Loke Hesus A Siña Hende Tokante Su Persona

“Hesus nunka a duda ken e tabata, di unda el a bini, dikon el a bini na mundu ni kiko su futuro a enserá.”​—OUTOR HERBERT LOCKYER.

PROMÉ ku nos por aseptá i pone fe den loke Hesus a siña hende, nos mester sa algu tokante su persona. Ken Hesus tabata realmente? Di unda el a bini? Kiko tabata e propósito di su bida riba tera? Na moda di papia, nos por haña e kontestanan for di Hesus su mes boka ora nos lesa e Evangelionan, esta, Mateo, Marko, Lukas i Juan.

El a eksistí promé ku el a bini na tera Na un okashon, Hesus a papia di e gloria ku e tabatin “promé ku mundu tabata” eksistí. (Juan 17:5) Mundu tabata eksistí promé ku Adam, i Adam a biba mas o ménos 4000 aña promé ku Hesus a bini na tera. Sinembargo, Hesus a eksistí promé ku Dios a krea tera. Pero, unda Hesus tabata biba? Hesus a splika: “Mi a baha for di shelu.”​—Juan 6:38.

E Yu di Dios Yehova tin hopi yu angelikal. Sinembargo, Hesus ta úniko. El a referí na su mes komo “e Yu unigénito di Dios.” (Juan 3:18) Esei ta nifiká ku e ta e úniko persona ku Dios a krea direktamente. Ta pa medio di e Yu unigénito ei, Dios a krea tur otro kos.​—Kolosensenan 1:16.

“E Yu di hende” Hesus a usa e ekspreshon akí mas ku kualke otro ekspreshon pa referí na su mes. (Mateo 8:20) Di e manera ei, el a mustra ku e no tabata un angel ku a tuma kurpa humano ni Dios den kurpa di hende. Mas bien, Hesus tabata un hende den tur sentido. Mediante spiritu santu, Dios a transferí e bida di su Yu for di shelu pa e matris di e bírgen Maria. P’esei, Hesus a nase komo un hende perfekto i sin piká.​—Mateo 1:18; Lukas 1:35; Juan 8:46.

E Mesias primintí Un hende muhé samaritano a bisa Hesus: “Mi sa ku e Mesias ta bin.” I Hesus a bis’é: ‘Ami, ku ta papia ku bo, t’e.’ (Juan 4:​25, 26) Tantu e palabra “Mesias” komo e palabra “Kristu” ta nifiká “Ungí.” Dios a ungi, òf nombra, Hesus pa desempeñá un papel spesial den kumplimentu di Su promesanan.

Su asignashon prinsipal Hesus a yega di bisa: ‘Mi mester prediká e reino di Dios, pasobra ta pa e propósito akí mi a wòrdu mandá.’ (Lukas 4:43) Ounke el a hasi hopi bon obra pa hende den nesesidat, e predikashon tokante e Reino di Dios tabata su trabou prinsipal. Mas despues, nos lo konsiderá loke el a siña hende tokante e Reino ei.

Ta opvio ku Hesus no tabata kualke hòmber.a Manera nos lo mira, e echo ku el a bida den shelu promé ku el a bini na tera a duna su palabranan mas peso. P’esei, no ta nada straño ku el a prediká un mensahe ku lo a influensiá bida di miónes di hende rònt mundu.

[Nota]