Jehova Ta pa Mi un Dios di Bondad Amoroso

MANERA JOHN ANDRONIKOS A RELATA

Tabata aña 1956. Mi tabatin solamente nuebe dia casá, i ata mi pará dilanti un corte di apelacion na Komotiní, den nort di Grecia. Mi tabatin speransa cu nan lo anulá e sentencia di 12 luna di prizon cu mi a ricibí debí cu mi a predicá e Reino di Dios. E decision dje corte di apelacion—seis luna di prizon—a caba cu e speransa ei. Tambe el a resultá di ta solamente e principio di un seri largu di prueba. Sin embargo, atrabes di nan tur, Jehova a resultá di ta pa mi un Dios di bondad amoroso.

ORA mi a nace dia 1 di october 1931, mi famia tabata biba den e stad Kaválla, e antiguo Neapolis di Macedonia cu apostel Pablo a bishitá durante su segundo biahe di misionero. Mama a bira Testigo di Jehova ora mi tabatin cincu aña di edad. I aunke casi e no por a lesa ni skirbi, el a haci su best pa inculcá den mi un amor i temor pa Dios. Mi tata tabata un homber extremadamente conservativo, cu a pega cabesuramente n’e tradicion griego ortodox. E no tabata interesá den berdad bíblico i a oponé mi mama, hopi bes cu violencia.

Di manera cu mi a crece den un hogar dividí, unda Tata tabata bati i maltratá Mama, i asta a bandoná nos. For di tempu mi tabata hopi chikitu, Mama tabata hiba ami cu mi ruman muher chikitu n’e reunionnan cristian. Sin embargo, ora mi a haci 15 aña, mi deseonan hubenil i e spiritu di independencia a kita mi for di Testigonan di Jehova. Tog, mi mama fiel a haci esfuerso intenso, i a yora hopi durante su intentonan pa yuda mi.

Debí na pobresa i e mal bida cu mi tabata hiba, mi a bira hopi malu i mi mester a keda mas cu tres luna na cama. Tabata e tempu ei cu un ruman homber masha humilde, esun cu a yuda mi mama siña e berdad, a dicerní den mi un amor sincero pa Dios. El a sinti cu por a yuda mi recobrá spiritualmente. Otronan a bis’é: “Bo tempu bo ta perde cu John; nunca lo e no pone su cabes na pareu.” Pero e ruman aki su pacenshi i perseverancia den yuda mi a duna fruta. Dia 15 di augustus 1952, na edad di 21 aña, mi a simbolisá mi dedicacion na Jehova mediante bautismo bou di awa.

Recien Casá i den Prizon

Tres aña despues mi a conocé Martha, un ruman muher spiritualmente fuerte cu cualidadnan sobresaliente, i djis despues nos a comprometé. Un dia Martha a coge mi ègt di sorpresa ora el a bisa mi: “Mi tin plan di bai predicá di cas pa cas awe. Bo tin gana di bai cu mi?” Te cu e dia ei nunca mi no a participá den e rasgo ei dje trabou, mayoria bes mi a predicá informalmente. N’e tempu ei e trabou di predicá tabata prohibí na Grecia, i nos mester a cumpli cu nos actividad di predicá na scondí. Esei a resultá den hopi aresto, caso den corte i castigu pisá di prizon. Tog, mi no por a bisa mi enamorada no!

Na 1956, Martha a bira mi esposa. Tabata e aña ei, nuebe dia despues cu nos a casa, cu e corte di apelacion na Komotiní a condená mi na seis luna di prizon. Esaki a pone mi corda un pregunta cu algun tempu promé mi a haci un ruman muher cristian, un amiga di mi mama: “Con lo mi por mustra cu mi ta un berdadero Testigo di Jehova? Nunca mi no tabatin e oportunidad pa demostrá mi fe.” Ora e ruman muher aki a bin wak mi den prizon, el a recordá mi e pregunta ei i a bisa: “Awor bo por mustra Jehova cuantu bo ta stim’é. Esaki ta bo asignacion.”

Ora mi a haña sa cu mi abogado tabata purba haña cen pa mi sali bou di fiansa, mi a bis’é cu mi ta preferá di sinta mi castigu completo. Esta contentu mi tabata di mira cu na fin di mi estadia di seis luna den prizon, dos di mi compañeronan di prizon a aceptá e berdad! Durante e siguiente añanan, mi tabata enbolbí den hopi caso di corte pa causa dje bon nobo.

Decisionnan cu Nos No A Lamentá Nunca

Na 1959, un par di aña despues cu mi a haña mi libertad, mi tabata sirbi como sirbidó di congregacion, esta, superintendente presidente, i mi a haña invitacion pa asistí n’e Scol di Ministerio di Reino, un curso di entrenamentu pa ancianonan di congregacion. Pero n’e mésun tempu, mi a haña oferta pa un trabou vast den un hospital público. E trabou aki lo a duna ami cu mi famia siguridad financiero pa henter nos bida. Kico mi mester a scoge? Mi tabatin tres luna caba ta traha temporalmente den e hospital, i e director tabata hopi satisfecho cu mi trabou. Pero ora e invitacion pa bai e scol a bini, e no kier a laga mi bai ni sikiera cu ‘buiten bezwaar.’ Despues di a considerá e dilema huntu cu hopi oracion, mi a dicidí di pone interesnan di Reino promé i rechasá e oferta di trabou.—Mateo 6:33.

Rond di mésun tempu, e superintendentenan di distrito i circuito a bin sirbi na nos congregacion. Debí n’e oposicion severo di clero griego ortodox i autoridadnan, nos mester a tene nos reunionnan na secreto den casnan privá. Despues di un dje reunionnan, e superintendente di distrito a acercá mi i a puntra mi si mi a pensa di cuminsá den sirbishi di tempu completo. Su sugerencia a toca mi curason pasobra esei tabata mi soño for di dia cu mi a bautisá. Mi a contestá: “Mi tin masha gana mes.” Sin embargo, ya caba mi tabatin e responsabilidad adicional di cria un yu muher. E ruman a bisa mi: “Confia den Jehova, i lo e yuda bo realisá bo plannan.” Pues, sin neglishá nos responsabilidadnan di famia, ami cu mi casá por a ahustá nos circunstancia di tal forma cu na december 1960, mi a cuminsá traha como pionero special den e parti oost di Macedonia. Nos tabata solamente cincu pionero special den e pais aki.

Despues cu mi a traha como pionero special pa un aña, e oficina di sucursal di Aténas a invitá mi pa sirbi como superintendente biahero. Ora mi a bolbe cas despues di un entrenamentu di un luna den e forma di sirbishi aki, i miéntras ainda mi tabata conta Martha mi experencianan, mi a haña bishita dje director di un mina grandi dje metal manganeso. El a ofrecé mi e funcion di manager den e departamento pa refiná e producto, cu un contract espléndido di cincu aña, un cas excelente i un auto. El a duna mi dos dia pa dicidí. Atrobe, sin duda niun ratu, mi a haci oracion na Jehova: “Ata mi aki, manda mi.” (Isaías 6:8) Mi casá tabata completamente di acuerdo. Cu confiansa den Dios, nos a cuminsá cu e trabou biahero, i Jehova den su bondad amoroso, nunca a desapuntá nos.

Sirbiendo den Tempu Bon i Malu

Apesar di problemanan económico, nos a sigui padilanti i Jehova a percurá pa nos necesidadnan. Na principio, mi tabata bishitá e congregacionnan riba un motosaikel, i mi tabata biaha distancianan di te cu 500 kilometer. Hopi bes mi a haña mi cu problema i tambe un par di accidente. Durante un winter, ora mi tabata regresá for di un congregacion, mi a crusa un riu cu tabatin mas awa cu normal i cu tabata core mas duru tambe, mi motor a paga i awa a yega te na mi rudianan. Despues e motosaikel su tayer a baha. Un persona cu a pasa ei banda a yuda mi cu un pomp, i asina mi por a yega e pueblo di mas cerca caminda mi a drecha e tayer. Finalmente mi a yega cas 3 or di mardugá, friu-friu i agotá.

Na un otro ocasion, ora mi tabata bai for di un congregacion pa un otro, mi motosaikel a slip cai riba mi rudia. Como resultado, mi carson a kibra i a susha tur na sanger. Mi no tabatin otro carson, i mi a tira discurso e anochi ei, bistí cu carson di un ruman homber cu tabata muchu grandi pa mi. Tog, ningun dificultad no por a fria mi deseo pa sirbi Jehova i mi rumannan stimá.

Den un otro accidente, mi a haña heridanan serio, mi a kibra mi brasa i mi djentenan dilanti. Tabata e tempu ei cu mi a haña bishita di mi ruman muher cu tabata biba na Merca i cu no tabata Testigo. Ki un alivio mi a haña ora el a yuda mi cumpra un auto! Ora e rumannan n’e sucursal di Aténas a haña sa di mi accidente, nan a manda un carta animante pa mi. Entre otro, e carta a contené e palabranan di Romanonan 8:28, cu en parte ta bisa: “Dios ta haci tur su obranan cooperá huntu p’e bienestar di esnan cu ta stima Dios.” Bes tras bes, e promesa aki a resultá hopi cierto den mi bida!

Un Sorpresa Agradabel

Na 1963, mi tabata traha huntu cu un pionero special den un pueblo caminda e hendenan no tabata reaccioná. Nos a dicidí di traha separá, nos cada un a coge un banda di caya. Na un cas, mi no a ni caba di bati n’e porta cu un señora a ranca mi paden i a lok e porta mi tras. Mi tabata turdí i tabata puntra mi mes ta kico ta pasando. Djis despues, cu un ansha el a yama e pionero special tambe pa bini den e cas. E muher a bisa nos: “Keda ketu! No move tampoco!” Despues di un ratu, nos a tende bosnan rabiá parti pafó. E hendenan tabata busca nos. Ora cos a calma, e señora a bisa nos: “Mi a haci esaki pa boso mes proteccion. Mi ta respetá boso pasobra mi ta kere cu boso ta cristiannan berdadero.” Nos a gradicié sinceramente i a bai, lagand’é cu vários literatura.

Diescuater aña despues, na un congreso di distrito na Grecia, un señora a acercá mi i bisa: “Ruman, bo ta corda mi? Ami ta e señora cu a sconde boso for dje opositornan tempu boso a bin duna testimonio den nos pueblo.” El a imigrá bai Alemania, a studia Bijbel i a bira parti dje pueblo di Jehova. Awor, henter su famia ta den berdad.

Sí, durante tur e añanan ei, nos a ser bendicioná cu hopi ‘carta di recomendacion.’ (2 Corintionan 3:1) Un cantidad di e personanan cu nos tabatin e privilegio di yuda adkerí conocimentu di berdad bíblico, ta sirbi awor como anciano, sirbidó ministerial i pionero. Ki emocionante ta pa mira e man yen di publicadó den e circuitonan cu mi a sirbi aya na principio di añanan ’60, aumentá bira mas cu 10.000 adoradó di Jehova! Tur crédito ta bai na nos Dios di bondad amoroso, kende ta usa nos na su manera.

“Riba un Cama di Enfermedad”

Durante e añanan di nos trabou den sirbishi biahero, Martha a resultá di ta un yudante sobresaliente, semper cu un actitud gososo. Sin embargo, na october 1976, el a bira hopi malu i a haci un operacion doloroso. El a keda lam den rolstoel. Con nos por a trata cu e gastu i dolor emocional? Confiando un biaha mas den Jehova, nos a experenciá su man amoroso i generoso. Ora mi a bai sirbi na Macedonia, Martha a keda na cas di un ruman spiritual na Aténas p’e tuma terapia. E tabata bel i animá mi cu e palabranan: “Mi ta bon. Abo sigui padilanti, i ora mi por move atrobe, lo mi compañá bo den mi rolstoel.” I esei ta exactamente loke el a haci tambe. Nos rumannan stimá na Betel a manda hopi carta di animacion pa nos. Bes tras bes, nan a recordá Martha e palabranan di Salmo 41:3: “Jehova mes lo sosten’é riba un cama di enfermedad; siguramente lo bo cambia tur su cama durante su enfermedad.”

Debí na e problemanan serio di malesa aki, e rumannan a dicidí na 1986 cu ta mihó mi sirbi como pionero special na Kaválla, caminda mi ta biba den becindario dje famia di nos kerida yu muher. Luna di mart ei, mi kerida Martha a fayecé, fiel te na fin. Promé cu el a muri, ora rumannan tabata puntr’é: “Con ta bai?,” generalmente e tabata contestá: “Mi ta cerca di Jehova, pues mi ta hopi bon!” Ora nos tabata prepará p’e reunionnan of nos a ricibí invitacionnan tentador pa bai sirbi den áreanan caminda e cosecha ta abundante, Martha tabata bisa: “John, laga nos bai sirbi caminda tin mas necesidad.” Nunca el a perde su spiritu celoso.

Algun aña pasá, mi tambe a haña mi cu problema serio di salú. Na mart 1994, dokter a diagnosticá cu mi tabatin un problema peligroso di curason, i mi mester a operá. Un biaha mas mi a sinti cu Jehova su man amoroso a apoyá mi durante un periodo crítico. Nunca lo mi lubidá e oracion cu un superintendente di circuito a haci na mi cama ora mi a sali for di e departamento di cuido intensivo. Ni lo mi no lubidá e celebracion di Memorial cu mi a dirigí den mi kamber di hospital mes huntu cu cuater pashent cu a mustra un poco interes den e berdad.

Jehova Tabata Nos Yudante

Tempu ta bula, i nos carni ta bira swak, pero studio i sirbishi ta renobá nos spiritu. (2 Corintionan 4:16) Ya caba tin 39 aña cu mi a bisa: “Ata mi aki! Manda mi.” Mi tabatin un bida completo, felis i recompensador. Sí, tin biaha mi ta sinti cu “mi ta afligí i pober,” pero e ora ei mi por bisa Jehova cu confiansa: “Bo ta mi yudansa i e Percurador di escape pa mi.” (Salmo 40:17) En berdad e tabata pa mi un Dios di bondad amoroso.

[Plachi na página 25]

Huntu cu Martha na 1956

[Plachi na página 26]

E haf na Kaválla

[Plachi na página 26]

Huntu cu Martha na 1997