Problemanan di Humanidat—Nan Lo Kaba un Dia?

“UN DI kada kuater hende riba tera ta biba den pobresa, 1,3 mil mion ta biba ku ménos di un dòler pa dia, mil mion tin masha poko edukashon, 1,3 mil mion no ta disponé di awa limpi pa bebe i mil mion ta drumi ku hamber tur dia.” Asina un informe di Irlanda ta bisa tokante e kondishon di mundu.

E komentario tristu ei ta mustra ku hende no ta kapas pa haña solushon duradero p’e problemanan di humanidat. E problemanan ei ta parse asta mas teribel ainda ora bo realisá ku e gran mayoria di hende menshoná den e informe ei ta hende muhé i mucha indefenso. No ta algu spantoso ku asta awor akí, den siglo 21, “tur dia ta trapa e derechonan humano di asina tantu hende”?—The State of the World’s Children 2000.

“Un Mundu Nobo Denter di un Solo Generashon”

E Fondo di Nashonnan Uní pa Mucha a ekspresá su konfiansa ku “por eliminá e ambiente di desesperashon ku e abusunan aki . . . a kousa pa bida di hende rònt mundu.” E organisashon aki ta bisa ku e kondishonnan teribel ku e míles di miónes di hendenan desafortuná aki ta pasa aden aktualmente “no ta inevitabel ni inkambiabel.” De echo, nan a emití un yamada pa “tur hende traha riba un mundu nobo denter di un solo generashon.” E organisashon aki ta spera ku esaki lo ta un mundu den kua henter humanidat lo ta “liber di pobresa i diskriminashon, liber di violensia i enfermedat.”

Esnan ku ta ekspresá e sintimentunan ei ta basa nan mes riba e echo ku asta awor aki hende ku tin nan próhimo na pechu ta hasi un tremendo trabou pa aliviá e konsekuensianan tristu di un “seri di konflikto i krísis ku aparentemente no tin fin.” Por ehèmpel, durante e último 15 añanan, e Proyekto pa Mucha di Chernobyl “a yuda suavisá sufrimentu di sentenáres di mucha ku a bin haña kanser komo konsekuensia di un eksploshon den un planta nuklear.” (The Irish Examiner, 4 di aprel 2000) E organisashonnan ku ta duna asistensia humanitario, grandi i chikitu, sigur ta hasi un diferensia grandi den e bida di un kantidat inkontabel di víktima di guera i desaster.

Pero esnan ku ta partisipá den e esfuersonan humanitario ei ta realista. Nan sa ku e problemanan ku nan ta enfrentá “tin rais profundo i ta hopi mas ekstenso ku asta un dékada pasá.” David Begg, ehekutivo prinsipal di e organisashon di karidat Preokupashon di Irlanda, ta bisa ku “e trahadónan, e donornan i esnan ku ta sostené e organisashon aki a respondé na un manera magnífiko” ora ku un inundashon katastrófiko a dal Mozambique. “Pero,” e ta agregá, “e magnitut dje desaster ta pone ku nos so no por hasi mashá.” Relashoná ku e esfuersonan di yudansa pa Áfrika, e ta atmití frankamente: “No tin muchu motibu pa karga speransa. Si tin mes, lo e ta manera lus di bela ku ta serka di paga.” Hopi hende ta haña ku su komentario ta resumí e situashon mundial mes tambe na un manera hopi kla.

Ta realista pa nos anhelá e tan sperá “mundu nobo denter di un solo generashon”? Ounke nos en bèrdat ta elogiá e esfuersonan humanitario di aktualidat, ta bale la pena sigur pa konsiderá un otro speransa pa un mundu nobo ku ta hustu i pasífiko. Beibel ta papia di e speransa ei, manera e siguiente artíkulo lo splika.

[Rekonosementu pa Potrèt na página 2]

Página 3, mucha: Potrèt di UN/DPI saká dor di James Bu