Tin un Hende Cu Sí Ta Interesá?

“E lágrimanan di esnan oprimí” a bira un riu. Lágrimanan dramá pa víctimanan di numeroso “actonan di opresion” rond mundu. Hopi bes esnan cu bira víctima ta sinti cu nan no tin “consoladó,” i cu ningun hende no ta ègt interesá den nan.—Eclesiástes 4:1.

APESAR dje riu di lágrima aki, algun hende no ta wori mes cu e sufrimentu di nan próhimo. Nan ta cera wowo p’e dolor di otro hende, mescos cu e sacerdote i e levita den Jesucristo su ilustracion di un homber cu a ser atracá, hortá i lagá mitar morto cantu di caminda. (Lucas 10:30-32) Tanten cu cos ta bai basta bon pa nan i nan famia, nan no ta interesá den otro hende. Den un sentido, nan ta bisa: “Ki mi tin cunes?”

Esaki no mester sorprendé nos. Apostel Pablo a predicí cu den “e último dianan” hopi hende lo falta “cariño natural.” (2 Timoteo 3:1, 3) Un observadó a lamentá e actitud indiferente cu hende a desaroyá. El a bisa cu “un código nobo di conducta egocéntrico ta reemplasando e antiguo filosofia i tradicion irlandes di mustra interes den otro i compartí.” Rond mundu, hende ta interesá solamente den nan mes, i casi nan no ta preocupá mes cu e miseria di otro hende.

Tin un Necesidad pa Mustra Interes den Otro Hende

Tin un berdadero necesidad pa mustra interes den otro hende. Por ehempel, pensa riba e homber solitario na Alemania cu nan a “haña sintá dilanti su television—cincu aña despues di su morto riba Pascu.” E tabata divorciá i desabilitá, i su experencianan tristu a amargá su bida. Ningun hende no a sinti su falta te ora su cuenta di banco cu tabata paga su huur di cas a caba na nada. Ningun hende tabata ègt interesá den dje.

Pensa tambe riba e víctimanan impotente di doñonan grandi di tereno. Den un área, rond di 200.000 hende (un cuart dje poblacion) “a muri di opresion i hamber” despues cu a kita nan tera violentamente for di nan. Of pensa riba e muchanan cu a ser exponé na barbaridadnan casi increibel. Un informe a bisa: “E porcentahe di mucha den [un cierto pais] cu tabata testigo di múltiple atrocidad, manera matamentu, maltrato físico, violacion sexual, algun bes cometí dor di otro adolesente, ta asombroso.” Bo por comprendé pakico un víctima dje inhusticianan ei por puntra su mes cu awa na wowo: “Tin hende cu sí ta interesá den mi?”

Segun un informe di Nacionnan Uní, 1,3 mil miyon hende den e paisnan den desaroyo tin cu biba cu e ekivalente di ménos cu dos florin pa dia. Nan mester ta puntra nan mes si tin hende ta interesá den nan. Miles di refugiado tambe lo ta puntra nan mes esei. Segun un informe den The Irish Times, nan “tin e opcion desagradabel di sea keda den un campo di refugiado miserabel of un pais inhospitalario, of trata na regresá nan patria, cu ainda ta asotá [of, desbaratá] pa guera of division étnico.” E mésun informe a incluí e prueba desalentador aki: “Cera bo wowo, conta te tres, i un mucha a caba di muri, un dje 35.000 muchanan cu lo muri awe di malnutricion of di enfermedad cu por a ser prevení.” Nada straño anto cu hopi hende ta sclama di angustia i amargura!—Compará cu Job 7:11.

Mester tabatin tur e sufrimentu aki? Realísticamente, tin un persona cu no solamente ta interesá, sino tambe tin e poder pa stop e sufrimentu i cura tur e dolor cu hende ta experenciá?

[Rekonosementu pa Potrèt na página 2]

Portada i página 32: Reuters/Nikola Solic/Archive Photos

[Rekonosementu pa Potrèt na página 3]

A. Boulat/Sipa Press