Dikon Noe Tabata Bon Mirá den Bista di Dios?—Pakiko Esaki Mester Interesá Nos?

MAYORIA di nos ta kòrda okashonnan ku nos a yega di haña notisia importante. Nos ta kòrda detaye, esta, no solamente unda nos tabata i kiko nos tabata hasi sino tambe kon nos a reakshoná. No kabe duda ku Noe nunka a lubidá e dia ku el a haña notisia for di Yehova Dios, e Soberano di universo. Por tabatin un notisia mas importante? Yehova a bisa ku el a disidí di destruí “tur karni.” Noe mester a traha un arka gigantesko pa salba tantu su bida komo di su famia i tur sorto di bestia.​—Génesis 6:​9-21.

Kon Noe a reakshoná? El a alegrá ora el a tende e notisia, òf el a protestá? Kon el a duna su esposa i famia e notisia? Beibel no ta bisa esei. Loke sí Beibel ta bisa ta: “Asina Noe a hasi; konforme tur loke Dios a orden’é, el a hasi.”​—Génesis 6:22.

Esaki sigur ta un punto importante, pasobra e deklarashon ei ta splika en parti pakiko Noe tabata bon mirá den bista di Dios; Noe tabata dispuesto pa hasi loke Dios a pidié. (Génesis 6:8, BPK) Kiko mas a pone ku Noe tabata bon mirá den bista di Dios? E kontesta ta importante pasobra nos mester ta manera Noe pa sobrebibí ora Dios eliminá hende malbado for di tera. Pero promé laga nos mira kon e bida di Noe tabata promé ku e Diluvio.

Demoñonan A Bin Tera

Noe a biba na prinsipio di historia humano. El a nase mas o ménos mil aña despues ku a krea e promé hende. Den e époka ei hende no tabata primitivo manera hopi di nos ta imaginá, esta, kriatura bobo ku yen di kabei ku ta kana tur doblá ku chikoti den nan man. Hende tabata traha hèrmènt di heru i bròns na man, i probablemente Noe a usa e hèrmèntnan aki pa konstruí e arka. Nan tabatin instrumento musikal tambe. Hende tabata kasa, kria famia, planta i kria bestia. Nan tabata kumpra i bende kos. Den e asuntunan aki, bida den e tempu ei tabata hopi paresido na e bida di awendia.​—Génesis 4:​20-22; Lukas 17:​26-28.

Den otro asuntunan sí kos tabata bastante diferente. Un diferensia tabata ku e hendenan ei tabata biba hopi mas largu. No tabata nada straño pa un hende biba mas ku 800 aña. Noe a biba 950 aña; Adam a biba 930 aña i Matusalen, abuelo di Noe, a biba 969 aña.a​—Génesis 5:5, 27; 9:29.

Un otro diferensia ta ser deskribí na Génesis 6:​1 i 2, ku ta bisa: “Awor a sosodé ku ora hende a kuminsá multipliká riba superfisie di tera i a haña yu muhénan, e yu hòmbernan di Dios a mira ku e yu muhénan di hende tabata bunita; i nan a tuma esposanan pa nan mes, esun ku nan tabata kier a skohe.” E “yu hòmbernan di Dios” aki tabata angelnan di shelu ku a tuma kurpa humano i a biba meimei di hende. No ta Dios a manda nan riba tera; ni nan no a bin pa benefisiá e rasa humano. Mas bien, nan “a bandoná nan propio lugá di biba” den shelu pa tene relashon seksual ku e hende muhénan bunita riba tera. Nan a bira demoño.​—Hudas 6.

E demoñonan rebelde, pèrvèrso i superior den poder i inteligensia tabata ehersé un influensia masha malu mes riba hende. Probablemente nan a kontrolá i dominá e sosiedat humano. Nan no tabata traha sekretamente manera un outor intelektual ku ta plania su fechorianan pero ku ta skonde su identidat i ta hasi su maldatnan. Mas bien, nan a rebeldiá abiertamente kontra e areglo di Dios sin ningun klase di bèrgwensa.

E yunan angelikal di Dios aki a tene relashon ku hende muhé, e muhénan aki a haña yu ku tabatin forsa ekstraordinario. A identifiká nan ku e término hebreo nefi·lím ku den Beibel Santu ta tradusí komo “gigante.” Beibel ta bisa nos: “Tabatin gigante riba tera den e dianan ei, i tambe despues, tempu ku e yu hòmbernan di Dios a uni ku e yu muhénan di hende, i esakinan a haña yu pa nan. Eseinan tabata hòmbernan poderoso i balente di tempunan aya, hòmbernan di fama.” (Génesis 6:4) Hende tabatin masha miedu di e hòmbernan gigante aki. E palabra hebreo nefi·lím ta nifiká tumbadónan, esta, esnan ku tabata pone otro hende kai. Nan tabata asesinonan i nan aktonan di violensia probablemente ta ser reflehá den mito i leyenda di antigwedat.

E Tristesa di Hende Hustu

Beibel ta deskribí ku e korupshon di e generashon ei tabatin rais profundo i e tabata plamá tur kaminda. E ta bisa: “Maldat di hende tabata grandi riba tera, i ku tur intenshon di e pensamentunan di su kurason tabata kontinuamente maldat so. . . . Tera tabata yen di violensia. . . . Tur karni a korumpí nan kaminda riba tera.”​—Génesis 6:​5, 11, 12.

Ta den e mundu ei Noe a biba. Na kontraste ku e hendenan rònt di dje, “Noe tabata un hòmber hustu” ku “tabata kana ku Dios.” (Génesis 6:9) No tabata fásil pa un hòmber hustu biba den un sosiedat di hende inhustu. Noe lo mester tabata sintié hopi tristu pa loke hende tabata bisa i hasi! Probablemente el a sintié manera Lòt, un hòmber hustu ku a biba despues di Diluvio. Lòt, ku a biba entre e habitantenan inmoral di Sodoma, tabata afligí “pa motibu di e kondukta sensual di hòmbernan malbado,” i “e hòmber hustu ei, bibando meimei di nan, a sinti su alma hustu tormentá dia aden dia afó ku nan echonan malbado.” (2 Pedro 2:​7, 8) Asina Noe tambe lo a sintié.

Abo ta sinti bo afligí pa e kosnan spantoso ku bo ta tende den notisia òf pa e mal kondukta di hende rònt di bo? Si ta asina, bo por komprondé loke Noe a sinti. Djis imaginá kon difísil lo mester tabata p’e perseverá den un mundu inhustu pa 600 aña, pasobra ta dje bieu e tabata ora e Diluvio a bin. Kuantu lo el a anhelá pa haña alivio!​—Génesis 7:6.

Noe Tabatin e Kurashi pa Ta Diferente

Noe “tabata . . . perfekto den su generashonnan.” (Génesis 6:9) Tuma nota ku Beibel ta bisa ku e tabata perfekto den su generashon, no for di nan punto di bista. Ku otro palabra, e tabata perfekto òf sin kulpa den Dios su bista, pero pa e hendenan promé ku e Diluvio, Noe tabata straño. Nos por tin sigur ku e no tabata di akuerdo ku opinion públiko, ni e no tabata partisipá den entretenimentu ni den aktividatnan sosial malu di e tempu ei. Imaginá kiko hende tabata pensa di dje ora el a kuminsá traha e arka! Kasi sigur nan a harié, i a hasi bofon di dje. Nan no a tum’é na serio.

Ademas, Noe tabatin kreensianan religioso profundo, i e no a keda ku nan pa su so. Beibel ta bisa ku e tabata “un predikadó di hustisia.” (2 Pedro 2:5) Sin duda, Noe a spera oposishon. Su bisawelo Enok tabata un hòmber hustu ku a predisí ku Dios lo a bai ehekutá huisio kontra e malbadonan. Evidentemente, Enok a haña persekushon p’e motibu ei, apesar ku Dios no a permití su opositornan mat’é. (Génesis 5:​18, 21-24; Hebreonan 11:5; 12:1; Hudas 14, 15) Noe mester tabatin kurashi i fe den Yehova su abilidat pa proteh’é debí na e echo ku Satanas, e demoñonan, e nèfilim i mayoria di hende tabata sea indiferente òf kontra dje.

Sirbidónan di Dios semper a haña oposishon for di esnan ku no ta sirbié. Asta Hesukristu nan a odia, i meskos a sosodé ku esnan ku tabata siguié. (Mateo 10:22; Juan 15:18) Noe tabatin e kurashi pa sirbi Dios, maske esei no tabata algu popular. El a komprondé ku ta hopi mas importante pa ta bon mirá den bista di Dios ku haña aprobashon di hende ku tabata oponé Dios. I Noe tabata bon mirá den bista di Dios.

Noe A Hasi Kaso

Manera nos a mira, Noe a prediká ku kurashi na otro hende. Kon nan a reakshoná na e mensahe ku el a duna? Beibel ta bisa ku promé ku e Diluvio hende tabata “kome i bebe, nan tabata kasa i duna pa kasa, te dia ku Noe a bai den e arka, i nan no a komprondé [“nan no a hasi kaso,” NW] te ora ku e diluvio a bin i a bai ku nan tur.” Nan no a tuma e spièrtamentu na serio.​—Mateo 24:​38, 39.

Hesus a bisa ku meskos lo sosodé den nos dia. Pa mas ku shen aña, Testigunan di Yehova a duna spièrtamentu ku Yehova lo dal pasonan drástiko pa kumpli ku su promesa di establesé un mundu nobo di hustisia. Maske miónes di hende a reakshoná positivo, tòg míles di miónes di habitante di mundu no ta hasi kaso. “Di nan mes boluntat,” nan ta ignorá e realidat i e nifikashon di e Diluvio.​—2 Pedro 3:​5, 13.

Pero Noe sí a hasi kaso. El a kere loke Yehova Dios a bis’é. Su obedensia a hiba na su salbashon. Apòstel Pablo a skirbi: “Pa medio di fe Noe, siendo spièrtá pa Dios tokante di kosnan ku no a wòrdu mirá ainda, ku temor di Dios a prepará un arka pa salbashon di e hendenan di su kas.”​—Hebreonan 11:7.

Un Ehèmpel pa Imitá

E arka ku Noe a traha tabata gigantesko. E tabata mas largu ku un vèlt di futbòl i mes haltu ku un edifisio di tres piso. E tabata 30 meter mas largu ku e barku di bela ku yama Wyoming, ku te asina leu ta e barku di palu mas grandi ku a yega di eksistí. Naturalmente, e arka no tabata un barku; ta drif so e tabatin ku drif. No opstante, tabata nesesario pa usa téknika di konstrukshon avansá. I mester a kubrié ku breu paden i pafó. Probablemente a dura mas ku 50 aña pa trah’é.​—Génesis 6:​14-16.

Tabatin mas kos enbolbí. Noe mester a stòk kuminda pa un aña pa su famia i e bestianan den e arka. Promé ku e Diluvio a bin, e mester a perkurá pa e bestianan ta den e arka. “Noe a hasi konforme tur loke SEÑOR a orden’é.” Ki un alivio lo el a sinti ora tur kos tabata kla i Yehova a sera e porta di e arka!​—Génesis 6:​19-21; 7:​5, 16.

E Diluvio a bin. Awa a kai 40 dia i 40 anochi. Nan tur tabatin ku keda den e arka pa henter un aña te ora e awa a baha. (Génesis 7:​11, 12; 8:​13-16) Tur hende malbado a wòrdu destruí. Ta Noe i su famia so a sobrebibí i drenta den un tera limpi.

Beibel ta bisa ku e Diluvio mundial di e dianan di Noe ta representá “un ehèmpel pa . . . despues.” Den ki sentido? Nos ta lesa: “E shelunan i e tera aktual pa medio di su palabra ta wòrdu reservá pa kandela, wardá pa e dia di huisio i destrukshon di hendenan impio.” Sin embargo, meskos ku den e dianan di Noe, lo tin sobrebibiente. Nos por tin sigur ku Yehova “sa tambe kon pa reskatá e santunan for di [“prueba,” NW].”​—2 Pedro 2:​5, 6, 9; 3:7.

Noe tabata un hòmber santu òf di deboshon na Dios, un hòmber hustu entre un generashon malbado. El a obedesé Dios al pie de la letra. E tabatin kurashi pa hasi loke ta korekto maske ku e tabata sa ku hende ku no kier a sirbi Dios lo a menospresi’é i odi’é. Si nos imitá Noe den e maneranan aki, nos tambe lo ta bon mirá den bista di Dios i lo tin e perspektiva di haña salbashon pa biba den e mundu nobo ku ta na kaminda.​—Salmo 37:​9, 10.

[Nota]

[Komentario na página 5]

E aktonan di violensia di e gigantenan probablemente ta ser reflehá den mito i leyenda di antigwedat

[Plachi na página 7

Si nos imitá e fe di Noe, nos por ta bon mirá den bista di Dios

[Rekonosementu pa Potrèt na página 5]

Alinari/Art Resource, NY