Nan A Haci e Boluntad di Jehova

Un Ehempel di Sacrificio Propio i Lealtad

PA UN cunukero yong yamá Eliseo, loke a cuminsá como un dia comun i coriente di ploeg tera a resultá di ta e dia mas significante di su bida. Segun cu e tabata traha den cunucu, Eliseo a ricibí un bishita inesperá di Elías, e profeta principal di Israel. Eliseo lo por a puntra su mes: ‘Ta kico lo e kier cu mi?’ E no tabatin cu warda muchu riba un contesta. Elías a tira su bistí oficial riba Eliseo, indicando cu un dia Eliseo lo a bira su sucesor. Eliseo no a trata e invitacion aki cu poco seriedad. Mesora, el a bandoná su cunucu pa bira asistente di Elías.—1 Reynan 19:19-21.

Rond di seis aña despues, a yega e tempu pa Elías bai. E relato di su despedida a ser yamá “un dje relatonan mas impresionante” den e Scritura Hebreo.

Elías Ta Prepará pa Bai

Elías a deseá di haci un bishita final na Betel, Jérico i Jordan. Esaki lo a nificá cu nan mester a cana hopi kilometer, di cua algun dor di tereno brutu yen di ceru. Na cada etapa dje biahe, Elías a animá Eliseo pa keda atras. Pero Eliseo a insistí pa keda cu su shon te na fin.—2 Reynan 2:1, 2, 4, 6.

Ora nan tabata na Betel i na Jérico, “e yu hombernan dje profetanan” a acercá Eliseo.a “Bo sa realmente cu awe Jehova ta bai kita bo shon di hefatura riba bo?” nan a puntr’é. “Mi tambe sa esei masha bon,” el a contestá. “Keda ketu.”—2 Reynan 2:3, 5.

Despues Elías i Eliseo a sigui pa Riu Jordan. Ora nan a yega Jordan, Elías a haci un milager segun cu rond di 50 yu di profeta tabata wak for di un distancia. “Elías a tuma su bistí oficial i a lor’é i a dal e awanan, i esakinan a dividí gradualmente e banda aki i e banda aya, di manera cu nan tur dos a crusa riba tera secu.”—2 Reynan 2:8.

Una bes nan a crusa, Elías a bisa Eliseo: “Pidi loke mi mester haci pa bo promé cu mi ser kitá for di bo.” Eliseo a pidi pa “dos parti” dje spiritu di Elías—esta, e porcion dòbel cu un yu primogénito normalmente lo a haña. En berdad, Eliseo a onra Elías mescos cu un yu primogénito lo a onra su tata. Ademas, el a ser ungí pa bira sucesor di Elías como profeta di Jehova den Israel. Pues su peticion no tabata egoista ni inapropiado. No obstante, sabiendo cu ta solamente Jehova por a cumpli cu e peticion aki, Elías a contestá cu modestia: “Bo a pidi un cos difícil.” Anto el a agregá: “Si bo mirá mi ora mi ser kitá for di bo, lo sosodé asina cu bo; pero si bo no mirá mi, lo e no sosodé.”—2 Reynan 2:9, 10; Deuteronomio 21:17.

Sin duda Eliseo tabata mas determiná cu nunca pa pega na su shon. Anto, “un garoshi di guera di candela i cabainan di candela” a aparecé. Dilanti Eliseo su wowonan hanchu habrí di asombro, Elías a ser hibá den un tempestad di bientu—transferí milagrosamente na un otro lugá.b Eliseo a piki e bistí oficial di Elías i a cana bai bek na oriya di Riu Jordan. El a dal e awanan, bisando: “Unda Jehova e Dios di Elías ta, asta E?” E awanan a dividí, loke a duna evidencia claro cu Eliseo tabatin e apoyo divino como sucesor di Elías.—2 Reynan 2:11-14.

Lesnan pa Nos

Ora Elías a extendé e invitacion na Eliseo pa compañ’é den sirbishi special, Eliseo a bandoná su cunucu inmediatamente pa sirbi e profeta principal di Israel. Evidentemente, algun di su tareanan tabata humilde, pasobra el a bira conocí como esun cu tabata “basha awa riba man di Elías.”c (2 Reynan 3:11) No obstante, Eliseo a mira su trabou como un privilegio, i el a pega lealmente na Elías su banda.

Hopi sirbidó di Dios awe ta desplegá un spiritu similar di sacrificio propio. Algun a bandoná nan “cunucunan,” nan trabou seglar, pa predicá e bon nobo den teritorionan leu of pa sirbi como miembro di un famia di Betel. Otronan a biaha pa teranan stranhero pa traha riba proyectonan di construccion di Sociedad. Hopi a aceptá loke por ser yamá tareanan humilde. Pero, ningun hende cu ta traha como esclabo pa Jehova ta efectuando un sirbishi insignificante. Jehova ta apreciá tur persona cu ta sirbié di buena gana, i lo e bendicioná nan spiritu di sacrificio propio.—Marco 10:29, 30.

Eliseo a pega na Elías te na fin. El a nenga di bandoná e profeta mas bieu asta ora e último aki a ofrec’é e oportunidad. Sin duda, e relacion íntimo cu el a cultivá cu Elías a haci tal amor leal un placer. Awe, Dios su sirbidónan ta haci esfuerso pa fortalecé nan relacion cu Dios i ta hala mas cerca nan compañeronan creyente. Un relacion íntimo di unidad lo ser bendicioná, pasobra Bijbel ta bisa di Jehova: “Cu un persona leal lo bo actua den lealtad.”—2 Samuel 22:26.

[Nota]