Lo Bo Ta Fiel Manera Elias?
“Mi ta manda pa boso Elías e profeta promé cu e binida di Jehova su dia grandi i inspirador di temor.” —MALAKIAS 4:5.
1. Ki crísis ta tuma lugá despues cu Israel tabata den e Tera Primintí pa mas o ménos 500 aña?
“UN TERA cu ta abundá cu lechi i miel.” (Exodo 3:7, 8) Esei ta loke Jehova Dios a duna e israelitanan despues cu el a libra nan for di sclabitud na Egipto den siglo 16 P.E.C. Pero mira! Cincu siglo a pasa, i awor e reino di dies tribu di Israel ta den gara di un hamber severo. Ta difícil pa haña un poco yerba berde. Bestianan ta muriendo, i pa tres aña i mei awaceru no a cai. (1 Reynan 18:5; Lucas 4:25) Kico ta responsabel pa e calamidad aki?
2. Kico ta e causa dje crísis nacional di Israel?
2 Apostasia a causa e crísis aki. Violando e Ley di Dios, Rey Acab a casa cu e prinses cananeo Jezabel i a permitié introducí adoracion di Baal den Israel. Pió ainda, el a construí un tempel p’e dios falsu aki na Samaria, e stad capital. Figurá bo, e israelitanan a ser seducí pa kere cu adoracion di Baal lo trece cosecha abundante pa nan! Sin embargo, manera Jehova a spierta, awor nan ta den peliger di ‘perecé for di nan bon tera.’—Deuteronomio 7:3, 4; 11:16, 17; 1 Reynan 16:30-33.
Un Prueba Dramático di Ken Ta e Dios Berdadero
3. Con profeta Elías ta enfocá atencion riba e berdadero problema di Israel?
3 Ora e hamber ta cuminsá, Dios su profeta fiel, Elías, ta bisa Rey Acab: “Mes sigur cu Jehova, e Dios di Israel dilanti ken ami en efecto ta pará awe, ta na bida, durante e añanan aki lo no tin ni serena ni awaceru, si no ta riba órden di mi palabra!” (1 Reynan 17:1) Despues di experenciá e berdad teribel dje pronunciacion aki, e rey ta culpa Elías di a trece maldicion riba Israel. Pero Elías ta contestá cu ta Acab i su cas mester culpa pa motibu di nan apostasia como adoradónan di Baal. Pa resolvé e cuestion, e profeta di Jehova ta urgi Rey Acab pa reuní henter Israel na Ceru di Carmel huntu cu e 450 profetanan di Baal i 400 profeta dje palu sagrado. Acab i su súbditonan ta bini huntu ei, tal bes cu e speransa cu e ocasion lo trece un fin n’e secura. Pero Elías ta enfocá atencion n’e cuestion mas importante. E ta puntra: “Pa cuantu tempu mas boso lo sigui cocochá riba dos diferente opinion? Si Jehova ta e Dios berdadero, bai siguié; pero si ta Baal, bai siguié.” E israelitanan no sa kico pa bisa.—1 Reynan 18:18-21.
4. Pa resolvé e cuestion di ken ta e Dios berdadero, kico Elías ta proponé?
4 Pa añanan largu e israelitanan a purba mescla e adoracion di Jehova cu esun di Baal. Pa resolvé e cuestion di ken ta e Dios berdadero, Elías ta proponé awor un competencia. Lo e prepará un toro yong pa sacrificio, i e profetanan di Baal lo prepará un otro. Anto Elías a bisa: “Boso tin cu inbocá e nomber di boso dios, i ami, di mi parti, lo inbocá e nomber di Jehova; i tin cu sosodé cu e Dios berdadero cu contestá pa medio di candela ta e Dios berdadero.” (1 Reynan 18:23, 24) Imaginá bo candela baha for di shelu como contesta riba un oracion!
5. Con e banidad di adoracion di Baal ta ser exponé?
5 Elías ta invitá e profetanan di Baal pa cuminsá. Nan ta prepará un toro pa sacrificio i ta pon’é riba e altar. Despues nan ta cocochá rond dje altar, resando: “O Baal, contestá nos!” Esaki ta sigui “for di mainta te merdia.” “Grita mas duru,” Elías ta haci cherche di nan. Baal lo mester ta ocupá cu un asuntu urgente, of “kisas e ta drumí i e mester lanta!” No ta tarda muchu cu e profetanan di Baal ta drenta un locura total. Mira! Nan ta corta nan mes cu puñá, i sanger ta core for di nan heridanan. I ki un boroto tin ora cu tur 450 ta grita masha duru! Pero no tin contesta.—1 Reynan 18:26-29.
6. Ki preparacion Elías ta haci p’e prueba di ken ta e Dios berdadero?
6 Awor ta Elías su turno. E ta reconstruí e altar di Jehova, ta traha un trinchera rond di dje, i ta prepará e sacrificio. Despues e ta laga basha awa riba e palu i e sacrificio. Diesdos poron grandi di awa ta ser bashá riba e altar te ora e trinchera mes yena. Imaginá e suspenso segun cu Elías ta bisa den oracion: “O Jehova, e Dios di Abraham, Isaac i Israel, laga nan sa awe cu abo ta Dios den Israel i cu ami ta bo sirbidó i cu ta pa medio di bo palabra mi a haci tur e cosnan aki. Contestá mi, O Jehova, contestá mi, pa e pueblo aki por sa cu abo, Jehova, ta e Dios berdadero i abo mes a bira nan curason bek.”—1 Reynan 18:30-37.
7, 8. (a) Con Jehova ta contestá e oracion di Elías? (b) Kico e sucesonan riba Ceru di Carmel ta logra?
7 Como contesta riba Elías su oracion, ‘e candela di Jehova ta cai for di shelu i ta come su ofrenda, e palu, e piedranan, i e stof, i ta lembe e awa den e trinchera.’ E hendenan ta cai riba nan cara i ta bisa: “Jehova ta e Dios berdadero! Jehova ta e Dios berdadero!” (1 Reynan 18:38, 39) Awor Elías ta tuma accion dicididu. E ta manda: “Gara e profetanan di Baal! No laga ni un di nan scapa!” Despues cu nan ser matá den e vaye di Kison, nubianan scur ta yena shelu. Por fin, un awaceru duru ta pone un fin n’e secura!—1 Reynan 18:40-45; compará cu Deuteronomio 13:1-5.
8 Ki un dia magnífico! Jehova ta sali triunfador den e prueba remarcabel aki di ken ta e Dios berdadero. Ademas, e sucesonan aki ta bira curason di hopi israelita bek na Dios. Den e manera aki i den otro maneranan, Elías ta duna prueba cu e ta un profeta fiel, i personalmente e ta hunga un papel profético.
“Elías e Profeta” Mester Bini Ainda?
9. Kico Malakías 4:5, 6 a profetisá?
9 Mas despues, pa medio di Malakías, Dios a profetisá: “Mira! Mi ta manda pa boso Elías e profeta promé cu e binida di Jehova su dia grandi i inspirador di temor. I e mester bira e curason di tatanan bek pa yunan, i e curason di yunan bek pa tatanan; pa mi no bini i realmente heridá e tera dunand’e completamente na destruccion.” (Malakías 4:5, 6) Elías a biba mas o ménos 500 aña promé cu e palabranan ei a ser expresá. Siendo cu esaki tabata un profecia, hudiunan dje promé siglo E.C. tabata den expectativa dje binida di Elías pa cumpli cuné.—Mateo 17:10.
10. Ken tabata e Elías profetisá, i con nos por sa esei?
10 Ken, anto, tabata e binidero Elías aki? Su identidad a ser revelá ora Jesucristo a bisa: “For dje dianan di Juan Bautista te awor e reino di shelu ta e meta cu hende ta forsa pa alcansá, i esnan cu ta haciendo esfuerso ta hañando gara di dje. Pasobra tur, e Profetanan i e Ley, a profetisá te cu Juan; i si boso kier acept’é: E mes ta ‘Elías cu ta destiná pa bini.’” Sí, Juan Bautista tabata e ekivalente di Elías cu Bijbel a profetisá di dje. (Mateo 11:12-14; Marco 9:11-13) Un angel a bisa Juan su tata, Zacarías, cu Juan lo tabatin “e spiritu i poder di Elías” i lo a “drecha pa Jehova un pueblo prepará.” (Lucas 1:17) E bautismo cu Juan a efectuá tabata un símbolo público di cu un hende a repentí di su picánan contra e Ley, cu mester a guia e hudiunan na Cristo. (Lucas 3:3-6; Galationan 3:24) Pues Juan su trabou tabata di ‘drecha un pueblo prepará pa Jehova.’
11. Kico Pedro a bisa na Pentecoste tocante e ‘dia di Jehova,’ i na ki tempu el a sosodé?
11 E trabou di Juan Bautista como “Elías” a demostrá cu un ‘dia di Jehova’ tabata cerca. Apostel Pedro tambe a indicá ki cerca e dia ta cu Dios lo a actua contra su enemigunan i conserbá su pueblo. El a señalá cu e sucesonan milagroso cu a tuma lugá na Pentecoste di 33 E.C. tabata un cumplimentu di Joël su profecia tocante e dramamentu dje spiritu di Dios. Pedro a mustra cu esaki mester a sosodé promé cu “e gran i ilustre dia di Jehova.” (Echonan 2:16-21; Joël 2:28-32) Na 70 E.C. Jehova a cumpli cu su Palabra dor di laga e ehércitonan romano ehecutá huicio divino riba e nacion cu a rechasá su Yu.—Daniel 9:24-27; Juan 19:15.
12. (a) Kico Pablo i Pedro a bisa tocante un binidero “dia di Jehova”? (b) Pakico algu mas lo a bai tuma lugá sigur manera e trabou cu Elías a haci a representá?
12 Sin embargo, tabatin mas pa bini despues di 70 E.C. Apostel Pablo a asociá un binidero “dia di Jehova” cu e presencia di Jesucristo. Ademas, apostel Pedro a papia dje dia ei en coneccion cu e “shelu nobo i un tera nobo” pa futuro ainda. (2 Tesalonicensenan 2:1, 2; 2 Pedro 3:10-13) Tene na mente cu Juan Bautista a haci un trabou parecido na esun di Elías promé cu e “dia di Jehova” a bini na 70 E.C. Tur esaki huntu a indicá cu algu mas lo a bai tuma lugá, manera e trabou cu Elías a haci a representá. Kico esei ta?
Nan Tin e Spiritu di Elías
13, 14. (a) Ki paralelo tin entre e actividadnan di Elías i esnan dje cristiannan ungí di tempu actual? (b) Kico apóstatanan di cristiandad a haci?
13 E trabou di Elías no solamente tabatin un paralelo cu actividadnan di Juan Bautista sino tambe e tin un paralelo cu esnan dje cristiannan ungí den e periodo crítico aki cu ta hiba n’e binidero “dia di Jehova.” (2 Timoteo 3:1-5) Cu e spiritu i poder di Elías, nan ta apoyadónan leal di adoracion berdadero. I ki necesario esaki tabata! Despues di morto dje apostelnan di Cristo, tabatin un apostasia for di cristianismo berdadero, mescos cu adoracion di Baal a florecé den Israel den tempu di Elías. (2 Pedro 2:1) Esnan cu a pretendé di ta cristian a cuminsá mescla cristianismo cu doctrina i prácticanan religioso falsu. Por ehempel, nan a adoptá e siñansa pagano i no-bíblico cu hende ta poseé un alma inmortal. (Eclesiástes 9:5, 10; Ezekiel 18:4) Apóstatanan di cristiandad a stop di usa e nomber dje único Dios berdadero, Jehova. En bes di esei, nan ta adorando un Trinidad. Tambe nan a adoptá e práctica estilo di Baal di buig dilanti imágen di Jesus i di su mama, Maria. (Romanonan 1:23; 1 Juan 5:21) Pero esei no tabata tur.
14 For di siglo 19 padilanti, lidernan di iglesianan di cristiandad a cuminsá expresá duda en cuanto hopi parti di Bijbel. Por ehempel, nan a rechasá e relato di creacion di Génesis i a buig dilanti e teoria di evolucion, catalogand’e como “científico.” Esaki tabata na conflicto directo cu e siñansanan di Jesucristo i su apostelnan. (Mateo 19:4, 5; 1 Corintionan 15:47) Sin embargo, mescos cu Jesus i su siguidónan di promé, cristiannan ungí cu spiritu awe ta sostené e relato bíblico di creacion.—Génesis 1:27.
15, 16. Na contraste cu cristiandad, ken a ricibí suministro regular di alimento spiritual, i mediante kico?
15 Segun cu e mundu a drenta “e tempu di fin,” un hamber spiritual a coge cristiandad den su gara. (Daniel 12:4; Amos 8:11, 12) Pero e grupo chikitu di cristiannan ungí a haña un suministro regular di alimento spiritual for di Dios “n’e debido tempu,” mescos cu el a percurá pa Elías ser alimentá durante e periodo di hamber di su tempu. (Mateo 24:45; 1 Reynan 17:6, 13-16) E sirbidónan fiel aki di Dios, un tempu conocí como Studiantenan Internacional di Bijbel, mas despues a ricibí e nomber bíblico Testigonan di Jehova.—Isaías 43:10.
16 Elías a biba conforme su nomber, cu ta nificá “Mi Dios Ta Jehova.” Como e revista oficial di Jehova su sirbidónan terenal, E Toren di Vigilancia a usa e nomber di Dios consistentemente. De facto, su di dos edicion (augustus 1879) a expresá confiansa cu e revista tabatin e respaldo di Jehova. E revista aki i otro publicacionnan di Sociedad Watch Tower ta exponé e siñansanan no-bíblico di cristiandad i e resto di Babilonia e Grandi, e imperio mundial di religion falsu, miéntras cu nan ta sostené e berdad di e Palabra di Dios, e Bijbel.—2 Timoteo 3:16, 17; Revelacion 18:1-5.
Fiel bou di Prueba
17, 18. Con Jezabel a reaccioná riba e matansa dje profetanan di Baal, pero ki yudansa Elías a ricibí?
17 E manera cu clero a reaccioná riba e revelacion di siñansanan no-bíblico tabata mescos cu Jezabel ora el a haña sa cu Elías a mata e profetanan di Baal. El a manda un mensahe p’e profeta fiel di Jehova, hurando cu lo e laga mat’é. Esaki no tabata un menasa insignificante, pasobra Jezabel ya caba a mata hopi profeta di Dios. Miedu a pone Elías hui direccion zuidwest pa Beer-seba. Lagando su criá ei, el a bai mas aleu ainda, den e desierto, pidiendo p’e muri. Pero Jehova no a bandoná su profeta. Un angel a aparecé na Elías pa prepar’é p’e biahe largu pa Ceru di Horeb. Pues el a ricibí alimento p’e biahe di 40 dia di mas cu 300 kilometer. Na Horeb, Dios a papia cuné despues di un manifestacion imponente di poder den un bientu grandi, un temblor i un candela. Jehova no tabata den e manifestacionnan aki. Nan tabata expresionnan di su spiritu santu, of forsa activo. Anto Jehova a papia cu su profeta. Imaginá bo con e experencia aki a fortalecé Elías. (1 Reynan 19:1-12) Kico si nos, mescos cu Elías, haña un tiki miedu ora enemigunan di adoracion berdadero menasá nos? Su experencia mester yuda nos realisá cu Jehova no ta bandoná su pueblo.—1 Samuel 12:22.
18 Dios a mustra claramente cu Elías ainda tabatin trabou di haci como profeta. Ademas, aunke Elías a pensa cu e tabata e único adoradó dje Dios berdadero den Israel, Jehova a mustr’é cu 7.000 hende no a buig dilanti Baal. Anto Dios a manda Elías bek na su asignacion. (1 Reynan 19:13-18) Mescos cu Elías, kisas nos tambe ta ser persiguí pa enemigunan di adoracion berdadero. Kisas nos ta bira obheto di persecucion intenso, manera Jesus a profetisá. (Juan 15:17-20) Na algun ocasion, nos por yena cu miedu. Sin embargo, nos por ta manera Elías, kende a ricibí siguransa divino i despues a perseverá fielmente den sirbishi di Jehova.
19. Kico cristiannan ungí a experenciá durante e era di Guera Mundial I?
19 Pa motibu di persecucion intenso durante Guera Mundial I, algun cristian ungí a sucumbí na temor i a stop di predicá. Nan a ekibocá nan mes pensando cu nan trabou riba tera a terminá. Pero Dios no a rechasá nan. Mas bien, misericordiosamente el a sostené nan, mescos cu el a percurá cuminda pa Elías. Mescos cu Elías, personanan ungí cu tabata fiel a aceptá coreccion divino i a recobrá for di inactividad. Nan wowonan a ser habrí n’e privilegio magnífico di predicá e mensahe di Reino.
20. Awe, ki privilegio esnan cu ta fiel manera Elías ta ricibí?
20 Den su profecia tocante su presencia, Jesus a describí e trabou mundial cu lo a ser completá promé cu e fin dje mal sistema di cosnan aki. (Mateo 24:14) Awe, cristiannan ungí i nan miyones di compañeronan cu ta spera cu anhelo pa biba den un paradijs riba tera ta haci e trabou aki. Solamente esnan cu ta fiel manera Elías tin e privilegio di efectuá e trabou di predicá e Reino te ora e terminá.
Sea Fiel Manera Elías
21, 22. (a) Den ki trabou cristiannan ungí ta hiba delantera awe? (b) Cu ki yudansa e trabou di predicá ta ser lográ, i pakico esei ta necesario?
21 Cu celo manera esun di Elías, e resto chikitu di cristiannan berdadero ungí a cumpli cu nan responsabilidad di percurá p’e interesnan terenal dje Rey entronisá, Jesucristo. (Mateo 24:47) I pa mas cu 60 aña awor, Dios ta usando e ungínan aki pa hiba delantera den e trabou di haci disipel di hende na ken el a duna e maraviyoso speransa di bida eterno riba un tera paradísico. (Mateo 28:19, 20) Ki gradicidu e miyones di hendenan aki por ta cu e relativamente poco ungínan cu a sobra ta cumpli celosamente i fielmente cu nan responsabilidadnan!
22 E trabou aki di predicá e Reino a ser realisá dor di hende imperfecto i solamente cu e fortalesa cu Jehova ta duna esnan cu ta confia den dje cu oracion. “Elías tabata un homber cu sintimentu mescos cu nos,” disipel Santiago a bisa ora el a cita e ehempel dje profeta di haci oracion pa asina mustra e poder di oracion di un hende hustu. (Santiago 5:16-18) No ta tur ora Elías tabata profetisá of haci milager. E tabatin e mésun sintimentu i debilidadnan humano cu nos tin, pero el a sirbi Dios fielmente. Ya cu nos tambe tin e yudansa di Dios i e ta fortalecé nos, nos por ta fiel manera Elías.
23. Pakico nos tin bon motibu pa ta fiel i optimista?
23 Nos tin bon motibu pa ta fiel i optimista. Corda cu Juan Bautista a haci un trabou parecido na esun di Elías promé cu e “dia di Jehova” a dal aden na 70 E.C. Cu e spiritu i poder di Elías, cristiannan ungí a haci un trabou similar, asigná dor di Dios, na tur parti di mundu. Esaki ta proba claramente cu e gran “dia di Jehova” ta cerca.
Con Lo Bo Respondé?
◻ Den ki manera Jehova a demostrá di ta e Dios berdadero riba Ceru di Carmel?
◻ Ken tabata e ‘Elías pa bini,’ i kico el a haci?
◻ Con cristiannan ungí dje tempu actual a demostrá cu nan tin e spiritu di Elías?
◻ Pakico ta posibel pa nos ta fiel manera Elías?
[Kuadro na página 15]
Na Cua Shelu Elias A Subi?
“ASOSODE cu miéntras [Elías i Eliseo] tabata cana, papiando segun cu nan tabata cana, pues, mira! un garoshi di guera di candela i cabainan di candela, i esakinan a pasa na haci un separacion entre nan dos; i Elías a bai subiendo pa shelu den e tempestad di bientu.”—2 Reynan 2:11.
Kico e palabra “shelu” ta nificá den e caso aki? Tin biaha e término ta aplicá n’e habitacion di Dios i di su yunan angelical. (Mateo 6:9; 18:10) “Shelu” por denotá tambe e universo físico. (Deuteronomio 4:19) I Bijbel ta usa e término aki pa referí n’e tera su atmósfera rond di dje, unda paranan ta bula i bientu ta supla.—Salmo 78:26; Mateo 6:26.
Na cua dje shelunan aki profeta Elías a subi? Evidentemente, el a ser transferí atrabes dje atmósfera dje tera i pon’é na un otro parti dje planeta. Añanan despues, ainda Elías tabata riba tera pasobra el a skirbi un carta na Rey Jehoram di Huda. (2 Crónicanan 21:1, 12-15) Cu Elías no a subi n’e habitacion spiritual di Jehova Dios a ser confirmá despues dor di Jesucristo, kende a declará: “Ningun hende a subi na shelu sino esun cu a baha for di shelu, e Yu di hende,” esta, Jesus mes. (Juan 3:13) E caminda pa bida celestial a ser habrí pa promé bes pa hende imperfecto despues dje morto, resureccion, i asencion di Jesucristo.—Juan 14:2, 3; Hebreonan 9:24; 10:19, 20.