Hasi Bon Uso di Bo Don Komo Soltero

“Esun ku por aseptá esaki, lag’é asept’é.”​—MAT. 19:12.

1, 2. (a) Kiko Hesus, Pablo i otro kristiannan a bisa di hende soltero? (b) Pakiko algun ruman kisas no ta mira esei komo un don?

SIN duda, matrimonio ta un di e regalonan di mas presioso ku Dios a duna hende. (Pro. 19:14) Ma hopi kristian soltero tambe ta hiba un bida produktivo ku ta duna satisfakshon. Por ehèmpel, Harold, un ruman di 95 aña, kende no a kasa nunka, a bisa: “Aunke mi ta gusta di ta den kompania di otro hende i ta risibí nan na mi kas, nunka mi ta sinti mi so ora mi ta mi so. Mi ta kere ku esei ta pasobra, pa ami, ser soltero ta un don.”

² En bèrdat, tantu Hesukristu komo apòstel Pablo a bisa ku ser soltero ta un don di Dios. Sí, meskos ku matrimonio, e ta manera un regalo. (Lesa Mateo 19:​11 i 12; 1 Korintionan 7:7.) Nos mester rekonosé sí ku no ta tur hende ku no a kasa ta soltero pasobra nan no ke kasa. Tin hopi ku debí na sirkunstansia no por haña un partner adekuá. Òf otronan, despues ku nan tabatin hopi aña kasá, a haña nan diripiente nan so pa motibu di divorsio òf morto di nan kasá. Den ki sentido anto ser soltero por ta un don? I kon kristiannan soltero por hasi bon uso di e don ei?

Un Don Úniko

3. Ki bentaha kristiannan soltero tin?

³ Hopi biaha, un ruman soltero tin mas tempu i libertat ku un ruman kasá, lokual por ta masha bentahoso p’e. (1 Kor. 7:​32-35) Por ehèmpel, e por oumentá su sirbishi, mustra mas amor pa otro hende i hala mas serka Yehova. P’esei, hopi ruman kristian ku a mira kuantu benefisio un hende soltero por tin a disidí di “aseptá esaki,” esta, keda sin kasa, por lo ménos pa un tempu. Otronan kisas, na promé instante, no tabatin intenshon di keda soltero. Pero ora nan sirkunstansianan a kambia, nan a bai analisá nan situashon huntu ku orashon i a yega na e konklushon ku nan tambe por keda sin kasa. Nan a konformá nan mes ku nan situashon nobo, i ku yudansa di Yehova nan a opta pa keda soltero.​—1 Kor. 7:​37, 38, BPK.

4. Kiko ta duna kristiannan soltero motibu pa sinti ku nan sirbishi na Dios ta kompletu?

⁴ Kristiannan soltero sa ku nan no tin nodi di ta kasá pa Yehova òf su organisashon apresiá nan. Yehova stima kada un di nos, i no tin ningun persona ni nada ku por separá nos for di e amor ku e tin pa nos. (Mat. 10:​29-31; Rom. 8:​38, 39) P’esei, sea ku nos ta kasá òf soltero, nos tin tur motibu pa sinti ku nos sirbishi na Yehova ta kompletu.

5. Kiko un persona mester hasi pa e por saka e mayor probecho for di su don komo soltero?

⁵ Pero pa un kristian por saka e máksimo probecho for di su don komo soltero, e tin ku desaroyá e don ei, meskos ku un hende ku tin talento pa muzik òf deporte tin ku hasi ku su talento. Pues, kon kristiannan soltero awe—sea hòmber òf muhé, hóben òf di edat, soltero pa eskoho òf debí na sirkunstansia—por saka e mayor probecho for di nan situashon den bida? Laga nos konsiderá algun ehèmpel alentador di e kristiannan di promé siglo i mira kiko nos por siña for di nan.

Hóben i Soltero

6, 7. (a) Ki privilegio di sirbishi e yu muhénan di Felipe a risibí? (b) Kon Timoteo a hasi bon uso di e añanan ku e tabata soltero, i kon Yehova a bindishon’é pa su disposishon di sirbi na un edat yòn?

⁶ Tuma por ehèmpel e kuater yu muhénan bírgen di Felipe, e predikadó. Nan a prediká e bon notisia ku e mesun fervor ku nan tata. (Echo. 21:​8, 9) E hóbennan akí a usa e don di profetisá ku nan a risibí milagrosamente di spiritu santu, kumpliendo asina ku loke Joel 2:​28 i 29 a trese dilanti.

⁷ Timoteo tabata otro ehèmpel di un hóben ku a hasi bon uso di su don komo soltero. For di chikitu, su mama Eunise i su wela Loida a siñ’é “e skrituranan santu.” (2 Tim. 1:5; 3:​14, 15) Pero probablemente ta te despues ku Pablo a bishitá Listra, kaminda nan tabata biba, rònt di aña 47 di nos era, nan a bira kristian. Dos aña despues, ora Pablo a bini pa di dos biaha, Timoteo lo por tabatin mas o ménos 20 aña. Apesar ku Timoteo tabata relativamente yòn i resien den e bèrdat, e ansianonan di Listra i e stat bisiña Ikonio “tabata duna bon testimonio di dje.” (Echo. 16:​1, 2) P’esei Pablo a invit’é pa e kompañ’é den su biahenan. (1 Tim. 1:18; 4:14) Aunke nos no por bisa sigur ku Timoteo nunka no a kasa, loke sí nos sa ta ku komo yònkuman el a aseptá Pablo su invitashon gustosamente, i pa hopi aña despues di esei, el a sirbi komo un misionero i superintendente soltero.​—Fil. 2:​20-22.

8. Kiko a stimulá Juan Marko pa alkansá metanan di sirbishi, i ki bindishon el a risibí?

⁸ Juan Marko tambe a probechá bon di su añanan komo soltero tempu ku e tabata yòn. E, huntu ku su mama, Maria, i su primu, Barnabas, tabata entre e promé miembronan di e kongregashon di Yerusalèm. Tal bes Marko su famia tabata bon pará tambe, ya ku nan tabatin nan mes kas den e stat i un kriá. (Echo. 12:​12, 13) Ma apesar di e komodidatnan akí, ni tempu e tabata yòn, e no a kore tras di plaser ni e no tabata egoista; tampoko e no tabata lihé pa kasa i limitá su mes na un bida di famia konfortabel. E echo ku e tabata den kompania di e apòstelnan for di un edat yòn probablemente a lanta den dje un deseo pa e sirbishi di misionero. Pues, ku entusiasmo el a djòin Pablo i Barnabas riba nan promé biahe komo misionero i tabata un gran yudansa pa nan. (Echo. 13:5) Mas despues, el a biaha ku Barnabas, i finalmente el a sirbi huntu ku Pedro na Babilonia. (Echo. 15:39; 1 Ped. 5:13) Nos no sa kuantu tempu Marko a keda soltero, pero el a gana un tremendo reputashon komo un persona ku tabata dispuesto pa sirbi otro hende i amplia su sirbishi na Dios.

9, 10. Ki oportunidat hóbennan kristian ku ta soltero tin pa oumentá nan sirbishi? Duna un ehèmpel.

⁹ Awe tambe, hopi di nos hóbennan ta kontentu di por usa nan añanan komo soltero pa hasi mas den sirbishi di Dios. Meskos ku Marko i Timoteo, nan ta komprondé ku komo soltero nan por ‘dediká nan mes kompletamente na Señor.’ (1 Kor. 7:35) Hopi oportunidat di sirbishi ta habri pa nan. Nan por probechá traha komo pionero, sirbi kaminda tin mester di mas predikadó di Reino, siña otro idioma, yuda den konstrukshon di Salòn di Reino i di sukursal, asistí na e Skol di Entrenamentu Ministerial i sirbi na Bètel. Si ainda bo ta yòn i soltero, bo ta saka e máksimo probecho di e oportunidatnan ku bo tin bo dilanti?

¹⁰ Un ruman ku yama Mark a kuminsá traha pionero promé ku el a kumpli 20 aña. Despues el a asistí na e Skol di Entrenamentu Ministerial i a sirbi na vários parti di mundu. Mirando bèk riba 25 aña di sirbishi di tempu kompletu, el a bisa: “Semper mi a purba traha ku tur ruman di kongregashon: mi a bai sirbishi ku nan, pastoriá nan, invitá nan bin kome na mi kas i asta organisá reunionnan sosial ku un enfoke spiritual. Tur ta kosnan ku a duna mi masha goso.” Manera Mark su komentarionan ta indiká, e mayor satisfakshon den bida ta bini di duna, i un bida produktivo den sirbishi sagrado ta brinda hopi oportunidat pa duna. (Echo. 20:35) Hóbennan, sin importá kiko boso interesnan personal, abilidatnan òf eksperensia den bida por ta, awe tin hopi kos ku boso por hasi den e trabou di Señor.​—1 Kor. 15:58.

11. Ki bon motibu hóbennan tin pa no kore kasa?

¹¹ Aunke mayoria di hóben lo ke kasa un dia, tin bon motibu pa nan no kore hasi esei. Pablo a animá hóbennan pa warda te ora nan pasa ‘e flor di nan hubentut,’ ora deseonan seksual ta mas fuerte. (1 Kor. 7:36) Bo mester di tempu pa konosé bo mes mihó i pa haña e eksperensia den bida ku por yuda bo skohe un partner adekuá. Kasamentu ta un asuntu serio. Unabes bo bisa ‘sí,’ bo tin ku pega na bo promesa pa e restu di bo bida.​—Ekl. 5:​2-5.

Soltero i di Edat

12. (a) Kon e biuda Ana a probechá di su situashon nobo den bida? (b) Ki privilegio el a haña?

¹² Ana, ku e Evangelio di Lukas ta papia di dje, probablemente a keda hopi kibrá ora su esposo a muri inesperadamente despues ku nan tabatin apénas shete aña kasá. Nos no sa si nan tabatin yu ni ku Ana a pensa di bolbe kasa un dia. Pero Beibel ta informá nos ku tempu Ana tabatin 84 aña, ainda e tabata biuda, i for di loke e Skritura ta bisa, nos por konkluí ku Ana a usa su situashon nobo den bida pa e hala mas serka Yehova. ‘Nunka e tabata falta den e tèmpel, i e tabata rindi sirbishi sagrado di dia i anochi ku yunamentu i súplika.’ (Luk. 2:​36, 37, NW ) Pues, el a pone kosnan spiritual na promé lugá den su bida. Aunke esei a eksigí basta esfuerso i determinashon di su parti, su rekompensa tabata grandi, ya ku el a haña e privilegio di mira e bebi Hesus i konta otro hende tokante e liberashon ku lo a tuma lugá pronto pa medio di e benidero Mesias akí.​—Luk. 2:38.

13. (a) Kiko ta indiká ku Dorkas tabata hopi aktivo den e kongregashon? (b) Ki rekompensa el a risibí pa su bondat i obranan di karidat?

¹³ Un otro ehèmpel ta esun di Dorkas, òf Tabita. E tabata biba na Jope, un stat portuario di antigwedat, nortwèst di Yerusalèm. Ya ku Beibel no ta konekt’é ku un esposo, probablemente e no tabata kasá e tempu ei. Dorkas tabata “abundá den echonan di karidat i bon obra.” Aparentemente e tabata kose hopi paña pa e biudanan i otro kristiannan den nesesidat, i esei a hasié un ruman masha kerí. Pues, ora el a bira malu i muri diripiente, tur ruman di e kongregashon a manda yama Pedro i rog’é pa e bin resusitá nan ruman muhé stimá. Notisia di su resurekshon a plama rònt Jope, i hopi hende a bira kreyente. (Echo. 9:​36-42) Komo un ruman sumamente bondadoso, kisas Dorkas mes lo a yuda algun di e hendenan ei ku su obranan di karidat.

14. Kiko ta motivá kristiannan soltero pa hala mas serka Yehova?

¹⁴ Meskos ku Ana i Dorkas, awe tambe hopi di nos rumannan di edat ta soltero. Algun kisas no a haña un partner adekuá pa kasa kuné. Otronan a divorsiá i tin ku a bira biuda. Komo ku kristiannan soltero no tin un kasá pa papia nan kosnan personal kuné, hopi biaha nan ta siña dependé mas riba Yehova. (Pro. 16:3) Silvia, un ruman muhé soltero ku a sirbi na Bètel pa mas ku 38 aña, ta mira esaki komo un bindishon. El a bisa: “Tin biaha mi ta kansa di ta esun ku tin ku animá otro hende, i mi ta puntra mi mes: ‘Ki dia un hende ta animá ami?’ ” Ma el a bisa mesora su tras: “E konfiansa ku mi tin ku Yehova sa mihó ku mi kiko mi tin mester ta yuda mi hala mas serka dje. I semper e animashon ta bini, anto tin biaha for di un skina ku mi no a ferwagt mes.” Pues, ora nos ta hala mas serka Yehova, semper e ta reakshoná ku gran ternura i komprenshon.

15. Kon kristiannan soltero por ‘habri nan kurason’ pa mustra amor na mas hende?

¹⁵ Un kristian soltero tin un oportunidat úniko pa ‘habri su kurason’ pa mustra amor na mas hende. (Lesa 2 Korintionan 6:​11-13.) Jolene, un ruman muhé soltero ku a dediká e último 34 añanan na sirbishi di tempu kompletu, a bisa: “Mi no a spar ningun esfuerso pa krea lasonan di amistat, no ku hende di mi edat so, sino tambe ku tur tipo di hende. Komo soltero, bo tin un ekselente oportunidat pa duna di bo mes na Yehova, na bo famia i na bo rumannan den fe i tambe na bo próhimo. Mas grandi mi bira, mas felis mi ta sinti mi ku mi ta un soltero.” E rumannan di edat, esnan enfermo, mayornan soltero, hóbennan i otro miembronan di kongregashon sigur ta apresiá e yudansa bondadoso ku rumannan soltero ta duna nan. Sí, ora nos ta mustra amor na otro hende, nos ta sinti nos mes mihó. Abo tambe por ‘habri bo kurason’ i mustra amor na mas hende?

E Desishon pa Keda Soltero

16. (a) Dikon Hesus a keda soltero henter su bida? (b) Kon Pablo a hasi bon uso di e echo ku e tabata soltero?

¹⁶ Hesus mes no a kasa; el a bini pa kumpli ku un mishon i e tabatin ku prepará pa esei. El a bishitá hopi pueblo i stat, a traha for di mainta trempan te anochi lat i finalmente a duna su bida komo un sakrifisio. E por a hasi tur e kosnan ei prinsipalmente pasobra e tabata soltero. Apòstel Pablo tambe a rekoré míles di kilometer i a hañ’é ku hopi kontratempu den su sirbishi. (2 Kor. 11:​23-27) Aunke e por tabata kasá anteriormente, el a opta pa keda soltero despues ku Dios a skoh’é komo apòstel. (1 Kor. 7:​7, 8; 9:5) Tantu Hesus komo Pablo a animá otro hende pa, si ta posibel, imitá nan ehèmpel i keda soltero, i asina nan por hasi mas den sirbishi na Dios. Sinembargo, ningun di nan no a establesé selibato komo un rekisito pa sirbidó di Dios.​—1 Tim. 4:​1-3.

17. Kon algun ruman awe a sigui e ehèmpel di Hesus i Pablo, i pakiko nos por ta sigur ku Yehova ta apresiá esnan ku ta hasi e tipo di sakrifisionan ei?

¹⁷ Awe tambe, algun ruman a opta pa keda soltero a fin di por logra mas den nan sirbishi na Dios. Harold, ku nos a menshoná anteriormente, a traha mas ku 56 aña na Bètel. El a bisa: “Tempu mi tabatin dies aña ta sirbi na Bètel, mi a mira hopi pareha kasá bandoná Bètel pa motibu di enfermedat òf pa bai kuida un mayor di edat. Pa e tempu ei, mi mayornan a muri kaba. Pero mi tabata stima Bètel asina tantu ku mi no kier a kasa i kore rísiko di pèrdè e privilegio ei.” Meskos tambe, hopi aña pasá, Margaret, un pionero ku a sirbi pa hopi tempu, a remarká: “Mi a yega di haña chèns di kasa, pero nunka mi a interesá. E echo ku mi a keda soltero a permití mi usa e èkstra libertat ei pa keda aktivo den sirbishi, i esei a hasi mi masha felis.” Bo por ta sigur ku hamas Yehova lo lubidá esnan ku ta hasi e tipo di sakrifisionan ei na fabor di adorashon berdadero.​—Lesa Isaias 56:​4 i 5.

Saka lo Máksimo di Bo Sirkunstansianan

18. Kon otro ruman por animá i apoyá kristiannan soltero?

¹⁸ Tur kristian soltero ku ta hasi nan bèst pa sirbi Yehova ta digno di nos elogio i estímulo. Nos ta stima nan pa e hende ku nan ta i pa e aporte signifikativo ku nan ta duna na e kongregashon. Si di bèrdat nos bira nan ‘ruman hòmber, ruman muhé, mama òf yu’ spiritual, hamas nan lo haña e sintimentu ku nan ta so.​—Lesa Marko 10:​28-30.

19. Kiko boso por hasi pa saka e máksimo probecho for di e echo ku boso ta soltero?

¹⁹ Sea ku boso ta soltero pa motibu di sirkunstansia òf a opta pa keda soltero, laga e ehèmpelnan bíbliko akí i esnan di e tempu aktual sirbi komo un siguransa pa boso ku boso por hiba un bida felis i produktivo. Algun ruman ta plania pa keda soltero, miéntras ku otronan ta haña nan den e situashon ei. Tin ta mira mesora e benefisio ku esei ta trese kuné, siendo ku otronan ta realisá esei den transkurso di tempu. Pues, hopi ta dependé di nos aktitut. Kiko boso por hasi pa saka e máksimo probecho for di e echo ku boso ta soltero? Hala mas serka Yehova, sea aktivo den su sirbishi i habri boso kurason pa mustra amor na mas hende. Meskos ku ta konta pa hende kasá, ser soltero por trese hopi benefisio kuné, basta nos mir’é for di e punto di bista di Dios i hasi bon uso di e don akí.

Bo Ta Kòrda?

• Den ki sentido ser soltero ta un don?

• Ki bindishon un hóben soltero por risibí?

• Ki oportunidat kristiannan soltero tin pa hala mas serka Yehova i pa habri nan kurason i mustra amor na mas hende?