Preshon di Bo Pareunan​—Bo Por Saca Probecho for di Dje?

Nos tur ta nace cu e deseo fundamental pa nos pareunan aceptá nos. Niun hende no kier pa otro hende keda sin gusta nan of rechasá nan. Pues na diferente grado, nos pareunan tin influencia riba nos.

E DEFINICION pa un pareu ta: “Un persona den un posicion igual cu un otro; . . . unu cu ta pertenecé na e mésun grupo social, foral pa loke ta edad, rango of státus.” I preshon di pareu ta e influencia cu nos pareunan ta ehercé riba nos di manera cu, concientemente of inconcientemente, nos ta adaptá nos na nan manera di pensa of actua. Generalmente, hende ta mira preshon di pareu den un lus negativo. Tog, manera nos lo mira, nos por us’é pa saca probecho for di dje.

Influencia Riba Grupo di Tur Edad

Preshon di pareunan no ta limitá na hóbennan; e tin efecto riba grupo di tur edad. Nos ta bou di su influencia ora nos ripará cu nos ta haci preguntanan manera: “Ata otronan ta hacié, di con ami no por?” “Di con semper ami mester ta diferente?” “Kico otro hende lo pensa of bisa?” “Tur mi amigunan ta traha afsprak pa sali, i ta casa, pero ami no. Ta algu falta mi?”

Aunke e preshon pa comportá bo manera bo pareunan tin efecto riba grupo di tur edad, e sa ta mas fuerte durante adolesencia. The World Book Encyclopedia ta bisa cu “mayoria adolesente ta bira profundamente enbolbí den e grupo di nan pareunan—esta, nan círculo di amigu i conocí. E tienernan aki ta busca aprobacion cerca e grupo di nan pareunan, en bes di cerca nan mayornan, i kisas nan ta cambia nan conducta pa gana e aprobacion ei.” E enciclopedia ta agregá cu tienernan “ta asumí cu nan desaroyo ta normal si nan pareunan ta aceptá nan i gusta nan.” Cu e meta ei nan “ta bira absorbá den cosnan cu nan ta pensa ta influenciá nan popularidad, manera nan estilo di bisti, capacidad di dirigí i éxito den traha afsprak pa sali.”

Parehanan casá por ripará cu nan decisionnan tocante ki sorto di cas nan tin cu cumpra of huur, ki model di auto pa core, haña yu of no i hopi otro asuntu ta ser influenciá dor di preshon di nan pareunan, esta, loke ta aceptabel den nan comunidad, entre esnan cu nan ta asociá cuné of nan grupo étnico. Algun famia ta asta hinca nan mes den debe grandi djis pa nan keda n’e mes nivel materialmente cu nan bisiña of pareunan. Sí, hopi bes nos metanan, nos manera di pensa i nos decisionnan ta revelá con fuerte e poder sutil di preshon di pareunan ta. En bista dje poder cu preshon di nos pareunan tin, nos por us’é den un manera bentahoso pa yuda nos riba e caminda cu nos kier bai? Sí, nos por!

Saca Lo Mihó for di Influencia Sano di Bo Pareunan

Dokter i otro profesionalnan den cuido di salú sa cu ta di gran balor pa nan pashentnan ta rondoná cu hende positivo i otro influencianan sano. Un ambiente asina por stimulá nan recuperacion. Por ehempel, den caso di un persona cu a perde un brasa of pia, e bon ehempel i animacion di otronan cu a sufri algu similar por ta di gran yudansa p’e durante e proceso largu di rehabilitacion físico i recuperacion emocional. Ta bisto anto, cu ser completamente enbolbí den un ambiente sano, unda tin bon ehempelnan optimista i positivo, ta un manera pa saca lo mihó for dje clase corecto di preshon di pareunan.

E principio aki ta conta tambe den e congregacion cristian, pasobra un dje motibunan pakico Jehova a manda su pueblo pa reuní huntu regularmente, ta pa nan haña influencia positivo di pareunan. Dios ta urgi nos pa ‘incitá otro na amor i na obranan excelente i animá un e otro.’ (Hebreonan 10:24, 25) Animacion asina ta di balor incalculabel debí n’e hopi preshonnan negativo i dañino cu tin den e mundu djawe. Como resultado dje preshonnan aki, cristiannan tin cu “haci esfuerso vigoroso” pa keda spiritualmente fuerte. (Lucas 13:24) Pues, nos tin mester dje apoyo amoroso di nos compañeronan creyente, i nos ta apreci’é. Ademas, podisé algun tin cu soportá “sumpiña den carni,” kisas malesa of desabilidad. (2 Corintionan 12:7) Otronan por ta lucha pa vence mal custumber of depresion, of kisas nan tin dificultad pa cumpli cu loke bida ta exigí. P’esei, ta sabí pa nos trata pa ta huntu cu hende cu ta keda pegá na Jehova Dios i cu tin goso den sirbié. Pareunan asina lo animá nos i yuda nos ‘wanta fielmente te na fin.’—Mateo 24:13.

Anto dor di scoge e pareunan corecto, nos por controlá e influencia cu nan ta ehercé riba nos. Ademas, e excelente alimento spiritual i guia práctico cu nos ta haña n’e reunionnan cristian ta reforsá e animacion personal cu nos ta ricibí for di nos pareunan.

Naturalmente, no ta semper fácil pa nos yega nos reunionnan. Kisas algun ruman ta haña poco of ningun apoyo di nan casá, otronan tin cu prepará nan yunan i tin otronan cu kisas tin problema cu transport. Pero pensa: Si bo no permití e obstáculonan aki stroba bo, e ora ei, bo ehempel por animá otronan cu kisas ta lucha cu circunstancianan similar. Cu otro palabra, abo i otronan manera bo ta percurá no solamente un bon ehempel, sino tambe un forma sano di influencia di pareu—anto sin e mínimo indicacion di ta obligá hende.

De facto, apostel Pablo, kende mes tabata lucha cu hopi problema i obstáculo, a animá cristiannan pa imitá su excelente ehempel i di otro cristiannan maduro. El a bisa: “Unidamente bira imitadónan di mi, rumannan, i mantené boso bista riba esnan cu ta cana den un manera cu ta conforme cu e ehempel cu boso tin den nos.” (Filipensenan 3:17; 4:9) E cristiannan di promé siglo na Tesalónica a wak riba Pablo su excelente ehempel. Pablo a skirbi di nan: “Boso a bira imitadó di nos i di Señor, ya cu boso a aceptá e palabra bou di hopi tribulacion cu goso di spiritu santu, di manera cu boso a bira un ehempel pa tur e creyentenan di Macedonia i di Acaya.” (1 Tesalonicensenan 1:6, 7) Nos actitud i ehempel positivo por tin un efecto similar riba esnan cu ken nos ta asociá.

Evitá Influencianan Negativo

Si nos kier evitá preshon insaludabel di pareunan, nos tin cu resistí e influencia di ‘esnan cu ta cana segun carni.’ (Romanonan 8:4, 5; 1 Juan 2:15-17) Sino, preshon perhudicial di pareunan lo alehá nos for di Jehova i su conseho sabí. Proverbionan 13:20 ta bisa: “Esun cu ta cana cu hende sabí lo bira sabí, pero esun cu tin trato cu hende estúpido lo bai e malu.” Bo por corda un persona cu ken cos a bai malu, debí na preshon insaludabel di su pareunan? Por ehempel, influencia di nan pareunan a pone cu algun cristian a cai den materialismo, inmoralidad, uso di droga of maluso di alcohol.

Asta den e congregacion cristian, preshon insaludabel di pareunan por influenciá nos, si nos scoge individuonan cu ta spiritualmente swak como nos compañeronan íntimo. (1 Corintionan 15:33; 2 Tesalonicensenan 3:14) Hopi bes, hende asina no ta gusta combersá tocante cosnan spiritual; kisas asta nan ta tene mofa di esnan cu sí ta gusta hacié. Si nos scoge e tipo di personanan ei como nos compañeronan íntimo, preshon di pareu lo por primi nos den un malchi similar, i lo no dura mashá cu nos lo por ripará cu nos actitud i manera di pensa ta reflehá esnan di nan. Nos por asta cuminsá pensa negativo di esnan cu ta sincero den nan fe i cu ta purba haci progreso spiritual.—1 Timoteo 4:15.

Ta cuantu mas sabí pa cultivá amistad cu esnan cu ta haci esfuerso pa agradá Jehova, kendenan tin goso den cosnan spiritual! Compañeronan asina lo yuda nos reflehá “e sabiduria djariba.” E “ta na promé lugá decente, despues pacífico, razonabel, cla pa obedecé, yen di misericordia i bon fruta, . . . sin ta hipócrita.” (Santiago 3:17) Esaki no ta nificá cu un persona cu ta gusta cos spiritual no por papia tocante otro cos cu no ta cos spiritual. Al contrario! Djis pensa riba e variedad di temanan interesante cu e publicacionnan di Sociedad Watch Tower, manera e revista Spierta!, ta trata cuné. Tópiconan di combersacion saludabel en berdad tin sinfin, i dor di mustra interes den un surtido amplio di tema, nos ta reflehá amor pa bida i pa Jehova su obranan.

Mescos cu un bon hungadó di ténis ta mehorá su wega dor di hunga cu otro bon hungadó, compañeronan corecto ta elevá nos mentalmente, emocionalmente i spiritualmente. Di otro banda, compañeronan robes por hiba nos den un curso di hipocresia dor di animá nos pa hiba un bida dòbel. Ta cuantu mas mihó pa disfrutá di un concenshi limpi i respet propio!

Algun Cu A Beneficiá

Mayoria hende ta haña cu siña doctrina di Bijbel i su rekisitonan moral i spiritual no ta masha difícil. Sin embargo, loke sí por ta difícil ta pa pone e cosnan ei na práctica. Manera e siguiente ehempelnan ta mustra, influencia sano di preshon di pareu por yuda nos sirbi Jehova di henter nos alma.

Un Testigo cu ta den e ministerio di tempu completo huntu cu su casá, a bisa cu e ehempel di su pareunan tabatin influencia riba su metanan den bida. Miéntras e tabata crece, e tabatin cu soportá influencianan insaludabel. Pero como amigu el a scoge hende cu a anim’é pa participá den e ministerio i asistí na reunionnan cristian regularmente. Un relacion estrecho cu e compañeronan aki, a yud’é riba e caminda pa madures spiritual.

Un otro Testigo ta skirbi: “Despues cu nos a casa, ami cu mi esposa a muda bai un congregacion caminda tabatin un pareha di mas of ménos nos edad ta traha como pionero regular. Nan ehempel a contribuí cu nos a drenta e ministerio di tempu completo. Anto nos tambe a traha pa edificá e spiritu di pionero den e congregacion. Como resultado, hopi ruman a djoin nos como pionero.”

Asociacion cu hende cu tin metanan teocrático por haci obedencia na Jehova mas fácil. Esaki ta un otro efecto beneficioso di influencia sano di pareunan. Un Testigo cu como hóben a cuminsá den e ministerio di tempu completo i despues a bira superintendente biahero, ta sirbi awor na un oficina di sucursal di Sociedad Watch Tower. E ta skirbi: “Algun dje recuerdonan di mas bieu i dushi di mi hubentud, ta esnan di sirbidónan di tempu completo cu tabata bishitá nos cas. Semper tabatin lugá pa un stul mas na nos mesa di comedor. Ora mi tabatin dies aña di edad, un superintendente di circuito a duna mi un tas di sirbishi. Te awe mi ta apreciá e tas ei.”

Refleccionando riba su añanan di tiener, e Testigo aki ta agregá: “Hopi dje mucha hombernan den e congregacion kier tabata enbolbí den actividadnan di congregacion, i nan ehempel a impulsá e otronan di nos pa deseá di haci mescos.” Pareunan sano a yuda e hóben aki, cu tabata manera un planch’i mata, crece bira un excelente cristian manera un palu grandi. Mayornan, boso ta invitá rumannan cu por tin un influencia positivo i edificante riba boso yunan, na boso cas?—Malakías 3:16.

Naturalmente, no ta nos tur por participá den e ministerio di tempu completo manera e rumannan cu nos a caba di mencioná. Pero sí nos tur por siña stima Jehova ‘cu henter nos curason, alma i mente.’ (Mateo 22:37) Pareunan cu nos scoge ta hunga un papel importante den desaroyá e amor ei i, tambe den nos prospectonan pa bida eterno.

E salmista a duna un fórmula simpel pero eficas pa berdadero éxito den bida: “Felis ta e homber cu no a cana den e conseho dje malbadonan, i den caminda di pecadónan e no a para, i den stul di mofadónan e na a sinta. Pero su deleite ta den e ley di Jehova, i den su ley e ta lesa na bos abou di dia i anochi. I sigur lo e bira manera un palu plantá cantu di coriente di awa, cu ta duna su propio fruta den su temporada i di cua su blachinan no ta marchitá, i tur loke e haci lo tin éxito.”—Salmo 1:1-3.

Esaki sí ta un garantia maraviyoso! Aunke nos ta imperfecto i ta cometé fayo, nos por tin un bida exitoso si nos laga Jehova guia nos i si nos probechá libremente dje abundancia di influencia sano di pareunan cu Dios ta duna nos, esta, “henter e asociacion di [nos] rumannan den e mundu.”—1 Pedro 5:9.

[Plachi na página 24]

E congregacion ta ofrecé un forma sano di influencia di pareunan

[Plachi na página 25]

Mayornan, animá boso yunan pa anda cu pareunan edificante