Progresá Spiritualmente dor di Sigui Pablo Su Ehèmpel
“Mi a lucha e bon lucha, mi a terminá e kareda, mi a warda e fe.”—2 Tim. 4:7.
1, 2. Ki kambionan Saulo di Tarso a hasi den su bida, i kua trabou importante el a kuminsá hasi?
ETABATA un hòmber inteligente i desididu. Sin embargo, el ‘a biba segun e pashonnan di su karni.’ (Efe. 2:3) Despues el a deskribí su mes komo “un blasfemadó i un persiguidó i [un hòmber] masha agresivo mes.” (1 Tim. 1:13) E hòmber ei tabata Saulo di Tarso.
2 Ku tempu, Saulo a hasi kambionan drástiko den su bida. El a bandoná su manera di anda di ántes i a traha duru pa ‘no buska su mes probecho, ma e probecho di hopi hende.’ (1 Kor. 10:33) El a bira un persona suave i a mustra tierno kariño na esnan den e kongregashon kristian ku ántes tabata su víktimanan. (Lesa 1 Tesalonisensenan 2:7 i 8.) El a skirbi: “Mi a wòrdu hasí un sirbidó.” I el a agregá: “Na ami, esun di mas ménos entre tur e santunan, e grasia aki a wòrdu duná, pa prediká na e paganonan e rikesa insondeabel di Kristu.”—Efe. 3:7, 8.
3. Den ki maneranan un estudio di e kartanan di Pablo i e registro di su ministerio por yuda nos?
3 Saulo, kende tabata konosí tambe komo Pablo, a progresá di un manera sobresaliente den e bèrdat. (Echo. 13:9) Pues, un manera sigur ku nos por aselerá nos progreso den e bèrdat ta dor di studia e kartanan di Pablo i e registro di su ministerio i despues imitá su ehèmpel di fe. (Lesa 1 Korintionan 11:1; Hebreonan 13:7.) Laga nos wak kon esaki lo motivá nos pa desaroyá un bon rutina di estudio personal, pa kultivá berdadero amor pa hende i pa mantené un punto di bista korekto di nos mes.
Pablo Su Rutina di Studia
4, 5. Ki benefisio Pablo a saka for di estudio personal?
4 Komo un fariseo ku a ser eduká “na pia di Gamaliel, estriktamente segun e Lei” di nan antepasadonan, Pablo tabatin sierto konosementu kaba di e Skritura. (Echo. 22:1-3; Fil. 3:4-6) Djis despues ku el a batisá, el “a bai Arabia”—sea den e Desierto di Siria òf kisas na un lugá trankil riba e Península di Arabia, situá ost di Laman Kòrá, kaminda e por a meditá. (Gal. 1:17) Aparentemente, Pablo kier a reflekshoná riba e pasashinan di e Skritura ku a duna prueba ku Hesus ta e Mesias. Ademas, Pablo kier a prepará su mes pa e trabou ku a sper’é. (Lesa Echonan 9:15, 16, 20 i 22.) Pablo a tuma tempu pa meditá riba kosnan spiritual.
5 E konosementu i perspikasia di e Skritura ku Pablo a atkerí for di estudio personal a kapasit’é pa siña otro hende e bèrdat na un manera efikas. Por ehèmpel, den e snoa na Antiokia di Pisidia, Pablo a sita por lo ménos sinku teksto direktamente for di e Skritura Hebreo pa duna prueba ku Hesus ta e Mesias. Pablo a referí tambe vários bes na e santu skrituranan. Su argumentonan bíbliko tabata asina konvinsente ku “hopi di e hudiunan i e prosélitonan ku tabata teme Dios a sigui Pablo i Barnabas” pa nan por a siña mas kos. (Echo. 13:14-44) Despues di vários aña, ora un grupo di hudiu di Roma a bin serka Pablo kaminda e tabata hospedá, el a splika nan algun asuntu “dor di duna testimonio tokante di e reino di Dios, i tabata trata di konvensé nan tokante di Hesus, tantu for di e lei di Moisés komo for di e Profetanan.”—Echo. 28:17, 22, 23.
6. Kiko a yuda Pablo keda spiritualmente fuerte ora el a konfrontá prueba?
6 Ora Pablo a hañ’é ku prueba, el a sigui analisá e Skritura i saka fortalesa for di su mensahe inspirá. (Heb. 4:12) Ora Pablo tabata den prizon na Roma promé ku el a wòrdu ehekutá, el a pidi Timoteo pa trese p’e “e bukinan” òf ròlnan i “e pèrkamèntnan.” (2 Tim. 4:13) Probablemente e dokumentonan ei tabata porshonnan di e Skritura Hebreo ku Pablo a usa den su estudio profundo. Pa Pablo por a keda firme tabata masha importante pa el a atkerí konosementu di e Skritura mediante un rutina di studia Beibel.
7. Menshoná e benefisionan ku bo por saka for di un estudio regular di Beibel.
7 Estudio regular di Beibel, kompañá ku meditashon ku un propósito spesífiko, lo yuda nos progresá spiritualmente. (Heb. 5:12-14) Relashoná ku e balor di Dios su Palabra, e salmista a kanta: “E lei di bo boka ta mihó pa mi ku míles di pida oro i plata. Bo mandamentunan ta hasi mi bira mas sabí ku mi enemigunan, pasobra semper nan ta ku mi. Mi a detené mi pianan for di tur mal kaminda, pa mi por warda bo palabra.” (Sal. 119:72, 98, 101) Bo tin un rutina di estudio personal di Beibel? Bo ta preparando pa futuro asignashonnan den sirbishi di Dios dor di lesa Beibel tur dia i reflekshoná riba loke bo ta lesa?
Saulo A Siña Stima Hende
8. Kon Saulo a trata hende ku no tabata miembro di e religion hudiu?
8 Promé ku Saulo a bira un kristian, e tabata un fanátiko di su religion, pero e no tabata masha interesá den hende ku no tabata miembro di e religion hudiu. (Echo. 26:4, 5) El a presensiá kon algun hudiu tabata piedra Esteban, i el a aprobá esaki. Loke Saulo a mira mester a dun’é mas kurashi pa persiguí e kristiannan, ya ku kisas el a pensa ku Esteban a meresé e kastigu ei. (Echo. 6:8-14; 7:54–8:1) E relato inspirá ta bisa: “Saulo a kuminsá destruí e iglesia, i tabata drenta kas pa kas i lastra hòmber i muhé bai kuné i sera nan den prizon.” (Echo. 8:3) El “a bai te na statnan stranhero pa persiguí nan.”—Echo. 26:11.
9. Ki eksperensia a pone Saulo rekonsiderá e manera ku e tabata trata hende?
9 Ora ku Señor Hesus a aparesé na Saulo, e tabata riba kaminda pa Damasko pa bai persiguí Kristu su disipelnan. E lus sobrenatural di e Yu di Dios a laga Saulo siegu i dependiente di otro hende. Pa e tempu ku Yehova a usa Ananias pa restorá Saulo su bista, Saulo su aktitut pa ku hende a kambia pa semper. (Echo. 9:1-30) Ora ku el a bira un siguidó di Kristu, el a traha duru pa trata ku tur hende meskos ku Hesus a hasi. Esaki a nifiká ku e mester a stòp ku violensia i sea “na pas ku tur hende.”—Lesa Romanonan 12:17-21.
10, 11. Kon Pablo a demostrá berdadero amor pa hende?
10 Pablo no a keda kontentu ku djis ser na pas ku otro hende. E kier a mustra berdadero amor na nan, i e ministerio kristian a dun’é e oportunidat ei. Riba su promé biahe komo misionero, el a prediká e bon nobo na Asia Menor. Apesar di oposishon feros, Pablo i su kompañeronan a enfoká prinsipalmente riba yuda hende mansu aseptá kristianismo. Nan a bolbe bishitá Listra i Ikonio ounke e opositornan den e statnan ei a purba mata Pablo.—Echo. 13:1-3; 14:1-7, 19-23.
11 Despues, Pablo i su grupo a bai buska hende ku ke tabatin un bon relashon ku Dios den e stat di Masedonia na Filipos. Un prosélito hudiu ku yama Lidia a skucha e bon nobo i a bira kristian. Outoridatnan sivil a suta Pablo i Silas ku bara i a benta nan den prizon. Apesar di esei, Pablo a duna testimonio na e wardadó di prezu. Konsekuentemente, e wardadó di prezu i su famia a batisá komo adoradónan di Yehova.—Echo. 16:11-34.
12. Kiko a motivá Saulo, e hòmber agresivo, pa bira un apòstel amoroso di Hesukristu?
12 Dikon Saulo, e eks-persiguidó, a aseptá e fe di esnan ku tabata su víktimanan? Kiko a motivá e hòmber agresivo ei pa bira un apòstel bondadoso i amoroso, kende tabata dispuesto pa riska su bida pa otro hende por a siña e bèrdat tokante Dios i Kristu? Pablo mes a splika: “Dios . . . a yama mi pa medio di su grasia, pa revelá su Yu den mi.” (Gal. 1:15, 16) Pablo a skirbi Timoteo: “Mi a haña miserikòrdia, pa asina den mi, komo esun di promé, Hesukristu por a demostrá su pasenshi perfekto, komo un ehèmpel pa esnan ku lo a kere den dje pa bida eterno.” (1 Tim. 1:16) Yehova a pordoná Pablo. I e bondat inmeresí i miserikòrdia ei ku Pablo a risibí a motiv’é pa mustra amor na otro hende dor di prediká e bon nobo na nan.
13. Kiko mester motivá nos pa mustra amor na otro hende, i kon nos por hasi esei?
13 Di mes manera, Yehova ta pordoná nos piká- i fayonan. (Sal. 103:8-14) E salmista a puntra: “Si abo, SEÑOR, tuma inikidatnan na kuenta, o Señor [Yehova], ken lo por a keda para?” (Sal. 130:3) Sin e miserikòrdia di Dios, niun di nos lo no tabatin e goso di sirbishi sagrado ni e speransa di haña bida eterno. Dios ta demostrá su gran bondat inmeresí na nos tur. P’esei, meskos ku Pablo, nos mester tin e deseo di ekstendé nos amor na otro hende dor di prediká na nan i siña nan e bèrdat i dor di fortalesé nos kompañeronan di fe.—Lesa Echonan 14:21-23.
14. Kon nos lo por ekspandé nos ministerio?
14 Pablo kier a progresá komo un minister di e bon nobo, i Hesus su ehèmpel a konmové su kurason. Un di e maneranan ku e Yu di Dios a mustra amor inkomparabel pa hende tabata mediante su trabou di prediká. Hesus a bisa: “E kosecha ta masha grandi, ma trahadó ta poko. P’esei, pidi e Señor di kosecha pa manda trahadó na su kosecha.” (Mat. 9:35-38) Pablo a bira un trahadó diligente, i asina el a aktua na armonia ku kualke petishon ku lo el a hasi pa mas trahadó. Kiko di abo? Bo por mehorá e kualidat di bo ministerio? Òf bo por oumentá bo partisipashon den e trabou di prediká e Reino? Kisas bo por asta regla bo asuntunan di tal manera ku bo por traha pionero? Laga nos mustra berdadero amor na otro hende dor di yuda nan tene “duru na e palabra di bida.”—Fil. 2:16.
E Manera Ku Pablo A Mira Su Mes
15. Kon Pablo a mira su mes na komparashon ku su kompañeronan kristian?
15 Komo un minister kristian, Pablo a pone un ekselente ehèmpel pa nos den un otro manera tambe. Ounke el a risibí hopi privilegio den e kongregashon kristian, Pablo tabata bon konsiente ku e no a meresé e bendishonnan ei i ku e no tabatin derecho riba nan debí na su abilidatnan. El a realisá ku e bendishonnan ku el a eksperensiá tabata ekspreshonnan di Dios su bondat inmeresí. Pablo a rekonosé ku otro kristiannan tambe tabatin éksito komo ministernan di e bon nobo. Apesar di su posishon den e pueblo di Dios, el a keda humilde.—Lesa 1 Korintionan 15:9-11.
16. Kon Pablo a mustra humildat i modestia en konekshon ku e kuestion di sirkunsishon?
16 Konsiderá kon Pablo a trata ku un problema ku a surgi na e stat sirio di Antiokia. E kongregashon kristian einan tabata dividí pa motibu di e kuestion di sirkunsishon. (Echo. 14:26–15:2) Siendo ku Pablo a ser nombrá pa hiba delantera den e predikashon na e paganonan insirkunsidá, kisas lo el a pensa ku e tabata un eksperto den trata ku hende no-hudiu i p’esei bon kualifiká pa resolvé e problema. (Lesa Galationan 2:8 i 9.) Sin embargo, ora su esfuersonan no a resolvé e problema, ku humildat i modestia, el a sigui e areglonan pa aserká e kuerpo gobernante na Yerusalèm pa papia riba e asuntu. El a koperá plenamente segun ku e miembronan di e kuerpo gobernante tabata skucha e asuntu, a tuma un desishon i a asigná é komo un di nan mensaheronan. (Echo. 15:22-31) Asina Pablo a hiba delantera den mustra “onor” na su ko-sirbidónan.—Rom. 12:10b.
17, 18. (a) Ki sintimentu Pablo a kultivá pa e rumannan den e kongregashonnan? (b) Kiko nos ta siña tokante Pablo for di e manera ku e ansianonan di Efeso a reakshoná na su despedida?
17 Komo un persona humilde, Pablo no a distansiá su mes for di su rumannan den e kongregashonnan. Mas bien, el a haña un kariño profundo pa nan. Na final di su karta na e Romanonan, el a manda saludo pa mas ku 20 persona ku el a menshoná na nòmber. Mayoria di nan no ta ser menshoná niun kaminda mas den e Skritura i ta algun di nan so tabatin privilegionan spesial. Pero nan tabata sirbidónan leal di Yehova, i Pablo a stima nan mashá.—Rom. 16:1-16.
18 Pablo su aktitut humilde i amigabel a fortalesé e kongregashonnan. Despues ku el a reuní ku e ansianonan di Efeso pa e último bes, nan “a brasa Pablo i a sunch’é bes tras bes, masha tristu, spesialmente pa e palabra ku el a papia, ku nan lo no mira su kara mas.” E despedida di un hòmber orguyoso ku ta apartá su mes di otronan lo no a kousa e reakshon ei.—Echo. 20:37, 38.
19. Kon nos por demostrá “humildat” den e manera ku nos ta trata nos kompañeronan kristian?
19 Tur hende ku ke progresá spiritualmente mester desplegá un aktitut humilde manera Pablo. El a konsehá su kompañeronan kristian pa no hasi “nada ku un aktitut di egoismo òf orguyo, ma ku humildat laga kada un di boso konsiderá e otro mas importante ku e mes.” (Fil. 2:3) Kon nos por sigui e konseho ei? Un manera ta dor di koperá ku e ansianonan den nos kongregashon, siguiendo nan instrukshon i apoyá e desishonnan ku nan tuma relashoná ku pikánan serio den e kongregashon. (Lesa Hebreonan 13:17.) Un otro manera ta dor di mustra apresio profundo pa tur nos rumannan den fe. Hopi bes, e kongregashonnan di e pueblo di Yehova ta konsistí di hende di vários nashonalidat, kultura, rasa i background étniko. P’esei, meskos ku Pablo, nos tin ku siña trata tur hende ku kariño i sin hasi distinshon, no ta bèrdat? (Echo. 17:26; Rom. 12:10a) Beibel ta animá nos pa “aseptá otro, meskos ku Kristu tambe a aseptá nos pa e gloria di Dios.”—Rom. 15:7.
“Kore” e Kareda di Bida “ku Perseveransia”
20, 21. Kiko lo yuda nos kore e kareda di bida ku éksito?
20 Nos por kompará e bida di un kristian ku un kareda di distansia largu. Pablo a skirbi: “Mi a terminá e kareda, mi a warda e fe; den futuro ta wardá pa mi e korona di hustisia, kual Señor, e hues hustu, lo duna mi riba e dia ei; i no na ami so, ma tambe na tur esnan ku a stima su [“manifestashon,” NW].”—2 Tim. 4:7, 8.
21 Si nos ta sigui Pablo su ehèmpel, esaki lo yuda nos kore e kareda pa bida eterno ku éksito. (Heb. 12:1) P’esei, laga nos hasi tur esfuerso pa sigui progresá spiritualmente dor di kultivá un bon rutina di estudio personal, dor di kultivá amor profundo pa hende i dor di mantené un aktitut humilde.
Kon Lo Bo Kontestá?
• Ki benefisio Pablo a saka for di estudio personal di e Skritura riba un base regular?
• Dikon ta importante pa kristiannan berdadero desplegá amor profundo pa hende?
• Ki kualidatnan lo yuda bo trata hende sin hasi distinshon?
• Kon Pablo su ehèmpel por yuda bo koperá ku e ansianonan di bo kongregashon?
[Plachi na página 31]
Saka fortalesa for di e Skritura meskos ku Pablo a hasi
[Plachi na página 31]
Mustra amor dor di kompartí e bon nobo ku otro hende
[Plachi na página 31]
Bo sa kiko a pone Pablo su rumannan stim’é?