Ken Jehova Ta?

JEHOVA a bisa un di su fiel adoradónan: “Ningun hende por mirá mi i tog biba.” (Exodo 33:20) “Dios ta un Spiritu,” i ser humano no por mir’é cu nan wowo físico. (Juan 4:24) Mescos cu lo ta desastroso pa wak directamente den e solo di merdia pa nos wowo, asina lo ta desastroso pa nos mira e tremendo Fuente di energia cu a crea no solamente nos solo briyante sino tambe e incontabel otro solonan den universo.

Afortunadamente, nos no tin nodi mira Dios pa haña sa tocante dje. Bijbel ta identificá Esun cu a prepará e pakete maraviyoso ei, e tera, pa nos, i tambe e ta revelá su personalidad. P’esei ta bale la pena pa wak den Bijbel pa haña sa tocante e Tata cu a duna nos bida i cu a percurá un hogar deleitabel den cua nos por disfrutá dje bida ei.

E Nificacion di Su Nomber

Tur nomber tin un nificacion, maske hopi hende kisas no ta conciente di nan awe. Por ehempel, e nomber comun David ta bini di un palabra hebreo cu ta nificá “Stimá.” E nomber dje Creador, Jehova, tambe tin un nificacion. Kico e ta? Den e hebreo original di Bijbel, e nomber divino ta skirbí cu cuater letter, YHWH, i ta aparecé casi 7.000 bes den e parti hebreo di Bijbel. Bijbel ta duna di comprendé cu e nomber divino ta nificá “E Ta Causa pa Yega di Ser.” Esei ta implicá cu den su sabiduria Jehova ta causa cu e ta yega di ser loke e mester ta pa cumpli cu su propósitonan. E ta Creador, Hues, Salbador, Sostenedor di Bida, i p’esei e por cumpli cu su promesanan. Ademas, na hebreo e nomber Jehova ta den un forma cu ta indicá un accion cu ta den e proceso pa cumpli. Sí, ainda Jehova ta causando cu e ta yega di ta e cumplidor di su propósitonan. E ta un Dios bibu!

Jehova Su Cualidadnan Predominante

Bijbel ta describí e Creador como “un Dios misericordioso i yen di gracia, cu ta tarda pa rabia i ta abundante den bondad amoroso i berdad, conserbando bondad amoroso pa miles, pordonando eror i transgresion i picá.” (Exodo 34:6, 7) E expresion “bondad amoroso” ta bini di un palabra hebreo masha significativo. E ta denotá un bondad cu ta pega su mes amorosamente na un obheto te ora su propósito p’e obheto ei ser realisá. E por ser traducí tambe como “amor leal.” Jehova su bondad ta pega su mes amorosamente na su criaturanan i ta cumpli cu su propósitonan maraviyoso. Lo bo no ta contentu di haña un amor asina for di Esun cu a duná bo bida?

Jehova ta tarda pa rabia i ta lihé pa pordoná nos erornan. Ta conmovedor pa ta íntimo cu un persona asina. Sin embargo, esei no kier men cu e ta pasa por haltu di malecho. El a declará: “Ami, Jehova, ta stima husticia, ta odia robo huntu cu inhusticia.” (Isaías 61:8) Como e Dios di husticia, lo e no tolerá pa semper pecadónan prufiá cu ta persistí den nan maldad. Pues, nos por ta sigur cu na su debido tempu, Jehova lo corigí e inhusticianan den mundu. Lo e no bira lomba pa esnan afligí.

No ta fácil pa mantené un balansa perfecto entre amor i husticia. Si bo ta un mayor, bo ta haña ta difícil pa dicidí ki ora, con i te na ki grado corigí bo yunan ora nan comportá nan malu? Pa balansá husticia cu compasion amoroso mester tin gran sabiduria. Jehova ta desplegá e cualidad aki na abundancia ora e ta trata cu hende. (Romanonan 11:33-36) En berdad, bo por mira e sabiduria dje Creador tur caminda, por ehempel den e maraviyanan di creacion cu ta rondoná nos.—Salmo 104:24; Proverbionan 3:19.

Tog, tin sabiduria no ta tur cos. Pa cumpli cu su boluntad, e Creador mester tin poder tambe, i Bijbel ta revelá cu e ta masha poderoso: “Hisa boso wowo na haltu i mira. Ken a crea e cosnan aki? Ta Esun cu ta saca e ehército di nan asta pa number, tur di cua e ta yama asta pa nomber. Debí n’e abundancia di energia dinámico, pasobra e ta vigoroso den poder tambe, ningun di nan ta falta.” (Isaías 40:26) Cu un “abundancia di energia dinámico,” Jehova ta logra cosnan. Un cualidad asina no ta atraé bo na dje?

Dios di Tur Nacion

Kisas bo ta puntra bo mes: ‘Pero Jehova no ta e Dios dje “Testament Bieu,” e Dios di Israel di antigwedad?’ Ta cierto cu Jehova a revelá su mes n’e israelitanan. Tog, pa e echo cu el a crea e promé pareha humano, Jehova ta e Dios “na ken tur famia . . . riba tera debe nan nomber.” (Efesionan 3:15) Si bo ta kere cu ta corecto pa respetá bo antepasadonan, lo no ta apropiado pa mustra onor na Esun cu a duna bida n’e promé homber, nos antepasado comun, for di cua tur genealogia cu ta existí riba tera awe a bini?

E Creador di humanidad no tin un mente cerá. Ta cierto cu na un tempu e tabatin un relacion special cu e nacion di Israel. Pero asta e ora ei, el a habri su brasanan pa tur cu a inbocá su nomber. Un rey sabí di Israel a bisa den oracion na Jehova: “N’e stranhero, cu no ta parti di bo pueblo Israel i cu realmente ta bini for di un tera leu pa causa di bo nomber . . . , cu abo mes por scucha for di shelu, . . . i bo tin cu haci conforme tur cos pa cua e stranhero ta sclama na bo; afin di cu tur pueblo dje tera por yega na conocé bo nomber.” (1 Reynan 8:41-43) Te n’e dia djawe, hende di tur nacion por yega na conocé Jehova i tin un relacion significativo cuné. Pero ki efecto esei tin riba bo?

E Beneficionan di Conocé Jehova

Pa bolbe bek n’e ilustracion den e artículo anterior, si bo a ricibí un pakete nechi lorá, ta claro cu bo kier haña sa con bin bo a haña e regalo. Con bo mester us’é i soru p’e? Di igual manera, nos kier sa kico Dios tabatin na mente ora el a prepará e tera pa nos. Bijbel ta bisa cu e “no a cre’é simplemente pornada,” sino cu el “a form’é asta pa ser habitá,” esta dor di hende.—Isaías 45:18.

Pero, mayoria hende no a cuida e regalo dje Creador. Nan ta bezig ta ruiná e tera, i esei ta desagradá Jehova bastante. Sin embargo, na armonia cu e nificacion di su nomber, Jehova ta determiná pa cumpli cu su propósito original pa hende i e tera. (Salmo 115:16; Revelacion 11:18) Lo e restorá e tera i dun’é como herencia na esnan cu ta dispuesto pa biba como su yunan obediente.—Mateo 5:5.

E último buki di Bijbel ta describí con cosnan lo ta ora esei tuma lugá: “Mira! E tent di Dios ta cu humanidad, i lo e biba cu nan, i nan lo ta su pueblo. . . . I lo e seca tur lágrima di nan wowo, i lo no tin morto mas, ni lo tin mas lamento ni sclamacion ni dolor mas. E cosnan anterior a pasa bai.” (Revelacion 21:3, 4) E tempu ei ningun hende lo drama lágrima di tristesa ni lamentá debí n’e morto di un ser kerí. Ningun hende lo sclama pa yudansa den desesperacion ni sufri e dolor di malesanan mortal. Asta ‘morto tin cu ser reducí na nada.’ (1 Corintionan 15:26; Isaías 25:8; 33:24) Esaki ta describí e clase di bida cu Jehova tabata kier pa nos disfrutá di dje originalmente ora el a crea nos promé antepasadonan.

Sí, bo por haña un bista adelantá di condicionnan paradísico asina awor entre e adoradónan di Jehova. E ta bisa nan: “Ami, Jehova, ta bo Dios, Esun cu ta siñá bo beneficiá bo mes, Esun cu ta hací bo stap den e caminda den cua bo mester cana.” (Isaías 48:17) Jehova ta un Tata bondadoso cu ta siña nos, su yunan, e mihó moda di biba. Su instruccionnan pa hende ta duna, no indebido restriccion, sino proteccion amoroso. Si nos sigui nan, nos lo haña berdadero libertad i felicidad, manera ta pará skirbí: “Awor Jehova ta e Spiritu; i caminda e spiritu di Jehova ta, tin libertad.” (2 Corintionan 3:17) Dor di sigui e instruccionnan describí den Bijbel, esnan cu ta aceptá Jehova su gobernacion ta experenciando awor un pas mental cu un dia lo plama den henter e mundu di humanidad.—Filipensenan 4:7.

Ki un Tata bondadoso Jehova ta! Bo ta dispuesto pa siña mas tocante Esun cu ta tras di tur e maraviyanan di creacion? Pa esnan cu ta dispuesto, e beneficionan ta preciosísimo asta awor mes. I den futuro e bendicionnan lo ta eterno.

[Plachi na página 5]

Por mira e nomber divino skirbí cu e cuater letternan hebreo riba muraya di hopi misa bieu