Sigui Haci Progreso Spiritual!
E Dia Di Nos Bautismo Ta Un Dia Cu Semper Nos Mester Sigui Corda Cu Aprecio. Al Fin I Al Cabo, E Ta E Dia Riba Cua Nos A Declara Publicamente Cu Nos A Haci Un Dedicacion Pa Sirbi Dios.
HOPI hende tin cu haci esfuersonan inmenso pa yega n’e punto ei—bandoná mal hábitonan di hopi tempu, kita for di mal asociacion, cambia manera di pensa i conducta cu ta profundamente ancrá.
Pero, maske bautismo ta un suceso felis i significante den bida di un cristian, tog e ta solamente un comienso. Apostel Pablo a bisa cristiannan bautisá di Hudea: “Awor cu nos a bandoná e doctrina primario tocante e Cristo, laga nos sigui padilanti na madures.” (Hebreonan 6:1) Sí, tur cristian mester “alcansá unidad den e fe i den e conocimentu exacto dje Yu di Dios, te na un homber maduro, te n’e midí di estatura cu ta pertenecé n’e plenitud di e Cristo.” (Efesionan 4:13) Solamente dor di progresá te na madures nos por ta “stabilisá den e fe.”—Colosensenan 2:7.
Den e último par di añanan, cientos di miles di adoradó recien dedicá a drenta e congregacion cristian. Kisas abo ta un di nan. Mescos cu bo rumannan di promé siglo, bo no kier keda un baby spiritual. Bo kier crece, bai dilanti! Pero con? I cua ta algun manera den cua bo por progresá?
Haci Progreso Mediante Studio Personal
Pablo a bisa e cristiannan na Filípos: “Esaki ta loke mi ta sigui pidi den oracion, pa boso amor abundá mas i mas ainda cu conocimentu exacto i pleno dicernimentu.” (Filipensenan 1:9) Aumentá den “conocimentu exacto” ta crucial pa bo progreso spiritual. ‘Gana conocimentu exacto di Jehova Dios i di Jesucristo’ ta un proceso continuo, i no algu cu ta stop despues di bautismo.—Juan 17:3.
Un ruman muher cristian cu nos lo yama Alexandra, a realisá esaki dies aña despues cu el a bautisá na edad di 16 aña. El a crece den e berdad i semper el a asistí na reunion i a participá den e trabou di predicá regularmente. E ta skirbi: “E último lunanan cu a pasa ei, mi a realisá cu tabatin algu completamente robes. Mi mes a dicidí di haci un auto-examinacion serio i onesto pa mi sa kico mi ta sinti p’e berdad i pakico mi ta den e berdad ainda.” Kico el a descubrí? E ta sigui: “Mi a descubrí cu mi motibunan pa keda den e berdad tabata molestiá mi. Mi a corda cu tempu mi tabata creciendo, e énfasis tabata riba bai reunion i sirbishi di veld. Tabata como si fuera cu custumbernan manera studio personal i oracion lo a bini di mes. Pero ora mi a analisá mi situacion, mi a realisá cu esaki no a sosodé.”
Apostel Pablo a exhortá: “Te n’e grado cu nos a haci progreso, laga nos sigui cana ordenadamente den e mésun rutina aki.” (Filipensenan 3:16) Un rutina por yudá bo bai dilanti. Promé cu bo bautismo, sin duda bo tabatin un rutina semanal di studio cu un maestro bon cualificá. Segun bo aprecio a crece, bo a incluí den e rutina aki preparacion p’e les di tur siman, buscamentu dje textonan citá, etcétera. Awor cu bo ta bautisá, bo a sigui ‘cana den mésun rutina’?
Si no ta asina, bo tin cu examiná bo prioridadnan atrobe, ‘haciendo sigur dje cosnan mas importante.’ (Filipensenan 1:10) Den e bida druk aki, nos mester tin dominio propio pa apartá tempu pa lesamentu i studio personal di Bijbel. Pero e beneficionan ta bal e esfuerso ei. Considerá e experencia di Alexandra atrobe. E ta admití: “Mi tin cu bisa cu pa e último 20 añanan mi a existí den e berdad dor di solamente bai reunion i sirbishi di veld.” Sin embargo, e ta sigui: “Mi a yega n’e conclusion cu aunke e cosnan aki ta importante, nan so no por sostené mi ora cosnan cuminsá bira difícil. Tur esaki a bini padilanti pasobra casi mi no tin un studio personal i mi oracionnan ta iregular i superficial. Awor mi ta realisá cu mi tin cu reahustá mi pensamentu i cuminsá un programa di studio significativo pa mi por ègt siña conocé Jehova, yega na stim’é i apreciá loke su Yu a duna nos.”
Si bo mester di yudansa pa establecé un bon rutina di studio personal, e ancianonan i otro cristiannan maduro di bo congregacion lo ta contentu pa yudá bo. Ademas, artículonan cu a aparecé den E Toren di Vigilancia di 1 di mei 1995, 15 di augustus 1993 i La Atalaya di 15 di mei 1986, tin un cantidad di sugerencia útil.
E Necesidad pa Hala Cerca di Dios
Un otro área den cua bo tin cu lucha pa haci progreso ta bo relacion cu Dios. Den algun caso kisas ta asta urgente pa haci esaki. Considerá Anthony kende a bautisá na un edad hóben. “Mi tabata e promé yu cu a bautisá den mi famia,” e ta conta. “Despues cu mi a caba di bautisá, mi mama a duná mi un abraso fuerte. Nunca mi a mir’é asina felis. Tabatin asina tantu goso, i ami a sintí mi fuerte.” Sin embargo, e medaya tabatin un otro banda. “Pa basta tempu, ningun hóben den e congregacion a bautisá,” Anthony ta continuá. “P’esei, mi tabata mashá orguyoso di mi mes. Tambe mi tabata orguyoso di mi comentario i partinan den reunion. Elogio i aprobacion di hende a bira mas importante pa mi cu duna alabansa na Jehova. En realidad mi no tabatin un relacion íntimo cuné.”
Mescos cu Anthony, algun persona tal bes a dedicá nan mes mas motivá p’e deseo di agradá otro hende cu pa agradá Jehova. Asta si ta asina, Jehova ta verwagt pa e personanan aki cumpli cu nan promesa di sirbié. (Compará cu Eclesiástes 5:4.) Pero hopi bes ta difícil pa nan logra esei, si nan no tin un relacion personal cu Dios. Anthony ta corda: “E goso intenso cu mi a sinti ora mi a bautisá, no a dura mashá. Ni un aña no a pasa despues di mi bautismo cu mi tabata enbolbí den malecho serio i ancianonan di congregacion mester a reprendé mi. Debí cu mi tabata cai bes tras bes den mal conducta, mi a ser scomulgá for dje congregacion. Seis aña despues di mi dedicacion na Jehova, mi a ser arestá i a bai cerá pa motibu di asesinato.”
Cultivá un Relacion Intimo cu Jehova
Sea cua sea bo situacion, tur cristian por respondé n’e invitacion bíblico: “Hala cerca Dios, i lo e hala cerca boso.” (Santiago 4:8) Sin duda, for dje tempu cu bo a cuminsá studia Bijbel, bo a desaroyá un midí di intimidad cu Dios. Bo a siña cu Dios no ta e deidad abstracto cu cristiandad ta adorá, ma cu e ta un persona cu un nomber, Jehova. Tambe bo a siña cu e tin cualidadnan atractivo, cu e ta “un Dios misericordioso i yen di gracia, cu ta tarda pa rabia i ta abundante den bondad amoroso.”—Exodo 34:6.
Sin embargo, pa bo biba di acuerdo cu bo dedicacion pa sirbi Dios, bo tin cu hala asta mas cerca di dje! Con? E salmista a pidi den oracion: “Hací mi conocé bo mes camindanan, O Jehova; siñá mi bo mes bereanan.” (Salmo 25:4) Studio personal di Bijbel i di publicacionnan di Sociedad por yudá bo conocé Jehova mihó. Tambe ta importante pa haci oracion sincero regularmente. “Deshogá boso curason dilanti dje,” e salmista ta urgi. (Salmo 62:8) Ora bo ripará cu bo oracionnan ta haña contesta, lo bo sinti Dios su interes personal den bo. Esaki lo yudá bo sintí bo mas cerca di dje.
Prueba i problema ta ofrecé otro oportunidad mas pa hala cerca Dios. Kisas bo ta enfrentá desafio i pruebanan di fe, manera malesa, presion na scol i trabou, of dificultad económico. Por ta cu bo tin asta dificultad pa cumpli cu e rutina teocrático normal di bai sirbishi, asistí na reunion of studia Bijbel cu bo yunan. No enfrentá e problemanan aki bo so! Suplicá Dios pa yudansa, pidiend’e pa su guia i direccion. (Proverbionan 3:5, 6) Rogu’é pa su spiritu santu! (Lucas 11:13) Segun cu bo ta experenciá Jehova su yudansa amoroso, lo bo hala asta mas cerca dje. Manera e salmista David a expres’é: “Purba i mira cu Jehova ta bon . . . Felis ta e homber físicamente fuerte cu ta busca refugio den dje.”—Salmo 34:8.
Kico di Anthony? “Mi a cuminsá corda e tempu cu mi tabatin asina tantu meta relacioná cu Jehova su boluntad,” e ta conta. “Esaki a haci hopi dolor. Pero meimei di tur e dolor i desapunte ei, mi a corda Jehova su amor. A tuma un poco tempu promé cu mi por a bolbe haci oracion na Jehova, pero mi a hacié i mi a deshogá mi curason na dje, pidiendo pordon. Tambe mi a cuminsá lesa Bijbel i mi a keda sorprendí cuantu mi a lubidá i ki tiki mi tabata sa en berdad di Jehova.” Aunke ainda Anthony no a caba di sinta su castigu p’e crímen cu el a cometé, e ta ricibí yudansa for di Testigonan local i e ta riba caminda pa recuperá spiritualmente. Yen di gratitud, Anthony ta bisa: “Danki na Jehova i su organisacion, mi por a kita e personalidad bieu, i tur dia mi ta haci esfuerso pa bisti esun nobo. Awor, mi relacion cu Jehova ta e cos di mas importante pa mi.”
Progreso Spiritual den Bo Ministerio
Jesucristo a manda su siguidónan pa predicá e ‘bon nobo dje reino.’ (Mateo 24:14) Como un predicadó dje bon nobo relativamente nobo, kisas bo no tin masha experencia den e ministerio. Con anto, bo por progresá pa asina “cumpli cu bo ministerio plenamente”?—2 Timoteo 4:5.
Un manera ta dor di desaroyá un actitud positivo. Siña considerá e trabou di predicá manera un “tesoro,” un privilegio. (2 Corintionan 4:7) E ta duna nos oportunidad pa demostrá nos amor, lealtad i integridad na Jehova. Tambe e ta permití nos demostrá interes den nos próhimo. Si nos duna di nos mes inegoistamente den esaki, lo e por ta un fuente di berdadero felicidad.—Echonan 20:35.
Jesus mes tabatin un punto di bista positivo di e trabou di predicá. Compartí e berdad bíblico cu otronan tabata manera “cuminda” p’e. (Juan 4:34) P’esei, kisas e mihó manera pa resumí su motivacion pa yuda otronan, ta su palabranan: “Mi kier.” (Mateo 8:3) Jesus tabatin compasion pa hende, foral pa esnan cu e mundu di Satanas a ‘soya i plama.’ (Mateo 9:35, 36) Abo tambe “kier” yuda esnan cu ta den scuridad spiritual i cu tin mester dje lus dje Palabra di Dios? Si ta asina, anto lo bo sintí bo impulsá pa reaccioná na e mandamentu di Jesus: “Bai, pues, i haci disipel di hende di tur nacion.” (Mateo 28:19) Sí, lo bo sintí bo moví pa logra pleno participacion den e trabou aki segun bo salú i circunstancia ta permití.
Un otro clave pa progreso ta participacion regular den e ministerio—si ta posibel—tur siman. Un participacion asina por yuda disminuí e temor i miedu cu lo por stroba un persona cu ta predicá solamente de bes en cuando. Participacion regular den sirbishi di veld tin otro beneficionan tambe. Lo e aumentá bo aprecio pa e berdad, nutri bo amor pa Jehova i pa bo próhimo, i lo yudá bo keda enfocá riba e speransa dje Reino.
Pero, kico si bo circunstancia actual ta limitá mashá bo participacion den e trabou di predicá? Si ègt bo no por haci ningun ahuste, consolá bo mes sabiendo cu Jehova ta contentu cu loke bo por haci, basta cu bo sirbishi ta di henter alma. (Mateo 13:23) Kisas bo por progresá den otro formanan, manera dor di mehorá bo abilidadnan pa predicá. Den e congregacion, e Scol di Ministerio Teocrático i Reunion di Sirbishi ta percurá hopi entrenamentu excelente den e sentido aki. Naturalmente, mas competente nos ta den e ministerio, mas nos lo disfrutá di dje i mira resultado.
Ta bisto anto, cu progreso spiritual no mester stop ora un persona bautisá. Relacioná cu su speransa di haña bida inmortal den shelu, apostel Pablo a skirbi: “Rumannan, mi no ta considerá cu ya mi a haña gara di dje caba; pero un cos ta sigur: Lubidando loke a keda atras i forsando padilanti pa loke tin mi dilanti, mi ta sigui den direccion dje meta p’e premio dje yamada djariba di Dios mediante Cristo Jesus. Laga nos, anto, mes tantu di nos cu ta maduro, tin e actitud mental aki; i si den cualkier sentido boso tin un otro inclinacion mental, Dios lo revelá e actitud mencioná ariba na boso.”—Filipensenan 3:13-15.
Sí, tur cristian, sea cu nan tin speransa pa bida inmortal den shelu of pa bida eterno den Paradijs riba tera, tin cu ‘forsa padilanti,’ haci esfuerso, pa obtené e meta di bida! Bo bautismo tabata un bon comienso, ma e ta solamente un cuminsamentu. Sigui haci esfuerso pa bo progresá spiritualmente. Cu yudansa di reunion i studio personal, “bira plenamente desaroyá den e facultad di comprendimentu.” (1 Corintionan 14:20) Sea “capas pa capta mentalmente . . . e hanchura i largura i haltura i profundidad” dje berdad. (Efesionan 3:18) Bo progreso lo yudá bo no solamente pa bo permanecé felis i gososo awor, sino tambe pa bo obtené un lugá sigur den Dios su mundu nobo, unda, bou dje mando di su Reino celestial, lo bo por sigui progresá te den eternidad!
[Plachi na página 29]
Bo mester tin disiplina pa saca tempu pa studio personal
[Plachi na página 31]
Un actitud positivo por contribuí na nos goso den e ministerio