“Pone Bo Curason Riba” Dios Su Tempel!

“Yu di hende, . . . pone bo curason riba tur loke mi ta bai mustra bo . . . Informá tur loke bo ta mira n’e cas di Israel.”​—EZEKIEL 40:4.

1. Den ki condicion e pueblo scogí di Dios tabata na aña 593 P.E.C.?

TABATA aña 593 P.E.C., e di 14 aña cu Israel tabata den exilio. Pa e hudiunan cu tabata biba na Babilonia, nan kerido tera natal mester a parce hopi leu berdad. Ora mayoria di nan a mira Jerusalem pa último biaha, e tabata na candela, su murayanan fuerte bashá abou, i su edificionan mahestuoso na ruina. Jehova su tempel​—un tempu e adorno i gloria dje stad, e único centro pa adoracion puru riba henter e tera​—a ser reducí na un monton di piedra. Awor ainda Israel a falta pa pasa e mayor parti di su exilio na Babilonia. Cincuentiseis aña lo mester a pasa promé cu nan liberacion primintí bini.​—Jeremías 29:10.

2. Pakico recuerdonan di Dios su tempel den Jerusalem mester a haci Ezekiel tristu?

² E idea di cu Dios su tempel tabata na ruina, miles di kilometer leu, un lugá desolá frecuentá pa animalnan salbahe, lo mester a haci fiel profeta Ezekiel tristu. (Jeremías 9:11) Su mes tata, Buzi, a sirbi como sacerdote einan. (Ezekiel 1:3) Ezekiel lo a haña e mésun privilegio, pero el a ser hibá den exilio huntu cu e noblenan di Jerusalem na 617 P.E.C., tempu e tabata hóben ainda. Awor cu e tabatin rond di 50 aña di edad, kisas Ezekiel lo a pensa cu lo e no biba pa mira Jerusalem mas, i cu lo e no haña chens pa yuda reconstruí e tempel. P’esei, imaginá bo cuantu e vision cu Ezekiel a haña di un tempel glorioso lo mester a nificá p’e!

3. (a) Kico tabata e propósito dje vision cu Ezekiel a haña dje tempel? (b) Cua ta e cuater facetanan principal dje vision?

³ E vision detayá aki, cu a yena nuebe capítulo di Ezekiel su buki, a duna e hudiunan den exilio un promesa cu a fortalecé nan fe. Adoracion puru lo a ser restorá! Den e siglonan despues di esei i asta te den nos dia, e vision aki ta un fuente di animacion pa esnan cu ta stima Jehova. Con asina? Laga nos examiná loke e vision profético aki a nificá pa e israelitanan den exilio. E tin cuater faceta principal: e tempel, e sacerdocio, e cabesante i e tera.

E Tempel Ta Ser Restorá

4. Unda Ezekiel ta ser hibá na cuminsamentu di su vision, kico e ta mira einan, i ken ta mustr’é e cosnan ei?

⁴ Na promé lugá, Ezekiel ta ser hibá na “un ceru masha haltu.” Riba parti sur dje ceru tin un tempel inmenso, manera un stad rondoná cu muraya. Un angel, kende su “aparencia tabata manera e aparencia di koper,” ta mustra e profeta tur e partinan dje edificionan. (Ezekiel 40:​2, 3) Den transcurso dje vision, Ezekiel ta mira e angel midi e tres par di portanan dje tempel cu masha cuidou, cada par cara pa otro, cu nan cuartonan di guardia, un patio exterior, un patio interior, comedornan, un altar i e santuario dje tempel cu su compartimentunan yamá e Lugá Santu i e Santísimo.

5. (a) Ki siguransa Jehova ta duna Ezekiel? (b) Kico tabata e “cadavernan di nan reynan” cu mester a saca for dje tempel, i pakico esaki tabata importante?

⁵ Siguientemente, Jehova mes ta aparecé den e vision. E ta drenta e tempel i ta sigurá Ezekiel cu lo E biba ei. Pero Jehova ta ordená pa su cas haña un limpiesa, i e ta bisa: “Awor, laga nan kita nan fornicacion i e cadavernan di nan reynan leu for di mi, i siguramente lo mi biba meimei di nan te na tempu indefiní.” (Ezekiel 43:​2-4, 7, 9) Ta parce cu e “cadavernan di nan reynan” aki a referí na ídolonan. Jerusalem su gobernantenan i pueblo rebelde a contaminá Dios su tempel cu ídolo i, de facto, a haci nan bira rey. (Compará cu Amos 5:26.) Leu di ta dios of reynan bibu, esakinan tabata cosnan sushi i sin bida den bista di Jehova. Mester a kita nan.​—Levítico 26:30; Jeremías 16:18.

6. Kico e midimentu dje tempel a nificá?

⁶ Ki propósito e parti aki dje vision a sirbi? El a sigurá e exiliadonan cu adoracion puru lo a ser restorá completamente na Dios su tempel. Ademas, e midimentu dje tempel a duna un garantia divino cu e vision lo a cumpli cu tur siguridad. (Compará cu Jeremías 31:​39, 40; Zacarías 2:​2-8.) Tur idolatria lo a ser kitá. Un bes mas Jehova lo a bendicioná su cas.

E Sacerdocio i e Cabesante

7. Ki informacion ta ser duná relacioná cu e levitanan i e sacerdotenan?

⁷ E sacerdocio tambe mester a pasa dor di un proceso di limpiesa of refinamentu. Mester a reprendé e levitanan cu a sucumbí na idolatria, miéntras cu mester a encomendá i recompensá e yunan dje sacerdote Zadok pa motibu cu nan a keda limpi.a Tog, tantu e sacerdotenan como e levitanan lo a bai haña posicionnan di sirbishi den e cas restorá di Dios, i no tin duda cu esei a dependé di nan fieldad como individuo. Ademas, Jehova a decretá: “I nan mester instruí mi pueblo en cuanto e diferencia entre un cos santu i un cos profano; i nan mester laga nan conocé e diferencia entre loke ta sushi i loke ta limpi.” (Ezekiel 44:​10-16, 23) Pues, mester a restorá e sacerdocio, i e awante fiel dje sacerdotenan lo a ser recompensá.

8. (a) Ken e cabesantenan di Israel di antigwedad tabata? (b) Den ki maneranan e cabesante di Ezekiel su vision tabata activo den adoracion puru?

⁸ Tambe e vision ta referí na un persona yamá e cabesante. For di tempu di Moises, e nacion tabatin cabesante. E palabra hebreo pa cabesante ta na·sí, i e por a referí na cabes di un cas paterno, tribu of asta un nacion. Den e vision di Ezekiel, e gobernantenan di Israel como clase ta ser reprendé pasobra nan a oprimí e pueblo, i nan ta ser exhortá pa ta imparcial i hustu. Aunke e cabesante no ta dje clase sacerdotal, e ta prominentemente activo den adoracion puru. E ta drenta i sali for dje patio exterior huntu cu e tribunan no-sacerdotal, ta sinta na entrada dje Porta Oost, i ta percurá algun dje sacrificionan pa e pueblo ofrecé. (Ezekiel 44:​2, 3; 45:​8-12, 17) Asina e vision ta sigurá Ezekiel su pueblo cu e nacion restorá lo a ser bendicioná cu lidernan ehemplar, hombernan cu lo a apoyá e sacerdotenan den organisá Dios su pueblo i cu lo tabata bon ehempel den asuntunan spiritual.

E Tera

9. (a) Con mester a dividí e tera, pero ken lo no a ricibí un herencia? (b) Kico tabata e contribucion santu, i kico tabatin den dje?

⁹ Finalmente, Ezekiel su vision ta duna un cuadro general dje tera di Israel. Lo mester a dividié, cu un pida tereno pa cada tribu. E cabesante tambe lo a haña un herencia. Pero e sacerdotenan no, pasobra Jehova a bisa: “Ami ta nan herencia.” (Ezekiel 44:​10, 28; Númeronan 18:20) E vision a mustra cu e pida tereno dje cabesante lo tabata situá na cada banda di un área special yamá e contribucion santu. Esaki tabata un pida tereno vierkant, partí na tres: esun mas ariba tabata pa e levitanan repentí, esun meimei tabata pa e sacerdotenan i esun mas abou tabata pa e stad cu su terenonan productivo. Jehova su tempel lo tabata situá den e parti di tera dje sacerdotenan, net meimei den e tereno di contribucion vierkant.​—Ezekiel 45:​1-7.

10. Kico e profecia tocante e partimentu dje tera a nificá p’e fiel habitantenan di Hudea cu tabata den exilio?

¹⁰ Tur esaki sigur a lanta e ánimo dje exiliadonan ei mashá! Cada famia a haña e siguransa cu nan lo a haña un herencia den e tera. (Compará cu Mikéas 4:4.) Adoracion puru lo a ocupá un lugá elevá i central ei. I tuma nota cu den Ezekiel su vision, e cabesante, mescos cu e sacerdotenan, lo a biba riba e tereno cu e pueblo a contribuí. (Ezekiel 45:16) Pues, den e tera restorá, e pueblo mester a contribuí pa e trabou di esnan cu Jehova a nombra pa hiba delantera, i apoyá nan dor di cooperá cu nan direccion. Den su totalidad, e tera aki tabata un ehempel di organisacion, cooperacion i siguridad.

11, 12. (a) Con Jehova ta sigurá su pueblo proféticamente cu lo el a bendicioná nan tera natal restorá? (b) Kico e palunan cantu dje riu a representá?

¹¹ Jehova lo a bendicioná nan tera? E profecia ta contestá e pregunta aki cu un descripcion alentador. Un rooi ta core for dje tempel. Segun cu e ta core, e ta bira mas i mas hanchu, i pa ora e drenta Laman Morto e ta un riu grandi. Ei e ta rebibá awanan sin bida, i un industria di piscamentu ta florecé na un cantu dje laman. Na ámbos banda dje riu tin hopi palu cu ta duna fruta henter aña, percurando alimento i curacion.​—Ezekiel 47:​1-12.

¹² Pa e exiliadonan, e promesa aki a ripití i a confirmá profecianan di restoracion anterior cu nan a stima mashá. Mas cu un biaha, Jehova su profetanan inspirá a describí un Israel restorá i repoblá den términonan paradísico. Regionnan desolá cu ta haña bida tabata un tema profético cu tabata bini bek regularmente. (Isaías 35:​1, 6, 7; 51:3; Ezekiel 36:35; 37:​1-14) Pues, e pueblo por a verwagt cu Jehova su bendicionnan dunador di bida lo a core manera un riu for dje tempel restorá. Como consecuencia, un nacion spiritualmente morto lo a rebibá. E pueblo restorá lo a ser bendicioná cu hombernan spiritual sobresaliente​—hombernan mes hustu i firme cu e palunan na ámbos banda dje riu dje vision, hombernan cu lo a hiba delantera den reconstruí un tera ruiná. Isaías tambe a skirbi di “palunan grandi di husticia” cu lo a “reconstruí e lugánan cu tabata destruí pa hopi tempu.”​—Isaías 61:​3, 4.

Na Ki Tempu e Vision Ta Cumpli?

13. (a) Den ki sentido Jehova a bendicioná su pueblo restorá cu “palunan grandi di husticia”? (b) Con e profecia tocante Laman Morto a cumpli?

¹³ E exiliadonan cu a bolbe a keda desapuntá? Sigur cu no! Un resto restorá a bolbe na nan kerido tera natal na 537 P.E.C. Cu tempu, e lugánan cu tabata destruí pa hopi tempu, a ser reconstruí bou di guia dje “palunan grandi di husticia,” manera e escriba Esdras, e profetanan Ageo i Zacarías, i e Sumo Sacerdote Hosué. Cabesantenan, manera por ehempel Nehemías i Zorobabel, a goberná e tera cu imparcialidad i husticia. Jehova su tempel a ser restorá, i su percuracionnan pa bida​—e bendicionnan cu ta bini dor di biba segun su pacto​—tabata core libremente atrobe. (Deuteronomio 30:19; Isaías 48:​17-20) Un dje bendicionnan tabata conocimentu. E sacerdotenan a cuminsá cumpli cu nan tareanan atrobe, i nan tabata instruí e pueblo den e Ley. (Malakías 2:7) Como resultado, e pueblo a rebibá spiritualmente i a bira sirbidónan fructífero di Jehova atrobe, manera e curacion di Laman Morto i e industria di piscamentu productivo cu esaki a generá, ta representá.

14. Pakico mester tabatin un cumplimentu di Ezekiel su profecia cu a surpasá loke a sosodé despues cu e hudiunan a regresá for di exilio na Babilonia?

¹⁴ E sucesonan aki tabata e único cumplimentu di Ezekiel su vision? No; el a señalá na algu muchu mas grandi. Pensa un ratu: E tempel cu Ezekiel a mira no por a ser construí n’e manera describí. Ta cierto cu e hudiunan a tuma e vision ei na serio i a asta aplicá algun detaye literalmente.b Sin embargo, e tempel di vision como un totalidad tabata muchu grandi asta pa pas riba e Ceru di Moria, e sitio dje tempel anterior. Ademas, Ezekiel su tempel no tabata den e stad sino na un distancia for di dje, riba un pida tereno separá, miéntras cu e di dos tempel a ser construí n’e sitio caminda esun promé tabata, den e stad di Jerusalem. (Esdras 1:​1, 2) Ademas, nunca tabatin un riu literal cu a sali for dje tempel di Jerusalem. Pues, Israel di antigwedad a mira solamente un cumplimentu menor di e profecia di Ezekiel. Esaki ta implicá cu mester tin un cumplimentu spiritual mas grandi dje vision aki.

15. (a) Na ki tempu Jehova su tempel spiritual a cuminsá funcioná? (b) Kico ta indicá cu e vision di Ezekiel no a cumpli durante Cristo su bida riba tera?

¹⁵ Ta keda claro cu nos mester busca e cumplimentu principal dje vision di Ezekiel den Jehova su gran tempel spiritual, di cua apostel Pablo ta elaborá den e buki di Hebreonan. E tempel ei a bira un realidad ora Jesucristo a ser ungí como su Sumo Sacerdote na aña 29 E.C. Pero e vision di Ezekiel a cumpli den tempu di Jesus? Evidentemente cu no. Jesus, como e Sumo Sacerdote, a cumpli cu e nificacion profético dje Dia di Expiacion mediante su bautismo, su morto sacrificial i su entrada den e Santísimo, esta, shelu mes. (Hebreonan 9:24) Sin embargo, ta interesante cu Ezekiel su vision no ta haci ningun mencion dje sumo sacerdote ni dje Dia di Expiacion. Pues, no ta parce probabel cu e vision aki tabata mustra den direccion di promé siglo E.C. Den ki periodo di tempu e ta cumpli anto?

16. E esenario di Ezekiel su vision ta recordá nos di ki otro profecia, i con esaki ta yuda nos dicerní e tempu dje cumplimentu principal di Ezekiel su vision?

¹⁶ Pa haña un contesta, laga nos bai bek na e vision mes. Ezekiel a skirbi: “Den e visionnan di Dios el a hibá mi n’e tera di Israel i gradualmente el a poné mi riba un ceru masha haltu, riba cua tabatin algu manera structura di un stad parti sur.” (Ezekiel 40:2) E esenario dje vision aki, e “ceru masha haltu,” ta haci nos corda Mikéas 4:1: “Mester sosodé den e parti final dje dianan cu e ceru dje cas di Jehova lo bira firmemente establecí mas haltu cu e top dje cerunan, i siguramente lo e ser halsá mas haltu cu e ceritunan; i na dje pueblonan mester basha bai.” Na ki tempu e profecia aki ta haña su cumplimentu? Mikéas 4:5 ta mustra cu esaki ta cuminsá miéntras cu e nacionnan ta adorá dios falsu ainda. De echo, ta den nos mes tempu, “e parti final dje dianan,” adoracion puru a ser elevá, esta, restorá na su debido lugá den e bida di Dios su sirbidónan.

17. Con e profecia na Malakías 3:​1-5 ta yuda nos determiná e tempu cu a haci e tempel dje vision di Ezekiel limpi?

¹⁷ Kico a haci e restoracion aki posibel? Corda, den e suceso mas significativo dje vision di Ezekiel, Jehova ta bini n’e tempel i ta insistí pa su cas ser hací limpi di idolatria. Na ki tempu Dios su tempel spiritual a ser hací limpi? Na Malakías 3:​1-5, Jehova ta predicí un tempu ora cu lo e “bini na Su tempel,” compañá pa su “mensahero dje pacto,” Jesucristo. Cu ki propósito? “Lo e ta manera e candela di un refinadó i manera e loog dje labadónan.” E refinamentu aki a cuminsá den e tempu dje promé guera mundial. Kico tabata e resultado? Jehova a biba den su cas i a bendicioná e tera spiritual di su pueblo desde 1919 padilanti. (Isaías 66:8) Pues anto, nos por concluí cu e profecia di Ezekiel en cuanto e tempel ta haña un cumplimentu importante durante e último dianan.

18. Na ki tempu e vision dje tempel lo haña su cumplimentu final?

¹⁸ Mescos cu otro profecianan di restoracion, Ezekiel su vision tin un cumplimentu mas, unu final, den Paradijs. Ta n’e tempu ei numa humanidad recto lo ricibí tur e beneficionan di Dios su areglo di tempel. E ora ei Cristo, den compania di su 144.000 sacerdotenan celestial, lo aplicá e balor di su sacrificio di rescate. Tur súbdito humano obediente na Cristo su gobernacion lo ser elevá na perfeccion. (Revelacion 20:​5, 6) Sin embargo, e tempu principal cu e vision di Ezekiel ta haña su cumplimentu no por ta den Paradijs. Di con no?

E Vision Ta Enfocá Riba Nos Mes Tempu

19, 20. Pakico e cumplimentu principal dje vision tin cu sosodé den nos tempu i no den Paradijs?

¹⁹ Ezekiel a mira un tempel cu mester a ser hací limpi di idolatria i fornicacion spiritual. (Ezekiel 43:​7-9) Esaki sigur no por aplicá n’e adoracion di Jehova den Paradijs. Ademas, e sacerdotenan dje vision ta prefigurá e clase sacerdotal ungí miéntras cu nan ta riba tera ainda, no despues cu nan haña nan resureccion celestial of durante e Milenio. Di con? Ripará cu e vision ta describí e sacerdotenan sirbiendo den e patio interior. Artículonan den edicionnan anterior di E Toren di Vigilancia a yega di mustra cu e patio aki ta representá e posicion spiritual único di Cristo su subsacerdotenan miéntras cu nan ta riba tera ainda.c Ripará tambe cu e vision ta enfatisá e imperfeccion dje sacerdotenan. Ta bisa nan pa ofrecé sacrificio pa nan mes picánan. Nan ta haña spiertamentu dje peliger di bira impuru den sentido spiritual i moral. Di manera cu no ta e ungínan resucitá nan ta representá, di ken apostel Pablo a skirbi: “E trompet lo toca, i e mortonan lo ser lantá incoruptibel.” (1 Corintionan 15:52; Ezekiel 44:​21, 22, 25, 27) E sacerdotenan den e vision ta mescla cu e pueblo i ta sirbi nan directamente. Esaki lo no ta e caso den Paradijs, ora e clase sacerdotal lo ta den shelu. P’esei, e vision ta percurá un cuadro excelente dje manera cu e ungínan ta traha estrechamente cu e “multitud grandi” riba tera awe.​—Revelacion 7:9; Ezekiel 42:14.

²⁰ Pues, e vision cu Ezekiel a mira dje tempel ta predicí e efectonan saludabel di un limpiesa spiritual cu ta tumando lugá awe. Pero kico esaki ta nificá pa abo? Esaki no ta djis un enigma teológico abstracto. E vision aki tin hopi di haci cu e manera cu abo ta adorá e único Dios berdadero, Jehova, diariamente. Den nos siguiente artículo, nos lo mira con.

[Nota]

Bo Ta Corda?

◻ Kico tabata e cumplimentu inicial dje vision cu Ezekiel a haña dje tempel i su sacerdocio?

◻ Con Ezekiel su vision dje partimentu dje tera a haña un promé cumplimentu?

◻ Den e restoracion di Israel di antigwedad, ken a actua como cabesantenan fiel, i ken a actua como “palunan grandi di husticia”?

◻ Pakico Ezekiel su vision di tempel tin cu haña su cumplimentu principal durante e último dianan?