Bo Por Confia Bo Concenshi?

BOU di circunstancia normal, un kompas ta un instrumento confiabel. Su angua, orientá dor dje tera su campo magnético, semper ta mustra direccion nort. P’esei, biaheronan por dependé riba un kompas pa dirigí nan ora no tin ningun indicacion pa guia nan. Pero, kico ta pasa ora bo pone un magneet banda di un kompas? E angua lo move den direccion dje magneet na lugá di mustra direccion nort. E no ta un guia confiabel mas.

Algu similar por pasa cu e concenshi humano. E Creador a dota nos cu e facultad aki p’e sirbi como un guia confiabel. Siendo cu nos a ser trahá den e imágen di Dios, semper nos concenshi lo mester mustra nos e direccion corecto ora nos tin cu tuma decision. E lo mester impulsá nos pa reflehá e normanan moral di Dios. (Génesis 1:27) E ta haci esei hopi bes. Por ehempel, apostel cristian Pablo a skirbi cu asta algun hende cu no tin e ley revelá di Dios “ta haci di naturalesa e cosnan dje ley.” Pakico? Pasobra “nan concenshi ta duna testimonio cu nan.”—Romanonan 2:14, 15.

No obstante, no ta semper e concenshi ta respondé manera e mester. Pa motibu di imperfeccion humano, nos ta incliná na haci cos cu nos sa ta robes. “Realmente mi tin deleite den e ley di Dios segun e homber cu mi ta paden,” Pablo a admití, “pero mi ta contemplá den mi miembronan un otro ley cu ta haci guera contra e ley di mi mente i ta hibá mi catibu n’e ley di picá cu ta den mi miembronan.” (Romanonan 7:22, 23) Si nos cede demasiado biaha na inclinacionnan incorecto, nos concenshi lo por bira gradualmente dòf i cu tempu stop di bisa nos cu tal conducta ta incorecto.

Sin embargo, apesar di imperfeccion, nos por ahustá nos concenshi n’e normanan di Dios. Sí, ta vital pa nos haci esei. Un concenshi limpi i bon entrená no solamente ta hiba na un relacion personal i caluroso cu Dios sino ta esencial tambe pa nos salbacion. (Hebreonan 10:22; 1 Pedro 1:15, 16) Ademas, un bon concenshi lo yuda nos tuma decisionnan sabí den bida, cu na su turno lo hiba na nos pas i felicidad. E salmista a bisa di un persona cu un concenshi asina: “E ley di su Dios ta den su curason; su pasonan lo no tambaleá.”—Salmo 37:31.

Entrená Bo Concenshi

Entrená bo concenshi ta enbolbé mas cu djis siña un lista di ley for di cabes anto pega estrictamente na nan. Esei ta loke e fariseonan dje tempu di Jesus a haci. E lidernan religioso aki a conocé e Ley i a desaroyá un tradicion detayá, supuestamente pa yuda e pueblo evitá di violá e Ley. Pues, nan tabata cla pa protestá ora Jesus su disipelnan a piki tapushi riba sabat i come e granonan. I nan a cuestioná Jesus ora el a cura man secu di un homber riba sabat. (Mateo 12:1, 2, 9, 10) Tur e dos actonan aki, segun tradicion dje fariseonan, a nificá un violacion dje di cuater mandamentu.—Exodo 20:8-11.

Tabata bisto cu e fariseonan a studia e Ley. Pero nan concenshi tabata ahustá n’e normanan di Dios? Apénas! Wel, djis despues cu nan a piki pieu riba loke segun nan tabata un infraccion escandaloso contra e regulacion di sabat, e fariseonan a conferenciá huntu contra Jesus “pa nan por destruy’é.” (Mateo 12:14) Imaginá bo, e lidernan religioso aki cu tabata hustu den nan mes bista a heringá cu e idea di come grano frescu pikí i curamentu riba sabat; pero nan no tabatin remordimentu pa trama e morto di Jesus!

E sacerdotenan principal a manifestá e mésun manera trocí di pensa. E hombernan corumpí aki no a haña niun tiki sintimentu di culpa ora nan a ofrecé Hudas 30 pida plata for dje tesoreria dje tempel pa traicioná Jesus. Pero ora Hudas a debolbé e placa inesperadamente, tirand’e bek den e tempel, e concenshi dje sacerdotenan principal a confrontá un dilema legal. Nan a bisa: “No ta legal pa tira [e monedanan] den e tesoro sagrado, pasobra nan ta prijs di sanger.” (Mateo 27:3-6) Evidentemente, e sacerdotenan principal tabata preocupá cu awor e placa di Hudas tabata impuru. (Compará cu Deuteronomio 23:18.) Tog, e mésun grupo di hende aki no a mira nada malu den gasta placa pa cumpra e traicion dje Yu di Dios!

Ahustá na Dios Su Manera di Pensa

E ehempelnan mencioná ariba ta mustra cu entrenamentu di bo concenshi ta rekerí mas cu yena bo mente cu un lista di kico mag i kico no mag. Ta cierto cu ta esencial pa nos tin conocimentu dje leynan di Dios, i obedencia na nan ta necesario pa salbacion. (Salmo 19:7-11) Sin embargo, ademas di siña e leynan di Dios, nos tin cu desaroyá un curason cu ta ahustá na Dios su manera di pensa. E ora ei nos por experenciá e realisacion di Jehova su profecia mediante Isaías, cu ta declará: “Bo wowonan tin cu bira wowonan cu ta mira bo Magnífico Instructor. I bo propio oreanan lo tende un palabra bo tras bisando: ‘Esaki ta e caminda. Cana den dje,’ den caso cu boso mester bai na banda drechi of den caso cu boso mester bai na banda robes.”—Isaías 30:20, 21; 48:17.

Claro cu esaki no ta nificá cu ora nos mester tuma un decision pisá, un bos literal lo bisa nos kico pa haci. No obstante, ora nos manera di pensa ta armonisá cu Dios su manera di pensa riba asuntunan, nos concenshi lo ta mihó ekipá pa yuda nos tuma decisionnan cu lo agrad’é.—Proverbionan 27:11.

Tuma por ehempel Josef, cu a biba den siglo 18 P.E.C. Ora esposa di Pótifar a urgié p’e cometé adulterio cuné, Josef a nenga, bisando: “Con mi por cometé e gran maldad aki i realmente peca contra Dios?” (Génesis 39:9) Den tempu di Josef, no tabatin ningun ley skirbí di parti di Dios cu a condená e acto di adulterio. Ademas, Josef tabata biba na Egipto, leu for di disiplina di famia of reglanan di patriarca. Kico anto a yuda Josef resistí tentacion? Senciyamente bisá, su concenshi entrená. Josef a adoptá e punto di bista di Dios cu un esposo i esposa mester tabata “un solo carni.” (Génesis 2:24) El a mira cu p’esei lo tabata robes pa tuma esposa di un otro homber. Josef su manera di pensa a armonisá cu Dios su manera di pensa riba e asuntu. Adulterio a bai contra su sentido moral.

Awe, tin masha poco hende manera Josef. Inmoralidad sexual ta reina tur caminda, i hopi hende no ta sinti un responsabilidad na nan Creador, ni na nan mes, ni sikiera na nan casá pa keda moralmente limpi. E situacion ta parce hopi esun cu e buki di Jeremías a describí: “No tabatin ningun hende cu a repentí di su maldad, bisando: ‘Kico mi a haci?’ Cada un ta bayendo bek n’e proceder popular, manera un cabai cu ta lansa su mes den e bataya.” (Jeremías 8:6) Pues, awor tin un necesidad mas grandi cu nunca pa nos ahustá nos mes na Dios su manera di pensa. Nos tin un percuracion maraviyoso pa yuda nos haci esei.

Un Yudansa pa Entrená Nos Concenshi

E Scritura inspirá ta “probechoso pa siña, pa reprendé, pa rectificá cosnan, pa disipliná den husticia, p’e homber di Dios por ta plenamente competente, completamente ekipá pa tur bon obra.” (2 Timoteo 3:16, 17) Un studio di Bijbel lo yuda nos entrená loke Bijbel ta yama nos “facultadnan perceptivo,” pa por distinguí bon for di malu. (Hebreonan 5:14) Lo e permití nos desaroyá un amor p’e cosnan cu Dios ta stima i un repugnancia p’e cosnan cu e ta odia.—Salmo 97:10; 139:21.

Pues, e meta di studia Bijbel ta pa capta e spiritu i substancia dje berdad mas bien cu djis gana conocimentu detayá di Bijbel. Den su edicion di 1 di september 1976, The Watchtower a declará: “Ora di studia e Scritura nos mester haci esfuerso pa capta e sentido di Dios su husticia, amor i rectitud, i inculcá esakinan profundamente den nos curason pa nan bira parti di nos mescos cu come i hala rosea ta un parti di nos. Nos mester purba yega mas plenamente na un sentido di responsabilidad moral dor di cultivá un conciencia skerpi di loke ta bon i loke ta malu. Mas ainda, nos tin cu haci nos concenshi sinti di un manera fuerte su responsabilidad pa cu e Dunador di Ley i Hues perfecto. (Isa. 33:22) Pues miéntras nos ta siña cosnan tocante Dios, nos mester purba imit’é den tur aspecto di bida.”

Adkiriendo “e Mente di Cristo”

Un studio di Bijbel tambe lo yuda nos obtené “e mente di Cristo,” e disposicion mental di obedencia i humildad cu Jesus a manifestá. (1 Corintionan 2:16) Pa Jesus, haci e boluntad di su Tata tabata un goso, no djis un rutina pa sigui automáticamente, sin pensa. E salmista David a describí su actitud proféticamente ora el a skirbi: “Den haci bo boluntad, O mi Dios, mi tabatin deleite i bo ley ta den mi partinan paden.”a—Salmo 40:8.

Adkerí “e mente di Cristo” ta vital pa entrená nos concenshi. Ora Jesus tabata riba tera como un homber perfecto, el a reflehá e cualidadnan i personalidad di su Tata n’e grado mas completo posibel denter di limitacionnan humano. Pues, e por a bisa: “Ken cu a mirá mi a mira e Tata tambe.” (Juan 14:9) Den tur situacion cu el a enfrentá riba tera, Jesus a haci exactamente loke su Tata tabata kier p’e haci. P’esei, ora nos studia e bida di Jesus, nos ta haña sa claramente ki clase di Dios Jehova ta.

Nos ta lesa cu Jehova ta “misericordioso i yen di gracia, ta tarda pa rabia i ta abundante den bondad amoroso.” (Exodo 34:6) Bes tras bes Jesus a manifestá e cualidadnan aki den su trato cu su apostelnan. Ora cu nan tabata discutí cada bes riba cua di nan tabata mas grandi, cu pacenshi Jesus a siña nan cu palabra i cu ehempel cu “ken cu kier bira grandi den boso mester ta boso sirbidó, i ken cu kier ta e promé den boso mester ta boso esclabo.” (Mateo 20:26, 27) Esaki ta djis un ehempel pa mustra cu nos por ahustá nos mes na Dios su manera di pensa dor di considerá e bida di Jesus.

Mas nos siña tocante Jesus, mihó ekipá nos lo ta pa imitá nos Tata celestial, Jehova. (Efesionan 5:1, 2) Un concenshi cu ta ahustá na Dios su manera di pensa lo stuur nos den e bon direccion. Jehova ta primintí esnan cu ta confia den dje: “Lo mi hací bo tin perspicacia i instruí bo den e caminda cu bo mester bai. Lo mi duna conseho cu mi wowo riba bo.”—Salmo 32:8.

Saca Beneficio for di un Concenshi Entrená

Conociendo e desobedencia di hende imperfecto, Moises a spierta e israelitanan: “Tuma na pechu tur e palabranan cu mi ta papiando como spiertamentu na boso awe, pa boso por manda boso yunan pa soru cumpli cu tur e palabranan dje ley aki.” (Deuteronomio 32:46) Nos tambe tin cu skirbi e ley di Dios riba nos curason. Si nos haci esei, e chens ta grandi cu nos concenshi lo dirigí nos pasonan i yuda nos tuma decisionnan corecto.

Claro cu nos mester ta cauteloso. E proverbio bíblico ta bisa: “Ta existí un caminda cu ta règt dilanti un homber, pero e camindanan di morto ta e fin despues.” (Proverbionan 14:12) Pakico esaki ta e caso hopi bes? Pasobra, manera Bijbel ta bisa: “E curason ta mas traicionero cu cualkier otro cos i ta desesperá. Ken por conoc’é?” (Jeremías 17:9) P’esei, ta necesario pa nos tur sigui e spiertamentu di Proverbionan 3:5, 6: “Confia den Jehova cu tur bo curason i no lèn riba bo mes comprendimentu. Den tur bo camindanan tuma nota di dje, i e mes lo haci bo camindanan stret.”

[Nota]

[Plachi na página 7]

Mescos cu un kompas, un concenshi bíblicamente entrená por mustra nos e direccion corecto

[Rekonosementu]

Kompas: Courtesy, Peabody Essex Museum, Salem, Mass.