“Bendicioná Jehova, O Mi Alma”

“ULTIMO lunanan aki mi sirbishi a bira laf i mi a perde goso den dje,” Nancy ta bisa.a E tin un dies aña ta sirbi como pionero, esta, un proclamadó di tempu completo dje bon nobo. Pero e ta agregá: “Mi no ta contentu cu loke ta pasando cu mi. Ta parce cu mi manera di presentá e bon nobo ta sin smak, i e ta sali ménos for di mi curason. Kico mi mester haci?”

Considerá tambe e caso di Keith, un anciano den un congregacion cristian di Testigonan di Jehova. El a keda masha sorprendí ora el a tende su esposa bisa: “Mester tin algu ta preocupá bo. Den e oracion cu bo a caba di haci, bo a gradicí p’e cuminda, anto no ta ora di come!” Keith ta admití: “Mi por ripará cu mi oracionnan a bira rutinario.”

Sin duda, abo no kier pa bo expresionnan di alabansa na Jehova Dios ta friu i rutinario. Al contrario, bo kier pa nan ta sincero, motivá dor di sintimentunan di gratitud. Sin embargo, bo no por cambia di sintimentu manera bo ta haci cu paña. E tin cu sali for di bo paden. Con nos por ta gradicidu di curason? Salmo 103 ta duna nos comprendimentu penetrante den e aspecto aki.

Rey David di antiguo Israel a componé Salmo 103. E ta cuminsá cu e palabranan: “Bendicioná Jehova, o mi alma, sí, tur loke tin den mi, su nomber santu.” (Salmo 103:1) Segun un buki di referencia: “Ora e palabra bendicioná ta aplicá na Dios, e ta nificá alabá, i semper ta indicá un cariño profundo p’e i tambe un sintimentu di gratitud.” David tabatin e deseo di alabá Jehova cu un curason yen di amor i aprecio, i p’esei el a exhortá su propio alma, esta, su mes, pa “bendicioná Jehova.” Pero kico ta lanta e sintimentu caluroso aki den David su curason, pa cu e Dios cu e ta adorá?

David ta sigui: “No lubidá tur [Jehova] su echonan.” (Salmo 103:2) Evidentemente, sinti gratitud pa cu Jehova ta conectá cu meditá cu aprecio riba “su echonan.” Cua echonan di Jehova exactamente David tin na mente? Considerando Jehova Dios su creacion, por ehempel un shelu decorá cu strea riba un anochi cla, en berdad por yena bo curason cu gratitud p’e Creador. Shelu yen di strea a conmové David profundamente. (Salmo 8:3, 4; 19:1) Sin embargo, den Salmo 103, David ta corda riba un otro clase di actividad di Jehova.

Jehova “Ta Pordoná Tur Bo Erornan”

Den e salmo aki, David ta repasá Dios su actonan di bondad amoroso. E ta referí na esun di promé i mas importante, ora e ta canta: ‘Jehova ta pordoná tur bo erornan.’ (Salmo 103:3) David sigur tabata conciente di su mes estado pecaminoso. Despues cu profeta Natan a confront’é cu su relacion adúltero cu Bat-seba, David a admití: “Contra abo [Jehova], abo so, mi a peca, i loke ta malu den bo bista mi a haci.” (Salmo 51:4) Cu un curason kibrá, el a roga: “Mustra mi fabor, o Dios, conforme cu bo bondad amoroso. Conforme cu e abundancia di bo misericordianan, eliminá mi faltanan. Laba mi cabalmente di mi eror, i haci mi limpi asta di mi picá.” (Salmo 51:1, 2) David lo mester tabata hopi gradicidu ora el a sinti cu Dios a pordon’é! Como hende imperfecto, el a cometé otro erornan den su bida, pero semper el a repentí, a aceptá reprendementu i a corigí su camindanan. David a meditá riba Dios su actonan maraviyoso di bondad amoroso pa cuné i esei a impuls’é pa bendicioná Jehova.

Nos tambe no ta pecadó? (Romanonan 5:12) Asta apostel Pablo a lamentá: “Realmente mi tin deleite den e ley di Dios segun e hende cu mi ta paden, pero mi ta contemplá den mi miembronan un otro ley cu ta haci guera contra e ley di mi mente i ta hiba mi catibu n’e ley di picá cu ta den mi miembronan. Hende infelis cu mi ta! Ken lo rescatá mi for dje curpa padeciendo e morto aki?” (Romanonan 7:22-24) Esta gradicidu nos por ta cu Jehova no ta tene cuenta di nos faltanan! Ora nos repentí i busca pordon, gustosamente e ta veeg nan.

David ta corda su mes: “[Jehova] ta cura tur bo malesanan.” (Salmo 103:3) Ya cu curamentu ta un acto di restoracion, e ta encerá mas cu pordon pa malecho. E ta nificá eliminá ‘malesa,’ esta, e mal consecuencianan dje eror di nos camindanan. Den e mundu nobo cu Jehova ta bai crea, en berdad lo e eliminá e consecuencianan físico di picá, manera, enfermedad i morto. (Isaías 25:8; Revelacion 21:1-4) Sin embargo, asta awe Jehova ta cura nos malesanan spiritual. Pa algun hende, e malesanan aki ta encerá un concenshi sushi i un relacion dañá cu Dios. “No lubidá” loke Jehova a haci caba pa cada un di nos personalmente den e aspecto aki.

E “Ta Reclamá Bo Bida”

“[Jehova] ta reclamá bo bida for di e buracu,” David ta canta. (Salmo 103:4) “E buracu” ta e graf comun di humanidad, esta, Sheol of Hádes. Asta promé cu el a bira rey di Israel, David a hañ’é den peliger di morto. Por ehempel, Saul, e rey di Israel, tabatin un odio mortífero contra David i a purba mat’é na vários ocasion. (1 Samuel 18:9-29; 19:10; 23:6-29) E filisteonan tambe kier a mata David. (1 Samuel 21:10-15) Pero tur biaha, Jehova a scap’é for di “e buracu.” Esta gradicidu David lo mester tabata ora el a corda e echonan aki di Jehova!

Kico di abo? Jehova a sostené bo durante periodonan di depresion of di pérdida di un ser kerí? Of bo sa di casonan den nos tempu caminda el a scapa bida di su fiel Testigonan for dje buracu di Sheol? Kisas relatonan di su actonan di salbacion cu bo a yega di lesa den e revista aki a conmové bo. Pakico no tuma tempu pa meditá cu aprecio riba e echonan aki dje Dios berdadero? I naturalmente, nos tur tin motibu pa ta gradicidu na Jehova p’e speransa di resureccion.—Juan 5:28, 29; Echonan 24:15.

Jehova ta duna nos bida i tambe loke ta haci bida gososo i bale la pena. E salmista ta declará cu Dios “ta coroná bo cu bondad amoroso i misericordianan.” (Salmo 103:4) Ora nos ta den necesidad, Jehova no ta bandoná nos, e ta yuda nos mediante su organisacion visibel i e wardadónan, esta, e ancianonan nombrá den e congregacion. Yudansa asina ta pone cu nos por trata cu un situacion ferfelu, sin perde nos respet propio i dignidad. Wardadónan cristian ta mashá interesá den e carnénan. Nan ta animá esnan enfermo i deprimí, i nan ta haci tur loke nan por pa restorá esnan cu a cai. (Isaías 32:1, 2; 1 Pedro 5:2, 3; Hudas 22, 23) Jehova su spiritu ta motivá e wardadónan aki pa demostrá amor i compasion p’e tou. Su “bondad amoroso i misericordianan” ta ègt manera un corona cu ta dorna nos i duna nos dignidad! Laga nos bendicioná Jehova i su nomber santu sin nunca lubidá su echonan.

E salmista David ta canta i sigui amonestá su mes: “[Jehova] ta satisfacé henter bo bida cu loke ta bon; bo hubentud ta sigui renobá su mes mescos cu di un águila.” (Salmo 103:5) Jehova ta duna hende un bida di satisfaccion i goso. Sí, e conocimentu dje berdad riba su mes ta un tesoro incomparabel i un fuente di tremendo goso! I pensa riba e trabou cu Jehova a duna nos pa haci, cu ta duna asina un satisfaccion profundo, esta, e trabou di predicá i haci disipel. Ta ki un goso pa topa cu un persona cu ta interesá pa siña tocante e Dios berdadero, i yuda e persona ei siña conocé Jehova i bendicion’é! Ta un gran privilegio pa participá den un trabou cu tin di haber cu e santificacion di Jehova su nomber i vindicacion di su soberania, sea cu hende den nos teritorio ta scucha of no.

Ken no ta cansa miéntras cu nan ta persistí den e trabou di proclamá e Reino di Dios? Pero Jehova ta sigui renobá e fortalesa di su sirbidónan, i ta haci nan ‘manera águila’ cu tin ala poderoso i cu ta bula hopi haltu den shelu. Nos por ta hopi gradicidu cu nos amoroso Tata celestial ta percurá tal “energia dinámico,” pa asina nos por cumpli cu nos ministerio fielmente dia tras dia!—Isaías 40:29-31.

Pa ilustrá: Clara tin un trabou seglar di henter dia i tambe e ta dedicá rond di 50 ora tur luna den e ministerio di veld. E ta bisa: “Tin bes mi ta cansá, i mi ta haci esfuerso pa sali den sirbishi di veld djis pasobra mi a haci areglo pa traha cu un ruman. Pero una bes mi sali, mi ta sinti cu mi ta haña vigor.” Kisas den e ministerio cristian, bo tambe a yega di experenciá e vigor cu ta bini dor di apoyo divino. Mare abo tambe por ser impulsá pa bisa mescos cu David den su palabranan di apertura dje salmo aki: “Bendicioná Jehova, o mi alma, sí, tur loke tin den mi, su nomber santu.”

Jehova Ta Libra Su Pueblo

E salmista ta canta tambe: “Jehova ta efectuá actonan di husticia i decisionnan hudicial pa tur esnan cu ta ser estafá. El a duna di conocé su camindanan na Moises, su tratonan asta n’e yunan di Israel.” (Salmo 103:6, 7) Probablemente, David ta pensa riba e ‘estafamentu’ di israelitanan na man dje opresornan egipcio den tempu di Moises. Ora el a meditá riba e manera cu Jehova a haci su caminda di liberacion conocí na Moises, un sintimentu di gratitud mester a lanta den David su curason.

Dor di refleccioná riba Dios su trato cu e israelitanan, nos tambe por ser impulsá pa ta gradicidu asina. Pero nos no mester laga di meditá riba e experencianan di Jehova su sirbidónan djawe, manera esnan mencioná den capítulo 29 i 30 dje buki Los testigos de Jehová, proclamadores del Reino de Dios. E relatonan documentá den e buki ei i den otro publicacionnan di Sociedad Watch Tower ta yuda nos mira con Jehova a yuda su pueblo djawe wanta encarcelacion, accion di multitud desordená, prohibicion, campo di concentracion i campo di trabou forsá. Nan a pasa dor di prueba den paisnan asotá pa guera, manera Burundi, Liberia, Ruanda i ex-Yugoslavia. Ki ora cu tabatin persecucion, semper Jehova su man a sostené su fiel sirbidónan. Contemplá e echonan aki di nos gran Dios, Jehova, por tin mésun efecto riba nos cu meditá riba e relato tocante e liberacion for di Egipto tabatin riba David.

Considerá tambe con tiernamente Jehova ta libra nos for dje carga di picá. El a percurá “e sanger di e Cristo” pa “haci nos concenshi limpi di obranan morto.” (Hebreonan 9:14) Ora nos repentí di nos picánan i busca pordon a base dje sanger dramá di Cristo, Dios ta pone nos faltanan leu for di nos—“mes leu cu salimentu di solo ta for di bahamentu di solo”—i e ta trece nos bek den un posicion di fabor cerca dje. I pensa riba Jehova su percuracionnan pa loke ta reunionnan cristian, asociacion edificante, wardadónan den e congregacion i publicacionnan bíblico cu nos ta ricibí mediante “e esclabo fiel i discreto.” (Mateo 24:45) Tur e obranan aki di Jehova no ta yuda fortalecé nos relacion cuné? David ta proclamá: “Jehova ta misericordioso i compasivo, ta tarda pa rabia i abundante den bondad amoroso. . . . E no a haci cu nos ni conforme cu nos picánan; ni conforme cu nos erornan e no a trece riba nos loke nos merecé.” (Salmo 103:8-14) Meditacion riba Jehova su cuido amoroso siguramente por motivá nos pa glorifik’é i engrandecé su nomber santu.

“Bendicioná Jehova, Tur Obranan di Dje”

Na comparacion cu e inmortalidad di Jehova, e “Dios di eternidad,” e “dianan” di “hende mortal” en berdad ta corticu, “manera esnan di yerba berde.” Pero cu aprecio David ta refleccioná: “E bondad amoroso di Jehova ta di tempu indefiní, sí, te na tempu indefiní pa cu esnan cu ta tem’é, i su husticia p’e yunan di yunan, pa cu esnan cu ta warda su pacto i pa cu esnan cu ta corda su ordunan pa asina cumpli cu nan.” (Génesis 21:33, nota na pia di página; Salmo 103:15-18) Jehova no ta lubidá esnan cu ta tem’é. N’e debido tempu, lo e duna nan bida eterno.—Juan 3:16; 17:3.

David ta expresá su aprecio p’e reinado di Jehova, dor di bisa: “Jehova mes a establecé su trono firmemente den shelu; i su propio gobernacion real a tene dominio riba tur cos.” (Salmo 103:19) Aunke pa un tempu, e reino di Israel tabata un refleho visibel dje reinado di Jehova, su trono ta realmente den shelu. Dor cu Jehova ta e Creador di tur cos, e ta e Gobernante Soberano dje universo i e ta ehercé su boluntad divino den shelu i riba tera, na armonia cu su mes propósitonan.

David ta exhortá asta e angelnan di shelu. E ta canta: “Bendicioná Jehova, o angelnan di dje, poderoso den potencia, cu ta cumpli cu su palabra, dor di scucha n’e bos di su palabra. Bendicioná Jehova, tur ehércitonan di dje, ministernan di dje, cu ta haci su boluntad. Bendicioná Jehova, tur obranan di dje, na tur lugá di su dominacion. Bendicioná Jehova, o mi alma.” (Salmo 103:20-22) Nos meditacion riba Jehova su actonan di bondad amoroso pa cu nos no mester impulsá nos tambe pa bendicion’é? Sigur cu sí! I nos por ta sigur cu e zonido di nos bos den alabansa personal na Dios lo no bai perdí entre e coro poderoso di alabadónan cu ta incluí asta e angelnan hustu. Laga nos alabá nos Tata celestial di henter curason, i semper papia bon di dje. Sí, laga nos tuma na pechu e palabranan di David: “Bendicioná Jehova, o mi alma.”

[Nota]

[Plachi na página 23]

David a meditá riba Jehova su actonan di bondad amoroso. Abo tambe?