Siñadónan dje Palabra di Dios Animá Mashá pa Kumpli ku Nan Enkargo
SIENTOS di míles di maestro a bin huntu pa haña instrukshon den e lunanan ku a pasa. Kuminsando na mei 2001, nan a reuní na sientos di Kongreso di Distrito “Siñadónan dje Palabra di Dios” di Testigunan di Yehova tené rònt mundu. A animá e delegadonan mashá pa nan siña nan mes, pa nan bira mihó kapasitá i kumpli ku nan enkargo komo maestro.
Abo a asistí na un dje kongresonan aki? Si ta asina, sin duda bo a apresiá e ekselente alimento spiritual ku a ser sirbí na e reunionnan aki pa adorá e Dios berdadero, Yehova. Pakiko bo no ta repasá huntu ku nos e programa instruktivo dje kongreso?
Promé Dia: E Skritura Inspirá Ta Probechoso pa Siña Hende
E presidente di kongreso a duna delegadonan un bon biní kaluroso ku e diskurso “Sea Instruí, Siñadónan dje Palabra di Dios.” Hesukristu a siña for di Yehova, e “Magnífiko Instruktor,” i p’esei el a bira e Gran Maestro. (Isaías 30:20, NW; Mateo 19:16) Si nos kier progresá komo maestro òf siñadó dje Palabra di Dios, Yehova tin ku instruí nos tambe.
Despues a sigui e parti “Siña Hende Tokante e Reino Ta Produsí Fruta Ekselente.” E parti aki ku a konsistí di entrevista di siñadónan eksperensiá dje Palabra di Dios, a destaká e goso i rekompensanan di hasi disipel.
A sigui un diskurso motivador titulá “Stimulá dor di ‘e Kosnan Magnífiko di Dios.’” Den promé siglo, “kosnan magnífiko” tokante e Reino di Dios a stimulá hende na akshon. (Echonan 2:11, NW) Nos tambe por stimulá hende na akshon dor di deklará “kosnan magnífiko” manera por ehèmpel siñansanan bíbliko tokante e reskate, e resurekshon i e pakto nobo.
E siguiente diskurso a animá tur hende pa “Haña Deleite den Jehova Su Hustisia.” (Salmo 35:27) Loke por yuda nos sigui tras di hustisia ta di siña stima loke ta hustu i odia loke ta malu, studia Beibel, dal paso pa resistí influensianan ku ta spiritualmente perhudisial i kultivá humildat. E pasonan ei lo yuda protehá nos di mal asosiashon, di mundu su normanan materialista i di dibertishon inmoral i violento.
E diskurso klave, titulá “Kompletamente Ekipá Komo Siñadónan dje Palabra di Dios,” a rekordá nos ku Yehova ta kapasitá nos komo su ministernan mediante su Palabra, su spiritu santu i su organisashon riba tera. Pa loke ta nos uso dje Palabra di Dios, e oradó a konsehá nos: “Na moda di papia, nos meta ta pa hisa e mensahe di Beibel for dje papel i enk, anto hink’é den kurason di nos skuchadónan.”
E promé simposio dje kongreso tabata titulá “Siña Nos Mes Miéntras Nos Ta Siña Otro Hende.” E parti di introdukshon a enfatisá ku nos mester kumpli ku e mesun normanan haltu di moralidat kristian ku nos ta siña otro hende. E siguiente parti a konsehá nos pa ‘manehá e palabra dje bèrdat korektamente.’ (2 Timoteo 2:15, NW) Sea nos tin poko òf hopi tempu ta sirbi Dios, ta vital pa nos mes studia Beibel regularmente i ku diligensia. E último parti dje simposio a mustra ku Diabel ta buska pa mira si nos ta orguyoso, tin un aktitut independiente, ta sinti nos mes importante, ta yalurs, envidioso, amargá, renkoroso i ta kana piki pieu. Sin embargo, si nos oponé Diabel vigorosamente, lo e hui di nos. Pa nos por opon’é, nos tin ku hala serka Dios.—Santiago 4:7, 8.
E diskurso oportuno “Aboresé e Plaga Mundano di Pornografia” a mustra nos kon pa lucha ku éksito kontra e práktika degradante ei ku ta menasá nos spiritualidat. Profeta Habakuk a bisa di Yehova: “Bo wowonan ta muchu puru pa aprobá maldat, i bo no por wak maldat ku toleransia.” (Habakuk 1:13) Nos mester “aboresé loke ta malu.” (Romanonan 12:9) E oradó a spièrta mayornan pa kontrolá loke nan yunan ta wak riba Internet i na televishon. Ademas, el a bisa ku esnan ku ta sinti atrakshon pa pornografia mester buska yudansa serka un amigu spiritualmente maduro. Tambe lo ta bon pa meditá riba tekstonan di Beibel i memorisá nan, tekstonan manera Salmo 97:10, Mateo 5:28; 1 Korintionan 9:27; Efesionan 5:3 i 12; Kolosensenan 3:5; i 1 Tesalonisensenan 4:4 i 5.
E siguiente diskurso, “Laga e Pas di Dios Protehá Bo,” a konsolá nos ku e siguransa ku ora ansiedat bira kasi insoportabel, nos por tira nos karga riba Yehova. (Salmo 55:22) Si nos ekspresá nos mes libremente den orashon, Yehova lo duna nos “e pas di Dios,” e kalma i trankilidat interno ku ta bini dje relashon presioso ku nos tin kuné.—Filipensenan 4:6, 7.
E promé dia tabatin un final hopi felis ku e diskurso “Yehova Ta Embeyesé Su Pueblo ku Lus.” E parti ei tabata un splikashon dje kumplimentu di Isaías kapítulo 60. Meimei dje skuridat dje mundu aki, “stranheronan”—e kresiente multitut grandi di hende semehante na karné—ta disfrutá di Yehova su lus huntu ku e kristiannan ungí. Refiriendo na versíkulo 19 i 20, e oradó a splika: “Yehova lo no ‘baha’ manera solo ni ‘mengua’ manera luna. Lo e sigui embeyesé su pueblo dor di tira lus riba nan. Ki un garantia maravioso esei ta pa nos segun ku nos ta pasa dor dje último dianan dje mundu skur aki!” Na konklushon dje diskurso, e oradó a anunsiá publikashon dje buki E Profecia di Isaías—Lus pa Henter Humanidad, Volúmen Dos. Bo a kaba di lesa e publikashon nobo aki?
Di Dos Dia: Adekuadamente Kapasitá pa Siña Otronan
Despues di un konsiderashon dje teksto di dia riba e di dos dia, nos a skucha ku sumo atenshon n’e segundo simposio dje kongreso, “Ministernan Mediante Ken Otro Hende Ta Bira Kreyente.” E oradónan dje simposio aki di tres parti a enfatisá e tres etapanan enbolbí den yuda hende bira kreyente: plama e mensahe di Reino, kultivá e interes ku bo haña, i siña hende interesá warda loke Kristu a manda. Ku yudansa di entrevista i rekonstrukshon di eksperensia, nos por a mira spesífikamente kon nos por siña otro hende bira disipel.
E parti ku a sigui tabata riba e tema “Agregá na Bo Awante Deboshon na Dios.” E oradó a mustra ku loke finalmente ta konta ta ku nos ta ‘perseverando te na fin.’ (Mateo 24:13) Nos mester usa tur loke Dios a duna nos pa yuda nos kultivá deboshon na dje, esta, orashon, studio personal, e reunionnan i e ministerio. Nos no tin ku laga deseo i aktividatnan mundano tuma e lugá di nos deboshon na Dios òf asta kaba kuné.
Kon hende ku ta kansá i kargá por haña refreskamentu awe? E diskurso “Hañando Refreskamentu bou di Kristu Su Yugo” a kontestá e pregunta ei. Bondadosamente Hesus a invitá su siguidónan pa bini bou di su yugo i siña for di dje. (Mateo 11:28-30, NW) Nos por bini bou di Hesus su yugo dor di sigui su ehèmpel estrechamente, hibando un bida simpel i balansá. A duna realse na e puntonan prinsipal dje presentashon aki dor di entrevistá kristiannan ku a simplifiká nan bida.
Un dje puntonan sobresaliente di reunionnan grandi di Testigunan di Yehova ta e boutismo di sirbidónan di Dios resien dediká. E ruman ku a duna e diskurso “Boutismo Ta Hiba na Mayor Privilegionan di Siña Hende,” a duna e kandidatonan di boutismo un kaluroso bon biní i a invitá nan pa partisipá den oportunidatnan mas grandi di sirbishi. Siñadónan dje Palabra di Dios resien batisá ku ta satisfasé e rekisitonan bíbliko por hasi esfuerso pa alkansá vários responsabilidat den e kongregashon.
“Imitá e Gran Maestro” tabata título dje promé diskurso djatardi. Pa hopi tempu, Hesus den shelu a opservá i imitá su Tata kuidadosamente, i asina el a bira e Gran Maestro. Tempu ku e tabata riba tera, el a usa métodonan efikas di siña hende, manera preguntanan penetrante i komparashonnan simpel pero bibu. Hesus a basa su siñansa riba e Palabra di Dios i a papia ku entusiasmo, kariño i outoridat. Nos no a sinti nos motivá pa imitá e Gran Maestro?
Un otro diskurso motivador, “Bo Ta Dispuesto pa Sirbi Otro Hende?,” a animá nos pa imitá Hesus su ehèmpel di sirbi otro hende. (Huan 13:12-15) E oradó a dirigí su mes na ruman hòmbernan kualifiká i a animá nan pa imitá Timoteo i probechá di oportunidatnan pa yuda otro hende. (Filipensenan 2:20, 21) Tambe el a animá mayornan pa imitá Elkana i Hana dor di yuda nan yunan alkansá e meta dje ministerio di tempu kompleto. I el a enkurashá hóbennan pa imitá e ehèmpel di Hesukristu i dje hóben Timoteo dor di ofresé nan servisionan boluntariamente. (1 Pedro 2:21) Tambe e palabranan di rumannan ku a probechá di oportunidatnan pa sirbi otro hende a motivá nos.
E tema dje di tres simposio tabata “Benefisiá Mas Plenamente di Edukashon Teokrátiko.” E promé oradó a enfatisá e importansia di oumentá nos kapasidat di konsentrashon. Pa logra esei, nos tin ku kuminsá ku seshonnan kòrtiku di studio personal i purba hasi nan mas largu. Tambe el a animá e ouditorio pa durante reunion nan buska e tekstonan i hasi anotashon. E di dos oradó a spièrta nos ku nos tin ku tene duru na “e ehèmpel di palabranan sano.” (2 Timoteo 1:13, 14) Pa protehá nos mes di programanan inmoral di medionan di komunikashon, filosofianan mundano, krítikonan di Beibel i siñansanan apóstata, nos tin ku saka tempu pa hasi studio personal i pa asistí na reunion. (Efesionan 5:15, 16) E último oradó dje simposio a enfatisá e nesesidat di praktiká loke nos a siña pa asina nos por benefisiá plenamente di edukashon teokrátiko.—Filipensenan 4:9.
Tabata emoshonante pa nos tende e diskurso “Perkurashonnan Nobo pa Nos Adelanto Spiritual”! Nos a keda kontentu di tende ku pronto lo publiká un buki nobo titulá Benefisiá di e Edukashon dje Skol di Ministerio Teokrátiko. E manera ku e oradó a deskribí e buki a laga nos den gran ekspektativa pa hañ’é. E oradó a bisa en kuanto e sekshon dje buki ku ta kontené vários punto di konseho pa duna diskurso: “E buki di instrukshon nobo aki no ta usa un método seglar pa presentá e 53 aspektonan aki di lesa, papia i instruí bon. E método ta basá riba prinsipionan bíbliko.” E buki lo mustra kon e profetanan, Hesus i su disipelnan a demostrá bon abilidat di siña hende. Sí, e buki di instrukshon aki i e rasgonan nobo di e Skol di Ministerio Teokrátiko sigur lo yuda nos bira mihó siñadó dje Palabra di Dios.
Di Tres Dia: Sea Maestro en Bista dje Tempu
Despues di un konsiderashon dje teksto di dia riba e último dia, tur presente a paga bon tinu na e último simposio dje kongreso, “E Profesia di Malakías Ta Prepará Nos p’e Dia di Yehova.” Malakías a profetisá un shen aña despues ku e hudiunan a regresá for di Babilonia. Nan a bolbe drif kai den apostasia i maldat, desonrando e nòmber di Yehova dor di ignorá su leinan hustu i dor di trese bestianan siegu, lam i enfermo komo sakrifisio. Ademas, nan tabata divorsiá for di e esposanan di nan hubentut, probablemente pa kasa ku muhénan pagano.
E promé kapítulo di Malakías ta sigurá nos di e amor ku Yehova tin pa su pueblo. E ta enfatisá ku nos mester tin un temor respetuoso pa Dios i tambe apresio i rèspèt pa kosnan sagrado. Yehova ta ferwagt di nos ku nos ta dun’é lo mihó, i ku nos adorashon na dje ta motivá dor di amor inegoista. Nos sirbishi sagrado no mester ta djis un formalidat, i nos tin ku duna kuenta i rason na Dios.
Aplikando e di dos kapítulo di Malakías na nos tempu, e segundo oradó dje simposio a puntra: “Nos ta personalmente alerto pa ‘hende no haña inhustisia riba nos lep’?” (Malakías 2:6) Esnan ku ta hiba delantera den duna instrukshon mester tin sigur ku loke nan ta bisa ta firmemente basá riba e Palabra di Dios. Nos mester odia kosnan traishonero manera por ehèmpel optené un divorsio inhustu.—Malakías 2:14-16.
Papiando riba e tema “Ken Lo Sobrebibí e Dia di Yehova?” e último oradó dje simposio a yuda nos prepará p’e dia di Yehova. El a deklará: “Ta ki un konsuelo p’e sirbidónan di Yehova sa ku Malakías kapítulo 3, versíkulo 17, ta haña su kumplimentu prinsipal riba nan! E ta bisa: ‘“Sigur nan lo bira di mi,” Yehova di ehérsitonan a bisa, “riba e dia ku mi produsí un propiedat spesial. I lo mi mustra kompashon na nan, meskos ku un hòmber ta mustra kompashon na su yu hòmber ku ta sirbié.”’”
Un otro punto sobresaliente dje kongreso tabata e drama “Respetá Yehova Su Outoridat,” presentá den pleno trahe i esenario antiguo, i ku a bai over dje yunan di Kore. Apesar dje aktitut rebelde ku nan tata tabatin kontra Moises ku Aron, nan sí a keda fiel na Yehova i na su representantenan. Ounke Kore i su siguidónan a muri, e yunan di Kore sí a keda na bida. E siguiente diskurso, “Someté Nos Mes Lealmente na Dios Su Outoridat,” a apliká e kontenido dje drama na kada un di nos. E oradó a spièrta nos di seis área den kua Kore i su siguidónan a faya: keda sin apoyá Yehova su outoridat lealmente; laga orguyo, ambishon i yalusí dominá nan; konsentrá riba e imperfekshonnan di esnan ku Yehova a nombra; desaroyá un aktitut kehoso; bira malkontentu ku nan privilegionan di sirbishi; i laga amistat òf relashon familiar bai promé ku lealtat na Yehova.
“Ken Ta Siñando Tur Nashon e Bèrdat?” tabata tema dje diskurso públiko. E bèrdat ku e oradó a trata no tabata bèrdat en general, sino e bèrdat tokante Yehova su propósito di kua Hesukristu a duna testimonio. E oradó a konsiderá e bèrdat relashoná ku kreensia, e bèrdat en kuanto manera di adorá i e bèrdat pa loke ta kondukta personal. Hasiendo un komparashon entre e kristiannan di promé siglo ku Testigunan di Yehova awe, nos konvikshon ku ‘sigur-sigur Dios ta meimei di nos,’ realmente a bira mas firme.—1 Korintionan 14:25.
Despues di un resúmen dje artíkulo di studio di E Toren di Vigilansia pa e siman ei, e diskurso final “Kumpli Urgentemente ku Nos Komishon di Siña Otro Hende,” a stimulá tur siñadó di Dios su palabra den ouditorio na akshon. Un repaso breve dje programa a enfatisá e importansia di usa e Skritura ora di siña hende, e maneranan ku nos por bira maestronan kapasitá i e nesesidat di tin konfiansa den e bèrdat ku nos ta siña otro hende. E oradó a konsehá nos pa ‘hasi nos progreso bisto’ i tambe ‘paga bon tinu na nos mes i na nos siñansa.’—1 Timoteo 4:15, 16.
Nos a gosa di un gran bankete spiritual na e Kongreso di Distrito “Siñadónan dje Palabra di Dios”! Laga nos imitá nos Magnífiko Instruktor, Yehova, i nos Gran Maestro, Hesukristu, dor di siña otro hende e palabra di Dios.
[Kuadro/Plachinan na página 28]
Publikashonnan Nobo pa Satisfasé Nesesidatnan Spesial
Ku hopi entusiasmo delegadonan na e Kongreso di Distrito “Siñadónan dje Palabra di Dios” a risibí dos publikashon ku lo ta hopi práktiko pa siña bèrdatnan bíbliko na hende den sierto partinan di mundu. E tratado (na spañó) titulá Bo Tin un Spiritu Inmortal? lo ta un medio útil pa kuminsá kòmbersashon ku hende ku ta biba den paisnan kaminda e idiomanan lokal no ta hasi un distinshon entre “alma” i “spiritu.” E tratado nobo ta mustra bon kla ku tin un diferensia entre forsa spiritual i kriatura spiritual i ku hende no ta bira spiritu ora nan muri.
Na fin dje di dos dia di kongreso a presentá e foyeto nobo (na spañó) Kon pa Logra un Bida Satisfasiente. A prepará e foyeto aki ku e propósito di us’é pa kuminsá studio di Beibel ku hende ku no ta konosí ku e idea di un Kreador ku un personalidat, i ku tin un buki ku Dios a inspirá. Bo a haña chèns di usa e publikashonnan nobo aki den bo ministerio?
[Plachinan na página 26]
Na Milan, Italia, i na kongresonan rònt mundu, sientos di hende a batisá
[Plachi na página 29]
E drama “Respetá Yehova Su Outoridat” a konmové e ouditorio