“Jehova Lo No Bandona Su Pueblo”

“Hopi ta e calamidadnan di esun hustu, pero for di nan tur Jehova ta libr’é.”—SALMO 34:19.

1, 2. (a) Con Jehova ta bendicionando su pueblo awe? (b) Kico hopi cristian ta enfrentá, i ki preguntanan ta lanta?

CUMPLIENDO cu profecia bíblico, Jehova su adoradónan ta biba den un paradijs spiritual. (2 Corintionan 12:1-4) Testigonan di Jehova ta pertenecé na un asociacion internacional caracterisá pa amor i unidad. (Juan 13:35) Nan tin un conocimentu profundo i extenso di e berdadnan di Bijbel. (Isaías 54:13) Ki gradicidu nan ta na Jehova cu e ta otorgando nan e privilegio di ser huésped den su tent spiritual!—Salmo 15:1.

² Aunke tur persona den e organisacion di Jehova ta disfrutá di prosperidad spiritual, algun ta parce di biba den un pas i trankilidad relativo miéntras cu otronan ta experenciá un of otro sorto di afliccion. Hopi cristian ta haña nan mes den un situacion lamentabel pa periodonan largu di tempu i sin ningun alivio na bista. Ta natural pa sintí bo desanimá bou di circunstancianan asina. (Proverbionan 13:12) Calamidadnan ta evidencia di Dios su desaprobacion? Jehova ta dunando proteccion special na algun cristian miéntras cu e ta bandoná otronan?

3. (a) Jehova ta responsabel p’e adversidadnan cu su pueblo ta experenciá? (b) Pakico asta fiel adoradónan di Jehova ta experenciá sufrimentu humano?

³ Bijbel ta contestá: “Ora hende ta bou di prueba, laga nan no bisa: ‘Dios ta someté mi na prueba.’ Pasobra cu cos malu Dios no por ser sometí na prueba, ni e mes no ta someté ningun hende na prueba.” (Santiago 1:13) Jehova ta e Protector i Sostenedor di su pueblo. (Salmo 91:2-6) “Jehova lo no bandoná su pueblo.” (Salmo 94:14) Esaki no ta nificá cu adoradónan fiel lo no experenciá sufrimentu. E mundu su sistema di cosnan actual ta ser goberná dor di individuonan cu ta imperfecto di naturalesa. Hopi ta corupto, i algun ta completamente malbado. Ningun di nan ta acudí na Jehova pa sabiduria. Esaki ta resultá den hopi sufrimentu humano. Bijbel ta declará claramente cu Jehova su pueblo no semper por evitá e consecuencianan tristu di imperfeccion humano i maldad.—Echonan 14:22.

Cristiannan Leal Ta Verwagt Sufrimentu

4. Kico tur cristian por spera tanten cu nan ta biba den e sistema di cosnan malbado aki, i pakico?

⁴ Aunke Jesus su siguidónan no ta parti di mundu, nan ta biba meimei dje sistema di cosnan aki. (Juan 17:15, 16) Satanas ta ser exponé den Bijbel como e forsa dominante tras dje mundu aki. (1 Juan 5:19) P’esei, tardi of trempan tur cristian por spera di tin cu enfrentá problemanan serio. Cu esei na mente, apostel Pedro ta bisa: “Mantené boso sano huicio, sea vigilante. Boso adversario, e Diabel, ta cana rond manera un leon cu ta gruña, buscando un hende pa devorá. Pero tuma boso posicion contra dje, sólido den fe, sabiendo cu e mésun cosnan en cuanto sufrimentu ta ser realisá den henter e asociacion di boso rumannan den e mundu.” (1 Pedro 5:8, 9) Sí, henter e asociacion di cristiannan por spera sufrimentu.

5. Con Jesus a splica claramente cu fiel cristiannan lo experenciá cosnan penoso den bida?

⁵ Asta si nos ta stima Jehova profundamente i ta leal na su principionan, nos lo experenciá cosnan penoso den bida. Jesus a splica esaki claramente den su ilustracion registrá na Mateo 7:24-27, unda el a pinta un contraste entre esnan cu ta obedecé su palabranan i esnan cu no ta obedecé nan. El a compará disipelnan obediente cu un homber discreto cu ta construí un cas riba un baranca sólido. Esnan cu no ta obedecé su palabranan el a compará cu un homber bobo cu ta construí su cas riba santu. Despues di un tormenta severo, solamente e cas construí riba baranca ta sobrebibí. Ripará cu den e caso dje cas dje homber discreto, “awaceru a basha i inundacionnan a bini i e bientunan a supla i a suta contra e cas ei, pero e no a basha den otro.” Jesus no a primintí cu e homber discreto semper lo a disfrutá di pas i trankilidad. Mas bien, e discrecion dje homber ei lo a prepar’é pa wanta e tormenta. Un pensamentu similar ta ser transmití den e ilustracion dje sembradó. Den dje Jesus ta splica cu asta adoradónan obediente “cu un curason excelente i bon” lo “duna fruta cu awante.”—Lucas 8:4-15.

6. Den Pablo su ilustracion di materialnan cu ta resistí candela, ken ta pasa den prueba severo?

⁶ Skirbiendo n’e corintionan, apostel Pablo a usa idioma figurativo pa ilustrá e necesidad pa cualidadnan duradero cu por yuda nos enfrentá prueba. Materialnan cu ta resistí candela manera oro, plata i piedranan precioso ta corespondé cu cualidadnan divino. (Compará cu Proverbionan 3:13-15; 1 Pedro 1:6, 7.) Di otro banda, característicanan carnal ta ser compará cu materialnan cu ta kima lihé. Anto Pablo ta bisa: “E obra di cada un lo keda manifestá, pasobra e dia lo sak’é na cla, pasobra lo e ser revelá pa medio di candela; i e candela mes lo duna prueba di ki clase e obra di cada un ta. Si e obra di un persona, obra cu el a construí riba dje, permanecé, lo e ricibí un recompensa.” (1 Corintionan 3:10-14) Aki atrobe, Bijbel ta splica cu ningun di nos lo scapa di enfrentá un of otro forma di prueba severo.

7. Segun Romanonan 15:4, con e Scritura por yuda nos wanta prueba?

⁷ Tin numeroso relato den Bijbel di sirbidónan leal di Dios cu tabatin cu wanta calamidadnan, algun biaha pa periodonan largu. Tog, Jehova no a bandoná nan. Probablemente apostel Pablo tabatin ehempelnan asina na mente ora el a bisa: “Tur loke a ser skirbí den tempu pasá a ser skirbí pa nos instruccion, pa mediante nos awante i mediante e consuelo for dje Scritura nos por tin speransa.” (Romanonan 15:4) Considerá e ehempelnan di tres homber cu, aunke nan tabatin un relacion íntimo cu Dios, a sufri hopi calamidad.

Loke Nos Ta Siña for di Relatonan Bíblico

8. Kico Jehova a permití den e caso di Josef, i pa cuantu tempu?

⁸ Jehova a faborecé Josef, yu di Jacob, for di un edad yong. Sin embargo, sin cu tabata su falta, el a sufri di un seri di calamidad. El a ser secuestrá i tratá cruelmente dor di su propio rumannan. El a ser bendí como esclabo den un pais stranhero unda el a ser acusá falsamente i poné den un “buracu di prizon.” (Génesis 40:15) Ei, “cu cadena nan a afligí su pianan, den heru su alma a drenta.” (Salmo 105:17, 18) Durante su sclabitud i encarcelacion, sin duda Josef a roga Jehova bes tras bes pa un liberacion. Tog, pa mas o ménos 13 aña, aunke Jehova a fortalec’é den vários manera, el a lanta tur mainta ainda como esclabo of prezu.—Génesis 37:2; 41:46.

9. Kico David tabatin cu wanta pa vários aña?

⁹ Un caso similar ta esun di David. Ora Jehova tabata selectando un homber cualificá pa goberná Israel, el a bisa: “Mi a haña David e yu di Jese, un homber agradabel pa mi curason.” (Echonan 13:22) Apesar di su posicion faborecí den bista di Jehova, David a sufri masha tantu. Den peliger di morto, el a sconde pa vários aña den e desierto, den cueba, den spelonk i den pais stranhero. Persiguí manera un bestia salbahe, el a sintié desanimá i yen di temor. No obstante, el a wanta cu fortalesa di Jehova. Cu rason David por a bisa for di su mes experencia: “Hopi ta e calamidadnan di esun hustu, pero for di nan tur Jehova ta libr’é.”—Salmo 34:19.

10. Ki calamidad extremo a bini riba Nabot i su famia?

¹⁰ Den e tempu di profeta Elías, tabatin solamente 7.000 persona den Israel cu no a hinca rudia n’e dios falsu, Baal. (1 Reynan 19:18; Romanonan 11:4) Nabot, kende probablemente tabata un di nan, a bira víctima di un inhusticia teribel. El a sufri e humiyacion di ser acusá di blasfemia. Hañá culpabel, el a ser condená i sentenciá pa medio di decreto real pa muri piedrá, i cachó a lembe su sanger. Asta su yunan a ser matá! Sin embargo, e tabata inocente dje acusacion. E testigonan contra dje tabata mentirosonan. Henter e asuntu tabata un complot cu Reina Jezabel a trama pa asina e rey por a pone man riba Nabot su cunucu di wijndruif.—1 Reynan 21:1-19; 2 Reynan 9:26.

11. Kico apostel Pablo ta bisa nos tocante homber i muhernan fiel den historia di Bijbel?

¹¹ Josef, David i Nabot ta solamente tres dje hopi homber i muhernan fiel mencioná den Bijbel cu a sufri calamidad. Apostel Pablo a skirbi un repaso histórico di Jehova su sirbidónan atrabes dje épocanan. Den dje el a papia di esnan cu a “ricibí nan prueba dor di mofa i sota, en berdad, mas cu esei, cu cadena i prizon. Nan a ser piedrá, nan a ser probá, nan a ser di zag na pida-pida, nan a muri matá pa spada, nan a cana rond den cueru di carné, den cueru di cabritu, miéntras nan tabata den necesidad, den tribulacion, bou di maltrato; i mundu no tabata digno di nan. Nan a dual den desierto i ceru i cueba i holnan dje tera.” (Hebreonan 11:36-38) Pero Jehova no a bandoná nan.

Jehova Ta Percurá pa Esnan Cu Ta Sufri

12. Kico ta algun dje afliccionnan cu Testigonan di Jehova ta experenciá awe?

¹² Kico di Jehova su pueblo awe? Como organisacion, nos por conta riba proteccion divino i cu nos lo pasa a salbo dor dje último dianan i e tribulacion grandi. (Isaías 54:17; Revelacion 7:9-17) Sin embargo, como personanan individual, nos ta reconocé cu “tempu i suceso imprevisto” ta bini riba tur hende. (Eclesiástes 9:11) Awe tin hopi cristian fiel cu ta sufri calamidad. Algun ta den pobresa extremo. Bijbel ta papia di “huérfano i biudanan” cristian cu tin tribulacion. (Santiago 1:27) Otronan ta sufri como resultado di desaster natural, guera, crímen, abusu di poder, enfermedad i morto.

13. Ki experencianan difícil a ser raportá recientemente?

¹³ Por ehempel, den nan informe di 1996 n’e Cuerpo Gobernante di Testigonan di Jehova, oficinanan di sucursal di Watch Tower a relatá cu algun di nos rumannan ta sufriendo di encarcelacion den condicionnan deplorabel debí cu nan ta pega na principionan bíblico. Tres congregacion den un pais suramericano a ser disolvé ora gruponan di gueriya a obligá cientos di Testigo pa bandoná e área. Den un pais di West Africa, algun Testigo cu a ser atrapá den un choke di guera civil a ser matá. Den un pais centro americano, e situacion financiero di algun ruman cu ya caba tabata crítico a bira pió ora un horcan a asotá e pais. Den otro lugánan unda pobresa i scarcedad di cuminda kisas no ta problemanan serio, influencianan negativo por fria e goso di algun. Otronan ta sinti nan cargá cu e presionnan di bida di nos tempu. Pa motibu di apatia general, otronan tambe por sinti nan desanimá ora nan ta predicá e bon nobo di Reino.

14. (a) Kico nos ta siña for dje ehempel di Job? (b) En bes di carga pensamentu negativo, kico nos mester haci ora nos ta experenciá angustia?

¹⁴ Nos no mester mira e situacionnan aki como evidencia di Dios su desaprobacion. Corda e caso di Job i e hopi adversidadnan cu el a sufri. E tabata “un homber sin culpa i recto.” (Job 1:8) Ki desanimá Job mester a sinti su mes ora Elifas a acus’é di malecho! (Job, capítulo 4, 5, 22) Nos no kier ta lihé pa concluí cu nos ta experenciá calamidad pa motibu cu nos a decepcioná Jehova den un of otro manera of pasobra Jehova a kita su bendicion. Pensamentu negativo ora nos ta confrontá cu tribulacion por debilitá nos fe. (1 Tesalonicensenan 3:1-3, 5) Ora nos ta experenciá angustia, ta mihó pa meditá riba e echo cu Jehova i Jesus ta cerca esnan hustu sin importá kico pasa.

15. Con nos sa cu Jehova ta profundamente interesá den e calamidadnan cu su pueblo ta sufri?

¹⁵ Apostel Pablo ta trankilisá nos ora e ta bisa: “Ken lo separá nos for dje amor di e Cristo? Tribulacion of angustia of persecucion of hamber of desnudes of peliger of spada? . . . Mi ta convencí cu ni morto ni bida ni angel ni gobiernu ni cosnan aki awor ni cosnan pa bini ni podernan ni haltura ni profundidad ni ningun otro creacion lo por separá nos for di e amor di Dios cu ta den Cristo Jesus nos Señor.” (Romanonan 8:35, 38, 39) Jehova ta profundamente interesá den nos i ta conciente di nos sufrimentu. Miéntras cu ainda e tabata un fugitivo, David a skirbi: “E wowonan di Jehova ta den direccion dje hustunan, i su oreanan ta den direccion di nan sclamacion pa yudansa. Jehova ta cerca di esnan kibrá di curason.” (Salmo 34:15, 18; Mateo 18:6, 14) Nos Tata celestial ta interesá den nos i ta sinti duele di esnan cu ta sufri. (1 Pedro 5:6, 7) E ta percurá loke nos tin mester pa wanta, sea cual sea e sufrimentu cu nos por ta pasando aden.

E Donnan di Jehova Ta Sostené Nos

16. Ki percuracion for di Jehova ta yuda nos wanta, i di ki manera?

¹⁶ Aunke nos no por spera un bida liber di adversidad den e sistema di cosnan bieu aki, nos ‘no ta ser lagá sin yudansa.’ (2 Corintionan 4:8, 9) Jesus a primintí di percurá un yudante pa su siguidónan. El a bisa: “Lo mi pidi e Tata i lo e duna boso un otro yudante pa keda cu boso pa semper, e spiritu dje berdad.” (Juan 14:16, 17) Na Pentecoste di 33 E.C., apostel Pedro a bisa su oyentenan cu nan por a ricibí “e don grátis dje spiritu santu.” (Echonan 2:38) Spiritu santu ta yudando nos awe? Sí! Jehova su forsa activo ta duna nos fruta maraviyoso: “Amor, goso, pas, gran pacenshi, bondad, amabilidad, fe, suavedad, dominio propio.” (Galationan 5:22, 23) Tur esakinan ta cualidadnan preciosísimo cu ta yuda nos wanta.

17. Cua ta algun berdad di Bijbel cu ta fortalecé nos fe i determinacion pa spera cu pacenshi riba Jehova?

¹⁷ Spiritu santu tambe ta yuda nos comprendé cu tribulacionnan actual ta ‘momentáneo i leve’ ora compará nan cu e recompensa di bida eterno. (2 Corintionan 4:16-18) Nos ta convencí cu Dios lo no lubidá nos obranan i e amor cu nos a mustra p’e. (Hebreonan 6:9-12) Lesando e palabranan inspirá di Bijbel, nos ta ser consolá p’e ehempelnan di fiel sirbidónan di pasado cu a wanta hopi calamidad pero cu a ser pronunciá felis. Santiago ta skirbi: “Rumannan, tuma como modelo di sufri loke ta malu i di ehercé pacenshi e profetanan, cu a papia den e nomber di Jehova. Mira! Nos ta pronunciá felis esnan cu a wanta.” (Santiago 5:10, 11) Bijbel ta primintí “poder mas ayá di loke ta normal” pa yuda nos wanta prueba. Tambe Jehova ta bendicioná nos cu e speransa di resureccion. (2 Corintionan 1:8-10; 4:7) Dor di lesa Bijbel diariamente i meditá riba e promesanan aki, nos lo fortalecé nos fe i nos determinacion pa spera cu pacenshi riba Dios.—Salmo 42:5.

18. (a) Na 2 Corintionan 1:3, 4, kico nos ta ser animá pa haci? (b) Con superintendentenan cristian por resultá di ta fuentenan di consuelo i refrescamentu?

¹⁸ Ademas, Jehova a duna nos e paradijs spiritual den cua nos por disfrutá dje amor genuino di nos rumannan cristian. Nos tur tin un papel di hunga den consolá un e otro. (2 Corintionan 1:3, 4) Specialmente superintendentenan cristian por ta un fuente principal di consuelo i refrescamentu. (Isaías 32:2) Como “donnan den hende,” nan ta comisioná pa animá esnan cu ta sufri, pa “papia di un manera consolador cu e almanan deprimí,” i pa “apoyá e débilnan.” (Efesionan 4:8, 11, 12; 1 Tesalonicensenan 5:14) Ancianonan ta ser animá pa haci bon uso di e revistanan Toren di Vigilancia i Spierta!, i tambe otro publicacionnan cu “e esclabo fiel i discreto” ta percurá. (Mateo 24:45-47) Esakinan ta contené un abundancia di conseho basá riba Bijbel cu por yuda nos resolvé—i asta prevení—algun dje problemanan cu ta causa ansiedad pa nos. Laga nos imitá Jehova dor di consolá i animá un e otro durante tempunan difícil!

19. (a) Kico ta yuda nos evitá algun adversidad? (b) Finalmente, den ken nos mester confia, i kico lo capacitá nos pa enfrentá prueba?

¹⁹ Segun cu nos ta avansá mas leu den e último dianan, i condicionnan den e sistema di cosnan actual ta empeorá, cristiannan ta haci loke nan por pa evitá calamidad. (Proverbionan 22:3) Bon dicernimentu, sano huicio i conocimentu di principionan bíblico por yuda nos tuma decisionnan sabí. (Proverbionan 3:21, 22) Nos ta scucha i obedecé e Palabra di Jehova pa evitá di cometé erornan innecesario. (Salmo 38:4) No obstante, nos ta realisá cu ni maske cuantu esfuerso nos haci nos no por eliminá sufrimentu completamente for di nos bida. Den e sistema di cosnan aki, hopi hende hustu ta enfrentá adversidadnan severo. Sin embargo, nos por trata cu nos pruebanan cu e confiansa completo cu “Jehova lo no bandoná su pueblo.” (Salmo 94:14) I nos sa cu e sistema di cosnan aki i su afliccionnan lo disparcé pronto. P’esei, laga nos determiná pa “no entregá den hacimentu di loke ta excelente, pasobra n’e debido tempu nos lo cosechá si nos no cansa.”—Galationan 6:9.

Kico Nos A Siña?

◻ Ki pruebanan henter e asociacion di cristiannan ta experenciá?

◻ Ki ehempelnan bíblico ta yuda nos comprendé cu calamidadnan no ta evidencia di Jehova su desaprobacion?

◻ Con Jehova ta sinti pa cu e adversidadnan cu su pueblo ta sufri?

◻ Kico ta algun dje donnan di parti di Jehova cu ta yuda nos wanta prueba?

[Plachinan na página 10]

David, Nabot i Josef ta tres persona cu a sufri calamidad