Pronto Glorioso Libertad p’e Yunan di Dios

“E creacion a ser sometí na banidad . . . riba base dje speransa di cu e creacion mes tambe lo ser librá for di sclabitud na corupcion i lo tin e glorioso libertad dje yunan di Dios.”—ROMANONAN 8:20, 21.

1. Con Jesus su sacrificio a ser prefigurá riba e Dia di Expiacion?

JEHOVA a duna su Yu unigénito como un sacrificio di rescate cu a habri e caminda pa bida celestial pa 144.000 hende, i prospectonan terenal eterno p’e resto di humanidad. (1 Juan 2:1, 2) Manera a ser mencioná den e artículo anterior, Jesus su sacrificio pa cristiannan engendrá pa spiritu a ser prefigurá ora e sumo sacerdote di Israel a sacrificá riba e Dia di Expiacion anual un toro como ofrenda pa picá pa su mes, su famia di cas i e tribu di Levi. Riba e mésun dia, el a sacrificá un cabritu como ofrenda pa picá pa tur e otro israelitanan, mescos cu e sacrificio di Cristo lo beneficiá humanidad en general. Simbólicamente, un cabritu bibu a hiba tur e pueblo su picánan dje último aña, disparciendo den e desierto.a—Levítico 16:7-15, 20-22, 26.

2, 3. Kico Pablo su declaracion registrá na Romanonan 8:20, 21 ta nificá?

² Despues cu el a describí e speransa di hende cu lo a bira ‘yu celestial di Dios,’ apostel Pablo a bisa: “E expectativa anheloso dje creacion ta spera e revelacion dje yunan di Dios. Pasobra e creacion a ser sometí na banidad, no dor di su mes boluntad sino dor di esun cu a somet’é, riba base dje speransa di cu e creacion mes tambe lo ser librá for di sclabitud na corupcion i lo tin e glorioso libertad dje yunan di Dios.” (Romanonan 8:14, 17, 19-21) Kico e declaracion aki ta nificá?

³ Ora nos antepasado Adam a ser creá como un hende perfecto, e tabata un “yu di Dios.” (Lucas 3:38) Pa motibu cu el a peca, el a cai den “sclabitud na corupcion” i a pasa e condicion aki p’e rasa humano. (Romanonan 5:12) Dios a permití hende nace cu banidad nan dilanti debí na nan imperfeccion heredá, pero el a duna speransa mediante e “simia,” Jesucristo. (Génesis 3:15; 22:18; Galationan 3:16) Revelacion 21:1-4 ta señalá n’e tempu ora ‘lo no tin morto, ni lamento, ni sclamacion ni dolor mas.’ Siendo cu esaki ta un promesa na “humanidad,” e ta sigurá nos cu un sociedad terenal nobo di hende cu ta biba bou di gobernacion di Reino lo experenciá restoracion di mente i curpa na pleno salú i bida eterno como ‘yu terenal di Dios.’ Durante Cristo su Reino di Mil Aña, hende obediente “lo ser librá for di sclabitud na corupcion.” Despues cu nan proba di ta leal na Jehova durante un prueba final, nan lo ta liber pa semper di picá i morto heredá. (Revelacion 20:7-10) Esnan riba tera e ora ei lo “tin e glorioso libertad dje yunan di Dios.”

Nan Ta Bisa “Bin!”

4. Kico kier men “tuma e awa di bida grátis”?

⁴ Ki un speransa maraviyoso ta poní dilanti humanidad! Nada straño cu cristiannan ungí cu spiritu cu ainda ta riba tera celosamente ta hiba delantera den conta otronan tocante dje! Como esnan cu lo bira parti dje “bruid” dje Lamchi glorificá, Jesucristo, e resto ungí ta enbolbí den e cumplimentu dje palabranan profético aki: “E spiritu i e bruid ta sigui bisa: ‘Bin!’ I laga ken cu ta tende bisa: ‘Bin!’ I laga ken cu tin sed bini; laga ken cu kier tuma e awa di bida grátis.” (Revelacion 21:2, 9; 22:1, 2, 17) No, e beneficionan di Jesus su sacrificio di rescate no ta limitá n’e 144.000 personanan ungí. E spiritu di Dios ta sigui obra atrabes dje resto dje clase di bruid riba tera bisando “Bin.” Ken cu ta tende i cu tin sed pa husticia ta ser invitá pa bisa “Bin,” probechando di Jehova su percuracion abundante pa salbacion.

5. Ken Testigonan di Jehova ta contentu di por tin den nan seno?

⁵ Testigonan di Jehova tin fe den e percuracion di Dios pa bida mediante Jesucristo. (Echonan 4:12) Nan ta contentu di por tin den nan seno personanan di curason onrado cu ta deseá di siña tocante e propósito di Dios i haci su boluntad. Nan Salonnan di Reino ta habrí pa tur cu ta deseá di ‘bini i tuma e awa di bida grátis’ den “e tempu di fin” aki.—Daniel 12:4.

Cambionan cu A Bini cu Pasamentu di Tempu

6. Con e spiritu di Dios a obra riba Jehova su sirbidónan durante vários periodo di tempu?

⁶ Dios tin un tempu pa efectuá su propósitonan, i esaki ta influenciá su trato cu hende. (Eclesiástes 3:1; Echonan 1:7) Aunke e spiritu di Dios a bini riba su sirbidónan di tempunan pre-cristian, nan no a ser engendrá como su yunan spiritual. Pero, cuminsando cu Jesus, Jehova su tempu a yega pa usa e spiritu santu pa engendrá homber i muhernan dedicá pa un herencia celestial. I kico di nos tempu? E mésun spiritu ta obrando riba Jesus su “otro carnénan,” pero e no ta lanta den nan e speransa i deseo pa bida celestial. (Juan 10:16) Cu bida eterno riba un tera paradísico como e speransa cu Dios a duna nan, gososamente nan ta apoyá e resto ungí den duna testimonio durante e periodo aki di transicion for dje mundu bieu p’e hustu mundu nobo di Dios.—2 Pedro 3:5-13.

7. Ki trabou di cosecha e Studiantenan di Bijbel tabata ocupá den dje, pero kico nan tabata sa tocante paradijs?

⁷ Dios a cuminsá “hiba hopi yu na gloria” cu e dramamentu di spiritu santu na Pentecoste di 33 E.C., i aparentemente el a fiha un tempu pa completá e ‘Israel spiritual di Dios’ cu un total di 144.000. (Hebreonan 2:10; Galationan 6:16; Revelacion 7:1-8) Cuminsando na 1879, hopi biaha e revista aki a mencioná un trabou di cosecha cu a enbolbé cristiannan ungí. Pero e Studiantenan di Bijbel (yamá awor Testigonan di Jehova) tabata sa tambe cu e Scritura ta ofrecé e speransa di bida eterno riba un tera paradísico. Por ehempel, e Toren di Vigilancia [na ingles] di juli 1883 a bisa: “Despues cu Jesus establecé su reino, destruí maldad, etc., e tera aki lo bira un paradijs, . . . i tur esnan cu ta den nan graf lo drenta den dje. I dor di bira obediente na su leynan nan lo por biba pa semper den dje.” Segun cu tempu a pasa, e cosecha di esnan ungí a mengua, i gradualmente individuonan cu no tabatin e speransa celestial a ser cosechá pa drenta Jehova su organisacion. Miéntras tantu, Dios a duna su sirbidónan ungí, cristiannan cu a nace di nobo, comprendimentu penetrante notabel.—Daniel 12:3; Filipensenan 2:15; Revelacion 14:15, 16.

8. Con comprendimentu dje speransa terenal a desaroyá na cuminsamentu di añanan ’30?

⁸ Foral desde 1931 esnan cu tin e speransa terenal ta asociando cu e congregacion cristian. Den e aña ei, Jehova a iluminá e resto di cristiannan engendrá pa spiritu pa mira cu Ezekiel capítulo 9 ta referí n’e clase terenal aki, cu ta ser marcá pa sobrebibí i drenta den Dios su mundu nobo. Na 1932 nan a yega n’e conclusion cu tal persona mansu manera carné dje tempu actual a ser prefigurá dor di Jehú su socio Jónadab (Jehónadab). (2 Reynan 10:15-17) Na 1934 a bira claro pa nan cu e “jónadabnan” mester a “consagrá,” of dedicá, nan mes na Dios. Na 1935 a identificá e “multitud grandi,”—cu anteriormente nan a pensa ta un clase spiritual secundario cu lo tabata “compañeronan” dje bruid di Cristo den shelu—como otro carnénan cu tin un speransa terenal. (Revelacion 7:4-15; 21:2, 9; Salmo 45:14, 15) I specialmente desde 1935 esnan ungí ta hibando delantera den un búskeda pa hende recto cu ta anhelá pa biba pa semper riba un tera paradísico.

9. Despues di 1935, pakico algun cristian a stop di tuma for dje emblemanan n’e Cena di Señor?

⁹ Despues di 1935 algun cristian cu tabata tuma parti dje pan i biña n’e Cena di Señor a stop di participá. Pakico? Pasobra nan a realisá cu nan speransa tabata terenal, no celestial. Un señora cu a ser bautisá na 1930 a bisa: “Aunke nos a considerá cu tabata corecto pa [tuma dje pan i biña], specialmente pa ministernan celoso di tempu completo, ami nunca tabata convencí cu mi tabatin un speransa celestial. Anto, na 1935, nan a clarificá pa nos cu un multitud grandi tabata ser recogé cu e speransa di biba pa semper riba tera. Hopi di nos a alegrá ora nos a comprendé cu nos tabata parti dje multitud grandi ei, i nos a stop di tuma for dje emblemanan.” Asta publicacionnan cristian a cambia di contenido. Miéntras esnan dje añanan anterior tabata principalmente diseñá pa Jesus su siguidónan engendrá pa spiritu, for di 1935 padilanti E Toren di Vigilancia i otro literatura dje ‘esclabo fiel’ a percurá cuminda spiritual cu a cuadra cu e necesidadnan di tantu e ungínan como nan socionan cu tin e speransa terenal.—Mateo 24:45-47.

10. Con kisas un ungí infiel ta ser reemplasá?

¹⁰ Suponé cu un ungí bira infiel. Lo e ser reemplasá? Pablo a indicá cu sí den su consideracion dje palu di olijfi simbólico. (Romanonan 11:11-32) Si un persona engendrá pa spiritu mester ser reemplasá, probablemente Dios lo duna e yamamentu celestial na un persona kende su fe tabata ehemplar den rindi sirbishi sagrado na dje pa hopi aña.—Compará cu Lucas 22:28, 29; 1 Pedro 1:6, 7.

Hopi Motibu pa Gratitud

11. Sea cual sea e clase di speransa cu nos tin, di kico Santiago 1:17 ta sigurá nos?

¹¹ Unda cu nos sirbi Jehova den fieldad, lo e satisfacé nos necesidad i deseonan recto. (Salmo 145:16; Lucas 1:67-74) Sea nos tin un berdadero speransa celestial of nos prospectonan ta terenal, nos tin hopi motibu sólido pa mustra gratitud na Dios. Semper e ta haci cosnan cu ta na mihó interes di esnan cu ta stim’é. Disipel Santiago a bisa cu “tur bon don i tur regalo perfecto ta bini di ariba, pasobra e ta baha for dje Tata dje lusnan celestial,” Jehova Dios. (Santiago 1:17) Laga nos tuma nota di algun dje don i bendicionnan aki.

12. Pakico nos por bisa cu Jehova a duna cada un di su fiel sirbidónan un speransa maraviyoso?

¹² Jehova a duna cada un di su fiel sirbidónan un speransa maraviyoso. El a yama algun pa bida celestial. Na su testigonan pre-cristian, Jehova a duna e speransa espléndido di un resureccion pa bida eterno riba tera. Por ehempel, Abraham tabatin fe den e resureccion i a spera riba “e stad cu tin berdadero fundeshi”—e Reino celestial bou di cua lo e ser resucitá pa bida terenal. (Hebreonan 11:10, 17-19) Un biaha mas, den e tempu aki di fin, Dios ta otorgando na miyones di hende e speransa di bida eterno den un paradijs riba tera. (Lucas 23:43; Juan 17:3) Siguramente, ken cu Jehova duna un speransa magnífico asina mester ta profundamente gradicidu p’e.

13. Con e spiritu santu di Dios a obra riba su pueblo?

¹³ Jehova ta impartí su spiritu santu como un don na su pueblo. E cristiannan cu a haña un speransa celestial ta ser ungí cu spiritu santu. (1 Juan 2:20; 5:1-4, 18) Pero, e sirbidónan di Dios cu tin prospectonan terenal tin e yudansa i guia dje spiritu. Entre esakinan tabatin Moises, kende tabatin Jehova su spiritu, mescos tambe e 70 hombernan cu a ser nombrá pa asistié. (Númeronan 11:24, 25) Bou di influencia di spiritu santu, Bezalel a sirbi como un artesano experto en coneccion cu e tabernáculo di Israel. (Exodo 31:1-11) E spiritu di Dios a bini riba Gídeon, Jefte, Samson, David, Elías, Eliseo i otronan. Aunke e individuonan aki di antigwedad hamas lo ser hibá na gloria celestial, spiritu santu a guia i yuda nan, mescos tambe cu Jesus su otro carnénan awe. Pues anto, e echo cu nos ta poseé e spiritu di Dios no kier men cu nos mester tin e yamamentu celestial. Sin embargo, e spiritu di Jehova ta duna guia, ta yuda nos predicá i cumpli cu otro asignacionnan cu Dios a duna nos, ta duna nos poder mas ayá di loke ta normal, i ta producí den nos su fruta di amor, goso, pas, gran pacenshi, amabilidad, bondad, fe, suavedad i dominio propio. (Juan 16:13; Echonan 1:8; 2 Corintionan 4:7-10; Galationan 5:22, 23) Nos no mester ta gradicidu p’e don aki di Dios su bondad inmerecí?

14. Con nos ta beneficiá di Dios su donnan di conocimentu i sabiduria?

¹⁴ Conocimentu i sabiduria ta donnan for di Dios pa cua nos mester ta gradicidu, sea nos speransa ta celestial of terenal. Conocimentu exacto di Jehova ta yuda nos “haci sigur dje cosnan mas importante” i “cana di un manera digno di Jehova afin di agrad’é plenamente.” (Filipensenan 1:9-11; Colosensenan 1:9, 10) Sabiduria piadoso ta sirbi como un proteccion i guia den bida. (Proverbionan 4:5-7; Eclesiástes 7:12) Berdadero conocimentu i sabiduria ta basá riba e Palabra di Dios, i e poco ungínan cu a resta ta ser atraí specialmente na loke e ta bisa tocante nan speransa celestial. Sin embargo, amor p’e Palabra di Dios i un bon comprendimentu di dje no ta e manera cu Dios ta indicá cu nos a ser yamá pa bida celestial. Hombernan manera Moises i Daniel asta a skirbi porcionnan di Bijbel, tog nan lo ser resucitá na bida riba tera. Sea nos speransa ta celestial of terenal, nos tur ta ricibí alimento spiritual atrabes dje “esclabo fiel i discreto” cu Jehova a aprobá. (Mateo 24:45-47) Ki gradicidu nos tur ta p’e conocimentu cu nos a adkerí dje forma ei!

15. Kico ta un dje mayor donnan di Dios, i con abo ta mir’é?

¹⁵ Un dje mayor donnan di Dios ta e percuracion amoroso di Jesus su sacrificio di rescate, cu ta beneficiá nos sea nos tin un prospecto celestial of un speransa terenal. Dios a stima mundu di humanidad “asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.” (Juan 3:16) I Jesus su amor a motiv’é “pa duna su alma como rescate en cambio pa hopi.” (Mateo 20:28) Manera apostel Juan a splica, Jesucristo “ta un sacrificio di reconciliacion pa nos picánan [esnan dje ungínan], pero no pa esnan di nos so sino tambe pa esnan di henter e mundu.” (1 Juan 2:1, 2) P’esei, nos tur mester ta profundamente gradicidu p’e percuracion amoroso aki pa salbacion pa bida eterno.b

Lo Bo Ta Presente?

16. Ki evento notabel lo ser conmemorá despues cu solo baha dia 11 di april, 1998, i ken mester ta presente?

¹⁶ Gratitud p’e rescate cu Dios a percurá mediante su Yu mester conmové nos pa t’ei presente na Salon di Reino of otro lugánan unda Testigonan di Jehova lo reuní despues cu solo baha dia 11 di april, 1998, pa conmemorá e morto di Cristo. Ora el a instituí e celebracion aki cu su fiel apostelnan riba e último anochi di su bida terenal, Jesus a bisa: “Sigui haci esaki na mi recuerdo.” (Lucas 22:19, 20; Mateo 26:26-30) E poco ungínan cu a resta lo tuma dje pan sin zuurdeeg cu ta representá Jesus su curpa humano sin picá, i e biña corá secu cu ta nificá su sanger dramá den sacrificio. Solamente cristiannan engendrá pa spiritu mester tuma di nan pasobra ta solamente nan ta den e pacto nobo i den e pacto di Reino i nan tin e testimonio indiscutibel dje spiritu santu di Dios cu nan tin un speransa celestial. Miyones di otronan lo ta presente como observadónan respetuoso cu ta gradicidu p’e amor cu Dios i Cristo a mustra en coneccion cu Jesus su sacrificio cu ta haci bida eterno posibel.—Romanonan 6:23.

17. Kico nos mester corda relacioná cu ungimentu cu spiritu?

¹⁷ Creencianan religioso di pasado, emocionnan fuerte cu ta surgi ora un ser kerí muri, dificultadnan cu hende ta topa den nan bida actual, of e sintimentu cu nan a ricibí algun bendicion special for di Jehova lo por hiba algun na asumí ekibocadamente cu nan tin un yamamentu celestial. Pero nos tur mester corda cu e Scritura no ta manda nos participá dje emblemanan di Memorial pa mustra nos gratitud p’e sacrificio di rescate di Cristo. Ademas, ungimentu cu spiritu “ta dependé, no di esun cu ta deseá ni di esun cu ta core, sino di Dios,” Esun cu a engendrá Jesus como Yu spiritual i cu ta hiba solamente 144.000 otro yu na gloria.—Romanonan 9:16; Isaías 64:8.

18. Pa mayoria di esnan cu ta sirbi Jehova awe, ki bendicionnan lo tin den futuro?

¹⁸ Bida eterno den un paradijs riba tera ta e speransa cu Dios a duna e mayoria inmenso di hende cu ta sirbi Jehova den e último dianan aki. (2 Timoteo 3:1-5) Pronto, nan lo disfrutá dje paradijs maraviyoso aki. E tempu ei prinsnan lo manehá asuntunan terenal bou di gobernacion celestial. (Salmo 45:16) Condicionnan pacífico lo existí segun cu habitantenan dje tera ta cumpli cu e leynan di Dios i ta siña mas tocante e camindanan di Jehova. (Isaías 9:6, 7; Revelacion 20:12) Lo tin hopi trabou di haci, manera, construí casnan i dominá e tera. (Isaías 65:17-25) I pensa dje felis reencuentro di famia segun cu e mortonan ta bolbe bek na bida! (Juan 5:28, 29) Despues di un prueba final, tur maldad lo disparcé. (Revelacion 20:7-10) Pa semper despues, e tera lo ta yená cu hende perfecto cu a ser ‘librá for di sclabitud na corupcion i cu tin e glorioso libertad dje yunan di Dios.’

[Nota]

Con Lo Bo Contestá?

◻ Kico kier men “tuma e awa di bida grátis”?

◻ Sea nos speransa ta celestial of terenal, ki motibunan nos tin pa mustra gratitud na Dios?

◻ Na ki celebracion anual nos tur tin cu asistí?

◻ Pa mayoria dje pueblo di Jehova, kico e futuro ta encerá?

[Plachi na página 18]

Miyones di hende a cuminsá “tuma e awa di bida grátis.” Abo ta entre nan?