di Dios dor di studia e Scritura i publicacionnan basá riba Bijbel personalmente i den grupo.

Alimento pa Energia Spiritual

Alimento ta necesario tambe “pa producí cayente i energia.” Alimento ta percurá combustibel pa nos curpa funcioná bon. Si nos ta come malu, nos lo tin tiki energia. Falta di heru den nos dieta, por laga nos sinti cansá i letárgico. Ta asina bo sa sinti tin biaha ora ta trata di actividad spiritual? Bo tin problema pa cumpli cu e debernan cu ta encerá den ta un cristian? Algun persona cu ta profesá di ta siguidor di Jesucristo ta cansa di haci bon, i nan ta falta e resistencia pa haci obranan cristian. (Santiago 2:17, 26) Si bo mira cu esaki ta cierto den bo caso, tal bes e solucion en gran parti ta sinta den mehorá bo dieta spiritual of aumentá bo comementu di alimento spiritual.—Isaías 40:29-31; Galationan 6:9.

No sea gañá pa cultivá mal custumbernan di come spiritual. Un dje engañonan mas grandi cu Satanas a usa atrabes dje siglonan tabata di convencé hende cu nan no tin cu lesa Bijbel i adkerí conocimentu exacto for di dje. E ta usa un táctica masha bieu adoptá dor di ehércitonan invasor pa conkistá stadnan enemigu—priva nan di alimento i laga nan sufri di hamber te ora nan entregá. Pero Satanas a aplicá e táctica aki un paso mas aleu. E ta engañá esnan cu e ta “sitiando” pa di nan mes nan keda sin come, sufriendo asina di hamber, miéntras cu nan ta rondoná dor di un ceru di alimento spiritual saludabel. Nada straño cu asina tantu ta bira víctima di su atakenan!—Efesionan 6:10-18.

Alimento pa Salú Spiritual

Un di tres motibu pakico nos tin mester di alimento, segun Food and Nutrition, ta “pa regulá e salú dje curpa . . . i prevení malesa.” E beneficionan pa salú cu bon alimento ta trece cuné no ta bisto mesora. Ora nos caba di come un bon cuminda, rara bes nos ta pensa, ‘E cumindá aki a beneficiá mi curason (of mi nirnan of mi músculonan, etcétera) mashá.’ Sin embargo, purba biba sin come pa un periodo largu di tempu, i e consecuencianan riba bo salú ta bira bisto. Ki consecuencianan? “E efecto mas comun di malnutricion,” segun un obra di referencia médico, “ta unu negativo: falta di crecementu i desaroyo, falta den resistí infeccion chikitu, falta di energia of iniciativa.” Un clase comparabel di mal salú spiritual a afectá Israel di antigwedad pa un tempu. Profeta Isaías a bisa di nan: “Henter e cabes ta den un estado enfermo, i henter e curason ta swak. For di e plant’i pia te n’e cabes mes no tin un lugá sano den dje.”—Isaías 1:5, 6.

Bon alimento spiritual ta duna nos e poder pa resistí tal debilidad spiritual i e consecuencianan di infeccion spiritual. Conocimentu for di Dios ta yuda mantené nos spiritualmente den un bon condicion—si nos alimentá di dje! Jesucristo a comentá riba con mayoria hende den su tempu no a siña for dje negligencia di nan antepasadonan den e asuntu di alimentacion spiritual apropiado. Nan tambe a nenga di alimentá dje berdadnan cu e tabata siña nan. Cu ki resultado? Jesus a bisa: “E curason dje pueblo aki a bira indispuesto pa ricibí, i cu nan orea nan a tende sin respondé, i nan a cera nan wowo; pa nan nunca mira cu nan wowo i tende cu nan orea i capta e sentido di dje cu nan curason i bolbe, i ami cura nan.” (Mateo 13:15) E mayoria nunca a beneficiá dje poder sanador dje Palabra di Dios. Nan a keda spiritualmente enfermo. Asta algun cristian ungí a bira “débil i enfermiso.” (1 Corintionan 11:30) Ohalá nos nunca mustra desprecio pa e alimento spiritual cu Dios ta percurando.—Salmo 107:20.

Contaminacion Spiritual

Ademas dje menasa di sufri di hamber spiritual, tin un otro peliger cu nos mester ta conciente di dje—e tipo di alimento cu nos ta come riba su mes por ta contaminá. Alimentando di siñansanan infectá cu ideanan demoniaco peligroso por venená nos mes fácilmente cu come alimento físico cu a ser contaminá cu microbio i cosnan tóxico. (Colosensenan 2:8) No ta semper fácil pa identificá cuminda venená. “Cuminda,” segun un autoridad, “tin biaha por parce basta saludabel i tog contené bacteria cu ta desaroyá malesa.” Pues nos ta haci bon di examiná e fuente di nos alimento figurativo, teniendo na mente cu algun literatura, manera bukinan apóstata, por ta infectá cu siñansa i filosofianan no-bíblico cu a ser introducí den nan. Algun productor di alimento asta ta usa etiketnan cu informacion cu ta engañá nan clientenan en cuanto e contenido di nan producto. Siguramente nos por spera cu Satanas, e gran gañador, ta haci mescos. P’esei, haci sigur cu bo ta hañando e alimento figurativo ei for di un fuente confiabel, di manera cu bo ta keda “saludabel den e fe.”—Tito 1:9, 13.

Thomas Adams, un pastor di siglo 17, a bisa di hende den su tempu: “Nan a coba nan graf cu nan djentenan.” Cu otro palabra, loke nan a come a mata nan. Haci sigur cu loke bo ta come spiritualmente no ta matá bo. Busca te ora bo haña bon suministronan di alimento spiritual. “Pakico boso ta sigui paga placa pa loke no ta pan?” Jehova Dios a puntra ora esnan cu a afirmá di ta su pueblo a acudí na maestro i profetanan falsu. “Scuchá mi atentamente, i come loke ta bon, i laga boso alma haña su deleite exkisito den gordura mes. Incliná boso orea i bini na mi. Scucha, i boso alma lo keda na bida.”—Isaías 55:2, 3; compará cu Jeremías 2:8, 13.

Un Abundancia di Alimento Spiritual

Siguramente no tin scarcedad di bon alimento spiritual. Manera Jesucristo a profetisá, awor e tin un clase di esclabo fiel i discreto cu ta ocupá percurando “alimento n’e debido tempu” pa ken cu kier e. (Mateo 24:45) Mediante profeta Isaías, Jehova a primintí: “Mira! Mi mes sirbidornan lo come, pero boso mes lo padecé di hamber. . . . Mi mes sirbidornan lo sclama cu goso debí n’e bon condicion di curason.” De facto, e ta primintí un bankete di cuminda pa esnan cu kier come di dje. “Jehova di ehércitonan siguramente lo prepará pa tur pueblo . . . un bankete di plato cu hopi zeta, un bankete di biña mantené riba cachi-cachi, di plato cu hopi zeta yená cu tuti di wesu.”—Isaías 25:6; 65:13, 14.

Pero, pensa riba esaki: Nos lo por muri di hamber na un bankete! Rondoná pa cuminda, tog nos por resultá di ta seriamente desnutrí si nos no realmente pusha nos mes pa come di dje. Proverbionan 26:15 ta percurá e descripcion literal aki: “Esun floho a sconde su man den e conchi di bankete; el a bira muchu cansá pa hib’é bek na su boca.” Ki un situacion tristu! Nos tambe di igual manera por bira demasiado floho pa haci esfuerso pa tin un studio personal dje Palabra di Dios i di publicacionnan bíblico diseñá pa yuda nos ingerí alimento spiritual. Of nos por bira demasiado cansá pa prepará pa of participá den e reunionnan dje congregacion cristian.

Bon Custumbernan di Come

Nos tin tur motibu, anto, pa desaroyá bon custumbernan di come spiritual. Sin embargo, e realidad ta cu hopi hende ta kiskouw nan alimento spiritual, algun asta no ta come nada mes. Nan por ta manera hendenan cu no ta mira e importancia di un dieta apropiado sino te ora nan sufri e consecuencianan mas despues den bida. Healthy Eating ta duna e motibu aki pakico nos por ta descuidá pa cu nos custumbernan di come, aunke nos sa cu come bon ta esencial pa bida: “E problema ta cu [como consecuencia di mal custumbernan di come] no tin un deterioro rápido di salú, no tin un resultado di ripiente manera sí tin ora bo crusa caminda sin paga tinu. En bes di esei, bo salú por bai atras masha lento i engañosamente, bo por haña infeccionnan mas lihé, wesunan por ta mas frágil, curacion di herida i recuperacion for di malesa por tarda mas.”

Den casonan extremo un persona lo por bira manera un muher hóben cu ta sufri di anorexia nervosa. E ta convencé su mes cu e tin mester di poco cuminda, cu e ta perfectamente bon, apesar dje echo cu físicamente e ta cabando na nada. Al final e ta perde tur deseo pa come. Segun un obra di referencia médico, “E ta un condicion peligroso.” Di con? “Aunke e pashent rara bes ta muri literalmente di hamber e ta bira severamente desnutrí i lo por muri di loke normalmente lo tabata un infeccion chikitu.”

Un muher cristian a admití: “Pa años mi a lucha cu e echo cu mi sa cu mi tin cu prepará regularmente pa reunion i studio personal i tog nunca mi no por a hacié.” Cu tempu el a haci cambionan di manera cu el a bira un bon studiante dje Palabra di Dios, pero solamente ora el a reconocé plenamente con malu su situacion tabata.

Pues, tuma na pechu e conseho cu apostel Pedro a duna. Bira manera “criatura recien nací,” i “desaroyá un anhelo p’e lechi puru cu ta pertenecé n’e palabra, pa mediante dje boso por crece na salbacion.” (1 Pedro 2:2) Sí, “desaroyá un anhelo”—cultivá un deseo fuerte—pa yena bo mente i curason cu e conocimentu di Dios. Adultonan spiritual tambe tin cu sigui fomentá e anhelo ei. No laga alimento spiritual bira ‘un di bo posesionnan mas abusá.’ Come bon spiritualmente, i beneficiá plenamente di tur e “palabranan saludabel” hañá den e Palabra di Dios, e Bijbel.—2 Timoteo 1:13, 14.

[Plachi na página 28]

Bo tin cu mehorá bo dieta?