Kiko Por Yuda Bo Komprondé Beibel?
1. Pidi e Outor Yudansa
“Un tempu mi tabata lesa Beibel tur anochi promé ku mi bai drumi,” Ninfa, un señora ku ta biba na Italia, a konta. “Mi tabata hasi esei pasobra mi tabata sa ku e ta e Palabra di Dios, i maske mi no tabata gusta lesa, mi tabata ke sa kiko Dios a skirbi den Beibel. Mi tabatin intenshon di les’é kompletu. Na kuminsamentu mi a hañ’é fásil, pero despues ku mi a yega na algun parti ku mi a haña difísil, mi a stòp di les’é.”
ABO tambe a pasa den mesun kos ku Ninfa? Esei ta pasa ku hopi hende. Sinembargo, manera nos a mira den e artíkulo anterior, e Outor di Beibel, Yehova Dios, ke pa bo komprondé su Palabra. Pero kon bo por haña e komprondementu ei? E promé paso ta pa pidi e Outor yudansa.
Den bista di hende, e apòstelnan di Hesus no tabata hòmbernan “eduká ni siñá” pasobra nan no a bai skolnan rabíniko pa haña entrenamentu religioso. (Echonan 4:13) Ma Hesus sí a sigurá nan ku nan lo por a komprondé e Palabra di Dios. Di ki manera? Hesus a splika nan: “E konsolador [òf, “ayudante,” NW], spiritu santu, kende e Tata lo manda den mi nòmber, e lo siña boso tur kos.” (Juan 14:26) Dios a usa e spiritu santu akí—òf forsa aktivo—pa krea tera i tur loke ta biba riba dje. (Génesis 1:2) El a us’é tambe pa inspirá mas o ménos 40 eskritor pa skirbi su pensamentunan den Beibel. (2 Pedro 1:20, 21) E mesun spiritu ei ta disponibel awe pa yuda hende ku ke komprondé Beibel.
Kon bo por haña Dios su spiritu santu? Bo tin ku pidi ku fe pa bo hañ’é. I kisas bo tin ku pidi ku insistensia. Hesus a bisa: “Pidi, i lo wòrdu duná na boso.” “Si boso . . . sa di duna kosnan bon na boso yunan, kuantu mas boso Tata selestial lo duna e spiritu santu na esnan ku pidié!” (Lukas 11:9, 13) Yehova ta dispuesto pa duna spiritu santu na ken ku pidié ku un kurason sinsero. E forsa aktivo ei por yuda bo kapta e nifikashon di e palabranan inspirá ku míles di aña pasá a keda skirbí den Beibel. Es mas, e spiritu di Dios por duna bo e sabiduria ku bo mester pa apliká e mensahe poderoso di Beibel den bo bida.—Hebreonan 4:12; Santiago 1:5, 6.
Pues anto, kada biaha ku bo kai sinta pa lesa Beibel, pidi Dios den orashon p’e duna bo spiritu santu pa yuda bo komprondé su Palabra.