Liberashon Mediante e Reino di Dios Ta Serka!

“Ku bo reino bin. Ku bo boluntat sosodé na tera meskos ku den shelu.”​—MAT. 6:10.

1. Kiko tabata Hesus su siñansa prinsipal?

ORA Hesukristu a duna su Sermon Riba Seru, el a inkluí den dje un orashon modelo ku ta resumí su siñansa prinsipal. El a siña su siguidónan pa resa pidi Dios: “Ku bo reino bin. Ku bo boluntat sosodé na tera meskos ku den shelu.” (Mat. 6:​9-13) Hesus a “bai di un stat i di un pueblito pa otro, proklamando i predikando e reino di Dios.” (Luk. 8:1) Hesus a urgi su siguidónan: ‘Sigui buska promé e reino di Dios i Su hustisia.’ (Mat. 6:33) Segun ku bo ta studia e artíkulo aki, pensa riba maneranan ku bo por usa e informashon den bo ministerio. Por ehèmpel, pensa kon lo bo por kontestá e preguntanan aki: Kon importante e mensahe di Reino ta? For di kiko humanidat tin mester di liberashon? I kon e Reino di Dios lo perkurá liberashon?

2. Kon importante e mensahe di Reino ta?

² Hesus a profetisá: “E evangelio aki di e reino lo wòrdu prediká den henter mundu komo un testimonio na tur nashon, i e ora ei e fin lo yega.” (Mat. 24:14) E evangelio òf bon nobo tokante e Reino di Dios ta di sumo importansia. Sí, e ta e mensahe di mas importante na mundu! Den mas ku 100.000 kongregashon di Testigunan di Yehova mundialmente, rònt di shete mion sirbidó di Dios ta partisipá den un trabou di prediká inigualabel den kua nan ta bisa otro hende ku e Reino a ser establesí. E echo ku e Reino a ser establesí ta bon notisia pasobra esaki ta nifiká ku Dios a establesé un gobièrnu den shelu ku lo bai tin pleno kontròl riba tur asuntu riba tera. Bou di mando di e Reino, e boluntat di Yehova lo sosodé riba tera meskos ku den shelu.

3, 4. Kiko lo ta e resultado ora Dios su boluntat sosodé na tera?

³ Kiko lo pasa ku humanidat ora Dios su boluntat sosodé na tera? Yehova lo “seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló.” (Rev. 21:4) Hende lo no bira malu ni muri debí na piká heredá i imperfekshon. E mortonan ku ta den Dios su memoria lo haña e oportunidat di biba pa semper, pasobra Beibel ta primintí: “Lo tin un resurekshon di tantu e hustunan komo e malbadonan [òf “inhustunan,” NW].” (Echo. 24:15) Lo no tin guera, malesa ni hamber mas, i e tera lo ser transformá den un paradeis. Asta bestianan ku awendia ta peligroso lo ta na pas ku otro i ku hende.​—Sal. 46:9; 72:16; Isa. 11:​6-9; 33:24; Luk. 23:43.

⁴ Siendo ku e Reino lo trese e bendishonnan maravioso ei, no ta nada straño ku profesia di Beibel ta deskribí bida den e tempu ei ku e palabranan di konsuelo aki: “E humildenan lo heredá e tera, i lo deleitá nan mes den pas abundante.” Pero kiko di esnan ku ta kousa problema? E Skritura ta profetisá: “Aki poko tempu e malbado lo no t’ei mas.” Sin embargo, “esnan ku spera riba SEÑOR lo heredá e tera.”​—Sal. 37:​9-11.

5. Kiko ta bai pasa ku e sistema aktual di kosnan?

⁵ Pa tur esaki por sosodé, e sistema aktual di kosnan ku su gobièrnunan na konflikto ku otro, religionnan i sistema komersial tin ku ser eliminá. I esei ta eksaktamente loke e gobièrnu selestial lo hasi. Profeta Daniel a ser inspirá pa profetisá: “Den e dianan di e reinan ei [ku ta eksistí aktualmente] e Dios di shelu lo lanta un reino [den shelu] ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan [eksistente] aki, ma e mes lo dura pa semper.” (Dan. 2:44) E ora ei, e Reino di Dios—un gobièrnu selestial nobo—lo goberná riba un sosiedat terenal nobo. Lo tin “shelunan nobo i un tera nobo, den kual ta biba hustisia.”​—2 Ped. 3:13.

Awor Tin Mas Nesesidat pa Liberashon

6. Kon Beibel ta deskribí e maldat di e mundu malbado aki?

⁶ Ora Satanas, Adam i Eva a rebeldiá kontra Dios pasobra nan tabata ke disidí pa nan mes loke ta bon i loke ta malu, humanidat su historia desastroso a kuminsá. Un 1.600 aña despues, promé ku e Diluvio, ‘maldat di hende tabata abundante riba tera, i tur intenshon di e pensamentunan di nan kurason tabata kontinuamente maldat so.’ (Gén. 6:5) Rònt di 1.300 aña despues di esei, Salomon a haña ku e situashon tabata asina malu ku el a skirbi: “Mi a felisitá e mortonan ku ta morto kaba, mas ku e bibunan ku ta na bida ainda. Ma esun ku nunka a eksistí, ku nunka a mira e obra di maldat ku a wòrdu hasí bou di solo, ta mas felis ku nan tur dos.” (Ekl. 4:​2, 3) Agregando un 3000 aña mas na esei, nos ta yega den nos tempu. I maldat ta abundá ketu bai.

7. Dikon tin mas nesesidat awor pa liberashon di Dios?

⁷ Ounke ta sierto ku maldat ta eksistí pa hopi tempu kaba, awor tin mas nesesidat ku nunka pa liberashon mediante e Reino di Dios. Durante e último 100 añanan, e situashon a bira mas malu ku nunka, i e ta sigui deteriorá. Por ehèmpel, Worldwatch Institute ta informá: “Tres biaha mas tantu hende a bira víktima di guera den siglo [20] ku den tur guera for di e promé siglo AD [di nos era] pa 1899.” Desde 1914, mas ku 100 mion hende a muri den guera! Un ensiklopedia ta kalkulá ku por lo ménos 60 mion hende a muri den Segundo Guera Mundial. Ku e armanan nuklear ku algun nashon tin awendia, hende tin e kapasidat di eliminá partinan grandi di e poblashon mundial. I apesar di avansenan riba tereno di siensia i medisina, ainda tur aña hamber ta kousa morto di rònt di sinku mion mucha.​—Wak kapítulo 9 di e buki Kiko Beibel Ta Siña Realmente?

8. Kiko míles di aña di gobernashon humano sin duda a duna prueba di dje?

⁸ Hende a faya den nan esfuersonan pa kaba ku maldat. E mundu aki su institushonnan polítiko, komersial i religioso nunka no por a satisfasé hende su nesesidat básiko pa pas, prosperidat i un bon salú. En bes di solushoná e problemanan inmenso ku humanidat ta konfrontando awor, e organisashonnan aki a krea mas problema. No tin duda, míles di aña di gobernashon humano a duna prueba ku e siguiente palabranan ta sierto: “E kaminda di hende no ta di dje mes; tampoko no ta keda na hende pa dirigí su pasonan.” (Jer. 10:23) Sí, “hende a ehersé outoridat riba un otro hende pa su daño.” (Ekl. 8:9) Ademas, “henter e kreashon ta keha i ta sufri e dolónan di parto huntu.”​—Rom. 8:22.

9. Ki kondishonnan kristiannan berdadero ta ferwagt di mira durante e “último dianan” aki?

⁹ Relashoná ku nos tempu, Beibel a profetisá: “Den e último dianan tempunan trabahoso lo bin.” Despues ku e profesia a deskribí e kondishon di e último dianan bou di gobernashon humano, e ta deklará: “Hendenan malbado i gañadónan lo bai di malu pa peor.” (Lesa 2 Timoteo 3:​1-5 i 13.) Esei ta loke kristiannan ta ferwagt, pasobra “henter mundu ta bou di kontròl di e malbado,” Satanas. (1 Juan 5:19) Di otro banda, e bon notisia ta ku pronto Dios lo libra tur esnan ku ta stim’é. Nan lo ser librá for di e mundu aki, ku rápidamente ta bayendo di malu pa peor.

E Úniko Fuente Konfiabel di Liberashon

10. Dikon Yehova ta e úniko Fuente konfiabel di liberashon?

¹⁰ Segun ku bo ta prediká e bon nobo, splika bo oyentenan ku Yehova ta e úniko Fuente konfiabel di liberashon. Ta e so tin e poder i e deseo pa libra su sirbidónan di kualke situashon ku ta malu. (Echo. 4:​24, 31; Rev. 4:11) Nos por tin sigur ku Yehova semper lo libra su pueblo, i ku lo e kumpli ku su propósito, pasobra el a hura: “Siguramente, manera mi a pensa, asina a sosodé.” Su palabra “lo no bolbe bashí serka [dje].”​—Lesa Isaias 14:24 i 25; 55:​10 i 11.

11, 12. Ki garantia Dios ta duna su sirbidónan?

¹¹ Yehova a duna e garantia ku lo e libra su sirbidónan ora e ehekutá huisio riba e malbadonan. Ora Dios a manda profeta Jeremias bai papia ku kurashi ku e pekadónan grosero, el a bis’é: “No tene miedu.” Dikon nò? “Ami ta ku bo pa libra bo.” (Jer. 1:8) Di mes manera, ora Yehova tabata bai destruí e statnan malbado Sodoma i Gomora, el a manda dos angel pa guia Lòt i su famia pa nan por a sali safe for di e área. ‘E ora ei Yehova a laga yobe suafel i kandela riba Sodoma i Gomora.’​—Gén. 19:​15, 24, 25.

¹² Asta riba un eskala mundial, Yehova por libra esnan ku ta hasi su boluntat. Ora el a destruí e mundu malbado di antigwedat mediante e Diluvio, el “a preservá Noe, un predikadó di hustisia, huntu ku shete otro persona mas.” (2 Ped. 2:5) Yehova lo bolbe libra hende rekto ora ku e destruí e mundu malbado aktual. P’esei, su Palabra ta bisa: ‘Buska Yehova, boso tur humildenan di tera; buska hustisia; buska humildat. Kisas boso lo wòrdu skondí riba e dia di e rabia di Yehova.’ (Sof. 2:3) Komo resultado di e destrukshon mundial ei, ‘e rektonan lo biba den e tera, ma e malbadonan lo wòrdu kòrtá kitá for di tera.’​—Pro. 2:​21, 22.

13. Kon Yehova su sirbidónan ku a muri lo haña liberashon?

¹³ Sin embargo, hopi sirbidó di Dios a muri kaba debí na malesa, persekushon i otro faktornan. (Mat. 24:9) Kon anto, e personanan aki lo haña liberashon? Manera e artíkulo a menshoná anteriormente: “Lo tin un resurekshon di . . . e hustunan.” (Echo. 24:15) Ta un gran konsuelo pa sa ku nada no por stroba Yehova di libra su sirbidónan!

Un Gobièrnu Hustu

14. Dikon nos tin konfiansa ku e Reino di Dios ta un gobièrnu hustu?

¹⁴ Ora bo ta prediká, bo por splika bo oyentenan ku Yehova su Reino selestial ta un gobièrnu hustu. Esei ta asina pasobra e ta reflehá Dios su kualidatnan maravioso, manera hustisia, rektitut i amor. (Deu. 32:4; 1 Juan 4:8) Dios a pone e Reino den man di Hesukristu, esun ku ta mihó kualifiká pa goberná e tera. Ademas, Yehova su propósito ta pa 144.000 kristian ungí wòrdu tumá for di tera i resusitá na bida selestial komo ko-heredero, i pa huntu ku Kristu nan goberná e tera.​—Rev. 14:​1-5.

15. Mustra e diferensia entre e Reino di Dios i gobernashon di hende.

¹⁵ Lo tin un diferensia grandi entre e gobernashon di Hesus ku e 144.000 i esun di hende imperfekto! Hopi bes e gobernantenan di e sistema di kosnan aki tabata kruel i a kondusí nan súpditonan na gueranan ku a resultá den morto di miónes di hende. P’esei, no ta nada straño ku e Skritura ta konsehá nos pa no pone nos konfiansa den hende, “den kende no tin salbashon.” (Sal. 146:3) E gobernashon di Kristu sí lo ta ekselente! Hesus a bisa: “Bin serka mi tur ku ta kansá i kargá, i lo mi duna boso sosiegu. Tuma mi yugo riba boso, i siña di mi, pasobra mi ta mansu i humilde di kurason; i boso lo haña sosiegu pa boso alma. Pasobra mi yugo ta suave i mi karga ta lihé.”​—Mat. 11:​28-30.

E Último Dianan Lo Terminá Pronto!

16. Kon e último dianan aki ta yega na su fin?

¹⁶ For di aña 1914, e mundu aki a drenta su último dianan òf e “konklushon dje sistema di kosnan.” (Mat. 24:​3, NW) Awor falta masha poko tempu pa loke Hesus a yama e ‘tribulashon grandi’ kuminsá. (Lesa Mateo 24:21.) E tribulashon sin igual ei lo pone un fin na henter Satanas su mundu. Pero kon e tribulashon grandi ta kuminsá? I kon e ta kaba?

17. Segun Beibel, ku ki suseso e tribulashon grandi lo kuminsá?

¹⁷ E tribulashon grandi lo kuminsá diripiente. Sí, ‘e dia di Yehova’ lo bin ònferwagt, “miéntras ku nan ta bisa: ‘Pas i siguridat!’” (Lesa 1 Tesalonisensenan 5:2 i 3.) Ora e nashonnan ta pensa ku nan ta serka di solushoná algun di nan problemanan grandi, e tribulashon ku Beibel ta profetisá di dje lo kuminsá diripiente ku e destrukshon di ‘Babilonia e Grandi,’ e imperio mundial di religion falsu. Esaki lo kohe e mundu di sorpresa. Reinan i otronan lo keda asombrá ora ku ehekutá huisio riba Babilonia e Grandi.​—Rev. 17:​1-6, 18; 18:​9, 10, 15, 16, 19.

18. Kon Yehova lo reakshoná ora Satanas ataká Su pueblo?

¹⁸ Lo tin “señalnan den solo i luna i streanan,” i “e señal di e Yu di hende lo aparesé na shelu.” E ora ei, nos por ‘lanta nos kabes pasobra nos redenshon [òf “liberashon,” NW] ta yegando serka.’ (Luk. 21:​25-28; Mat. 24:​29, 30) Satanas òf Gòg lo dirigí su ehérsitonan kontra e pueblo di Dios. Pero relashoná ku esnan ku ta ataká su sirbidónan fiel, Yehova ta bisa: ‘Esun ku mishi ku boso ta mishi ku mi pret’i wowo.’ (Zak. 2:8) P’esei, Satanas su intento pa kousa destrukshon lo frakasá. Dikon? Pasobra Señor Soberano Yehova lo reakshoná mesora pa libra su sirbidónan.​—Eze. 38:​9, 18.

19. Dikon nos por tin konfiansa ku Dios su forsanan di ehekushon lo destruí e sistema di Satanas?

¹⁹ Ora Dios tuma akshon kontra e nashonnan, ‘nan lo sa ku e ta Yehova.’ (Eze. 36:23) Lo e manda su forsanan di ehekushon—un kantidat grandi di kriaturanan spiritual bou di guia di Kristu Hesus—pa destruí e restu di Satanas su sistema riba tera. (Rev. 19:​11-19) Ora nos kòrda ku na un okashon, un angel so a “mata shent’i ochent’i sinku mil” enemigu di Dios durante un solo anochi, nos por tin konfiansa ku fásilmente e ehérsito selestial lo destruí tur rastro di Satanas su sistema riba tera ora e tribulashon grandi kulminá den Armagedón. (2 Rei. 19:35; Rev. 16:​14, 16) Satanas i su demoñonan lo wòrdu será den abismo pa mil aña. Finalmente, nan lo ser destruí.​—Rev. 20:​1-3.

20. Kiko Yehova lo logra mediante e Reino?

²⁰ Asina tera lo ser hasí limpi di maldat, i hende hustu lo biba riba dje pa semper. Yehova lo duna prueba ku e ta e Gran Libertador. (Sal. 145:20) Mediante e Reino, lo e vindiká su soberania, santifiká su nòmber santu i kumpli ku su gran propósito pa e tera. Ta nos deseo pa bo tin masha goso den bo ministerio segun ku bo ta deklará e bon nobo aki i yuda hende ku tin e “disposishon korekto pa bida eterno” realisá ku liberashon mediante e Reino di Dios ta serka.​—Echo. 13:​48, NW.

Bo Ta Kòrda?

• Kon Hesus a enfatisá e importansia di e Reino?

• Dikon awor tin mas nesesidat ku nunka pa liberashon?

• Ki susesonan nos por spera durante e tribulashon grandi?

• Kon Yehova lo duna prueba ku e ta e Gran Libertador?

[Plachinan na página 22]

E Palabra di Dios a profetisá ku lo tin un obra mundial di predikashon sin igual den nos tempu

[Plachi na página 23]

Yehova por libra nos meskos ku el a libra Noe i su famia

[Plachi na página 23]

Yehova “lo seka tur lágrima . . . i lo no tin morto mas.”​—Rev. 21:4