Un Mundu Hustu No Ta un Soño!

“HUSTICIA ta e gran preocupacion di hende riba tera,” segun e estadista mericano Daniel Webster. I Bijbel ta declará: “Jehova ta un stimador di husticia.” (Salmo 37:28) Dios a traha e promé pareha humano den su imágen, cu atributonan divino, incluyendo un sentido di husticia.—Génesis 1:26, 27.

E Scritura ta papia tambe di ‘hende dje nacionnan cu no tin ley cu di naturalesa ta haci e cosnan dje ley.’ Asina nan ta “demostrá cu e substancia dje ley ta skirbí den nan curason, miéntras cu nan concenshi ta duna testimonio cu nan i, entre nan mes pensamentu, nan ta ser acusá of asta dispensá.” (Romanonan 2:14, 15) Sí, hende ta dotá cu e facultad di concenshi—un sentido interno di loke ta bon i malu. Ta claro cu e necesidad pa husticia ta ancrá den hende.

Hende su necesidad pa husticia ta estrechamente ligá cu nan búskeda pa felicidad, pasobra Salmo 106:3 ta declará: “Felis ta esnan cu ta observá loke ta hustu, esnan cu ta haci husticia tur ora.” Pakico, anto, hende no tabata capas pa producí un mundu hustu?

Pakico Hende A Fracasá?

Un motibu básico pakico hende no a logra realisá un mundu hustu ta e mancha cu nos a heredá for di nos promé mayornan, Adam i Eva. Bijbel ta splica: “Pa medio di un solo hende picá a drenta mundu i morto pa medio di picá, i asina morto a plama na tur hende pasobra nan tur a peca.” (Romanonan 5:12) E mancha ta picá. Aunke Dios a crea nan sin defecto, Adam i Eva a dicidí di rebelá contra dje i asina a bira pecadó. (Génesis 2:16, 17; 3:1-6) P’esei, nan a pasa tendencianan malu i pecaminoso pa nan yunan.

Característicanan manera golosidad i prehuicio no ta e resultado di tendencianan pecaminoso? I e característicanan aki no ta contribuí na inhusticia den mundu? Sí, golosidad ta e rais di opresion económico i di abusu deliberá di medio ambiente! Sigur sigur prehuicio ta tras di conflicto étnico i inhusticia racial. Característicanan asina tambe ta inducí hende na horta, cometé estafa i actua den un manera cu ta perhudicá otronan.

Pa motibu di nos inclinacionnan pecaminoso, asta e mihó intencionnan pa ehercé husticia i pa haci bon hopi biaha ta faya. Apostel Pablo mes a confesá: “E bon cu mi ta deseá mi no ta haci, pero e malu cu mi no ta deseá ta loke mi ta practicá.” El a sigui splica e lucha, bisando: “Realmente mi tin deleite den e ley di Dios segun e homber cu mi ta paden, pero mi ta contemplá den mi miembronan un otro ley cu ta haci guera contra e ley di mi mente i ta hibá mi catibu n’e ley di picá cu ta den mi miembronan.” (Romanonan 7:19-23) Probablemente, awe nos tin e mésun conflicto. Ta p’esei tin asina tantu inhusticia ta tuma lugá.

Hende su forma di goberná tambe a contribuí na inhusticia den mundu. Den tur pais, tin tantu ley como esnan cu ta imponé nan. I naturalmente tin hues i cortenan. Claro, algun hende guiá pa principio a purba sostené derechonan humano i percurá pa por tin husticia igual pa tur hende. Tog, gran parti di nan esfuersonan a fracasá. Pakico? Resumiendo vários factor enbolbí den nan fracaso, Jeremías 10:23 ta mustra: “Mi sa masha bon, O Jehova, cu na hende terenal no ta pertenecé su caminda. No ta pertenecé na hende cu ta canando pa ni sikiera dirigí su paso.” Siendo cu e ta alehá for di Dios, hende simplemente ta incapas pa establecé un mundu recto i hustu.—Proverbionan 14:12; Eclesiástes 8:9.

Un barera grandi cu ta stroba hende su esfuerso pa construí un mundu hustu ta Satanas e Diabel. Bijbel ta declará claramente cu e angel rebelde Satanas ta e promé “matadó” i “mentiroso” i cu “henter e mundu ta drumí den poder dje malbado.” (Juan 8:44; 1 Juan 5:19) Apostel Pablo ta identifik’é como “e dios dje sistema di cosnan aki.” (2 Corintionan 4:3, 4) Como un odiadó di husticia, Satanas ta haci tur loke ta posibel pa promové maldad. Tanten cu e ta dominá mundu, tur sorto di inhusticia i e calamidadnan cu ta resultá for di eseinan lo sclabisá humanidad.

Tur esaki ta nificá cu inhusticia ta inevitabel den sociedad humano? Un mundu hustu ta un soño imposibel?

Un Mundu Hustu Ta un Realidad—Con?

Pa e speransa di un mundu hustu bira un realidad, humanidad tin cu acudí na un fuente cu por caba cu e causanan di inhusticia. Pero ken por kita picá i eliminá Satanas i su gobernacion? Ta obvio cu ningun hende ni ningun agencia humano por cumpli cu un tarea formidabel asina. Solamente Jehova Dios por! Bijbel ta declará tocante dje: “E Baranca, perfecto ta su actividad, pasobra tur su camindanan ta husticia. Un Dios di fieldad, cu ken no tin inhusticia; hustu i recto e ta.” (Deuteronomio 32:4) I como “un stimador di husticia,” Jehova kier pa humanidad disfrutá di bida den un mundu hustu.—Salmo 37:28.

Papiando dje areglo di Dios pa producí un mundu hustu, apostel Pedro a skirbi: “Tin shelu nobo i un tera nobo cu nos ta spera segun su promesa, i den esakinan husticia lo tin cu biba.” (2 Pedro 3:13) E “shelu nobo” aki no ta un shelu físico nobo. Dios a traha nos shelu físico perfecto, i e ta duna gloria na Dios. (Salmo 8:3; 19:1, 2) E “shelu nobo” ta un gobernacion nobo pa goberná e tera. E “shelu” actual ta consistí di gobiernunan cu hende a forma. Masha pronto, na Armagedon, e guera di Dios, esakinan lo traha lugá pa e “shelu nobo”—su Reino of gobiernu celestial. (Revelacion 16:14-16) E Rey dje Reino ei ta Jesucristo. Despues di trece un fin permanente na gobernacion humano, e gobiernu aki lo goberná pa tempu indefiní.—Daniel 2:44.

Kico, anto, ta e “tera nobo”? Esei no ta un planeta nobo, pasobra Dios a traha e tera net bon pa hende habit’é, i su boluntad ta pa e permanecé pa semper. (Salmo 104:5) E “tera nobo” ta referí na un sociedad nobo di hende. (Génesis 11:1; Salmo 96:1) E “tera” cu lo ser destruí ta consistí di hende cu ta haci nan mes parti dje sistema di cosnan malbado. (2 Pedro 3:7) E “tera nobo” cu ta reemplasá nan lo consistí di berdadero sirbidónan di Dios, cu ta odia maldad i cu ta stima husticia i rectitud. (Salmo 37:10, 11) Asina e mundu di Satanas lo disparcé pa semper.

Pero kico ta spera Satanas? Apostel Juan a predicí: “El [Cristo Jesus] a gara e dragon, e colebra original, cu ta e Diabel i Satanas, i a mar’é pa mil aña. I el a tir’é den abismo i a cer’é i a sey’é riba dje, p’e no gaña e nacionnan mas.” (Revelacion 20:1-3) Satanas na cadena lo no tin mas influencia riba humanidad cu un prezu cerá den un cueba profundo. Ki un alivio e anticipacion ei di un mundu hustu lo ta pa humanidad! I na fin dje mil añanan, Satanas lo ser aplastá i eliminá for di existencia.—Revelacion 20:7-10.

Pero, kico di picá heredá? Jehova ya caba a percurá e base pa kita picá. “E Yu di hende [Jesucristo] a bini . . . pa duna su alma como rescate en cambio pa hopi.” (Mateo 20:28) E palabra “rescate” ta nificá e prijs cu ta ser exigí p’e liberacion di esnan cautivo. Jesus a paga e prijs cu su bida humano perfecto como e rescate pa libra humanidad.—2 Corintionan 5:14; 1 Pedro 1:18, 19.

Asta awor nos por beneficiá di Jesus su sacrificio di rescate. Dor di ehercé fe den dje, nos por disfrutá di un posicion limpi dilanti Dios. (Echonan 10:43; 1 Corintionan 6:11) Bou dje mando dje Reino di Dios, e rescate lo haci posibel pa humanidad recobrá completamente for di picá. E último buki di Bijbel ta describí un “riu di awa di bida” figurativo cu ta sali for dje trono di Dios, i cantu di su oriyanan tin e palunan di fruta simbólico cu blachi “pa curacion dje nacionnan.” (Revelacion 22:1, 2) Loke Bijbel ta describí aki ta representá e percuracion maraviyoso dje Creador pa humanidad recobrá for di picá riba e base di Jesus su sacrificio di rescate. E aplicacion completo dje percuracion aki lo libra humanidad obediente for di picá i morto.

Bida den un Mundu Hustu

Imaginá bo con bida lo ta bou di gobernacion di Reino. Crímen i violencia lo ta cosnan di pasado. (Proverbionan 2:21, 22) Inhusticia económico lo disparcé. (Salmo 37:6; 72:12, 13; Isaías 65:21-23) Tur rastro di discriminacion social, racial, étnico i di tribu lo ser eliminá. (Echonan 10:34, 35) Guera i armanan di guera lo no existí mas. (Salmo 46:9) Miyones di morto lo ser restorá na bida den un mundu liber di inhusticia. (Echonan 24:15) Tur hende lo disfrutá di salú perfecto i vibrante. (Job 33:25; Revelacion 21:3, 4) Bijbel ta sigurá nos: “Den apego na e berdad, [Jesucristo] lo producí husticia.”—Isaías 42:3.

Miéntras tantu, inhusticia por bini riba nos, pero en buelta, laga nos nunca ser inhustu. (Mikéas 6:8) Asta ora nos tin cu wanta inhusticia, laga nos mantené un punto di bista positivo. Pronto e mundu hustu primintí lo bira un realidad. (2 Timoteo 3:1-5; 2 Pedro 3:11-13) Dios Todopoderoso a duna su palabra, i ‘lo e resultá di ta.’ (Isaías 55:10, 11) Awor ta e tempu pa nos prepará pa biba den e mundu hustu ei dor di siña loke Dios ta rekerí di nos.—Juan 17:3; 2 Timoteo 3:16, 17.

[Plachi na página 7]

Tur rastro di inhusticia lo ser eliminá den Dios su mundu nobo primintí