Kico Por Haci Contra Desanimacion?

CON un hende por combatí desanimacion? Vários superintendente biahero, kendenan ta bishitá congregacionnan di Testigonan di Jehova regularmente, a haña nan cu e pregunta aki. Nan contestanan por yuda nos analisá e causanan di desanimacion, i kico por remedi’é, ya cu e por afectá cualkier cristian.

Mas cu un análisis ta necesario pa trata cu desanimacion, pero algun dje síntomanan ta un falta di interes den haci oracion of den studio personal, baha man na asistencia na reunion, falta di entusiasmo i asta un cierto actitud friu cu compañeronan cristian. Pero un dje señalnan mas concreto ta un menguamentu di celo pa evangelisá. Laga nos examiná su síntomanan i considerá algun remedi p’e.

Desanimacion den Nos Trabou di Evangelisá

Jesucristo tabata conciente dje dificultadnan mará na e comision di haci disipel. (Mateo 28:19, 20) El a manda su siguidónan manera “carné meimei di lobo,” sabiendo cu nan actividad di predicá lo trece persecucion riba nan. (Mateo 10:16-23) Tog esei no tabata motibu pa nan desanimá. De echo, hopi bes sirbidónan di Dios cu a confia riba Jehova i haci oracion a ser fortalecé dor di persecucion.—Echonan 4:29-31; 5:41, 42.

Asta ora e disipelnan di Cristo no tabata sufri di persecucion intenso, no ta semper e hendenan a ricibí nan bon. (Mateo 10:11-15) Mescos, no ta semper Testigonan di Jehova por efectuá nan predicacion cu facilidad awe.a Hopi hende ta haña cu creencia den Dios ta algu personal cu nan no kier papia ariba. Otronan no kier tin nada di haci cu un organisacion religioso cu nan tin cierto prehuicio p’e. Sin duda, indiferencia, poco resultado of vários otro problema por ta fuentenan formal di desanimacion. Con nos por vence e obstáculonan aki?

Con pa Obtené Mihó Resultado

E goso cu nos ta saca di nos ministerio tin di haber en parte cu e resultadonan cu nos saca. Anto, con nos por tin un ministerio mas productivo? Wel, nos ta “piscadó di hende.” (Marco 1:16-18) Piscadónan den Israel di antigwedad tabata sali bai pisca anochi, ora nan por a coge mas tantu piscá. Nos tambe mester analisá nos teritorio pa nos sali bai “pisca” ora cu mayoria hende ta na cas i ta mas dispuesto pa aceptá nos mensahe. Esei por ta anochi, den fin di siman of riba un otro ora. Segun un superintendente biahero, esaki ta práctico den áreanan caminda hende ta traha henter dia. E ta mencioná cu hopi bes predicacion anochi ta producí masha bon resultado. Testificacion via telefon of informal tambe ta permití nos alcansá mas tantu hende.

Perseverancia den e ministerio ta producí bon resultado. Na Oost Europa i cierto paisnan africano e trabou di predicá e Reino ta avansando bon, i esaki a producí aumentonan excelente. Mescos, hopi congregacion a keda formá den áreanan cu pa hopi tempu a ser considerá improductivo, of asta den teritorio cu nos ta cubri cu hopi frecuencia. Sin embargo, kico si bo teritorio no ta produciendo e tipo di resultadonan ei?

Mantené un Bon Actitud

Algu cu por yuda nos evitá di bira desanimá ora nos enfrentá indiferencia den e ministerio, ta di tene bon cla na mente cua ta e metanan cu Jesus a pone nos dilanti. Cristo tabata kier pa su disipelnan busca esnan merecedó, no pa nan combertí hende na gran cantidad. Na vários ocasion el a señalá cu e gran mayoria lo no aceptá e bon nobo, mescos cu mayoria israelita no a scucha e profetanan di pasado.—Ezekiel 9:4; Mateo 10:11-15; Marco 4:14-20.

Personanan cu ta “conciente di nan necesidad spiritual” ta ricibí e ‘bon nobo dje Reino’ cu gratitud. (Mateo 5:3; 24:14) Nan kier sirbi Dios dje manera cu E ta indicá. P’esei, e resultado di nos actividad ta dependé mas tantu di e condicion di curason dje hendenan cu di nos abilidad pa presentá e mensahe. Claro, nos mester haci nos best pa haci e bon nobo atractivo. Sin embargo, e resultado ta dependé di Dios, pasobra Jesus a bisa: “Ningun hende por bini cerca mi a ménos cu e Tata, kende a manda mi, ta atra’é.”—Juan 6:44.

Nos obra di evangelisá ta haci Jehova su nomber conocí. Sea cu hende scucha of no, nos actividad di predicá ta yuda santificá Jehova su nomber santu. Ademas, pa medio di nos obra di evangelisá nos ta proba cu nos ta disipel di Cristo, i nos tin e privilegio di tuma parti den e mision mas importante cu ta ser efectuá den nos tempu.—Mateo 6:9; Juan 15:8.

Desanimacion i Relacion cu Hende

Cierto relacionnan humano, sea den famia of den congregacion, por causa desanimacion. Por ehempel, lo por existí e sintimentu di cu nan no ta comprendé bo. E imperfeccionnan di otro creyentenan tambe lo por desanimá nos. Atrobe Bijbel por ta un gran yudansa pa nos.

“Henter e asociacion di rumannan” rond mundu ta forma un famia spiritual grandi. (1 Pedro 2:17) Pero e sintimentu di ta pertenecé na un pueblo uní por mengua ora cu surgi dificultad dor di conflictonan di personalidad. Evidentemente, e cristiannan den promé siglo no tabata inmuno p’e tipo di problemanan ei, pasobra apostel Pablo mester a recordá nan bes tras bes cu nan mester a biba huntu den unidad. Por ehempel, el a animá dos muher cristian—Evodia i Síntike—pa nan resolvé nan desacuerdo cu otro.—1 Corintionan 1:10; Efesionan 4:1-3; Filipensenan 4:2, 3.

Si esaki ta e problema, con nos por rebibá un amor sincero pa nos rumannan? Dor di keda corda cu Cristo a muri pa nan, i cu mescos cu nos, nan a ehercé fe den su sacrificio di rescate. Nos por tene na mente tambe cu hopi di nos rumannan ta dispuesto di imitá Jesucristo dor di risca nan bida pa nos.

Algun aña pasá na Paris, Francia, un Testigo hóben no a duda pa gara un maletin cu un bom aden, cu nan a pone pafó dje Salon di Reino. El a baha vários piso via trapi promé cu el a tir’é den un fontein, caminda el a explotá. Ora nan a puntr’é kico a motiv’é pa risca su bida asina, el a contestá: “M’a realisá cu nos bida tabata na peliger. Pues m’a pensa cu lo ta mihó pa mi so muri, cu nos tur ser matá.”b Esta un bendicion cu nos tin compañeronan asina, cu ta dispuesto di sigui Jesus su ehempel asina bon!

Ademas, nos por meditá riba e spiritu di cooperacion cu a existí entre e Testigonan di Jehova cu tabata den camponan di concentracion durante Guera Mundial II.c Den tempunan mas recien, nos rumannan na Malawi a para firme como cristian berdadero, mes fiel cu nan. Si nos corda cu e rumannan den nos congregacion lo actua mescos bou di circunstancianan desfaborabel, esei no ta yuda nos pasa tension i dificultadnan di tur dia por alto, of sikiera minimisá nan? Si nos cultivá e mente di Cristo, nos relacionnan diario cu nos co-adoradónan lo ta un fuente di refrescamentu, no di desanimacion.

Sintimentunan Personal Desanimante

“Expectativa posponé ta haci e curason enfermo, pero e cos deseá ta un palu di bida ora e yega di berdad.” (Proverbionan 13:12) Den bista di algun sirbidó di Jehova, e fin dje sistema di cosnan aki no ta yega pa caba. Cristiannan ta haña e temporada cu nos ta biba aden aki ‘crítico i duru pa trata cuné,’ mescos cu hopi no-creyente.—2 Timoteo 3:1-5.

Pero, na contraste cu no-creyentenan, cristiannan mester alegrá di mira e “señal” di Cristo su presencia den e condicionnan difícil aki, loke ta indicá cu pronto e Reino di Dios lo trece un fin na e sistema di cosnan malbado aki. (Mateo 24:3-14) Maske situacion bira pió—i sin duda lo e bira pió durante e “tribulacion grandi”—e sucesonan aki ta un fuente di goso pa nos dor cu nan ta anunciá Dios su binidero mundu nobo.—Mateo 24:21; 2 Pedro 3:13.

Si den su mente un cristian posponé e intervencion dje Reino den asuntunan djawe, esei lo por pon’é dedicá mas i mas tempu na metanan material. Si e mester laga cosnan manera trabou seglar i diberticion tuma tur su tempu i energia, lo ta difícil pa e cumpli cu su responsabilidadnan bíblico manera mester ta. (Mateo 6:24, 33, 34) Un actitud asina ta promové frustracion i, como tal, desanimacion. Un superintendente biahero a comentá: “No ta realístico pa purba crea un imitacion barata dje sistema nobo den e sistema di cosnan aki.”

Dos dje Mihó Remedinan

Despues di a yega na un diagnóstico, con un hende por haña un remedi eficas? Studio personal ta un dje mihó métodonan disponibel. Di con? “E ta corda nos di con nos mester haci loke nos ta haci,” segun un superintendente biahero. Un otro superintendente biahero a splica: “Cu tempu, predicá djis pa obligacion ta bira un peso.” Pero bon studio personal ta yuda nos recobrá un idea skerpi di nos papel segun cu nos ta acercá e fin. Den e mésun liña di pensamentu, Bijbel ta corda nos bes tras bes cu ta necesario pa nos ta bon alimentá den sentido spiritual, pa nos por tin berdadero felicidad ora nos ta efectuá e boluntad di Dios.—Salmo 1:1-3; 19:7-10; 119:1, 2.

Ancianonan por yuda otro rumannan vence desanimacion dor di haci bishita di pastoreo animante cerca nan. Na e bishitanan privá aki, e ancianonan por mustra cu cada un di nos ta ser apreciá mashá, i ta ocupá un lugá importante den Jehova su pueblo. (1 Corintionan 12:20-26) Refiriendo na su compañeronan cristian, un anciano a bisa: “Pa enfatisá nan importancia, mi ta recordá nan loke nan a yega di logra den pasado. Mi ta mustra cu nan ta precioso den Jehova su bista, i cu el a duna sanger di su Yu na nan fabor. Semper e razonamentu aki ta cai den bon tera. Una bes cu apoyá e razonamentu aki cu referencianan bíblico sólido, esnan desanimá ta den un posicion pa pone metanan nobo, manera haci oracion i studia como famia i lesa Bijbel.”—Hebreonan 6:10.

Na bishitanan di pastoreo, ancianonan mester tene cuidou pa no laga parce cu Jehova ta un Dios imposibel pa complacé. Na lugá di esei, e ancianonan por yuda nan co-adoradónan mira cu e carga di Jesus su siguidónan ta lihé. P’esei, nos sirbishi cristian ta un goso.—Mateo 11:28-30.

Vence Desanimacion

Sin importá kico ta su causa, desanimacion ta un plaga cu nos mester bringa. Pero corda cu nos no ta nos so den e lucha aki. Si nos bira desanimá, laga nos aceptá e yudansa di nos compañeronan cristian, specialmente dje ancianonan. Si nos haci asina, nos por mengua e sintimentunan di desanimacion.

Mas cu tur cos, nos tin cu acudí na Dios p’e yuda nos vence desanimacion. Si nos dependé riba Jehova haciendo oracion, lo e por yuda nos vence desanimacion completamente. (Salmo 55:22; Filipensenan 4:6, 7) Di tur manera, como su pueblo nos por compartí e sintimentunan dje salmista cu a canta: “Felis ta e pueblo cu conocé e gritu gososo. O Jehova, den e lus di bo cara nan ta sigui cana. Den bo nomber nan ta gososo henter dia, i den bo husticia nan ta ser halsá. Pasobra abo ta e bunitesa di nan forsa; i dor di bo bon boluntad nos cachu ta ser halsá.”—Salmo 89:15-17.

[Nota]

[Plachi na página 31]

Bishita di pastoreo edificante di ancianonan amoroso por yuda cristiannan vence desanimacion