E Bendicionnan dje Ministerio di Pionero
“E bendicion di Jehova—esei ta loke ta haci ricu, i e no ta agregá ningun dolor cuné.”—PROVERBIONAN 10:22.
1, 2. (a) Con un pionero a expresá su sintimentu tocante e ministerio di tempu completo? (b) Pakico pioneronan ta den un posicion pa experenciá e goso di haci disipel mas plenamente?
“ACASO por tin un goso mas grandi cu mira un persona cu ken bo ta studia bira un alabadó activo di Jehova? Ta excitante i fortalecedor di fe pa mira con poderoso e Palabra di Dios ta den motivá hende pa haci cambio den nan bida afin di agradá Jehova.” Asina un pionero di Cánada, cu tabata den e ministerio di tempu completo pa mas cu 32 aña, a skirbi. Relacioná cu su ministerio di pionero, e ta bisa: “Mi no por imaginá mi ta haciendo algu otro. Sigur sigur mi no por imaginá nada cu lo por trece e mésun goso.”
2 Bo ta di acuerdo cu tin gran goso ora bo por contribuí den yuda un hende riba e caminda pa bida? Naturalmente, pioneronan no ta e único personanan cu ta experenciá un goso asina. Tur sirbidó di Jehova tin e comision di “haci disipel di hende,” i nan ta haci esfuerso pa logra esei. (Mateo 28:19) Sin embargo, siendo cu pioneronan por dedicá hopi ora den e ministerio di veld, hopi biaha nan ta den un posicion pa experenciá e goso di haci disipel mas plenamente. Pero e trabou di pionero tin otro recompensanan tambe. Papia cu pioneronan, i nan lo bisá bo cu e trabou di pionero ta un manera maraviyoso pa experenciá ‘e bendicion di Jehova cu ta hací bo ricu.’—Proverbionan 10:22.
3. Kico lo por stimulá nos pa sigui sirbi Jehova?
3 Recientemente, a pidi pioneronan for di vários parti di mundu pa describí e bendicionnan cu nan a experenciá den e ministerio di tempu completo. Laga nos considerá loke nan tabatin di bisa. Pero no desanimá si bo sirbishi ta limitá debí na enfermedad, edad avansá of otro circunstancianan. Corda, importante ta pa sirbi Jehova di henter alma, den cualkier capacidad. Tog, dor di tende comentario di algun pionero bo interes pa participá den e actividad recompensador aki lo por aumentá, si esei ta den bo alcanse.
Sintimentunan Profundo di Satisfaccion i Goso
4, 5. (a) Pakico compartí e bon nobo cu otronan ta un experencia asina recompensador? (b) Con pioneronan ta sinti tocante participá den e ministerio tempu completo?
4 “Tin mas felicidad den duna cu tin den ricibí,” Jesus a bisa. (Echonan 20:35) Sí, dunamentu inegoista tin su propio recompensanan. (Proverbionan 11:25) Esaki ta specialmente cierto ora ta trata di compartí e bon nobo cu otronan. Realmente, ki mihó regalo nos lo por duna un otro hende cu yud’é gana e conocimentu di Dios cu ta hiba na bida eterno?—Juan 17:3.
5 No ta un sorpresa anto cu hopi biaha esnan cu ta participá den e ministerio di tempu completo ta comentá tocante e goso i sintimentu profundo di logro cu nan ta haña for di nan ministerio. “Mi sa cu ningun otro trabou por a duná mi e satisfaccion cu a bini di compartí e berdad cu otronan,” un pionero di 64 aña di edad di Gran Bretania ta bisa. Un biuda di Zaire a expresá loke trabou di pionero a nificá p’e: “E sirbishi di pionero tabata un berdadero consuelo pa mi despues cu mi a perde mi kerido esposo. Mas mi sali den sirbishi pa yuda otronan, ménos mi ta sinti e pérdida trágico. Mi ta pone mi fe den e promesanan di Jehova i ta pensa mayoria biaha riba con mi por yuda esnan cu ken mi ta studia haci cambio den nan bida. Na fin di cada dia, mi soño ta dushi, i mi curason ta yen di goso.”
6. Ki goso special algun pionero a experenciá?
6 Algun hende cu a traha pionero pa hopi década tabatin e goso special di sirbi den áreanan remoto i establecé congregacionnan, cuanan cu tempu a crece bira circuitonan. Por ehempel, na Abashiri, Hokkaido (e isla mas nort di Hapon), tin un ruman muher cu a traha pionero pa 33 aña. E ta corda cu na su promé asamblea di circuito—pa henter Hokkaido—tabatin solamente 70 persona presente. I awor? Tin 12 circuito riba e isla ei, cu un total di mas cu 12.000 publicadó. Imaginá cuantu su curason ta pasa over di goso ora e asistí na asamblea i congresonan huntu cu e multitud di co-proclamadónan di Reino riba e isla ei!
7, 8. Ki goso mayoria ruman cu a traha pionero pa hopi tempu a experenciá?
7 Otro rumannan cu a traha pionero pa hopi tempu tabatin e goso di mira studiantenan di Bijbel bautisá anto alcansá mayor privilegionan di sirbishi. Na Hapon un ruman muher cu desde 1957 a sirbi den nuebe asignacion di pionero ta corda cu el a laga un revista Spierta! cu un yufrou cu tabata traha na un banco. Den nuebe luna e yufrou a bautisá. Despues el a casa, i e huntu cu su esposo a bira pionero special. Tabata ki un goso p’e ruman muher pionero ora cu, den su di tres asignacion, e superintendente di circuito huntu cu su casá—su ex-studiante di Bijbel—a bishitá su congregacion!
8 Nada straño cu esnan cu a haci e ministerio di pionero un carera, ta mir’é como “un privilegio preciosísimo pa atesorá,” manera un ruman homber cu a traha pionero pa 22 aña a expres’é!
Evidencia di Jehova Su Cuido
9. Como e Gran Percurador, kico Jehova ta primintí su sirbidónan, i kico esaki ta nificá pa nos?
9 Jehova, e Gran Percurador, ta primintí di sostené su sirbidónan den sentido spiritual i material. Rey David tabatin rason ora el a bisa: “Un homber hóben mi tabata, tambe mi a bira bieu, i tog nunca mi a mira un hende hustu bandoná henteramente, ni su yunan buscando pan.” (Salmo 37:25) Naturalmente, e garantia divino aki no ta dispensá nos dje obligacion di percurá materialmente pa nos famia, ni e no ta duna nos e derecho di asumí cu nos rumannan cristian lo ta generoso pa cu nos. (1 Tesalonicensenan 4:11, 12; 1 Timoteo 5:8) Sin embargo, ora nos ta haci sacrificio di buena gana den nos bida afin di sirbi Jehova mas plenamente, lo e no bandoná nos nunca.—Mateo 6:33.
10, 11. Kico hopi pionero sa di experencia tocante e abilidad di Jehova pa percurá pa nan?
10 Pioneronan rond parti di mundu sa di experencia cu Jehova ta percurá pa esnan cu ta hinca nan mes den su mannan percurador. Considerá e caso di un pareha pionero cu a muda pa un pueblo chikitu caminda tabatin mas necesidad pa predicadónan di Reino. Despues di un par di luna, trabou seglar a bira scars, i nan placa di spar a caba. Anto nan a ricibí un cuenta di seguro di auto di US$ 81. “Nos no tabatin moda di pagu’é,” e ruman ta splica. “E anochi ei nos a haci oracion intenso.” E siguiente dia, nan a ricibí un tarheta for di un famia kende nan mes tabata den un situacion pertá. E tarheta a splica cu e famia a ricibí cen bek di belasting, i ya cu e tabata mas di loke nan a anticipá, nan kier a compartí algu di dje cu e pareha pionero. Huntu cu e tarheta tabatin un chek di US$ 81! “Lo mi no lubidá e dia ei nunca mas—mi cabeinan a lanta para!” e ruman homber pionero a bisa. “Nos a apreciá e generosidad dje famia aki masha tantu.” Jehova tambe ta apreciá un bondad asina, cua ta tipificá e spiritu generoso cu e ta animá su sirbidónan pa manifestá.—Proverbionan 19:17; Hebreonan 13:16.
11 Hopi pionero por relatá experencianan similar. Puntra nan, i nan lo bisá bo cu nunca nan a ser “bandoná henteramente.” Mirando atras riba 55 aña den e ministerio di tempu completo, un pionero di 72 aña di edad ta bisa: “Jehova nunca a lagá mi na caya.”—Hebreonan 13:5, 6.
“Un Manera Excelente pa Hala Mas Cerca Jehova”
12. Pakico e trabou di proclamá e bon nobo ta un privilegio asina remarcabel?
12 Solamente e echo cu Jehova ta pidi nos proclamá e bon nobo di su Reino ta un privilegio pa nos. E ta mira nos—aunke nos ta hende imperfecto—como su “colaboradónan” den e actividad salbador di bida aki. (1 Corintionan 3:9; 1 Timoteo 4:16) Ora nos ta predicá na otronan tocante e Reino di Dios, ora nos ta proclamá un fin na maldad, ora nos ta splica hende di su maraviyoso amor den percurá un rescate, ora nos ta habri su Palabra bibu i siña su contenido precioso na hende di curason onrado, di mes nos ta hala mas cerca nos Creador, Jehova.—Salmo 145:11; Juan 3:16; Hebreonan 4:12.
13. Kico algun hende ta bisa tocante e efecto di nan ministerio di pionero riba nan relacion cu Jehova?
13 Pioneronan por dedicá hopi tempu tur luna pa siña nan mes i siña otronan tocante Jehova. Con nan ta haña cu esaki ta afectá nan relacion cu Dios? “Traha pionero ta un manera excelente pa hala mas cerca Jehova,” segun un anciano di Francia, cu a traha pionero pa mas cu dies aña. Un otro pionero den e pais ei, cu a dedicá 18 aña den e ministerio di tempu completo, ta bisa: “Sirbishi di pionero ta permití nos ‘purba i mira cu Jehova ta bon,’ segun cu dia tras dia nos ta desaroyá un relacion cada bes mas fuerte cu nos Creador.” (Salmo 34:8) Un ruman muher na Gran Bretania cu tabata un pionero pa 30 aña ta sinti mescos. “E echo cu mi mester dependé riba e spiritu di Jehova pa guia den mi ministerio ta halá mi mas cerca dje,” e ta bisa. “Mi a ègt sinti cu na hopi ocasion e spiritu di Jehova a dirigí mi na un cierto cas net na tempu.”—Compará cu Echonan 16:6-10.
14. Ki beneficio pioneronan ta saca dor di usa Bijbel i publicacionnan basá riba Bijbel dia tras dia pa siña otronan?
14 Hopi pionero ta haña cu dor cu nan ta usa Bijbel i publicacionnan basá riba Bijbel dia tras dia pa splica i siña berdadnan di Bijbel, nan ta crece den conocimentu dje Palabra di Dios. Un ruman di 85 aña di edad na Spaña cu tabata un pionero pa 31 aña ta splica: “Trabou di pionero a yudá mi gana un conocimentu profundo di Bijbel, un conocimentu cu mi a usa pa yuda hopi hende yega na conocé Jehova i su propósitonan.” Un ruman muher di Gran Bretania cu a traha pionero pa 23 aña ta bisa: “E ministerio di tempu completo a yudá mi cultivá un apetit fuerte pa cuminda spiritual.” Dor di splica otronan e ‘motibu p’e speransa den bo,’ esei por fortalecé bo mes conviccion relacioná cu e creencianan cu bo ta atesorá. (1 Pedro 3:15) Un pionero di Australia ta bisa: “Trabou di pionero ta aumentá mi fe segun cu mi ta expresá mi mes na otronan.”
15. Kico hopi ruman tabata dispuesto pa haci afin di drenta e ministerio di pionero i permanecé den dje, i pakico?
15 Ta bisto cu e ministernan pionero aki ta convencí cu nan a scoge un forma di sirbishi cu ta trece bendicionnan incontabel for di Jehova. Nada straño cu hopi hende tabata dispuesto pa haci ahustenan den nan bida, asta sacrificando un carera seglar i rikesa material, pa drenta e ministerio di pionero i permanecé den dje!—Proverbionan 28:20.
Bo Curason Ta Anhelá pa Haci Mas?
16, 17. (a) Si bo ta puntrando bo mes si e trabou di pionero ta posibel pa bo, kico lo bo por haci? (b) Con algun ruman ta sinti ora nan no ta den un posicion pa traha pionero?
16 Despues di a considerá loke pioneronan ta bisa tocante e bendicionnan dje ministerio di pionero, tal bes bo ta puntra bo mes si abo lo por alcansá traha e trabou di pionero. Si ta asina, pakico no papia cu un pionero cu tabatin éxito den e ministerio di tempu completo? Tambe lo bo haña ta probechoso pa papia cu un dje ancianonan den e congregacion, un cu conocé bo—bo estado di salú, bo limitacionnan i bo responsabilidadnan di famia. (Proverbionan 15:22) E comentarionan realístico di otronan por yudá bo evaluá cuidadosamente si e trabou di pionero ta posibel pa bo. (Compará cu Lucas 14:28.) Si bo por traha pionero, bo bendicionnan lo ta abundante en berdad.—Malakías 3:10.
17 Pero kico dje hopi fiel publicadónan di Reino cu no ta den un posicion pa traha pionero, aunke kisas nan ta anhelá pa haci mas den e ministerio? Tuma por ehempel e sintimentunan di un ruman muher cristian cu ta lucha pa lanta su cuater yunan su so. E ta bisa: “Mi ta sintí mi malu, pasobra mi tabata un pionero regular, pero awor, debí na circunstancia, mi no por sali den sirbishi di veld mes tantu cu ántes.” E ruman aki ta stima su yunan mashá i kier percurá pa nan. Na mésun tempu, e ta anhelá pa haci mas den e trabou di predicá. “Mi stima e ministerio,” e ta splica. Otro cristiannan deboto kende nan amor pa Dios ta impulsá nan pa deseá di sirbi Jehova ‘cu tur nan curason,’ tin sintimentunan similar.—Salmo 86:12.
18. (a) Kico Jehova ta spera di nos? (b) Pakico nos no mester desanimá si circunstancianan ta limitá loke nos por haci?
18 Corda cu loke Jehova ta spera di nos ta sirbishi di henter alma. Loke esaki ta nificá por varia considerablemente di alma pa alma. Algun ta den e posicion pa ahustá nan asuntunan afin di sirbi como pionero regular. Hopi otronan ta inscribí como pionero auxiliar sea de bes en cuando of riba un base continuo, dedicando 60 ora tur luna den e ministerio. Sin embargo, e gran mayoria dje pueblo di Jehova ta dedicá nan mes n’e trabou di predicá i siña di henter alma como publicadónan di congregacion. Pues si bo ta berdaderamente limitá dor di enfermedad, edad avansá, responsabilidadnan di famia of otro circunstancianan, no desanimá. Tanten cu bo ta duna lo mihó, bo sirbishi ta balioso den bista di Dios, manera ta e caso cu esnan cu ta den e ministerio di tempu completo!
Tur Ruman Por Demostrá e Spiritu di Pionero
19. Kico ta e spiritu di pionero?
19 Maske kisas bo no por inscribí como pionero, bo por demostrá sí e spiritu di pionero. Kico ta e spiritu di pionero? E edicion di Nuestro Ministerio del Reino di juli 1988 a declará: “E por ser definí como un actitud positivo pa cu e mandamentu pa predicá i haci disipel, ser completamente dedicá pa mustra amor i interes den hende, tin e actitud di sacrificio propio, haña goso den sigui e Doño cu sumo cuidou i deleitá den cosnan spiritual, no material.” Con bo por desplegá e spiritu di pionero?
20. Con mayornan por demostrá e spiritu di pionero?
20 Si bo ta un mayor cu yu chikitu, bo por recomendá nan di curason pa sigui un carera como pionero. Bo actitud positivo pa cu e ministerio por graba den nan e necesidad pa haci e sirbishi di Jehova e cos mas importante den nan bida. Bo por invitá pionero i superintendentenan biahero i nan esposa na bo cas pa asina bo yunan por saca beneficio for dje ehempelnan di esnan cu a haña goso den e ministerio di tempu completo. (Compará cu Hebreonan 13:7.) Asta den casnan dividí pa motibu di religion, mayornan creyente, cu palabra i cu ehempel, por yuda nan yunan haci e ministerio di tempu completo un meta den bida.—2 Timoteo 1:5; 3:15.
21. (a) Con nos tur por duna apoyo na esnan cu ta trahando pionero? (b) Kico ancianonan por haci pa animá e pioneronan?
21 Den e congregacion, nos tur por duna apoyo di henter curason na esnan cu por traha pionero. Por ehempel, bo por haci un esfuerso special pa traha cu un pionero den e ministerio, specialmente na oranan cu e pionero kisas ta trahando su so? A lo mehor lo bo por haña cu tin “un intercambio di estímulo.” (Romanonan 1:11, 12) Si bo ta un anciano, bo por haci asta mas pa animá e pioneronan. Ora e cuerpo di anciano ta reuní, nan mester considerá regularmente e necesidadnan dje pioneronan. Ora un pionero ta desanimá of ta experenciando algun dificultad, no sea lihé pa recomend’é pa stop di traha pionero. Aunke un recomendacion asina por ta necesario den algun caso, no lubidá cu e trabou di pionero ta un privilegio precioso cu e sirbidó di tempu completo lo ta apreciá profundamente. Kisas tur loke ta necesario ta un poco animacion i algun conseho of yudansa práctico. Sociedad su oficina di sucursal na Spaña ta skirbi: “Ora ancianonan ta animá pa traha pionero, ta apoyá e pioneronan den e ministerio di veld i ta pastoreá nan regularmente, pioneronan tin mas goso, ta sinti nan mas útil i kier sigui apesar di obstáculonan cu lo por presentá.”
22. Den e periodo crítico aki di historia humano, kico nos mester ta determiná pa haci?
22 Nos ta bibando den un periodo crítico di historia humano. Jehova a duna nos un trabou salbador di bida pa cumpli cuné. (Romanonan 10:13, 14) Sea cu nos por traha tempu completo den e trabou aki como pionero of no, laga nos demostrá e spiritu di pionero. Laga nos tin un sentido di urgencia i un spiritu di sacrificio propio. Laga nos ser determiná pa duna Jehova loke e ta pidi di nos—sirbishi di henter alma. I laga nos corda cu ora nos ta duna tur loke nos por, sea esei ta manera e dos cen pretu dje biuda of e zeta costoso di Maria, nos sirbishi ta di henter alma, i Jehova ta apreciá nos sirbishi di henter alma!
Bo Ta Corda?
◻ Pakico e ministerio di tempu completo ta duna sintimentunan di satisfaccion i goso?
◻ Kico hopi pionero sa di experencia tocante Jehova su abilidad di percurá pa su sirbidónan?
◻ Ki efecto pioneronan ta sinti cu nan ministerio tin riba nan relacion cu Jehova?
◻ Con bo por demostrá e spiritu di pionero?
[Plachi na página 23]
Pioneronan ta haña hopi goso den e trabou di haci disipel
[Plachi na página 23]
Bo yunan por saca beneficio for di asociacion cu proclamadónan di Reino di tempu completo
[Plachi na página 23]
Ancianonan por animá pioneronan den e ministerio di veld