Siña e Caminda Sobresaliente di Amor

Kósovo, Líbanon i Irlanda. Esakinan ta nombernan cu a dominá noticia den añanan recien. Nan ta lanta den mente di hende esenanan di dramamentu di sanger, bombardeo i matansa. Claro cu conflictonan violento causá pa pleitu religioso, racial, étnico of di otro tipo, no ta nada nobo. En realidad, e páginanan di historia ta yen di nan, i nan a pone humanidad sufri masha hopi.

MIRANDO cu tabatin guera atrabes di henter historia, hopi persona a yega n’e conclusion cu guera ta realmente inevitabel i cu ta natural pa hende odia otro. Sin embargo, e punto di bista ei ta totalmente contrario n’e siñansanan di Bijbel, e Palabra di Dios. E Scritura ta declará inekibocablemente: “Esun cu no ta stima no a yega na conocé Dios, pasobra Dios ta amor.” (1 Juan 4:8) Ta keda claro cu e Creador kier pa hende stima otro.

Bijbel ta revelá tambe cu hende a ser creá den imágen di Dios. (Génesis 1:26, 27) Esaki ta nificá cu humanidad ta dotá cu e capacidad pa reflehá e cualidadnan di Dios, i esun mas prominente di nan ta amor. Siendo cu ta asina, pakico hende a faya asina miserablemente den mustra amor pa otro atrabes di henter historia? Atrobe, Bijbel ta laga nos comprendé esei bon cla. Esei ta pasobra e promé pareha humano, Adam i Eva, a rebelá contra Dios i a cai den picá. Como resultado, tur nan desendientenan a heredá picá i imperfeccion. Romanonan 3:23 ta splica: “Tur a peca i no ta alcansá e gloria di Dios.” E abilidad di stima cu Dios a duna nos ta manchá cu nos picá heredá i imperfeccion. Pero esaki ta nificá cu hende no por stima otro mas? Ki speransa tin cu un dia nos lo por tin un relacion pacífico i amoroso cu nos próhimo?

Nos Tin cu Siña Stima Dios

Jehova Dios sa cu apesar di tur cos, ainda hende ta capas pa mustra amor. P’e motibu ei e ta rekerí di tur persona cu kier agrad’é pa manifestá amor te caminda nan por. Jesucristo, Yu di Dios, a splica e rekisito aki ora a puntr’é cua ta e mandamentu di mas grandi den e Ley duná na Israel. El a bisa: “‘Bo tin cu stima Jehova bo Dios cu henter bo curason i cu henter bo alma i cu henter bo mente.’ Esaki ta e mandamentu di mas grandi i esun promé.” Anto el a agregá: “E di dos, semehante na dje, ta esaki: ‘Bo tin cu stima bo próhimo mescos cu bo mes.’ Henter e Ley i e Profetanan ta dependé dje dos mandamentunan aki.”—Mateo 22:37-40.

Ma hopi hende ta haña cu ta masha difícil pa stima un persona cu nan no por mira, i nos como ser humano no por mira Jehova Dios pasobra e ta un Spiritu. (Juan 4:24) Tog, loke Dios ta haci tin un efecto riba nos tur dia, ya cu nos tur ta dependé dje hopi cosnan bon cu el a crea pa nos beneficio. Apostel Pablo a mustra riba e echo aki ora el a bisa: “[Dios] no a laga su mes sin testimonio pasobra el a haci bon, dunando boso yobida di shelu i temporadanan fructífero, yenando boso curason completamente cu cuminda i alegria.”—Echonan 14:17.

Maske tur hende ta beneficiá dje percuracionnan dje Creador den un of otro manera, na comparacion poco hende ta gradicidu na dje of ta sinti nan impulsá pa yam’é danki. Pues, nos tin cu evaluá tur e bon cosnan cu Dios a haci pa nos, anto meditá riba e cualidadnan maraviyoso cu ta manifestá nan mes den tur loke e ta haci. Dor di haci esei, nos lo por dicerní e sabiduria i poder asombroso di nos Magnífico Creador. (Isaías 45:18) Riba tur cos, esei mester yuda nos mira ki un Dios amoroso e ta, p’e echo cu no solamente el a duna nos bida, sino tambe a haci posibel pa nos disfrutá dje hopi placernan di bida.

Por ehempel, pensa riba e variedad interminabel di flor bunita cu Dios a crea riba tera. Ta algu masha maraviyoso tambe cu el a dota nos cu e abilidad di mira i saca gran placer for dje preciosidadnan aki! Den e mésun manera, Dios a percurá tur sorto di cuminda nutritivo pa alimentá nos. Ta muestra di consideracion di su parti cu tambe el a crea den nos e sentido di smak pa nos por disfrutá di loke nos come! E cosnan aki no ta prueba elocuente cu Dios di berdad ta stima nos i tin nos mihó interesnan na mente?—Salmo 145:16, 17; Isaías 42:5, 8.

Ademas di revelá su mes na nos mediante e “buki di naturalesa,” e Creador ta mustra nos ki clase di Dios e ta mediante su Palabra, Bijbel. Ta asina pasobra den Bijbel tin registrá hopi dje cosnan amoroso cu Jehova Dios a haci den pasado i e numeroso bendicionnan cu e ta primintí di drama riba humanidad den futuro cercano. (Génesis 22:17, 18; Exodo 3:17; Salmo 72:6-16; Revelacion 21:4, 5) Riba tur cos, Bijbel ta revelá na nos e mayor expresion di Dios su amor pa humanidad: e echo cu el a duna su Yu unigénito como nos Rescatador pa asina nos por ser librá di sclabitud na picá i morto. (Romanonan 5:8) En berdad, mas nos siña tocante nos Creador amoroso, mas nos ser impulsá pa stim’é di curason.

Siña Stima Nos Próhimo

Manera Jesus a señalá, ademas di stima Dios cu henter nos curason, alma i mente, nos tin cu stima nos próhimo mescos cu nos mes. Eigenlijk, e amor di Dios ta obligá nos di stima nos próhimo. Apostel Juan a splica: “Stimánan, si Dios a stima nos asina, e ora ei nos mes ta obligá di stima otro.” El a enfatisá mas aleu: “Si un hende haci e declaracion: ‘Mi ta stima Dios,’ i tog ta odia su ruman, e ta un mentiroso. Pasobra esun cu no ta stima su ruman, cu el a mira, no por stima Dios, cu e no a mira. I e mandamentu aki nos tin di dje, cu esun cu ta stima Dios mester stima su ruman tambe.”—1 Juan 4:11, 20, 21.

Awe nos ta biba den un mundu caminda mayoria hende ta mustra un actitud di ‘ami promé,’ siendo “stimadó di nan mes,” net manera Bijbel a predicí. (2 Timoteo 3:2) P’esei, si nos kier siña e caminda sobresaliente di amor, nos tin cu haci esfuerso serio pa rehací nos mente i imitá nos Creador amoroso, en bes di sigui e camindanan egoista di hende en general. (Romanonan 12:2; Efesionan 5:1) Dios ta asta “bondadoso pa cu esnan malagradecidu i malbado,” i e “ta haci su solo sali riba hende malbado i bon i ta haci awa yobe riba hende hustu i inhustu.” Ya cu nos Tata celestial ta pone un ehempel asina magnífico pa nos, nos mester haci esfuerso pa ta bondadoso i cla pa yuda tur hende. Dor di haci esei, nos por duna prueba cu nos ta ‘yunan di nos amoroso Tata celestial.’—Lucas 6:35; Mateo 5:45.

Tin biaha e actonan amoroso ei ta resultá den yuda hende bira adoradó dje Dios berdadero. Algun aña pasá, un ama di cas cu ta un Testigo di Jehova a trata na compartí e mensahe di Bijbel cu su bisiña, pero el a haña un rechaso fuerte. Sin embargo, e reaccion ei no a desanim’é. Mas bien, el a sigui mustra bondad i a purba di ta cla pa yuda e bisiña. Un biaha el a yuda e bisiña muda pa un otro cas. Un otro biaha el a haci areglo pa un persona hiba e bisiña aeropuerto pa busca su famianan. Mas despues, e bisiña a aceptá un studio di Bijbel i cu tempu a bira un cristian celoso apesar di persecucion severo di parti di su esposo. Sí, tal expresionnan di amor a pone e fundeshi pa bendicionnan eterno.

Si nos ta franco, nos lo admití cu Dios su amor pa nos no ta pasobra nos tin un abundancia di cualidadnan admirabel. Al contrario, e ta stima nos maske nos tin hopi falta i defecto. Siendo cu esei ta e caso, nos tambe tin cu siña stima nos próhimo apesar di nan hopi faltanan. Si nos entrená nos mes pa dicerní i apreciá e bon cualidadnan di otro hende en bes di busca nan fayonan, nos lo ripará cu ta muchu mas fácil pa sinti amor pa nan. Loke nos ta sinti pa nan por asta bai mas leu cu solamente e amor basá riba principio i incluí e cariño i ternura cu ta existí entre amigu cerá.

Laga Bo Amor Crece

Amor i amistad ta algu cu nos tin cu nutri i cultivá, i entre e ingredientenan esencial pa esaki tin sinceridad i onestidad. Algun persona ta purba sconde nan defectonan pa por laga un impresion faborabel riba hende cu nan kier tin como amigu. Sin embargo, hopi bes un curso asina ta producí net lo contrali, pasobra cu tempu otronan ta descubrí e echonan, i e desonestidad ei ta duna nan asco. P’esei, nos no mester tin miedu di laga otronan conocé nos manera nos berdaderamente ta, maske nos tin defectonan cu nos ta lucha pa vence. Esaki lo por yuda nos cera amistad cu nan.

Por ehempel, un ruman muher Testigo di edad avansá den un congregacion na Lehano Oriente tin masha poco educacion. Pero, nunca e no ta purba sconde e echo ei pa otro hende. Por ehempel, e ta admití francamente cu e no por splica otro hende con pa establecé for di profecia i historia di Bijbel cu e Tempu Gentil a terminá na 1914.a Sin embargo, e ta pone un ehempel asina excelente den celo p’e ministerio, i tambe den amor i generosidad p’e rumannan, cu nan ta yam’é cariñosamente e hoya dje congregacion.

Den algun cultura, hende ta desaprobá ora bo mustra cariño abiertamente; nan ta spera pa bo desplegá un cortesia di formalidad den bo trato cu otro hende. Aunke semper ta bon pa ta cortes i mustra consideracion, nos no mester laga nos cortesia stroba nos di mustra nos sintimentu pa otro hende. Jehova no tabatin bergwensa di expresá su cariño pa su pueblo scogí, Israel di antigwedad. El a bisa nan: “Cu un amor pa tempu indefiní mi a stimá bo.” (Jeremías 31:3) Di manera similar, apostel Pablo a bisa su compañeronan creyente na Tesalónica: “Teniendo tierno cariño pa boso, cu muchu gustu nos a compartí cu boso, no solamente e bon nobo di Dios, sino tambe nos propio alma, pasobra boso a bira stimá pa nos.” (1 Tesalonicensenan 2:8) P’esei segun cu nos ta haci esfuerso pa cultivá berdadero cariño pa próhimo, ta pas mas cu siñansa di Bijbel pa nos expresá sintimentunan asina di un manera natural en bes di suprimí nan.

Esfuerso Continuo Ta Necesario

Siña sinti i mustra amor pa otro hende ta un proceso continuo. Esei ta rekerí hopi esfuerso di nos parti pasobra nos tin cu traha duru pa vence nos mes imperfeccionnan i tambe resistí e influencia fuerte dje mundu sin amor aki. Sin embargo, e recompensanan ricu cu esaki ta trece cuné ta hacié berdaderamente bale la pensa.—Mateo 24:12.

Asta den e mundu sumamente imperfecto aki, nos por disfrutá di mihó relacion cu nos próhimo. I esei ta resultá den hopi goso, pas i satisfaccion pa nos mes i pa otro hende. Dor di haci un esfuerso asina, nos por duna prueba di ta digno dje speransa maraviyoso di biba pa semper den Dios su mundu nobo. Riba tur cos, dor di siña e caminda sobresaliente di amor, nos por gana e aprobacion i bendicion di nos Creador amoroso, tantu awor i pa eternidad!

[Nota]

[Plachinan na página 10]

Nos por mustra amor cristian cu actonan di bondad

[Rekonosementu pa Potrèt na página 8]

UN PHOTO 186226/M. Grafman