Bo Ta Kere den Reencarnacion?

“BO TA corda e mucha muher bisiña cu bo tabata enamorá di dje ora bo tabata creciendo aki na India?” Mukundbhai a skirbi su yu homber, un studiante di universidad na Merca. “E ta bai casa aki un par di siman. Mi ta haña cu bo mester sa.”

Pakico e tata a compartí e noticia aki cu su yu? Al fin i al cabo, Mukundbhai a pone un fin abrupto n’e enamoracion di tiener ei añanan pasá. Ademas, e yu tabatin seis aña na Merca ta studia na universidad. E no tabatin contacto cu e mucha muher durante e tempo ei, i Mukundbhai tabata sa esei.

Pakico, anto, e preocupacion? Mukundbhai tabata preocupá pasobra e tabata kere den reencarnacion, of renacementu.a Si pa casualidad e atraccion di mucha entre nan dos tabata debí cu nan dos tabata casa den un bida anterior, lo tabata cruel pa tene nan separá awor cu nan tabatin edad di casa. Mukundbhai solamente kier a haci su yu conciente dje situacion promé cu e mucha muher bira esposa di un otro hende den e bida aki.

Considerá un otro caso. Un mucha muher di cuater aña tabatin vários estadia agonisante den un hospital na Mumbai, India. Su problema tabata un klep defectuoso den su curason. Su mayornan bon pará no por a soportá di mira e yu sufri. Pero nan a razoná: “Nos tin cu aceptá e echo cu nos tin un yu cu ta malu. Lo e mester a haci algo den su bida anterior pa merecé esaki.”

Creencia den reencarnacion ta hunga un papel importante den bida di miyones di hende den hinduismo, budismo, jainismo, sikismo i otro religionnan cu ta originá na India. Experencianan den bida—for di enamoracion te na sufrimentu intenso—ta ser considerá como consecuencia di echonan cometé den un of mas bida anterior.

Hopi hende den paisnan occidental tambe ta fasiná cu e doctrina di reencarnacion. E actris americano Shirley MacLaine ta bisa cu e ta kere den dje. E escritor Laurel Phelan di Vancouver, British Columbia, Cánada, ta pretendé di tin recuerdonan di 50 bida anterior. Den un encuesta cu e organisacion Gallup a conducí na 1994 pa CNN/USA Today, mas cu 270 di 1.016 adulto entrevistá a bisa cu nan ta kere den reencarnacion. Creencia den reencarnacion ta tambe un parti dje movementu Era Nobo. Pero ki evidencia ta apoya e creencia aki?

“Recuerdonan di un bida anterior!” creyentenan den reencarnacion ta contesta. Consecuentemente, ora Ratana di tres aña di edad na Bangkok a cuminsá haña “recuerdonan di su bida anterior como un muher religioso cu a muri na edad di 60 i picu aña,” mayoria observadó a aceptá su caso como prueba válido di reencarnacion.

Sin embargo, tin hopi skepticismo. I otro splicacionnan di recuerdonan cu ta ser atribuí na un bida anterior ta posibel.b Den su buki Hinduism: Its Meaning for the Liberation of the Spirit, filósofo hindú Nikhilananda ta bisa cu “no por proba experencianan despues di morto cu inteligencia.” Tog e ta afirmá cu “e doctrina di renacementu ta mas probabel cu improbabel.”

Pero Bijbel ta apoyá e siñansa aki? I ki speransa p’e mortonan e Palabra inspirá di Dios ta ofrecé?

[Nota]

[Plachi na página 4]

E ta ricibiendo castigu pa picánan cu el a cometé den un bida anterior?