Nos Por Kulpa Dios pa Nos Problemanan?

TEMPU ku Marion su yu muhé adulto a sufri un leshon selebral serio, Marion a hasi loke hopi di nos lo a hasi.a El a resa pidi Dios yudansa. “Mi no ta kòrda ku mi a yega di sinti mi asina impotente i so,” Marion ta bisa. Despues, e kondishon di su yu muhé a empeorá, i Marion a kuminsá kuestioná Dios. El a puntra su mes: “Pakiko e kos aki ta pasa?” E no por a komprondé kon un Dios amoroso i interesá den hende por a laga su yu muhé na kaya.

E eksperensia di Marion no ta algu úniko. Hopi hende rònt mundu a yega di sinti komo si fuera Dios a laga nan na kaya n’e momentunan ku mas nan tabatin mester di dje. Por ehèmpel, despues ku nan a asesiná un nietu di Lisa, el a bisa: “Te ainda mi no por kaba di komprondé dikon Dios ta permití kos malu sosodé. . . . Mi no a pèrdè tur fe den Dios; pero un kos ta sigur, e no a keda mes fuerte.” Meskos tambe, despues ku un señora a pèrdè su yu chikitu trágikamente, el a bisa: “Mi no a haña konsuelo di Dios. E no a duna mi ningun señal ku e ta interesá den mi ni ku e tin kompashon ku mi.” Anto el a agregá: “Lo mi no pordoná Dios nunka mas.”

Otro hende ta krea un renkor kontra Dios ora nan mira e mundu rònt di nan. Nan ta mira paisnan asotá pa pobresa i hamber, refugiadonan di guera sin niun speransa, gran kantidat di mucha huérfano dor di AIDS i miónes di hende ku ta sufri di otro enfermedatnan. En bista di esakinan i otro tragedianan similar, hopi hende ta kulpa Dios pasobra aparentemente e no ta hasi nada.

Sin embargo, e bèrdat ta ku nos no por kulpa Dios p’e problemanan ku ta asotá humanidat. De echo, tin bon motibu pa kere ku pronto Dios lo aliviá e famia humano di tur sufrimentu. Nos ta invitá bo pa lesa e siguiente artíkulo i mira ku di bèrdat Dios ta interesá den nos.

[Nota]