Pakico Informá Loke Ta Malu?

“ESUN cu ta revelá un asuntu ta bira un enemigu di pueblo,” segun un dicho na West Africa. Esei ta loke a sosodé cu Olu ora el a acusá su ruman homber mas grandi di a cometé incesto cu su ruman muher. “Bo ta gaña!” e ruman homber a grit’é. Anto el a bati Olu ferosmente, a sak’é for dje cas di famia i a kima tur Olu su pañanan. E habitantenan dje pueblo a apoyá e ruman homber. Ya cu Olu no tabata bon biní mas den e pueblo, e tabatin cu bai. Ta te despues cu e hendenan a mira cu e mucha muher a sali na estado, nan a realisá cu Olu a papia e berdad. E ruman homber a confesá, i Olu a bolbe ricibí fabor dje hendenan. Cosnan por a sali basta diferente. Olu por a haña su morto.

Claramente, esnan cu no tin amor pa Jehova probablemente no gusta pa nan eror ser revelá. E tendencia humano pecaminoso ta pa oponé reprendimentu i carga rencor contra ken cu ta dun’é. (Compará cu Juan 7:7.) Nada straño cu hopi persona ta ketu mescos cu un tumba ora ta trata di revelá e malechonan di otronan na esnan cu tin autoridad pa corigí nan.

Apreciando e Balor di Reprendimentu

Sin embargo, den Jehova su pueblo tin un actitud diferente pa cu reprendimentu. Homber i muhernan piadoso ta apreciá profundamente e areglo cu Jehova a haci pa yuda esnan cu ta faya den e congregacion cristian. Nan ta reconocé cu e disiplina ei ta un expresion di su bondad amoroso.—Hebreonan 12:6-11.

Por ilustrá esaki cu un incidente den e bida di Rey David. Aunke e tabata un homber hustu desde su hubentud, tabatin un tempu cu el a cai den malecho serio. Di promé, el a cometé adulterio. Despues, den un intento pa cubri su malecho, el a haci areglo pa laga mata e esposo dje muher. Pero Jehova a revelá David su picá na profeta Natan, kende yen di curashi a confrontá David cu e asuntu. Usando un ilustracion poderoso, Natan a puntra David kico mester haci cu un homber ricu cu tabatin hopi carné, pero cu a tuma i mata e único lamchi, un mascota kerí, di un homber pober, pa duna di come na su amigu. David, un ex-wardadó di carné, a yena cu indignacion i rabia. El a bisa: “E homber cu haci esaki ta merecé morto!” Anto Natan a aplicá e ilustracion na David, bisando: “Abo mes ta e homber!”—2 Samuel 12:1-7.

David no a rabia cu Natan; tampoco el a purba defendé su mes ni no a recurí na tira culpa riba otronan. Mas bien, e reprendimentu di Natan a conmové su concenshi profundamente. Cu dolor den su curason, David a confesá: “Mi a peca contra Jehova.”—2 Samuel 12:13.

E revelacion cu Natan a haci di David su picá, siguí pa reprendimentu piadoso, a duna bon resultado. Aunke David no a ser librá dje consecuencianan di su malecho, el a repentí i a reconciliá cu Jehova. Con David a sinti tocante un reprendimentu asina? El a skirbi: “Si e hustu mester golpiá mi, esei lo ta un bondad amoroso; i si e mester reprendé mi, esei lo ta zeta riba e cabes, cu mi cabes lo no kier nenga.”—Salmo 141:5.

Den nos tempu tambe, Jehova su sirbidónan por haña nan enbolbí den malecho serio, asta esnan cu ta fiel pa hopi aña. Reconociendo cu e ancianonan por yuda, mayoria ta tuma e iniciativa pa acercá nan pa yudansa. (Santiago 5:13-16) Pero tin biaha un malechor por purba tapa su picá, mescos cu Rey David a haci. Kico nos mester haci si nos haña sa tocante malecho serio den e congregacion?

Ken Su Responsabilidad E Ta?

Ora ancianonan haña sa tocante malecho serio, nan ta acercá e individuo enbolbí pa duna yudansa i coreccion necesario. Ta e ancianonan tin e responsabilidad di husga malechornan den e congregacion cristian. Dor di vigilá e condicion spiritual di e congregacion atentamente, nan ta yuda i spierta cualkier persona cu ta dal un paso imprudente of robes.—1 Corintionan 5:12, 13; 2 Timoteo 4:2; 1 Pedro 5:1, 2.

Pero kico si bo no ta un anciano i bo haña sa tocante un of otro malecho serio di parti di un otro cristian? Nos ta haña guia den e Ley cu Jehova a duna e nacion di Israel. E Ley a declará cu si un persona tabata testigo di actonan apóstata, lantamentu, homicidio of cierto otro crímennan serio, tabata su responsabilidad pa informá esei i di para como testigo di loke e tabata sa. Levítico 5:1 ta declará: “Awor, den caso cu un alma peca pasobra el a tende plegamentu na público i ta testigo of a mir’é of a yega di sa di dje, si e no informá esei, e ora ei e tin cu respondé pa su eror.”—Compará cu Deuteronomio 13:6-8; Ester 6:2; Proverbionan 29:24.

Aunke cristiannan no ta bou dje Ley di Moises, awe nan por ser guiá p’e principionan tras di dje. (Salmo 19:7, 8) P’esei, si bo haña sa tocante e malecho serio di un compañero cristian, kico bo mester haci?

Atendiendo e Asuntu

Promé cu tur cos, ta importante pa tin un motibu válido pa kere cu malecho serio realmente a tuma lugá. “No bira un testigo contra bo semehante sin base,” e homber sabí a declará. “E ora ei lo bo tin cu ser bobo cu bo lipnan.”—Proverbionan 24:28.

Kisas bo ta dicidí di bai derechitu n’e ancianonan. No ta malu pa haci esei. Sin embargo, generalmente e proceder mas amoroso ta di acercá e persona enbolbí. Tal bes e echonan no ta loke nan ta parce. Of tal bes e situacion ya caba tin atencion dje ancianonan. Considerá e asuntu cu e persona den un manera calmu. Si ainda tin motibu pa kere cu un malecho serio a ser cometé, anim’é p’e acercá e ancianonan pa yudansa, i splica e sabiduria di haci esei. No papia cu otronan tocante e asuntu, pasobra esei lo ta redu.

Si e persona no informá e ancianonan dentro di un tempu razonabel, e ora ei abo mester informá e ancianonan. Anto un of dos anciano lo considerá e asuntu cu e persona acusá. E ancianonan tin cu “scudriñá i investigá i indagá cabalmente” pa mira si un malecho a ser cometé. Si esei ta e caso, nan lo atendé e caso segun guia bíblico.—Deuteronomio 13:12-14.

Por lo ménos dos testigo ta necesario pa establecé un acusacion di malecho. (Juan 8:17; Hebreonan 10:28) Si e persona nenga di ta culpabel i bo testimonio ta e único cu tin, lo laga e asuntu den man di Jehova. (1 Timoteo 5:19, 24, 25) Esaki ta ser hací pasobra nos sa cu tur cos ta “abiertamente exponí” na Jehova i cu si e persona ta culpabel, cu tempu su picánan lo ‘alcans’é.’—Hebreonan 4:13; Númeronan 32:23.

Pero suponé cu e persona ta nenga di ta culpabel i cu bo ta e único testigo contra dje. Bo por ser acusá awor di a calumniá? No, a ménos cu bo a conta otronan cu no ta enbolbí den e asuntu. No ta un calumnia pa informá condicionnan cu ta afectá un congregacion na esnan cu tin autoridad i responsabilidad pa supervisá i corigí asuntunan. E ta, realmente, na armonia cu nos deseo pa semper haci loke ta corecto i leal.—Compará cu Lucas 1:74, 75.

Manteniendo Santidad den e Congregacion

Un motibu pa informá malecho ta cu e ta sirbi pa conserbá e limpiesa dje congregacion. Jehova ta un Dios limpi, un Dios santu. E ta rekerí pa tur esnan cu ta ador’é ser spiritualmente i moralmente limpi. Su Palabra inspirá ta spierta: “Como yunan obediente, stop di conformá boso mes segun e deseonan cu boso tabatin ántes den boso ignorancia, sino, di acuerdo cu Esun Santu cu a yama boso, boso mes tambe bira santu den tur boso conducta, pasobra ta pará skirbí: ‘Boso mester ta santu, pasobra ami ta santu.’” (1 Pedro 1:14-16) Individuonan cu ta practicá sushedad of malecho por trece contaminacion i Jehova su desaprobacion riba henter un congregacion a ménos cu tuma accion pa corigí of saca nan.—Compará cu Hosué, capítulo 7.

E cartanan di apostel Pablo n’e congregacion cristian na Corinto ta mustra con e asuntu di informá malecho a contribuí n’e limpiesa dje pueblo di Dios einan. Den su promé carta, Pablo a skirbi: “Realmente, ta ser informá cu tin fornicacion entre boso, i fornicacion tal como ni sikiera tin den e nacionnan, cu un cierto homber tin esposa di su tata.”—1 Corintionan 5:1.

Bijbel no ta bisa nos for di ken e apostel a ricibí e informe aki. Kisas Pablo a haña sa dje situacion for di Stefánas, Fortunato i Acaico, kendenan a biaha for di Corinto pa Efeso caminda Pablo tabata kedando. Tambe Pablo a ricibí un carta cu pregunta for dje congregacion cristian na Corinto. Sea cual sea e fuente, una bes e situacion a ser informá na Pablo dor di testigonan confiabel, e tabata den e posicion e ora ei pa duna guia den e asuntu. “Saca e malbado for di den boso,” el a skirbi. E homber a ser expulsá for dje congregacion.—1 Corintionan 5:13; 16:17, 18.

E instruccion di Pablo a duna bon resultado? Sigur cu sí! Evidentemente, e malechor a recobrá su huicio. Den su di dos carta n’e corintionan, Pablo a urgi e congregacion pa ‘pordoná bondadosamente i consolá’ e homber repentí. (2 Corintionan 2:6-8) Pues e acto di informá malecho a hiba na accion cu tabatin como resultado cu e congregacion a ser limpiá i cu un persona cu a daña su relacion cu Dios tabatin su fabor atrobe.

Nos ta haña un otro ehempel den Pablo su promé carta n’e congregacion cristian na Corinto. E biaha aki e apostel ta mencioná e testigonan cu a informá e asuntu. El a skirbi: “Esnan dje cas di Cloe a informá mi tocante boso, mi rumannan, cu ta existí desacuerdo den boso.” (1 Corintionan 1:11) Pablo tabata sa cu e desacuerdo aki, huntu cu dunamentu di indebido onor na hende, a crea un actitud di forma secta cu a menasá di destruí e unidad dje congregacion. P’esei, motivá pa un interes profundo den e bienestar spiritual di su compañeronan creyente einan, Pablo a actua lihé i a skirbi conseho corectivo n’e congregacion.

Awe, e gran mayoria di rumannan den congregacionnan rond mundu ta traha duru pa conserbá e limpiesa spiritual dje congregacion dor di mantené individualmente un posicion aprobá dilanti Dios. Algun ta sufri pa ta haci esei; otronan asta a muri pa por a mantené integridad. Sigur lo e ta un falta di aprecio pa e esfuersonan aki si nos ta dispensá of tapa malecho.

Yudansa pa Esnan Cu Faya

Pakico algun cu ta cai den picá serio ta keda sin acercá e ancianonan di congregacion? Hopi biaha esei ta pasobra nan no ta conciente dje beneficionan di bai n’e ancianonan. Algun ta ekibocá di kere cu si nan confesá, nan picá lo ser exponé na henter e congregacion. Otronan ta gaña nan mes cu nan proceder no ta asina grave. Otronan mas ta pensa cu nan por reahustá nan mes sin yudansa dje ancianonan.

Pero e malechornan ei mester dje yudansa amoroso for dje ancianonan di congregacion. Santiago a skirbi: “Tin un hende enfermo entre boso? Lagu’é yama e ancianonan dje congregacion cerca dje i laga nan haci oracion riba dje, huntand’e cu zeta den e nomber di Jehova. I e oracion di fe lo sana esun enfermo, i Jehova lo lant’é. Tambe, si el a cometé picá, lo e ser pordoná.”—Santiago 5:14, 15.

Ki un provision maraviyoso pa yuda esnan cu a faya restorá nan spiritualidad! Dor di aplicá conseho calmante for dje Palabra di Dios i dor di haci oracion na fabor di nan, e ancianonan por yuda esnan spiritualmente enfermo recuperá for di nan mal caminda. Pues, en bes di sinti nan condená, hopi biaha esnan repentí ta sinti nan refrescá i aliviá ora nan reuní cu ancianonan amoroso. Un yoncuman di West Africa a cometé fornicacion i a tapa su picá pa algun luna. Despues cu su picá a sali na cla, el a bisa e ancianonan: “Cuantu mi a deseá pa un hende a puntrá mi tocante mi enbolbimentu cu e mucha muher ei! Ta ki un alivio pa saca e asuntu aki na cla.”—Compará cu Salmo 32:3-5.

Un Acto di Amor Basá Riba Principio

Sirbidónan di Dios bautisá “a pasa di morto pa bida.” (1 Juan 3:14) Pero si nan cometé picá serio, nan a bolbe bek n’e caminda di morto. Si nan no ser yudá, nan por bira indiferente den malecho, i no ta deseá pa repentí i bolbe bek na adoracion di e Dios berdadero.—Hebreonan 10:26-29.

E accion di informá malecho ta un acto di interes intenso i genuino den e malechor. Santiago a skirbi: “Mi rumannan, si cualkier un den boso ser desviá for dje berdad i un otro ta hacié bolbe, sabi cu esun cu ta haci un pecadó bolbe for di eror di su caminda lo salba su alma for di morto i lo tapa un multitud di picá.”—Santiago 5:19, 20.

Pues, anto, pakico informá loke ta malu? Pa motibu cu e ta duna bon resultado. Sí, informá malecho ta un acto di amor cristian basá riba principio mustrá na Dios, na e congregacion i na e malechor. Segun cu cada miembro dje congregacion ta sostené lealmente e normanan hustu di Dios, Jehova lo bendicioná e congregacion den su totalidad ricamente. Apostel Pablo a skirbi: “E [Jehova] tambe lo haci boso firme te na fin, pa boso no ser sometí na ningun acusacion den e dia di nos Señor Jesucristo.”—1 Corintionan 1:8.

[Plachi na página 26]

Ta un muestra di amor pa animá un Testigo cu a faya pa papia cu e ancianonan

[Plachi na página 28]

Ancianonan ta yuda restorá esnan cu a faya n’e fabor di Dios