“Haci Boso Curason Firme”

“Boso tin mester di awante, afin cu, despues cu boso a haci e boluntad di Dios, boso por ricibí e cumplimentu dje promesa.”—HEBREONAN 10:36.

1, 2. (a) Kico a sosodé cu vários cristian den promé siglo? (b) Pakico ta fácil pa hende su fe debilitá?

DI TUR escritor di Bijbel, ningun a mencioná fe mas tantu biaha cu apostel Pablo. I el a papia vários bes di esnan kende nan fe a debilitá of muri. Por ehempel, Himeneo i Alehandro “a experienciá naufragio relacioná cu nan fe.” (1 Timoteo 1:19, 20) Démas a bandoná Pablo pasobra “el a stima e sistema actual di cosnan.” (2 Timoteo 4:10) Algun, dor di nan accionnan iresponsabel i no-cristian “a nenga e fe.” Otronan a laga sabiduria falsu engañá nan i “a desviá for dje fe.”—1 Timoteo 5:8; 6:20, 21.

² Pakico e cristiannan ungí ei a faya den e maneranan aki? Wel, “fe ta e expectativa sigur di cosnan sperá, e demostracion evidente di realidadnan aunke nan no ta ser contemplá.” (Hebreonan 11:1) Nos ta ehercé fe den loke nos no por mira. Nos no tin mester di fe pa cosnan cu nos ta contemplá. Ta mas fácil traha pa rikesa visibel cu pa rikesa spiritual invisibel. (Mateo 19:21, 22) Hopi cos visibel—manera “e deseo di carni i e deseo di wowo”—ta atraé nos carni imperfecto fuertemente i por debilitá nos fe.—1 Juan 2:16.

3. Ki clase di fe un cristian mester cultivá?

³ Tog, apostel Pablo ta bisa cu “esun cu ta acudí na Dios mester kere cu e ta existí i cu e ta bira recompensador di esnan cu ta busk’é cu empeño.” Moises tabatin un fe asina. El “a mira atentamente n’e pago dje recompensa” i “a sigui firme como si el a mira Esun cu ta invisibel.” (Hebreonan 11:6, 24, 26, 27) Un cristian tin mester dje clase di fe aki. Manera e artículo anterior a remarcá, Abraham tabata un ehempel excelente di esaki.

Abraham Su Ehempel di Fe

4. Den ki manera e fe di Abraham a influenciá su curso di bida?

⁴ Abraham tabata na Ur ora el a ricibí e promesa di Dios cu lo el a bira tata di un simia cu lo ta un bendicion pa hende di tur nacion. (Génesis 12:1-3; Echonan 7:2, 3) Basá riba e promesa ei, Abraham a obedecé Jehova, i a muda promé pa Haran i despues pa Canan. Ei, Jehova a primintí di duna e simia di Abraham e tera. (Génesis 12:7; Nehemías 9:7, 8) Sin embargo, hopi di loke Jehova a primintí lo a cumpli despues di morto di Abraham. Por ehempel, nunca Abraham mes no a poseé ningun parti di Canan, cu excepcion dje cueba di Macpelá, cu el a cumpra como un lugá di entiero. (Génesis 23:1-20) Tog, e tabatin fe den e palabra di Jehova. Riba tur cos, e tabatin fe den un futuro “stad cu tin berdadero fundeshi, di cua stad Dios ta e constructor i trahador.” (Hebreonan 11:10) E fe ei a sosten’é durante henter su bida.

5, 6. Den ki manera Abraham su fe a ser poní na prueba relacioná cu e promesa di Jehova?

⁵ Nos ta mira esaki specialmente relacioná cu e promesa cu Abraham su simia lo a bira un nacion grandi. Pa esaki por a sosodé, Abraham mester a haña un yu homber, i el warda hopi tempu promé cu el a ser bendicioná cu un. Nos no sa cuantu aña e tabatin ora el a tende dje promesa di Dios pa promé bes, pero ora el a haci e biahe largu pa Haran, ainda Jehova no a dun’é un yu. (Génesis 11:30) E tabata na Haran suficiente tempu pa ‘acumulá posesionnan i adkerí alma,’ i ora el a muda pa Canan, e tabatin 75 aña i Sara tabatin 65 aña. Ainda, nan no tabatin yu. (Génesis 12:4, 5) Ora Sara a yega rond di 75 aña, el a concluí cu awor e tabata muchu bieu pa duna Abraham un yu. P’esei, siguiendo un custumber dje tempu ei, el a duna Abraham su criá Agar, i Abraham a haña un yu cuné. Pero esaki no tabata e yu primintí. Cu tempu nan a manda Agar i su yu, Ismael, bai. Tog, ora Abraham a haci súplica na fabor di nan, Jehova a primintí di bendicioná Ismael.—Génesis 16:1-4, 10; 17:15, 16, 18-20; 21:8-21.

⁶ N’e debido tempu di Dios, hopi hopi tempu despues cu nan a tende dje promesa pa promé bes, Abraham di 100 aña i Sara di 90 aña a haña un baby, Isaac. Ki maraviyoso esei lo mester tabata! P’e pareha di edad aki, tabata casi manera un resureccion ora nan curpa “morto” a producí bida nobo. (Romanonan 4:19-21) Nan a warda hopi tempu, pero ora por fin e promesa a cumpli, tabata bale la pena warda.

7. Con fe ta conectá cu awante?

⁷ E ehempel di Abraham ta recordá nos cu fe no mester ta djis pa un tempu corticu. Pablo a conectá fe cu awante ora el a skirbi: “Boso tin mester di awante, afin cu, despues cu boso a haci e boluntad di Dios, boso por ricibí e cumplimentu dje promesa. . . . Nos no ta e clase cu ta hala atras te na destruccion, sino e clase cu tin fe cu ta conserbá e alma bibu.” (Hebreonan 10:36-39) Hopi persona a warda un tempu largu p’e cumplimentu dje promesa. Algun a warda henter nan bida. Nan fe fuerte a sostené nan. I, mescos cu Abraham, nan lo ricibí e recompensa na Jehova su debido tempu.—Habacuc 2:3.

Scucha Dios

8. Con nos ta scucha Dios awe, i pakico esei lo fortalecé nos fe?

⁸ Por lo ménos cuater cos a fortalecé Abraham su fe, i e mésun cosnan ei por yuda nos tambe. Di promé, el a demostrá cu e ta ‘kere cu Dios ta existí’ dor di haci caso ora Jehova a papia. Pues, e tabata diferente for dje hudiunan den tempu di Jeremías, cu a kere den Jehova, pero cu no tabatin fe den su palabranan. (Jeremías 44:15-19) Awe, Jehova ta papia cu nos atrabes dje páginanan di Bijbel, su Palabra inspirá, cu Pedro a bisa ta manera “un lampi cu ta briya den un lugá scur . . . den boso curason.” (2 Pedro 1:19) Ora nos lesa Bijbel atentamente, e ta ‘alimentá nos cu e palabranan di fe.’ (1 Timoteo 4:6; Romanonan 10:17) Ademas, den e último dianan aki, “e esclabo fiel i discreto” ta percurando ‘alimento spiritual n’e debido tempu,’ esta, guia pa aplicá principio bíblico i pa comprendé profecia di Bijbel. (Mateo 24:45-47) Si nos kier tin fe fuerte, ta indispensabel pa nos scucha Jehova atrabes dje medionan aki.

9. Kico lo ta e resultado si di berdad nos ta kere den e speransa cristian?

⁹ Abraham su fe tabata estrechamente relacioná cu su speransa. “Basá riba speransa e tabatin fe, cu e por bira tata di hopi nacion.” (Romanonan 4:18) Esaki ta un di dos cos cu por yuda nos. Hamas nos mag lubidá cu Jehova ta “recompensador di esnan cu ta busk’é cu empeño.” Apostel Pablo a bisa: “Nos ta traha duru i ta haci esfuerso vigoroso, pasobra nos a pone nos speransa den un Dios bibu.” (1 Timoteo 4:10) Si berdaderamente nos ta kere den e speransa cristian, henter nos curso di bida lo ta un demostracion di nos fe, manera tabata e caso cu Abraham.

Papia cu Dios

10. Ki clase di oracion lo fortalecé nos fe?

¹⁰ Abraham a papia cu Dios, i esaki tabata un di tres cos cu a fortalecé su fe. Awe, nos tambe por papia cu Jehova, usando e don di oracion mediante Jesucristo. (Juan 14:6; Efesionan 6:18) Tabata despues cu Jesus a conta un comparacion cu a enfatisá e necesidad pa haci oracion constante, el a haci e pregunta: “Ora e Yu di hende yega, realmente lo e haña fe riba tera?” (Lucas 18:8) Oracion cu ta edificá fe no ta algu cu bo ta haci automático of sin pensa. E tin nificacion profundo. Por ehempel, oracion sincero ta vital ora nos tin cu tuma decision importante of ora nos ta den un situacion hopi tenso.—Lucas 6:12, 13; 22:41-44.

11. (a) Con Abraham a haña fortalesa ora el a habri su curason na Dios? (b) Kico nos por siña for dje experencia di Abraham?

¹¹ Ora Abraham tabata birando bieu i Jehova no a dun’é e simia primintí ainda, el a papia cu Dios tocante su preocupacion. Jehova a trankilis’é. E resultado? Abraham “a pone fe den Jehova; i el a cont’é como husticia p’e.” E ora ei Jehova a duna un señal pa confirmá su palabranan trankilisante. (Génesis 15:1-18) Si nos habri nos curason na Jehova den oracion, aceptá e garantianan di Jehova den su Palabra, Bijbel, i obedec’é den pleno fe, e ora ei Jehova lo fortalecé nos fe tambe.—Mateo 21:22; Hudas 20, 21.

12, 13. (a) Den ki manera Jehova a bendicioná Abraham ora el a sigui Su guia? (b) Ki clase di experencia lo fortalecé nos fe?

¹² Un di cuater cos cu a fortalecé Abraham su fe tabata e apoyo cu Jehova a dun’é ora el a sigui e guia di Dios. Ora Abraham a bai pa rescatá Lot for dje reynan invasor, Jehova a dun’é e victoria. (Génesis 14:16, 20) Miéntras Abraham tabata biba manera un residente temporal den e tera cu su simia lo a heredá, Jehova a bendicion’é den sentido material. (Compará cu Génesis 14:21-23.) Jehova a guia e esfuersonan di Abraham su mayordomo pa haña un bon casá pa Isaac. (Génesis 24:10-27) Sí, Jehova a “bendicioná Abraham den tur cos.” (Génesis 24:1) Como resultado, su fe tabata asina fuerte i su relacion cu Jehova Dios tabata asina íntimo, cu Jehova a yam’é “mi amigu.”—Isaías 41:8; Santiago 2:23.

¹³ Nos awe por tin un fe fuerte asina? Sí. Si nos pone Jehova na prueba dor di obedecé su mandamentunan mescos cu Abraham a haci, lo e bendicioná nos tambe, i esei lo fortalecé nos fe. Por ehempel, un bistaso riba e Raport di Aña di Sirbishi pa 1998 ta mustra cu hopi persona a ser bendicioná den un manera maraviyoso ora nan a obedecé su mandamentu pa predicá e bon nobo.—Marco 13:10.

Un Registro di Fe Awe

14. Con Jehova a bendicioná e campaña cu Noticia di Reino Num. 35?

¹⁴ Na october 1997, e campaña mundial cu Noticia di Reino Num. 35 tabata un éxito rotundo, gracias n’e celo i entusiasmo di miyones di Testigo individual. Loke a sosodé na Ghana ta típico. A distribuí casi 2,5 miyon ehemplar na cuater idioma, i como resultado, casi 2.000 hende a pidi studio di Bijbel. Na Chipre, dos Testigo cu tabata plama Noticia di Reino a ripará cu un pastor tabata sigui nan. Despues di un ratu nan a ofrec’é un ehemplar di Noticia di Reino. El a ricibí un ehemplar caba i a bisa: “Mi a keda asina impresioná cu su mensahe cu mi kier a felicitá e hendenan cu a prepar’é.” Na Dinamarca, a distribuí 1,5 miyon ehemplar di Noticia di Reino cu resultadonan excelente. Ei, un señora cu ta traha como relacionista público a bisa: “E tratado tin un mensahe pa tur hende. E ta fácil pa comprendé, i e ta conmové bo. E ta duna bo un deseo di sa mas. E ta dal net riba cabes di clabu!”

15. Ki experencianan ta mustra cu Jehova a bendicioná e esfuerso pa alcansá hende tur caminda?

¹⁵ Na 1998, publicadónan a haci esfuerso pa predicá no solamente na cas di hende, sino tur caminda. Na Côte d’Ivoire un pareha misionero a bishitá 322 barcu n’e wafnan. Nan a laga 247 buki, 2.284 revista, 500 foyeto i cientos di tratado, i tambe video p’e nabegantenan wak ora nan ta riba laman. Na Cánada, un Testigo a bai un garashi di saca sla. E doño tabata interesá, i e ruman a keda cuater ora i mei, aunke e tempu cu el a dedicá na duna testimonio mes a totalisá solamente un ora asina, entre e tempu cu cliente tabata bini i bai. Cu tempu, el a haci areglo pa un studio 10 or di anochi. Pero, tin biaha e tabata cuminsá te meianochi i tabata dura te dos or di mardugá. Kisas e orario tabata unu difícil, pero e Testigo a logra bon resultado. E homber a dicidí di cera su garashi riba diadomingo pa por asistí na reunion. Pronto e, huntu cu su famia, tabata haci bon progreso.

16. Ki experencianan ta mustra cu e foyeto Rekerí i e buki Conocimentu ta hermentnan poderoso den e trabou di predicá i siña?

¹⁶ E foyeto Kico Dios Ta Rekerí di Nos? i e buki Conocimentu cu Ta Hiba na Bida Eterno ta sigui ser instrumentonan poderoso den e trabou di predicá i siña. Na Italia, un soeur cu tabata warda riba bus a aceptá un ehemplar di Noticia di Reino. E siguiente dia, nan a acerk’é atrobe i el a aceptá e foyeto Rekerí. Despues di esei, tur dia e tabata haña un studio di Bijbel di 10 pa 15 minuut n’e parada. Despues di un luna i mei, el a dicidí di bandoná conbento i bai cas na Guatemala pa sigui su studio. Na Malawi un ferviente baidó di misa cu yama Lobina no a keda contentu ora su yu muhernan a cuminsá studia Bijbel cu Testigonan di Jehova. Tog, e hobencitanan tabata compartí e berdad di Bijbel cu nan mama ora nan tabata por. Na juni 1997, Lobina a mira e buki Conocimentu i e expresion “Conocimentu cu Ta Hiba na” a intrigu’é. Na juli el a aceptá un studio di Bijbel. Na augustus el a asistí n’e congreso di distrito i a scucha henter e programa cu atencion. Pa fin dje luna ei, el a bandoná su misa i a cualificá como un publicadó no-bautisá. El a bautisá na november 1997.

17, 18. Con e videonan di Sociedad a resultá di ta útil den yuda hende “mira” cosnan spiritual?

¹⁷ E videonan di Sociedad a yuda hopi hende “mira” cosnan spiritual. Na Mauritius, un homber a bandoná su misa pa motibu di desunion den dje. Un misionero a mustr’é e unidad di Testigonan di Jehova, usando e video Unidos gracias a la enseñanza divina. Impresioná, e homber a bisa: “Boso, Testigonan di Jehova ta den Paradijs caba!” El a aceptá un studio di Bijbel. Un ruman muher na Hapon a mustra su casá incrédulo e video Los testigos de Jehová... la organización tras el nombre i esei a conmov’é p’e cuminsá un studio regular di Bijbel. Despues di a wak Unidos gracias a la enseñanza divina, e kier a bira Testigo di Jehova. E seri di video di tres parti titulá La Biblia: Libro de hechos y profecías a yud’é aplicá principio di Bijbel den su bida. Finalmente, Los testigos de Jehová se mantienen firmes ante el ataque nazi a mustr’é cu Jehova ta fortalecé Su pueblo contra e atakenan di Satanas. E homber a bautisá na october 1997.

¹⁸ Esakinan ta djis algun dje tantísimo experencianan cu tabatin durante e último aña di sirbishi. Nan ta mustra cu Testigonan di Jehova tin un fe activo i cu Jehova ta fortalecé e fe ei dor di bendicioná nan actividad.—Santiago 2:17.

Cultivá Fe Awe

19. (a) Den ki sentido nos ta den un mihó posicion cu Abraham? (b) Cuantu persona a bini huntu aña pasá pa conmemorá e morto sacrificial di Jesus? (c) Cua paisnan tabatin asistencia di Memorial sobresaliente aña pasá? (Mira e raport na página 12 pa 15.)

¹⁹ Awe, den hopi manera nos ta den un mihó posicion cu Abraham tabata. Nos sa cu Jehova a cumpli cu tur su promesanan na Abraham. En berdad Abraham su desendientenan a heredá Canan, i en berdad nan a bira un nacion grandi. (1 Reynan 4:20; Hebreonan 11:12) Ademas, un 1.971 aña asina despues cu Abraham a bandoná Haran, un di su desendientenan, Jesus, a ser bautisá den awa dor di Juan Bautista i despues den spiritu santu dor di Jehova mes p’e bira e Mesías, Simia di Abraham den e sentido spiritual completo. (Mateo 3:16, 17; Galationan 3:16) Riba 14 di nísan 33 E.C., Jesus a ofrecé su bida como rescate pa esnan cu lo ehercé fe den dje. (Mateo 20:28; Juan 3:16) Miyones di hende lo por bendicioná nan mes awor pa medio di dje. Aña pasá, 13.896.312 persona a reuní dia 14 di nísan pa conmemorá e maraviyoso acto di amor aki. Ki un vindicacion di Jehova, e Gran Cumplidor di promesa!

20, 21. Con hende for di tur nacion a bendicioná nan mes mediante e Simia di Abraham den e promé siglo, i con nan ta bendicionando nan mes awe?

²⁰ Den e promé siglo, hopi hende di tur nacion, cuminsando cu Israel carnal, a ehercé fe den e Simia di Abraham aki i a bira yu ungí di Dios, miembro di un ‘Israel spiritual nobo di Dios.’ (Galationan 3:26-29; 6:16; Echonan 3:25, 26) Nan tabatin un expectativa sigur di bida spiritual inmortal den shelu como co-gobernante den e Reino di Dios. Solamente 144.000 hende lo ricibí e bendicion aki, i tin un resto chikitu di nan riba tera. (Revelacion 5:9, 10; 7:4) Aña pasá, 8.756 a duna di conocé cu nan ta parti dje cantidad aki dor di participá dje emblemanan durante e celebracion di Memorial.

²¹ Awe, casi tur Testigo di Jehova ta dje “multitud grandi” cu Revelacion 7:9-17 ta profetisá di dje. Debí cu nan ta bendicioná nan mes mediante Jesus, nan tin e speransa di bida eterno riba un tera paradísico. (Revelacion 21:3-5) E 5.888.650 personanan cu a participá den e trabou di predicá na 1998 ta evidencia cu en berdad e multitud aki ta “grandi.” Tabata specialmente emocionante pa mira tantu Rusia como Ucrania informá mas cu 100.000 publicadó pa promé bes. E raport di Merca tambe tabata sobresaliente: 1.040.283 publicadó na augustus! Esakinan tabata apénas tres dje 19 paisnan cu aña pasá a informá mas cu 100.000 publicadó.

Pronto Speransa Lo Ser Realisá

22, 23. (a) Pakico nos tin cu haci nos curason firme awe? (b) Con nos por resultá di ta manera Abraham, i no manera esnan sin fe cu Pablo a mencioná?

²² A recordá esnan cu a asistí na Memorial con leu nos ta den e cumplimentu di Jehova su promesanan. Na 1914, Jesus a ser entronisá como Rey dje Reino celestial di Dios, i el a cuminsá su presencia den poder di Reino. (Mateo 24:3; Revelacion 11:15) Sí, e Simia di Abraham ta reina awor den shelu! Santiago a bisa cristiannan di su dia: “Ehercé pacenshi; haci boso curason firme, pasobra e presencia di Señor a yega cerca.” (Santiago 5:8) Wel, awor e presencia ei ta un realidad! Cuantu mas motibu pa haci nos curason firme!

²³ Laga nos renobá nos confiansa den e promesanan di Dios constantemente dor di studia Bijbel cu regularidad i haci oracion significativo. Ohalá nunca nos stop di experenciá Jehova su bendicion segun cu nos ta obedecé su Palabra. E ora ei nos lo ta manera Abraham, i no manera esnan cu Pablo a mencioná kende nan fe a debilitá i a muri. Nada lo separá nos for di nos santísimo fe. (Hudas 20) Nos ta resa pidi pa esaki ta e caso cu tur sirbidó di Jehova durante e aña di sirbishi di 1999 i te den un futuro eterno.

Bo Sa?

◻ Con nos por scucha Dios awe?

◻ Ki beneficionan ta bini di oracionnan significativo na Dios?

◻ Si nos sigui e guia di Jehova obedientemente, con nos fe lo ser fortalecí?

◻ Ki aspectonan dje raport anual (página 12 pa 15) bo a haña specialmente interesante?

[Tabèl na página 12-15]

RAPORT DI AÑA DI SIRBISHI DI 1998

(Wak e edishon imprimí di e revista akí.)

[Plachi na página 16]

Si nos scucha n’e Palabra di Jehova, esei lo renobá nos confiansa den su promesanan

[Plachi na página 18]

Ora nos ta participá den e ministerio, nos fe ta bira mas fuerte