Angelnan—Ki Influensia Nan Tin Riba Nos?

ORA profeta Daniel a deskribí e vishon ku el a haña relashoná ku Dios su famia di angel, el a skirbi: “Míles i míles [di angel] tabata sirbi [Dios], i dies mil biaha dies mil tabata pará su dilanti.” (Daniel 7:10) E versíkulo aki ta indiká pakiko Dios a krea angel. Nan tin ku sirbié i para kla pa kumpli ku su instrukshonnan.

Dios ta usa angel pa kumpli ku sierto tareanan en konekshon ku sernan humano. Laga nos wak kon e ta usa nan pa fortalesé i protehá su pueblo, pa entregá mensahe na hende i pa ehekutá su huisio riba e malbadonan.

Angelnan Ta Fortalesé i Protehá Hende

For di despues ku kriaturanan spiritual a mira e kreashon di tera i di e promé hendenan, nan a mustra hopi interes den humanidat. Papiando komo si fuera ta sabiduria ta na palabra, Hesukristu a bisa durante su eksistensia prehumano: “Mi delisia tabata den e yunan di hende.” (Proverbionan 8:31) I Beibel ta informá nos ku “angelnan ta anhelá di mira” e detayenan tokante Kristu i e futuro ku a ser revelá na e profetanan di Dios.—1 Pedro 1:11, 12.

Ku pasamentu di tempu, e angelnan a tuma nota ku mayoria hende no tabata sirbiendo nan Kreadó amoroso. Esaki lo mester a hasi e angelnan fiel hopi tristu! Di otro banda, ki ora ku un pekadó repentí i akudí na Yehova, “tin goso den presensia di e angelnan.” (Lukas 15:10) Nan tin un interes profundo den e bienestar di hende ku ta sirbi Dios, i hopi biaha Yehova a usa nan pa fortalesé i protehá su fiel sirbidónan riba tera. (Hebreonan 1:14) Wak algun ehèmpel.

Dos angel a yuda hustu Lòt i su yu muhénan sobrebibí e destrukshon di e statnan malbado di Sodoma i Gomora dor di hiba nan pafó di e área ei.a (Génesis 19:1, 15-26) Hopi siglo despues, ounke profeta Daniel a ser tirá den un kueba di leon, el a sali ileso. Kon esei tabata posibel? El a deklará: “Mi Dios a manda su angel i a sera boka di e leonnan.” (Daniel 6:22) Angelnan a sostené Hesus na kuminsamentu di su ministerio riba tera. (Marko 1:13) I djis promé ku Hesus a muri, un angel a aparesé na dje i a “fortales’é.” (Lukas 22:43) E sosten ku Hesus a haña di angel n’e momentonan krusial ei di su bida lo mester tabata un gran bendishon p’e! Ta un angel tambe a libra apòstel Pedro for di prizon.—Echonan 12:6-11.

Angelnan ta protehá nos awe? Si nos adorá Yehova segun su Palabra, e ta sigurá nos ku su angelnan poderoso i invisibel lo protehá nos. Beibel ta primintí: “E angel di SEÑOR ta [kamper] rònt di esnan ku ta tem’é, i ta reskatá nan.”—Salmo 34:7.

Sin embargo, nos tin ku rekonosé ku na promé lugá angelnan ta den sirbishi di Dios, i no di hende. (Salmo 103:20, 21) Nan ta sigui e instrukshonnan di Dios, no hende su òrdu òf petishonnan. P’esei, esun ku nos tin ku pidi yudansa ta Yehova Dios, no e angelnan. (Mateo 26:53) Klaru ku nos no por determiná te na ki grado Dios ta usa angel pa yuda hende ku vários asuntu pasobra nos no ta mira e angelnan. Pero loke sí nos sa ta ku Yehova ta “sostené fuertemente esnan ku nan kurason ta kompletamente di dje.” (2 Krónikanan 16:9; Salmo 91:11) I nos tin e siguransa ku “si nos pidi kualke kos konforme su boluntat, [Dios] ta tende nos.”—1 Juan 5:14.

E Skritura ta bisa tambe ku nos tin ku dirigí nos orashonnan i adorashon na Dios so. (Eksodo 20:3-5; Salmo 5:1, 2; Mateo 6:9) Angelnan fiel ta animá nos pa hasi esei. Por ehèmpel, ora apòstel Juan a purba adorá un angel, e kriatura spiritual ei a skual e, bisando: “[“Tene kuidou!” NW] No hasi esei; . . . Adorá Dios.”—Revelashon 19:10.

Angelnan Ta Entregá Mensahenan di Dios

E palabra “angel” ta nifiká “mensahero,” i esei ta un otro manera den kua angelnan ta sirbi Dios, esta, pa duna hende mensahe di Dios. Por ehèmpel, “angel Gabriel a wòrdu mandá pa Dios na un stat den Galilea ku yama Názarèt.” Pakiko? Pa e informá un mosa ku yama Maria ku ounke e tabata un bírgen, lo el a konsebí den su matris i duna lus na un yu hòmber ku lo mester a ser yamá Hesus. (Lukas 1:26-31) Dios a manda un angel tambe na e wardadónan den e kunukunan pa informá nan ku “Kristu e Señor” a nase. (Lukas 2:8-11) Meskos tambe, angelnan a entregá mensahenan di Dios na Abraham, Moisés, Hesus i otro personanan menshoná den Beibel.—Génesis 18:1-5, 10; Eksodo 3:1, 2; Lukas 22:39-43.

Kon angelnan ta sirbi komo mensahero di Dios awe? Konsiderá e trabou ku Hesus a profetisá ku su siguidónan lo hasi promé ku e fin di e sistema di kosnan aki. El a bisa: “E evangelio aki di e reino lo wòrdu prediká den henter mundu komo un testimonio na tur nashon, i e ora ei e fin lo yega.” (Mateo 24:3, 14) Tur aña, Testigunan di Yehova ta dediká mas ku mil mion ora na prediká e evangelio, òf bon nobo di e Reino di Dios. Pero bo tabata sa ku angelnan tambe ta enbolbí den e obra aki? Apòstel Juan a referí na un vishon ku el a haña, bisando: “Mi a mira un otro angel . . . , kende tabatin un evangelio eterno pa prediká na esnan ku ta biba riba tera, i na tur nashon i tribu i lenga i pueblo.” (Revelashon 14:6, 7) E teksto aki ta resaltá e obra di mas importante ku angelnan ta hasi awe na fabor di humanidat.

Segun ku Testigunan di Yehova ta prediká di kas pa kas, nan ta mira evidensia ku ta angelnan ta dirigiendo e obra aki. Hopi bes nan ta bishitá hende ku a kaba di resa i pidi Dios pa manda un hende bin yuda nan komprondé su propósitonan. Komo resultado di e guia di angelnan i e aktividat di e Testigunan, tur aña míles i míles di persona ta yega na konosé Yehova. Nos ta deseá pa abo tambe benefisiá di e trabou aki ku ta salba bida, bou di direkshon di e angelnan.

Angelnan Ta Ehekutá e Huisio di Dios

Ounke angelnan no ta outorisá pa husga hende, nan no ta djis para un kantu mira. (Juan 5:22; Hebreonan 12:22, 23) Den pasado nan a yega di sirbi komo ehekutor di e huisionan di Dios. Por ehèmpel, Dios a usa angelnan den su guera kontra e egipsionan di antigwedat, kendenan tabatin e israelitanan komo esklabo. (Salmo 78:49) I na un otro okashon, den un solo anochi ‘e angel di Yehova’ a mata 185.000 sòldá den e kampamentu di un enemigu di e pueblo di Dios.—2 Reinan 19:35.

Den futuro tambe angelnan lo ehekutá e huisio desfaborabel di Dios. Hesus lo bini “ku su angelnan poderoso den kandela tur na vlam, pa duna pago meresí na esnan ku no konosé Dios i na esnan ku no ta obedesé e evangelio.” (2 Tesalonisensenan 1:7, 8) Pero e destrukshon ei lo bini solamente riba hende ku no ta aseptá e mensahe ku aworakí ta ser prediká rònt mundu ku respaldo di e angelnan. Hende ku ta buska Dios i ku ta kumpli ku siñansanan bíbliko lo no sufri daño.—Sofonias 2:3.

Nos por ta hopi gradisidu pa e angelnan fiel ku semper ta kumpli ku e instrukshonnan di Dios! Yehova ta usa nan pa yuda i protehá su sirbidónan leal riba tera. Esaki ta un gran konsuelo pa nos pasobra tin kriaturanan spiritual peligroso ku yama demoño i nan sí kier hasi nos daño.

Demoñonan—Ken Nan Ta?

Durante e 15 siglonan ku a transkurí despues ku Satanas a gaña Eva den Edén, Dios su famia di angel a opservá ku Satanas e Diabel a logra alehá tur hende for di Dios, ku eksepshon di algun persona obediente manera Abel, Enok i Noe. (Génesis 3:1-7; Hebreonan 11:4, 5, 7) Algun angel tambe a kuminsá sigui Satanas. Beibel ta referí na nan komo e spiritunan ku tabata desobediente “den e dianan di Noe.” (1 Pedro 3:19, 20) Kon nan a manifestá nan desobedensia?

Den tempu di Noe un kantidat no-spesifiká di angel rebelde a bandoná nan lugá den e famia selestial di Dios, a bini na tera i a tuma kurpanan karnal. Ku ki intenshon? Nan a kultivá un deseo pa tene relashon seksual ku hende muhé, i dor di esei nan a bira tata di yunan ku tabata yama nèfilim, kendenan a bira gigantenan violento. Ademas, “maldat di hende tabata grandi riba tera, i . . . tur intenshon di e pensamentunan di su kurason tabata kontinuamente maldat so.” Pero Yehova Dios no a laga e korupshon aki di humanidat sigui. El a trese un Diluvio mundial, ku a bari tur hende malbado huntu ku nèfilim. E úniko hendenan ku a ser salbá tabata e fiel sirbidónan di Dios.—Génesis 6:1-7, 17; 7:23.

Ora e Diluvio a bini e angelnan rebelde no a ser destruí. Nan a bandoná nan kurpa karnal i a regresá e region di spiritu komo kriaturanan spiritual. Djei padilanti Beibel ta referí na nan komo demoño. Nan a pone nan mes na banda di Satanas e Diabel, kende ta ser yamá “e prens di demoñonan.” (Mateo 12:24-27) Meskos ku nan gobernante, demoñonan ta anhelá e adorashon di hende.

Demoñonan ta peligroso, pero nos no tin nodi tene miedu di nan. Nan poder ta limitá. Ora e angelnan desobediente a regresá shelu, Dios no a laga nan drenta bèk den su famia di angelnan fiel. Mas bien, el a kòrta tur iluminashon spiritual for di nan. Úniko kos ku a keda nan ta un futuro skur, limitá den un kondishon di skuridat spiritual ku yama Tártaro. (2 Pedro 2:4, NW) Yehova a tene nan na “kadena eterno,” di manera ku nan ta den un skuridat spiritual. Ademas, aworakí nan no por tuma kurpa humano mas.—Hudas 6.

Kiko Abo Mester Hasi?

Ainda demoñonan tin influensia riba hende? Sí, nan ta hasi esei dor di usa triki òf maña, manera esnan ku nan gobernante, Satanas e Diabel, ta usa. (Efesionan 6:11, 12) No opstante, si nos apliká e konseho di e Palabra di Dios, nos por para firme kontra e demoñonan. Ademas, hende ku ta stima Dios ta haña protekshon di angelnan poderoso.

Ta masha importante pa bo siña kiko ta e rekisitonan di Dios hañá den Beibel i kumpli ku loke bo ta siña! Bo por haña sa mas tokante e siñansanan di Beibel dor di tuma kontakto ku Testigunan di Yehova den bo área òf dor di skirbi e editornan di e revista aki. Testigunan di Yehova lo ta kontentu pa studia Beibel ku bo sin kobra bo nada, i na un ora ku ta kumbiní bo.

[Nota]

[Kuadro na página 6]

KON ANGELNAN TA ORGANISÁ

Yehova su inmenso famia di angel ta organisá den e siguiente manera: E angel di mas importante pa loke ta poder i outoridat ta Miguel e arkangel, òf Hesukristu. (1 Tesalonisensenan 4:16; Hudas 9) Bou di dje ta bini e serafinnan, e kerubinnan i otro angelnan.

E serafinnan ta okupá un posishon hopi haltu den e areglo di Dios. Nan ta sirbi na e trono di Dios. Parti di nan enkargo ta pa deklará e santidat di Dios i mantené su pueblo spiritualmente limpi.—Isaias 6:1-3, 6, 7.

E kerubinnan ta asistí na e trono di Dios i ta sostené e mahestat di Yehova.—Salmo 80:1; 99:1; Ezekiel 10:1, 2.

Otro angelnan ta sirbi komo representante di Yehova, i nan ta kumpli ku e boluntat divino.

[Plachi na página 4]

Angelnan a hiba Lòt i su yu muhénan for di zona di peliger

[Plachi na página 5]

Ora apòstel Juan a purba adorá e angel, esaki a bis’é: “No hasi esei”!

[Plachi na página 6]

Angelnan ta ehekutá e huisio di Dios

[Plachi na página 7]

Abo ta benefisiando di e trabou di prediká ku angelnan ta dirigí?