Pregunta di Lektor

Ta korekto pa bisa ku Yehova su miserikòrdia ta moderá su hustisia?

Maske nos a yega di usa e ekspreshon aki, ta mihó evit’é, ya ku e ta parse di indiká ku Yehova su miserikòrdia ta suavisá òf frena su hustisia. Esei ta komo si fuera su miserikòrdia ta superior ku su kualidat mas severo ku ta hustisia. Esaki no ta korekto.

E palabra hebreo pa “hustisia” por nifiká “huisio” tambe. Hustisia ta estrechamente ligá ku rektitut. Pero, por lo general, hustisia tin di haber ku asuntunan hudisial, miéntras ku rektitut generalmente no. Hustisia di Yehova por enserá duna kastigu meresí, pero tambe e por enserá duna salbashon na hende ku ta meresé esei. (Génesis 18:20-32; Isaías 56:1; Malakías 4:2) P’esei no mester mira e hustisia di Yehova komo un kualidat severo òf ku mester ser suavisá.

E palabra hebreo pa “miserikòrdia” por duna idea di limitá kastigu òf duna kastigu ku moderashon. Tambe e por referí na mustra kompashon ku echo, dunando alivio na e persona den nesesidat.—Deuteronomio 10:18; Lukas 10:29-37.

Yehova ta un Dios di tantu hustisia komo miserikòrdia. (Éksodo 34:6, 7; Deuteronomio 32:4; Salmo 145:9) Tantu su hustisia komo su miserikòrdia ta perfekto i nan ta traha na armonia ku otro. (Salmo 116:5; Oséas 2:19) E dos kualidatnan aki ta balansá òf komplementá otro perfektamente. P’esei, si nos bisa ku Yehova su miserikòrdia ta moderá su hustisia, nos lo tin ku bisa tambe ku su hustisia ta moderá su miserikòrdia.

Isaías a profetisá: “SEÑOR ta anhelá di ta miserikòrdioso ku boso, i p’esei E lo wòrdu halsá pa tene kompashon ku boso. Pasobra SEÑOR ta un Dios di huisio [“hustisia,” Beibel na papiamentu koriente].” (Isaías 30:18) Aki Isaías ta mustra ku ta Yehova su hustisia ta motivá aktonan di miserikòrdia, i no ku su miserikòrdia ta suavisá òf frena su hustisia. Yehova ta mustra miserikòrdia pa motibu ku e ta hustu i tambe pa motibu ku e ta amoroso.

Pero e eskritor di Beibel, Santiago, no a skirbi ku “miserikòrdia ta triunfá riba huisio”? (Santiago 2:13b) Sí, pero den e konteksto Santiago no ta papiando di Yehova, sino di kristiannan ku ta mustra miserikòrdia na, por ehèmpel, hende afligí i pober. (Santiago 1:27; 2:1-9) Ora Yehova ta husga hende miserikòrdioso asina, e ta tene kuenta ku nan kondukta i miserikòrdiosamente e ta pordoná nan a base dje sakrifisio di su Yu. Asina, nan kondukta miserikòrdioso ta triunfá riba kualkier huisio desfaborabel ku nan lo a meresé.—Proverbionan 14:21; Mateo 5:7; 6:12; 7:2.

P’esei no ta korekto pa bisa ku Yehova su miserikòrdia ta moderá su huisio den e sentido ku miserikòrdia mester suavisá su hustisia. Yehova tin e dos kualidatnan aki den ekilibrio perfekto. Nan ta balansá otro meskos ku nan ta balansá—i ta ser balansá dor di—e otro kualidatnan di Yehova, manera amor i sabiduria.