Desaroyá Bo Curason p’e Teme Jehova

“Si solamente nan desaroyá nan curason p’e teme mi i semper warda tur mi mandamentunan.”—DEUTERONOMIO 5:29.

1. Di con nos por tin sigur cu un dia hende lo gosa di libertad for di miedu?

TEMOR a plaga humanidad pa hopi siglo. Temor di hamber, enfermedad, crímen i guera tin miyones di hende den un ansha constante. Ta p’esei den e introduccion dje Declaracion Universal di Derechonan Humano e deseo ta ser expresá pa forma un mundu den cua tur hende lo gosa di libertad for di miedu.a Felismente, Dios mes ta sigurá nos cu un mundu asina ta na caminda, maske lo e no ta dor di esfuerso humano. Pa medio di su profeta Mikéas, Jehova ta primintí nos cu den su mundu nobo di husticia ‘lo no tin ningun hende cu ta haci su pueblo tembla.’—Mikéas 4:4.

2. (a) Con Bijbel ta urgi nos pa teme Dios? (b) Ki preguntanan por lanta ora cu nos pensa riba nos obligacion di teme Dios?

² Di otro banda, temor por ta un influencia positivo tambe. Bijbel ta urgi Dios su sirbidónan bes tras bes pa nan teme Jehova. Moises a bisa e israelitanan: “Ta Jehova bo Dios bo mester teme, i ta e bo mester sirbi.” (Deuteronomio 6:13) Vários siglo despues Sálomon a skirbi: “Teme e Dios berdadero i warda su mandamentunan. Pasobra esaki ta henter e obligacion di hende.” (Eclesiástes 12:13) Den nos obra di duna testimonio cu nos ta efectuá bou di guia di angel, nos tambe ta urgi tur hende pa nan “teme Dios i dun’é gloria.” (Revelacion 14:6, 7) Ademas di teme Jehova, cristiannan mester stim’é cu henter nan curason. (Mateo 22:37, 38) Con nos por stima Dios i na mes momento tem’é tambe? Pakico nos tin cu teme un Dios amoroso? Ki beneficionan nos ta saca dor di cultivá temor di Dios? Pa contestá e preguntanan aki, promé nos mester comprendé kico teme Dios ta nificá, i con e tipo di temor aki ta forma un parti fundamental di nos relacion cu Jehova.

Admiracion, Respet Profundo i Temor

3. Kico temor di Dios ta nificá?

³ Temor di Dios ta un sintimentu cu cristiannan mester tin pa nan Creador. Por definí e temor aki como un admiracion i respet profundo pa e Creador, i un miedu saludabel di desagrad’é. Pues, temor di Dios ta influenciá dos aspecto importante di nos bida: e actitud cu nos tin pa Dios, i e actitud cu nos tin pa conducta cu e ta odia. Claramente, tur e dos aspectonan aki ta crucial i ta merecé nos atencion cuidadoso. Manera Expository Dictionary of New Testament Words di Vine ta mustra, pa cristiannan e temor respetuoso aki ta ‘un impulso cu ta influenciá nan bida den asuntu spiritual i tambe moral.’

4. Con nos por desaroyá admiracion i respet profundo pa nos Creador?

⁴ Con nos por desaroyá un sintimentu di admiracion i respet profundo pa nos Creador? Nos ta sinti admiracion ora nos mira un paisahe bunita, un waterval impresionante of un bahada di solo espectacular. Nos admiracion ta bira mas profundo ora nos dicerní cu nos wowo di fe, cu e man di Dios ta tras di e obranan di creacion ei. Mas ainda, mescos cu Rey David, nos ta realisá con insignificante nos mes ta na comparacion cu Jehova su creacion impresionante. Manera el a bisa: “Ora mi mira bo shelunan, obra di bo dedenan, e luna i e streanan cu bo a prepará, kico homber mortal ta pa bo tene cuenta cuné?” (Salmo 8:3, 4) E gran admiracion aki ta producí un respet profundo den nos, i e respet ei ta haci nos gradicí i alabá Jehova pa tur loke e ta haci pa nos. Tambe David a skirbi: “Lo mi alabá bo pasobra di un manera cu ta inspirá temor mi ta trahá maraviyosamente. Bo obranan ta maraviyoso, manera mi alma sa masha bon.”—Salmo 139:14.

5. Di con nos mester teme Jehova, i ken ta pone un excelente ehempel den esei?

⁵ Admiracion i respet profundo ta producí un temor saludabel i respetuoso pa Dios su poder como Creador, i pa su autoridad como e Gobernante legítimo di universo. Den un vision cu apostel Juan a haña, “esnan cu ta sali victorioso riba e bestia salbahe i su imágen,” esta, e siguidónan ungí di Cristo den nan posicion den shelu, ta proclamá: “Grandi i maraviyoso ta bo obranan, Jehova Dios, e Todopoderoso. Hustu i berdadero ta bo camindanan, Rey di eternidad. Ken lo no realmente teme bo, Jehova, i glorificá bo nomber?” (Revelacion 15:2-4) Temor di Dios, cu ta bini for di un respet profundo pa su mahestad, ta motivá e co-gobernantenan aki di Cristo den su Reino celestial pa onra Dios como e autoridad supremo. Acaso nos no tin tur motibu pa teme Jehova si nos tuma na cuenta tur loke el a logra i con e ta goberná universo cu husticia?—Salmo 2:11; Jeremías 10:7.

6. Di con nos mester tin un miedu saludabel di desagradá Jehova?

⁶ Pero ademas di admiracion i respet profundo, temor di Dios mester incluí tambe un miedu saludabel di desagrad’é of desobedec’é. Di con? Pasobra, maske Jehova ta “tarda pa rabia i ta abundante den bondad amoroso,” nos mester corda cu “di ningun manera lo e duna dispensacion di castigu.” (Éxodo 34:6, 7) Maske e ta amoroso i misericordioso, Jehova no ta tolerá inhusticia i malecho expres. (Salmo 5:4, 5; Habacuc 1:13) Hende cu expres i sin repentí ta practicá loke ta malu den Jehova su bista, i cu ta tuma un posicion contra dje, no por haci asina sin sufri castigu. Manera apostel Pablo a bisa: “Ta un cos spantoso pa cai den man di e Dios bibu.” Un miedu saludabel di cai den e situacion ei lo resultá di ta un proteccion pa nos.—Hebreonan 10:31.

‘Na dje Boso Mester Pega’

7. Ki motibunan nos tin pa confia den Jehova su poder di salba?

⁷ Si nos ta sinti un temor respetuoso pa Dios i nos ta bon conciente di cuantu poder e tin, esei ta un base pa nos pone nos confiansa den Jehova. Mescos cu un mucha chikitu ta sintié protehá ora cu su tata ta cerca, mescos nos ta sinti nos sigur i cu confiansa bou di Jehova su man guiador. Wak con e israelitanan a reaccioná despues cu Jehova a guia nan saca for di Egipto: “Israel tambe a yega na mira e gran man cu Jehova a pone na accion contra e egipcionan, i e pueblo a cuminsá teme Jehova i pone fe den Jehova.” (Éxodo 14:31) E experencia di Eliseo tambe ta mustra cu “e angel di Jehova ta stacioná tur rond di esnan cu ta tem’é, i e ta rescatá nan.” (Salmo 34:7; 2 Reynan 6:15-17) E historia moderno di Jehova su pueblo, i probablemente nos experencia personal tambe, ta confirmá cu Dios ta usa su poder na beneficio di esnan cu ta sirbié. (2 Crónicanan 16:9) Asina nos ta cuminsá comprendé cu “den e temor di Jehova tin confiansa firme.”—Proverbionan 14:26.

8. (a) Pakico temor di Dios ta motivá nos pa cana den su caminda? (b) Splica con nos mester “pega” na Jehova.

⁸ Ademas di duna nos confiansa den Dios, un temor saludabel di dje ta motivá nos pa cana den su caminda tambe. Ora Sálomon a inaugurá e tempel, el a resa pidi Jehova: “[Laga Israel] tin temor pa Bo, pa kana den Bo kamindanan tanten ku nan ta biba na e tera ku Bo a duna nos tatanan.” (2 Crónicanan 6:31, Beibel Santu) Promé cu esei Moises a urgi e israelitanan: “Ta Jehova boso Dios boso mester sigui i boso mester tin temor p’e; i boso mester warda su mandamentunan, i boso mester scucha su bos, i boso mester sirbié i boso mester pega na dje.” (Deuteronomio 13:4) Manera e versículonan aki ta mustra bon cla, e deseo di cana den Jehova su caminda i “pega” na dje ta bini di e confiansa cu nos tin den Dios. Sí, temor di Dios ta motivá nos pa obedecé Jehova, sirbié i pega na dje mescos cu un mucha chikitu ta pega literalmente na su tata cu e ta confia completamente.—Salmo 63:8; Isaías 41:13.

Stima Dios Kier Men Tem’é

9. Ki relacion tin entre amor pa Dios i temor di Dios?

⁹ For di Bijbel su punto di bista, teme Dios no kier men di ningun manera cu nos no por stim’é. Al contrario, e israelitanan a ser siñá pa “teme Jehova . . . pa asina cana den tur su camindanan i pa stim’é.” (Deuteronomio 10:12) Pues, temor di Dios i amor pa Dios tin hopi di haber cu otro. Temor di Dios ta haci nos cana den su caminda, i na su turno esei ta duna prueba di cu nos ta stim’é. (1 Juan 5:3) Esaki ta lógico, pasobra ora nos ta stima un hende nos tin miedu di hùrt e, i cu bon motibu. E israelitanan a hùrt Jehova cu nan proceder rebelde den desierto. Sin duda nos lo no kier haci nada cu lo duel nos Tata celestial. (Salmo 78:40, 41) Di otro banda, dor cu “Jehova tin placer den esnan cu ta tem’é,” nos obedencia i fieldad ta haci su curason contentu. (Salmo 147:11; Proverbionan 27:11) Amor pa Dios ta motivá nos pa agrad’é, i temor di Dios ta yuda nos pa no hùrt e. E dos cualidadnan aki ta complementá otro, no contradicí otro.

10. Con Jesus a mustra cu e tabatin deleite den teme Jehova?

¹⁰ E bida di Jesucristo ta ilustrá bon con nos por stima i teme Dios na mes momento. Profeta Isaías a skirbi tocante Jesus: “Riba dje e spiritu di Jehova tin cu baha, e spiritu di sabiduria i di comprendimentu, e spiritu di conseho i di poder, e spiritu di conocimentu i dje temor di Jehova; i lo e tin delicia den e temor di Jehova.” (Isaías 11:2, 3) Segun e profecia aki, e spiritu di Dios a motivá Jesus pa teme su Tata celestial. Ademas, manera nos por mira, e temor aki tabata un fuente di satisfaccion p’e en bes di un carga. Jesus tabatin deleite den haci Dios su boluntad i agrad’é, asta bou dje circunstancianan di mas difícil. Ora su ehecucion riba e staca di tormento a yega cerca, el a bisa Jehova: “No manera mi kier, sino manera abo kier.” (Mateo 26:39) Debí cu Jesus tabatin temor di Dios, Jehova a scucha e súplicanan di su Yu faborablemente, a fortalec’é, i a salb’é for di morto.—Hebreonan 5:7.

Siña Teme Jehova

11, 12. (a) Di con nos mester siña teme Dios? (b) Con Jesus ta siña nos teme Jehova?

¹¹ Maske nos ta sinti un admiracion instintivo ora nos mira e poder i mahestad cu naturalesa ta desplegá, temor di Dios sí no ta bini automáticamente. Ta p’esei den un profecia e David Mayor, Jesucristo, ta haci nos e invitacion aki: “Bini, yunan, scucha mi; e temor di Jehova ta loke lo mi siña boso.” (Salmo 34:11) Con e ehempel di Jesus ta siña nos teme Jehova?

¹² Jesus ta siña nos teme Jehova dor cu e ta yuda nos comprendé e personalidad maraviyoso di nos Tata celestial. (Juan 1:18) Cu su propio ehempel Jesus ta mustra nos con Dios ta pensa i con e ta trata cu hende, pasobra Jesus ta reflehá e personalidad di su Tata perfectamente. (Juan 14:9, 10) Ademas, pa medio dje sacrificio di Jesus, Jehova ta permití nos acerk’é pa pidié pordon pa nos picánan den oracion. Riba su mes, e gran expresion aki di Dios su misericordia ta un motibu poderoso pa nos tem’é. E salmista a skirbi: “Cu bo tin e berdadero pordon, pa asina hende teme bo.”—Salmo 130:4.

13. Ki pasonan e buki di Proverbionan ta mencioná cu ta yuda nos teme Jehova?

¹³ E buki di Proverbionan ta contené un lista di cincu paso cu ta yuda nos desaroyá temor di Dios. “Mi yu, si bo ricibí mi dichonan i atesorá cu bo mi mes mandamentunan, pa asina bo presta atencion cu bo oido na sabiduria, pa bo incliná bo curason na dicernimentu; si ademas bo sclama pa comprendimentu mes i duna bo bos pa dicernimentu mes, . . . den tal caso lo bo comprendé e temor di Jehova, i lo bo haña e conocimentu mes di Dios.” (Proverbionan 2:1-5) P’esei, pa nos teme Dios nos mester studia su Palabra, haci un esfuerso sincero pa comprendé su instruccionnan, anto presta bon atencion na su consehonan.

14. Con nos por sigui e conseho cu e reynan di Israel a ricibí?

¹⁴ Tur rey di Israel di antigwedad a ricibí instruccion pa traha un copia dje Ley anto ‘lesa den dje tur e dianan di nan bida, pa nan por siña teme Jehova nan Dios afin di warda tur e palabranan dje ley.’ (Deuteronomio 17:18, 19) Lesa Bijbel i studi’é ta mes vital pa nos si nos kier siña teme Jehova. Segun cu nos ta aplicá principionan di Bijbel den nos bida, gradualmente nos ta gana conocimentu i sabiduria cu ta bin di Dios. Nos ta bin “comprendé e temor di Jehova” pasobra nos ta mira e bon resultadonan cu e ta producí den nos bida, i pasobra nos ta balorá nos relacion cu Dios manera un tesoro. Ademas, dor di reuní regularmente cu compañeronan di creencia, tantu hóben como hende di mas edad por scucha Dios su siñansanan, siña teme Dios i cana den su caminda.—Deuteronomio 31:12.

Felis Ta Tur Hende Cu Teme Jehova

15. Con temor di Dios ta relacioná cu nos adoracion di dje?

¹⁵ Loke nos a trata aki ta mustra cu temor di Dios ta un actitud sano cu nos tur mester cultivá, pasobra e ta forma un parti fundamental di nos adoracion na Jehova. E temor aki ta yuda nos confi’é completamente, cana den su caminda i pega na dje. Mescos cu den caso di Jesucristo, temor di Dios por motivá nos tambe pa cumpli cu nos voto di dedicacion awor i pa tur eternidad.

16. Pakico Jehova ta animá nos pa tem’é?

¹⁶ Nunca temor di Dios no ta un miedu insaludabel ni un carga pisá. Bijbel ta sigurá nos: “Felis ta tur cu ta teme Jehova, cu ta cana den su camindanan.” (Salmo 128:1) Jehova ta animá nos pa tem’é debí cu e sa cu e cualidad aki lo protehá nos. Den su palabranan na Moises nos por sinti su interes amoroso: “Si solamente nan [e israelitanan] desaroyá e curason aki di nan p’e teme mi i semper warda tur mi mandamentunan, afin cu por bai bon cu nan i nan yunan te na tempu indefiní!”—Deuteronomio 5:29.

17. (a) Ki beneficio nos ta saca dor di teme Dios? (b) Ki aspectonan di temor di Dios nos lo considerá den e siguiente artículo?

¹⁷ Mescos, si nos desaroyá nos curason p’e teme Dios, lo bai nos bon. Den ki sentido? Na promé lugá, e actitud ei lo agradá Dios i lo e hala nos mas cerca dje. David tabata sa di experencia propio cu “lo e cumpli cu e deseo di hende cu ta tem’é, i lo e tende nan sclamacion pa yudansa, i lo e salba nan.” (Salmo 145:19) Na di dos lugá, temor di Dios lo beneficiá nos pasobra e lo influenciá nos actitud tocante loke ta malu. (Proverbionan 3:7) E siguiente artículo lo examiná con e temor aki ta protehá nos di peliger spiritual, i lo e repasá un par di ehempel bíblico di hombernan cu a teme Dios i a apartá for di maldad.

[Nota]

Bo Por Contestá e Preguntanan Aki?

• Kico ta nificá teme Dios, i ki efecto e tin riba nos?

• Ki relacion tin entre teme Dios i cana cu Dios?

• Con e ehempel di Jesus ta mustra cu tin un relacion entre teme Dios i stim’é?

• Den ki maneranan nos por desaroyá nos curason p’e teme Jehova?

[Plachi na página 17]

Reynan di Israel a ricibí instruccion pa traha un copia personal dje Ley anto les’é tur dia

[Plachi na página 18]

Temor di Jehova ta haci nos confi’é mescos cu un yu ta confia su tata

[Rekonosementu pa Potrèt na página 15]

Streanan: Potret di Malin, © IAC/RGO 1991