Fe Cristian Lo Ser Probá

“No ta tur hende tin fe.”—2 TESALONICENSENAN 3:2.

1. Con historia a mustra cu no ta tur hende tin fe genuino?

ATRABES di historia, tabatin homber, muher i muchanan cu fe genuino. E adhetivo “genuino” ta apropiado pasobra miyones di otro hende a desplegá un tipo di fe cu ta manera credulidad, esta, dispuesto pa kere sin base of motibu válido. Hopi biaha un fe asina a enbolbé dios falsu of formanan di adoracion cu no ta cuadra cu Jehova, e Todopoderoso, ni cu su Palabra revelá. P’esei apostel Pablo a skirbi: “No ta tur hende tin fe.”—2 Tesalonicensenan 3:2.

2. Pakico ta vital pa nos examiná nos propio fe?

² Pero e declaracion di Pablo ta implicá cu e tempu ei algun hende en berdad tabatin fe genuino, i esei ta implicá cu awe tambe tin algun hende asina. Mayoria lector dje revista aki ta deseá di tin i crece den un fe genuino asina—fe na armonia cu conocimentu exacto dje berdad divino. (Juan 18:37; Hebreonan 11:6) Esei ta e caso cu bo? Anto ta imperativo pa bo reconocé i ser prepará p’e echo cu bo fe lo ser probá. Pakico nos por bisa esei?

3, 4. Pakico nos mester mira riba Jesus relacioná cu pruebanan di fe?

³ Nos tin cu admití cu Jesucristo ta para central den nos fe. Sí, Bijbel ta papia di dje como e Perfeccionador di nos fe. Esei ta debí na loke Jesus a bisa i haci, specialmente e manera cu el a cumpli cu profecia. El a fortalecé e base riba cua hende por establecé fe genuino. (Hebreonan 12:2; Revelacion 1:1, 2) Tog, nos ta lesa cu Jesus a “ser probá den tur sentido mescos cu nos mes, pero sin picá.” (Hebreonan 4:15) Sí, Jesus su fe a ser probá. Esei di ningun manera mester desanimá nos of hinca miedu den nos, sino mester consolá nos.

⁴ Dor di pasa den pruebanan grandi asta te n’e punto di muri riba staca, Jesus “a siña obedencia.” (Hebreonan 5:8) El a proba cu hende por biba conforme cu fe genuino sea cual sea e prueba cu por bini riba nan. Esaki ta haña un nificacion particular ora nos pensa riba loke Jesus a bisa tocante su siguidónan: “Corda e palabra cu mi a bisa boso: Un esclabo no ta mayor cu su doño.” (Juan 15:20) De facto, relacioná cu su siguidónan den nos tempu, Jesus a predicí: “Boso lo ta obheto di odio di parti di tur nacion pa causa di mi nomber.”—Mateo 24:9.

5. Con e Scritura ta indicá cu nos lo enfrentá prueba?

⁵ Na principio dje siglo aki, huicio a cuminsá cu e cas di Dios. E Scritura a predicí: “Ta e tempu señalá pa e huicio cuminsá cu e cas di Dios. Awor, si e cuminsá promé cu nos, kico lo ta e fin di esnan cu no ta obediente n’e bon nobo di Dios? ‘I si e hustu ta ser salbá cu dificultad, unda e malbado i e pecadó lo presentá?’”—1 Pedro 4:17, 18.

Fe Probá—Pakico?

6. Pakico fe probá ta algu baliosísimo?

⁶ Den un sentido, fe cu no ta di test no tin balor probá, i su calidad ta keda desconocí. Bo por compar’é cu un chek cu no a ser cobrá ainda. Kisas bo a ricibí un chek pa un trabou cu bo a haci, pa artículonan cu bo a bende of asta como regalo. E chek por parce bon, pero e ta bon? Realmente e ta bal e montante di placa cu tin skirbí riba dje? Di manera similar, nos fe mester ta mas cu djis un aparencia of un simpel declaracion público. Mester test e pa nos proba cu e tin substancia i berdadero calidad. Ora nos fe ser di test, nos por mira si e ta fuerte i balioso. Un test lo por revelá tambe si tin áreanan unda nos mester refiná of fortalecé nos fe.

7, 8. For di ki fuente pruebanan di fe ta bini?

⁷ Dios ta permití persecucion i otro pruebanan di fe bini riba nos. Nos ta lesa: “No laga ningun hende, ora nan ta bou di prueba, bisa: ‘Dios ta pon’é mi na prueba.’ Pasobra cu cos malu no por pone Dios na prueba ni e mes no ta pone ningun hende na prueba.” (Santiago 1:13) Ken of kico ta responsabel pa e pruebanan ei? Esei ta Satanas, e mundu i nos mes carni imperfecto.

⁸ Tal bes nos ta admití cu Satanas ta ehercé un influencia poderoso riba e mundu, riba su manera di pensa i di actua. (1 Juan 5:19) I probablemente nos sa cu e ta instigá persecucion contra cristiannan. (Revelacion 12:17) Pero nos ta convencí tambe cu Satanas ta purba engañá nos dor di apelá na nos carni imperfecto, cologando tentacionnan mundano nos dilanti, sperando cu nos lo hap den e as, desobedecé Dios i terminá den un condicion desaprobá dor di Jehova? Naturalmente, Satanas su métodonan no mester sorprendé nos, pasobra el a usa e mésun tácticanan ora el a purba tenta Jesus.—Mateo 4:1-11.

9. Con nos por saca beneficio for di ehempelnan di fe?

⁹ Mediante su Palabra i e congregacion cristian, Jehova ta duna nos ehempelnan positivo di fe cu nos por imitá. Pablo a amonestá: “Unidamente bira imitadónan di mi, rumannan, i mantené boso bista riba esnan cu ta cana den un manera cu ta conforme cu e ehempel cu boso tin den nos.” (Filipensenan 3:17) Como un dje sirbidónan ungí di Dios den e promé siglo, Pablo a hiba delantera den efectuá obranan di fe apesar dje pruebanan grandi cu el a pasa aden. Yegando na fin di siglo 20, nos tambe tin ehempelnan asina di fe. E palabranan di Hebreonan 13:7 ta aplicá awor cu mes tantu forsa cu tempu Pablo a skirbi nan: “Corda esnan cu ta hibando delantera entre boso, cu a papia e palabra di Dios cu boso, i segun boso ta contemplá e resultado di nan conducta, imitá nan fe.”

10. Ki ehempelnan particular di fe nos tin den tempu recien?

¹⁰ E amonestacion ei tin aplicacion particular ora nos considerá con e conducta dje resto ungí a resultá. Nos por contemplá nan ehempel i imitá nan fe. Nan fe ta un fe genuino cu a ser refiná dor di prueba. For di un comienso chikitu aya den añanan 1870, a desaroyá un hermandad cristian mundial. Como fruta dje fe i awante dje ungínan dje tempu ei padilanti, awor tin mas cu cincu miyon i mei Testigo di Jehova ta predicá i siña tocante e Reino di Dios. E congregacion mundial actual di adoradónan berdadero i celoso ta un evidencia tangibel di fe probá.—Tito 2:14.

Fe Probá Relacioná cu 1914

11. Con 1914 tabata significativo pa C. T. Russell i su socionan?

¹¹ Hopi añá promé cu comienso dje promé guera mundial, e resto ungí tabata proclamá cu 1914 lo tabata un fecha significativo den profecia di Bijbel. Sin embargo, algun di nan expectativanan tabata prematuro, i nan punto di bista di loke lo a bai sosodé no tabata completamente exacto. Por ehempel, C. T. Russell, promé presidente di Sociedad Watch Tower, i su socionan por a mira cu un inmenso trabou di predicá tabata necesario. Nan a lesa: “E evangelio aki dje reino lo ser predicá den tur e mundu como testimonio na tur nacion; i e ora ei e fin lo yega.” (Mateo 24:14, King James Version) Pero con nan grupo relativamente chikitu hamas lo por a haci esei?

12. Con un di Russell su socionan a reaccioná n’e berdad di Bijbel?

¹² Considerá con esaki a afectá A. H. Macmillan, un socio di Russell. Macmillan a nace na Cánada, i ora el a haña Russell su buki The Plan of the Ages (1886) ainda e no tabatin ni 20 aña. (E buki aki, yamá tambe The Divine Plan of the Ages, a bira Volúmen 1 dje set ampliamente distribuí Studies in the Scriptures. Volúmen 2, The Time Is at Hand [1889], a señalá na 1914 como fin di “e tempu dje gentilnan.” [Lucas 21:24, KJ]) E mésun anochi cu Macmillan a cuminsá lesa e buki, el a pensa: “Wel, esaki tin e zonido dje berdad!” Den e zomer di 1900, el a topa Russell na un congreso di Studiantenan di Bijbel, manera Testigonan di Jehova tabata yama e tempu ei. No hopi tempu despues Macmillan a bautisá i a cuminsá traha cu Ruman Russell n’e sede di Sociedad na New York.

13. Ki problema Macmillan i otronan a mira pa cu cumplimentu di Mateo 24:14?

¹³ Basá riba nan lesamentu di Bijbel, e cristiannan ungí ei a señalá na 1914 como un punto crucial den Dios su propósito. Pero Macmillan i otronan a puntra nan mes con e trabou di predicá n’e nacionnan profetisá na Mateo 24:14 lo por a ser realisá den e tempu corticu cu a keda. El a bisa despues: “Mi ta corda con mi tabata combersá hopi bes cu Ruman Russell tocante esei, i e tabata bisa: ‘Wel, ruman, aki mes den New York nos tin mas hudiu cu tin na Jerusalem. Nos tin mas irlandes aki cu tin na Dublin. I nos tin mas italiano cu tin na Roma. Awor, si nos alcansá nan aki, esei lo nificá alcansá e mundu cu e mensahe.’ Pero esei no a parce di satisfacé nos mente. Pues e ora ei nos a haña e idea di producí e ‘Foto-Drama.’”

14. Promé cu 1914, ki proyecto sobresaliente a ser efectuá?

¹⁴ Ki un proyecto innovativo e “Foto-Drama di Creacion” tabata! El a combiná película i ‘slide’ di glas pintá, sincronisá cu discurso bíblico i música riba disco. Na 1913, The Watch Tower a bisa di un congreso na Arkansas, Merca: “[Sociedad] a dicidí unánimamente cu e tempu a yega pa usa película pa siña berdadnan di Bijbel. . . . [Russell] a splica cu e tabata trahando riba e plan aki pa tres aña caba i cu awor e tabatin casi shen bunita plachi cla. Sin duda esakinan lo atraé multitudnan grandi i proclamá e Evangelio, i yuda e público restorá nan fe den Dios.”

15. Ki resultado e “Foto-Drama” tabatin?

¹⁵ E “Foto-Drama” a logra exactamente esei despues di su presentacion inaugural na januari 1914. Esakinan ta informenan for di The Watch Tower di 1914:

1 di april: “Despues cu un pastor a mira dos parti, el a bisa: ‘Mi a mira solamente mitar dje FOTO-DRAMA DI CREACION, pero ya caba mi a siña for di dje mas tocante Bijbel cu mi a siña den mi curso di tres aña den e seminario teológico.’ Despues cu un hudiu a mir’é, el a remarcá: ‘Mi a sali un mihó hudiu cu ora mi a drenta.’ Vários pastor i soeur católico a bai mira e DRAMA i a expresá hopi aprecio. . . . Te cu awor tin solamente diesdos set dje DRAMA cla . . . No obstante, nos a alcansá i ta sirbiendo caba trint’i un stad . . . Pa dia, mas cu trint’i cincu mil hende ta mirando, tendiendo, admirando, pensando i siendo bendicioná.”

15 di juni: “E película a hací mi mas celoso pa plama e Berdad, i el a aumentá mi amor p’e Tata Celestial i nos kerido Ruman Mayó, Jesus. Mi ta resa pidi Dios tur dia pa su bendicion ricu ta riba e FOTO-DRAMA DI CREACION i riba tur enbolbí den su presentacion . . . Mi ta boso sirbidó den Dje, F. W. KNOCHE.—Iowa.”

15 di juli: “Nos ta contentu pa bisa ki un impresion faborabel e película a laga atras den e stad aki, i nos tin sigur cu e testimonio aki n’e mundu ta ser usá tambe pa reuní hopi hende cu ta duna evidencia di ta hoyanan cu Señor mes a scoge. Nos sa di basta studiante di Bijbel sincero cu awor ta asociá cu e Klas aki como resultado dje obra dje Foto-Drama. Boso ruman muher den Señor, EMMA L. BRICKER.”

15 di november: “Nos tin sigur cu boso lo ta contentu pa tende dje testimonio estupendo cu ta ser duná pa medio dje FOTO-DRAMA DI CREACION n’e Cas di Opera di Londen, Kingsway. E man guiador di Señor a keda manifestá di un manera asina maraviyoso den tur detaye dje exhibicion aki cu e rumannan ta gosa hopi . . . Nos auditorionan tabata consistí di tur clase i tipo di hende; nos a nota cu tabatin hopi miembro di clero presente. Un vicario . . . a pidi karchi pa e i su esposa por bin mir’é atrobe. Un Rector di Iglesia di Inglatera a asistí n’e DRAMA vários biaha, i . . . a trece hopi di su amigunan pa mir’é. Dos obispu tambe tabata presente, i vários noble.”

1 di december: “Ami cu mi esposa ta gradicí nos Tata Celestial sinceramente p’e bendicion grandi i preciosísimo cu nos a haña pa medio di bo. Tabata bo bunita FOTO-DRAMA cu a duna nos motibu pa mira i aceptá e Berdad . . . Nos tin bo seis volúmennan di STUDIES IN THE SCRIPTURES. Nan ta un gran yudansa.”

Reaccion Riba Pruebanan dje Tempu ei

16. Pakico 1914 a trece un prueba di fe?

¹⁶ Sin embargo, kico a pasa ora e cristiannan sincero i deboto ei a ripará cu nan expectativa di ser uní cu e Señor na 1914 no a ser realisá? E ungínan ei a pasa dor di un periodo di tempu excepcionalmente difícil. The Watch Tower di 1 di november 1914, a declará: “Laga nos corda cu nos ta den un periodo di prueba.” Relacioná cu esaki, e buki Los testigos de Jehová, proclamadores del Reino de Dios (1993) ta declará: “E añanan di 1914 pa 1918, en berdad a resultá di ta un ‘periodo di prueba’ pa e Studiantenan di Bijbel.” Nan lo a permití nan fe ser refiná i nan pensamentu ser ahustá, di manera cu nan lo por a tuma encargo dje gran trabou cu tabatin nan dilanti?

17. Con e fiel ungínan a reaccioná riba e echo cu nan a keda riba tera despues di 1914?

¹⁷ The Watch Tower di 1 di september, 1916, a bisa: “Nos a kere cu e trabou di Cosecha cu lo a reuní e Iglesia [e ungínan] lo a ser completá promé cu e fin dje Tempu Gentil; pero no tabatin nada den Bijbel cu a indicá esei. . . . Ta duel nos cu e trabou di Cosecha ta sigui? . . . Nos actitud actual, rumannan stimá, mester ta di gratitud profundo pa cu Dios, di mas i mas aprecio pa e bunita Berdad cu pa medio di Dje nos tin e privilegio di conocé i cu cua nos ta ser identificá, i cu cada bes nos mester reflehá mas celo pa yuda hiba e conocimentu dje Berdad ei na otronan.” Nan fe a ser poné na prueba. Sin embargo, nan a enfrentá e prueba ei i a pasa den dje cu éxito. Pero nos como cristian mester ta conciente cu pruebanan di fe por ta hopi i variá.

18, 19. Ki otro pruebanan di fe tabatin riba e pueblo di Dios djis despues cu Ruman Russell a muri?

¹⁸ Por ehempel, un otro tipo di prueba a bini riba e resto djis despues cu Ruman Charles T. Russell a muri. Esei tabata un test di nan lealtad i fe. Ken tabata “e esclabo fiel” di Mateo 24:45? Algun a kere cu tabata Ruman Russell mes, i nan a nenga di cooperá cu areglonan organisacional nobo. Si e tabata e esclabo, kico e rumannan lo mester a haci awor cu el a muri? Nan lo mester a sigui un of otro persona recien asigná, of awor tabata tempu pa reconocé cu Jehova tabata usando, no solamente un persona, sino henter un grupo di cristian como un instrumento of clase di esclabo?

¹⁹ Un prueba mas a bini riba cristiannan berdadero na 1918 ora autoridadnan di mundu, instigá dor dje clero di cristiandad, ‘via ley a trama maldad’ contra Jehova su organisacion. (Salmo 94:20, KJ) Un ola di persecucion violento a ser lansá contra e Studiantenan di Bijbel tantu na Norteamérica como na Europa. E oposicion inspirá dor di clero a yega na un culminacion dia 7 di mei, 1918, ora corte federal mericano a saca órdennan di aresto contra J. F. Rutherford i vários di su socionan yegá, incluyendo A. H. Macmillan. Nan a ser acusá falsamente di ta instigá lantamentu i autoridadnan a ignorá nan declaracionnan di inocencia.

20, 21. Manera Malakías 3:1-3 a predicí, ki obra a tuma lugá entre e ungínan?

²⁰ Maske n’e tempu ei nan no a reconocé esei asina, un trabou di purificacion tabata tumando lugá, manera Malakías 3:1-3 ta describí: “Ken lo ta soportando e dia di su binida, i ken ta esun cu lo keda pará ora e aparecé? Pasobra [e mensahero di pacto lo] ta manera e candela di un refinadó i manera e loog dje labadónan. I e tin cu sinta como un refinadó i limpiadó di plata i tin cu haci e yunan di Levi limpi; i e tin cu clarificá nan manera oro i manera plata, i nan siguramente lo bira pa Jehova personanan cu ta presentá un ofrenda di regalo den husticia.”

²¹ Segun cu Guera Mundial I tabata cabando, algun dje Studiantenan di Bijbel a enfrentá un otro prueba di fe, esta, si nan lo a keda estrictamente neutral den asuntunan militar di mundu of no. (Juan 17:16; 18:36) Algun no a keda neutral. P’esei na 1918, Jehova a manda “e mensahero dje pacto,” Cristo Jesus, na Jehova su areglo di tempel spiritual pa haci e grupo chikitu di Su adoradónan limpi di manchanan mundano. Esnan cu tabata dicididu pa desplegá fe genuino a siña for dje experencia, a marcha padilanti, i a sigui predicá celosamente.

22. Pa loke ta pruebanan di fe, kico nos mester considerá ainda?

²² Loke nos a considerá no ta djis algu di interes histórico pasahero. E ta directamente relacioná cu e condicion spiritual actual di Jehova su congregacion mundial. Pero laga nos considerá den e siguiente artículo algun dje pruebanan di fe cu e pueblo di Dios ta enfrentá awe i mira con nos por vence esakinan cu éxito.

Bo Ta Corda?

◻ Pakico Jehova su pueblo mester verwagt cu nan fe lo ser probá?

◻ Ki esfuersonan pa plama e mensahe di Dios tabata tumando lugá promé cu 1914?

◻ Kico e “Foto-Drama” tabata, i ki resultadonan el a producí?

◻ Con sucesonan den e periodo di 1914-18 a sirbi pa pone e ungínan na prueba?

[Plachi na página 12]

Rond dje cambio di siglo, hende den hopi pais tabata studia Bijbel cu yudansa dje seri “Millennial Dawn”, yamá despues “Studies in the Scriptures”

[Plachi na página 13]

Un carta for di C. T. Russell cu texto di introduccion pa un grabacion caminda e ta bisa: “‘E Foto-Drama di Creacion’ ta ser presentá pa IBSA [Asociacion Internacional di Studiantenan di Bijbel]. Su meta ta pa duna instruccion público riba temanan religioso-científico, i den defensa di Bijbel”

[Plachi na página 15]

Demetrius Papageorge a biaha presentando e “Foto-Drama di Creacion.” Mas despues, el a ser encarcelá pa motibu di su neutralidad cristian