Sigui Hesus Su Ehèmpel i Mustra Interes Profundo den Hende Pober

POBRESA i opreshon ta kasi mes bieu ku humanidat. Ounke e Lei ku Dios a duna Israel a trata na protehá hende pober i aliviá nan sufrimentu, e nashon hopi bes no a obedesé e Lei ei. (Amos 2:6) Profeta Ezekiel a denunsiá e manera ku nan tabata trata hende pober. El a bisa: “E hendenan di e tera a praktiká opreshon i a kometé ladronisia; nan a maltratá e pobernan i esnan den nesesidat i a oprimí e stranheronan dor di nenga di duna nan nan derecho.”—Ezekiel 22:29.

Tempu Hesus tabata riba tera e situashon tabata meskos. Lidernan religioso no a mustra niun tiki interes den hende pober ni den hende den nesesidat. E lidernan religioso a ser deskribí komo “stimadó di plaka” ku tabata “devorá kas di biuda” i ku tabata mas interesá den mantené nan tradishonnan ku kuida hende di edat i esnan den nesesidat. (Lukas 16:14; 20:47; Mateo 15:5, 6) Un punto interesante ta ku den Hesus su komparashon di e bon samaritano, el a konta ku ora un saserdote i un levita a mira un hòmber heridá, nan a krusa kaminda i kana pas’é forbei en bes di bai yud’é.—Lukas 10:30-37.

Hesus A Mustra Interes Profundo den Hende Pober

E relatonan di Hesus su bida ku tin pará skirbí den e Evangelionan ta mustra ku el a komprondé bon-bon e difikultatnan di hende pober i ku e tabata masha pendiente di nan nesesidatnan. Ounke Hesus tabata biba den shelu, el a bandoná su gloria, bira hende i ‘a bira pober pa nos.’ (2 Korintionan 8:9) Ora Hesus a mira e multitutnan, “el a sinti kompashon pa nan, pasobra nan tabata kansá i plamá, manera karné sin wardadó.” (Mateo 9:36) E relato di e biuda pober ta mustra ku Hesus no a keda impreshoná ku e ofrendanan grandi di e hendenan riku, kendenan tabata duna “for di nan abundansia.” Loke a impreshon’é tabata e kontribushon chikitu di e biuda pober. E akto ei a konmové Hesus su kurason pasobra e biuda “a tir’aden for di su pobresa tur loke ku e tabatin pa biba di dje.”—Lukas 21:4.

Hesus no solamente a sinti kompashon pa hende pober, sino tambe a mustra interes personal den nan nesesidatnan. E ku su apòstelnan tabatin un fondo for di kua nan tabata duna israelitanan pober algu. (Mateo 26:6-9; Juan 12:5-8; 13:29) Hesus a animá personanan ku kier a bira su siguidó pa rekonosé nan obligashon di yuda hende den nesesidat. El a bisa un hóben gobernante riku: “Bende tur bo propiedatnan, i partié pa hende pober, i lo bo tin tesoro den shelu; i bin, sigui mi.” E echo ku e hòmber no tabata dispuesto pa renunsiá su propiedatnan ta mustra ku su amor pa rikesa tabata mas grandi ku su amor pa Dios i pa próhimo. Pues, e no tabatin e kualidatnan nesesario pa ser un disipel di Hesus.—Lukas 18:22, 23.

Kristu Su Siguidónan Ta Profundamente Interesá den Hende Pober

Despues di Hesus su morto, e apòstelnan i otro siguidónan di Kristu a sigui mustra interes profundo den esnan pober entre nan. Rònt di aña 49 di nos era, apòstel Pablo a topa Santiago, Pedro i Juan i nan a papia tokante e asignashon ku Pablo a haña for di Señor Hesukristu pa prediká e bon nobo. Nan a bai di akuerdo pa Pablo ku Barnabas bai na e nashonnan ‘pagano,’ konsentrando nan predikashon riba hende no-hudiu. Sin embargo, Santiago ku su kompañeronan a pidi Pablo ku Barnabas pa “kòrda riba e pobernan.” Anto esei ta loke Pablo “tabata ansioso pa hasi.”—Galationan 2:7-10.

Durante e reinado di Emperador Claudio, un hamber severo a afektá vários parti di e Imperio Romano. Debí na esei, kristiannan na Antiokia “a determiná ku, segun alkanse, kada un di nan lo a manda un kontribushon komo un sosten pa e rumannan ku tabata biba na Hudea. I esaki nan a hasi i a mand’é pa medio di Barnabas i Saulo pa e ansianonan.”—Echonan 11:28-30.

Kristiannan berdadero djawe tambe ta rekonosé ku siguidónan di Hesus mester mustra interes profundo den hende pober i esnan den nesesidat. Nan mester mustra interes spesialmente na esnan ku ta rumannan den fe. (Galationan 6:10) P’esei nan ta mustra ku nan ta realmente preokupá pa yuda esnan ku tin mester di kosnan di promé nesesidat. Por ehèmpel, na 1998 un sekura severo a destrosá gran parti di e region nortost di Brazil. E sekura a destruí kosechanan di aros, bonchi i maishi. Esei a resultá den hamber den un área ekstenso, e pió den 15 aña. Na algun lugá, asta awa di bebe a bira skars. Testigunan di Yehova ku tabata biba den otro partinan di e pais mesora a organisá komiténan di yudansa, i den poko tempu, nan a rekohé tonelada di kuminda i a paga e gastu pa transportá e artíkulonan.

Testigunan ku a kontribuí ku plaka i artíkulonan di yudansa a skirbi: “Nos ta masha kontentu di por a yuda nos rumannan, foral dor ku nos tin sigur ku nos a hasi Yehova su kurason kontentu. Nunka nos ta lubidá e palabranan di Santiago 2:15 i 16.” E versíkulonan bíbliko ei ta bisa: “Si un ruman hòmber òf ruman muhé ta sin paña i den nesesidat di e kuminda di kada dia, i un di boso bisa nan: ‘Bai na pas, tene bo kurpa kayente i yena bo barika,’ i sin embargo, boso no ta duna nan loke ta nesesario pa nan kurpa, kiko esei ta bal?”

Den un di e kongregashonnan di Testigunan di Yehova den e stat di São Paulo, tin un Testigu humilde i seloso ku ta pober i ku hopi bes tabatin ku lucha pa haña e nesesidatnan básiko di bida. El a bisa: “Maske mi ta biba den pobresa, e mensahe di Beibel a duna mi bida berdadero nifikashon. Mi no sa kon lo a para ku mi si mi no a haña yudansa for di mi rumannan Testigu.” Poko tempu pasá, e señora kristian trahadó aki mester a hasi un operashon pero e no tabatin moda di paga hospital. Den e kaso en partikular aki, rumannan kristian den kongregashon tabata den posishon di kubri e gastu di e operashon. Rònt mundu kristiannan berdadero ta duna yudansa na rumannan den fe ku ta den nesesidat.

Sin embargo, pa konmovedor ku eksperensianan asina por ta, ta bisto ku tal esfuerso sinsero lo no eliminá pobresa. Asta gobièrnunan poderoso i agensianan internashonal grandi ku ta rindi yudansa i ku tin sierto grado di éksito, no a logra eliminá e problema bieu aki di pobresa. P’esei e pregunta ta lanta: Kiko lo ta e solushon definitivo pa pobresa i otro problemanan ku ta tormentá humanidat?

Siñansanan di Beibel Ta Duna Yudansa Duradero

E relatonan di Evangelio ta konta ku Hesukristu regularmente a hasi bon obra pa hende ku tabata pober òf ku tabatin otro nesesidat. (Mateo 14:14-21) Pero na kua aktividat el a duna prioridat? Na un okashon, despues ku Hesus a dediká algun tempu na yuda esnan den nesesidat, el a bisa su disipelnan: “Laga nos bai otro kaminda, na e statnan serka aki banda, pa mi por prediká ayanan tambe.” Dikon Hesus a interumpí su trabou na fabor di hende malu i den nesesidat pa reanudá su aktividat di prediká? El a splika bisando: “Ta pa e propósito aki [esta, pa prediká] mi a wòrdu mandá.” (Marko 1:38, 39; Lukas 4:43) Ounke hasi bon obra pa hende den nesesidat tabata importante pa Hesus, su mishon prinsipal tabata di prediká tokante e Reino di Dios.—Marko 1:14.

Siendo ku Beibel ta urgi kristiannan ‘pa sigui den Hesus su pasonan’ ku sumo kuidou i atenshon, kristiannan djawe tin un guia bon kla tokante kiko mester haña prioridat den nan esfuerso pa yuda otro hende. (1 Pedro 2:21) Meskos ku Hesus, nan ta yuda hende den nesesidat. Sin embargo, meskos ku Hesus tambe, nan prioridat prinsipal ta pa hasi e trabou di siña hende e mensahe di Beibel tokante e bon nobo di e Reino di Dios. (Mateo 5:14-16; 24:14; 28:19, 20) Pero dikon predikashon di e mensahe ku tin den e Palabra di Dios mester ta mas importante ku otro formanan di yuda hende?

Eksperensianan di bida real for di rònt mundu ta demostrá ku ora hende ta komprondé i sigui Beibel su konseho práktiko, nan ta mihó prepará pa trata ku problemanan di bida diario, inkluso ku pobresa. Ademas, Beibel su mensahe tokante e Reino di Dios ku e Testigunan di Yehova ta prediká awe, ta duna hende un speransa pa futuro, un speransa ku ta hasi ku bida ta bale la pena, asta bou di e sirkunstansianan di mas difísil. (1 Timoteo 4:8) Kua speransa esei ta?

E Palabra di Dios ta sigurá nos relashoná ku nos futuro: “Segun [Dios] su promesa nos ta sperando shelunan nobo i un tera nobo, den kual ta biba hustisia.” (2 Pedro 3:13) Ora ku Beibel ta papia di e “tera,” e ta referí tin biaha na e hendenan ku ta biba riba tera. (Génesis 11:1) Pues e hustu “tera nobo” ku Dios a primintí ku lo bin ta un sosiedat di hende ku tin Dios su aprobashon. E Palabra di Dios ta primintí tambe ku bou di e gobernashon di Kristu, hende ku tin Dios su aprobashon lo haña e rekompensa di bida eterno i nan lo hiba un bida di satisfakshon riba e tera transformá den un paradeis. (Marko 10:30) E futuro maravioso ei ta disponibel pa tur hende, inkluso pa hende pober. Den e “tera nobo” ei e problema di pobresa lo ser solushoná pa semper.

[Kuadro/Plachi na página 7]

KON HESUS LO “LIBRA ESUN DEN NESESIDAT”?—Salmo 72:12

HUSTISIA: “Lag’é husga e afligínan di e pueblo, salba e yunan di esnan den nesesidat, i plècha e opresor.” (Salmo 72:4) Durante Kristu su reinado di e tera, lo tin hustisia pa un i tur. Lo no tin lugá pa korupshon, ku ta un plaga ku ta kousa pobresa pa hopi pais ku di otro manera lo por tabata riku.

PAS: “Den su dianan laga e hustu floresé, i laga tin abundansia di pas te ora ku no tin luna mas.” (Salmo 72:7) Gran parti di e pobresa ku tin na mundu ta bin pa motibu di konfliktonan humano i guera. Kristu lo trese pas perfekto riba tera, i asina lo e eliminá un di e kousanan prinsipal di pobresa.

KOMPASHON: “E lo tin kompashon di e pober i di esun den nesesidat, i e lo salba bida di esnan den nesesidat. E lo reskatá nan bida for di opreshon i violensia; i nan sanger lo ta presioso den su bista.” (Salmo 72:12-14) Hende pober, hende den nesesidat i hende oprimí lo bira parti di un solo famia felis, uní bou di e liderato di Rei Hesukristu.

PROSPERIDAT: “Lo tin abundansia di maishi den e tera.” (Salmo 72:16) Durante e reinado di Kristu, lo tin prosperidat i abundansia material. Hende lo no sufri mas di skarsedat di kuminda ni hamber, lokual awendia hopi bes ta kousa di pobresa.

[Plachi na página 4, 5]

Hesus a mustra interes personal den e nesesidatnan di hende pober

[Plachi na página 6]

Beibel su mensahe ta duna berdadero speransa