Esclabo di Hende of Sirbidó di Dios?

“BO TIN cu mas o ménos admirá Testigonan di Jehova.” Asina e buki aleman Seher, Grübler, Enthusiasten (Utopistanan, Analistanan, Entusiásticonan). Aunke e ta criticá e Testigonan un poco, e ta admití: “Por lo general, nan ta hiba un bida di clase media, sin mancha. Nan ta diligente i conciencial den nan trabou, ciudadanonan ketu i pagadónan onesto di belasting. Nan ta abstené di core locamente tras di rikesa. . . . Nan disiplina na congresonan ta digno di elogio. Nan spiritu di sacrificio propio ta igualá esun di cualkier otro grupo religioso; pa loke ta e ministerio nan ta superá tur otro. Pero loke ta elevá nan riba tur otro iglesia cristian i grupo di nos tempu ta e determinacion absolutamente inkebrantabel cu cua mayoria di nan ta proclamá nan doctrinanan bou di tur circunstancia i enfrentando tur rísico.”a

Apesar di un evaluacion positivo asina, algun bos ta purba presentá Testigonan di Jehova den un lus basta diferente. Den mayoria pais rond mundu, e Testigonan a efectuá nan servicionan religioso abiertamente pa décadanan sin interferencia. Miyones di hende conocé nan, ta respetá nan i ta di acuerdo cu nan tin derecho di practicá nan religion. Pakico anto, tin cierto incertidumbre tocante ken Testigonan di Jehova ta?

Tal bes un motibu p’e incertidumbre ta cu den tempu recien un cantidad di otro gruponan religioso a bira enbolbí den abusu di mucha, suicidio masal i atakenan terorista. Naturalmente, tur caminda bo por haña conducta abnormal manera esakinan, no solamente entre hende cu ta religioso. Sin embargo, pa loke ta trata religion, hopi hende a bira sképtico, algun asta hostil.

Peligernan di Sigui Hende

Un “secta” a ser definí como “un grupo di hende cu ta pega na un doctrina distintivo of na un lider.” Di igual manera, esnan cu ta pertenecé na un “culto” tin “gran debocion na un persona, idea of cos.” En realidad, e miembronan di cualkier grupo religioso cu ta pega firmemente na lidernan humano i nan ideanan, ta den peliger di bira esclabo di hende. Un relacion fuerte pa cu un lider por hiba na un dependencia emocional i spiritual insaludabel. E peliger por bira mas grandi ora un persona for di infancia lanta den un ambiente di secta.

Hende cu tin e clase di preocupacionnan ei tocante un religion tin mester di informacion confiabel. Kisas algun a ser bisá cu Testigonan ta pertenecé na un organisacion religioso cu ta sclabisá su miembronan, ta ehercé control autoritario riba nan, ta restringí nan libertad indebidamente, i ta pone cu nan no ta pas den e totalidad di sociedad.

Testigonan di Jehova sa cu e preocupacionnan ei no ta hustificá. P’esei, nan ta invitá bo pa chek pa bo mes. Despues di un consideracion cuidadoso, saca bo propio conclusionnan. E Testigonan ta sirbidó di Dios, manera nan ta afirmá, of eigenlijk esclabo di hende? Kico ta e fuente di nan fortalesa? E dos artículonan na página 12 pa 23 lo duna contestanan satisfactorio n’e preguntanan ei.

[Nota]