Konfia den Yehova Segun ku e Fin Ta Aserkando

‘Konfia den Yehova pa semper.’​—ISA. 26:4.

1. Ki kontraste tin entre sirbidónan di Dios i hende en general?

NOS ta biba den un mundu kaminda miónes di hende no sa mas den ken ni den kiko nan tin ku konfia. Kisas esei ta pa motibu ku hopi biaha nan a ser desepshoná òf di hùrt. Pero sirbidónan di Yehova ta kompletamente diferente. Debí ku nan ta laga sabiduria di Dios guia nan, nan sa bon-bon ku nan no mester pone nan konfiansa den e mundu akí ni den su “prensnan.” (Sal. 146:3) Mas bien, nan ta konfia den Yehova. Nan ta pone nan bida i nan futuro den su man, pasobra nan sa ku e ta stima nan i ku semper e ta kumpli ku su Palabra.​—Rom. 3:4; 8:​38, 39.

2. Kon Josué a konfirmá ku Dios ta digno di konfiansa?

² Josué di antigwedat a konfirmá ku Dios ta digno di konfiansa. Na fin di su bida el a bisa su kompañeronan israelita: “Boso sa di henter boso kurason i di henter boso alma ku ni un palabra di tur e bon palabranan ku SEÑOR boso Dios a papia tokante di boso no a faya; tur a keda kumplí pa boso.”​—Jos. 23:14.

3. Kiko e nifikashon di Dios su nòmber ta revelá tokante dje?

³ Yehova ta kumpli ku su promesanan no solamente pa motibu ku e ta stima su sirbidónan pero spesialmente pa kousa di su nòmber. Yehova su nòmber ta nifiká: “Lo mi resultá di ta loke lo mi resultá di ta.” (Eks. 3:14, NW; 1 Sam. 12:22) The Emphasized Bible di J. B. Rotherham ta splika den su introdukshon ku Dios su nòmber ta nifiká ku e por bira loke sea ta nesesario pa kumpli ku su promesanan. Ora nos tende Dios su nòmber, nos ta kòrda ku semper e ta hasi loke e bisa. Dios por hasi loke e tin ku hasi ki ora ku e ke i unda ku e ke. Nada no ta difísil p’e. Semper lo e aktua na armonia ku e nifikashon di su nòmber.

4. (a) Kiko Isaias 26:4 ta animá nos pa hasi? (b) Kiko nos lo konsiderá den e artíkulo akí?

⁴ Ta bon pa puntra bo mes: ‘Mi konosé Yehova asina bon ku mi por konfia plenamente den dje? E echo ku mi sa ku Dios tin pleno kontròl riba asuntunan ta yuda mi mira futuro ku konfiansa?’ Isaias 26:4 ta bisa: ‘Konfia den Yehova pa semper, pasobra den Yehova nos tin un Baranka eterno.’ Ta sierto ku awendia Dios no ta intervení milagrosamente den bida di hende manera el a yega di hasi den tempu bíbliko. Sinembargo, komo ku Yehova ta e ‘Baranka eterno, semper’ nos por konfia den dje. Awor kon nos Dios kende ta digno di konfiansa ta yuda su adoradónan fiel awe? Laga nos konsiderá tres manera den kua e ta hasi esei: E ta fortalesé nos ora nos buska su yudansa pa resistí tentashon, e ta sostené nos ora nos haña nos ku apatia òf oposishon i e ta duna nos fortalesa ora nos tin ku trata ku ansiedat. Segun ku nos ta analisá esakinan, pensa kon abo por fortalesé bo konfiansa den Yehova.

Konfia den Dios Ora Bo Haña Bo ku Tentashon pa Hasi Malu

5. Ki ora por ta mas difísil pa konfia den Dios?

⁵ Ta fásil pa konfia den Yehova ora ta trata di promesanan ku nos ta anhelá di mira nan kumplimentu, manera esun di Paradeis òf di resurekshon. Pero kisas ta mas difísil pa konfia den Dios ora nos tin ku disidí si nos ta sigui su normanan moral òf nò. En bèrdat no ta fásil pa nos ta kompletamente konvensí ku sumishon na su kaminda- i normanan ta hiba na berdadero felisidat. Rei Salomon a animá nos ku e siguiente palabranan: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.” (Pro. 3:​5, 6) Tuma nota ku e tekstonan ta menshoná nos “kamindanan” i “bereanan.” Pues no ta ora ta trata di nos speransa komo kristian so nos mester demostrá nos konfiansa den Dios; mas bien, henter nos manera di biba mester demostrá esei. Awor, kon nos por demostrá konfiansa den Dios ora nos haña nos ku tentashon?

6. Kon nos por fortalesé nos determinashon pa rechasá mal pensamentu?

⁶ Pa rechasá loke ta malu nos tin ku kuminsá na rechasá mal pensamentu. (Lesa Romanonan 8:5; Efesionan 2:3.) Awor, kon nos por fortalesé nos determinashon pa rechasá mal pensamentu? Laga nos konsiderá sinku manera ku nos por hasi esei: 1. Buska Dios su yudansa den orashon. (Mat. 6:​9, 13) 2. Meditá riba ehèmpelnan bíbliko di personanan ku a skucha Yehova i di esnan ku no a hasi esei. I tuma nota tambe kiko tabata e resultado den ámbos kaso.a (1 Kor. 10:​8-11) 3. Pensa riba e angustia mental i sufrimentu ku piká por kousa abo i bo sernan kerí. 4. Pensa kon Dios lo ta sinti ora un di su sirbidónan kometé piká serio. (Lesa Salmo 78:​40 i 41.) 5. Imaginá e goso ku Yehova ta sinti ora e mira un fiel adoradó rechasá loke ta malu i hasi loke ta bon, sea den públiko òf den privá. (Sal. 15:​1, 2; Pro. 27:11) Bo tambe por demostrá bo konfiansa den Yehova hasiendo loke ta bon.

Konfia den Dios Ora Bo Haña Bo ku Apatia i Oposishon

7. Ki prueba Jeremias a konfrontá, i kon el a sintié de bes en kuando?

⁷ Hopi di nos rumannan ta sirbi den teritorionan masha difísil. Profeta Jeremias a sirbi den un situashon similar durante e último dianan turbulento di e reino di Huda. Diariamente su fe a ser poní na prueba pasobra obedientemente e tabata prediká Yehova su mensahe di huisio. Na dado momento, asta su fiel sekretario Baruk a keha ku e tabata kansá. (Jer. 45:​2, 3) E kosnan akí a desanimá Jeremias? Wèl, de bes en kuando e tabata sintié deprimí. El a sklama: “Maldishoná sea e dia ku mi a nase! . . . Pakiko anto mi a sali for di matris pa mira tròbel i tristesa, asina ku mi dianan lo a kaba na bèrgwensa?”​—Jer. 20:​14, 15, 18.

8, 9. Na armonia ku Jeremias 17:​7 i 8 i Salmo 1:​1-3, kiko nos tin ku hasi pa por sigui duna bon fruta?

⁸ Apesar di tur e kosnan ei, Jeremias no a entregá. El a sigui konfia den Yehova. P’esei, e fiel profeta akí a eksperensiá e kumplimentu di Yehova su palabranan registrá na Jeremias 17:​7 i 8 ku ta bisa: “Bendishoná ta e hende ku ta konfia den SEÑOR, i kende su konfiansa ta den SEÑOR. Pasobra e lo ta manera un palu plantá kantu di awa, ku ta manda su raisnan bai na un korida di awa, i ku lo no tin miedu ora kalor bini; ma su blachinan lo ta bèrdè, i den e aña di sekura e no ta preokupá, ni laga di duna fruta.”

⁹ Meskos ku un palu di fruta produktivo “plantá kantu di awa” òf den un hòfi ku ta haña sufisiente awa, Jeremias nunka a keda sin “duna fruta.” E no a laga e bofonadónan malbado rònt di dje influensi’é. En bes di esei, Jeremias a pega na Yehova, e Fuente di “awa” ku ta sostené bida, i a hasi kaso di tur loke el a bis’é. (Lesa Salmo 1:​1-3; Jer. 20:9) Jeremias ta un ekselente ehèmpel pa nos, spesialmente pa esnan ku ta sirbi Dios den teritorionan difísil. Si abo ta den un situashon asina, sigui dependé kompletamente riba Yehova, kende lo yuda bo perseverá segun ku bo ta “hasi deklarashon públiko di su nòmber.”​—Heb. 13:15, NW.

10. Kiko ta algun di e kosnan ku Yehova a perkurá pa nos, i kiko nos tin ku puntra nos mes?

¹⁰ Yehova a duna nos tur loke ta nesesario pa por enfrentá difikultatnan di bida den e último dianan akí. Entre otro, el a perkurá pa nos haña su Palabra kompletu, ku ta ser tradusí na un manera eksakto den mas i mas idioma. Ademas, e ta perkurá un abundansia di kuminda spiritual oportuno pa medio di e esklabo fiel i prudente. Yehova ta perkurá tambe pa nos haña sosten i animashon for di un multitut di kompañero kristian na nos reunion- i asambleanan. Bo ta hasi bon uso di tur e provishonnan akí? Tur kristian ku ta hasi esei “lo dal gritu di goso ku un kurason kontentu.” Ma esnan ku no skucha Dios ‘lo grita yora ku un kurason pisá i lamentá ku un spiritu kibrá.’​—Isa. 65:​13, 14.

Konfia den Dios Ora di Trata ku Ansiedat

11, 12. En bista di tur e problemanan di e mundu akí, unda nos por haña berdadero refugio?

¹¹ Manera Beibel a profetisá, un avalancha di problema ta asotando humanidat. (Mat. 24:​6-8; Rev. 12:12) Ora un avalancha di awa kai i kousa inundashon, hende su reakshon normal ta pa kore bai na sitionan mas haltu; por ehèmpel, nan ta subi un seru òf dak di kas. Di mes manera, segun ku e problemanan di mundu ta oumentá, miónes di hende ta buska refugio den institushonnan finansiero, polítiko òf religioso ku ta parse masha elevá. Fuera di esei, nan ta buska refugio tambe den siensia i teknologia. Pero ningun di e kosnan akí no ta duna berdadero siguridat. (Jer. 17:​5, 6) Di otro banda, sirbidónan di Yehova sí tin un refugio sigur, esta, e “Baranka eterno.” (Isa. 26:4) Anto e salmista a bisa: “[Yehova] so ta mi baranka i mi salbashon, mi defensa.” (Lesa Salmo 62:​6-9.) Kon nos ta hasi Yehova, e Baranka eterno, nos refugio?

¹² Nos ta pega na Yehova ora nos ta hasi kaso di su Palabra, ku hopi biaha ta nèt kontrali di sabiduria humano. (Sal. 73:​23, 24) Por ehèmpel, hende ku ta sigui sabiduria humano sa bisa: ‘Ta ún bida bo tin, probechá di dje.’ ‘Sòru pa bo haña un bon trabou.’ ‘Gana hopi plaka.’ ‘Kumpra esaki, kumpra esaya.’ ‘Biaha i gosa di bida.’ Di otro banda, sabiduria di Dios ta na armonia ku e konseho akí: ‘Laga esnan ku ta hasi uso di e kosnan di mundu, ta komo si fuera nan no ta hasi uso kompletu di nan; pasobra e mundu akí den su forma aktual ta pasando.’ (1 Kor. 7:31) Hesus a duna un konseho similar; el a urgi nos pa semper pone interesnan di Reino na promé lugá den nos bida i asina montoná “tesoro den shelu” kaminda nan lo ta bon sigurá.​—Mat. 6:​19, 20.

13. Ku 1 Juan 2:​15-17 na mente, kiko nos tin ku puntra nos mes?

¹³ Bo aktitut pa ku e “mundu” i “e kosnan ku tin den mundu” ta demostrá ku bo tin pleno konfiansa den Dios? (1 Juan 2:​15-17) Kon bo ta mira bendishon di Yehova i privilegionan di sirbishi? Bo ta konsiderá nan mas balioso i mas importante ku loke mundu ta ofresé? (Fil. 3:8) Bo ta hasi esfuerso pa mantené un ‘wowo simpel’? (Mat. 6:22, NW) Ta klaru ku Dios no ke pa bo ta imprudente òf iresponsabel, spesialmente si bo tin un famia pa kria. (1 Tim. 5:8) Ma e ta ferwagt sí ku su sirbidónan ta pone tur nan konfiansa den dje i no den e mundu di Satanas akí ku ta yegando su fin.​—Heb. 13:5.

14-16. Kon algun kristian a benefisiá debí ku nan a mantené un ‘wowo simpel’ i pone interesnan di Reino na promé lugá den nan bida?

¹⁴ Laga nos konsiderá e ehèmpel di Richard i Ruth, kendenan tin tres yu chikitu. Richard a bisa: “Mi kurason tabata bisa mi ku mi por hasi mas pa Yehova. Mi tabatin un bida kómodo i a sinti ku mi tabata duna Dios, na moda di papia, djis loke mi a sobra. Despues di a hasi orashon tokante e asuntu i a kalkulá e gastunan, ami ku Ruth a yega na un akuerdo ku lo mi pidi mi supervisor pa mi traha ménos, esta, kuater dia pa siman, maske e pais tabata den un krísis ekonómiko. Mi supervisor a aseptá i denter di un luna mi a kuminsá ku mi orario nobo.” Kon Richard ta sinti awor?

¹⁵ El a bisa: “Awor mi ta gana 20 porshento ménos, pero mi tin 50 dia mas pa aña pa dediká na mi famia i eduká mi yunan. Ademas, mi oranan di sirbishi a bira dòbel, mi estudionan di Beibel a bira tres bes mas tantu i mi por hasi mas pa yuda dirigí e kongregashon. Es mas, debí ku mi tin mas tempu pa yuda Ruth ku e muchanan, e por traha komo pionero ousiliar de bes en kuando. Mi ta determiná pa sigui ku e rutina akí mas tantu tempu posibel.”

¹⁶ Roy i Petina, kendenan tin un yu muhé ku ta biba serka nan ainda, a logra redusí nan oranan di trabou pa nan por traha pionero. Roy a bisa: “Mi ta traha tres dia pa siman i Petina dos dia. Ademas, nos a sali for di un kas i bai biba den un apartamento, lokual ta mas fásil pa mantené. Nos a yega di traha pionero promé ku nos yu hòmber i nos yu muhé a nase i semper nos a keda ku e deseo di traha pionero. P’esei, ora nos yunan a bira grandi, nos a bolbe drenta e sirbishi di tempu kompletu. Ningun suma di plaka por ser kompará ku e bendishonnan ku nos ta risibí.”

Laga “e Pas di Dios” Warda Boso Kurason

17. En bista di e insiguridat ku ta reina, ki animashon e Skritura ta pa bo?

¹⁷ Nos niun no sa kiko e dia di mañan lo trese kuné, pasobra “tempu i suseso imprevisto” por alkansá nos tur. (Ekl. 9:11, NW) Sinembargo, insiguridat relashoná ku futuro, òf e dia di mañan, no tin nodi di angustiá nos ni kita nos pas mental manera ta e kaso ku hopi hende ku no tin un relashon íntimo ku Dios. (Mat. 6:34) Apòstel Pablo a skirbi: “No preokupá pa nada; ma den tur kos, pa medio di orashon i súplika ku gradisimentu, laga boso petishonnan ta konosí dilanti di Dios. I e pas di Dios, ku ta surpasá tur komprondementu, lo warda boso kurason i boso mente den Kristu Hesus.”​—Fil. 4:​6, 7.

18, 19. Den ki manera Dios ta yuda nos? Duna ehèmpel.

¹⁸ Hopi ruman ku ta pasa den situashonnan difísil ta eksperensiá e pas i trankilidat ku ta bini di Yehova. Un ruman muhé a bisa: “Konstantemente un siruhano a purba obligá mi tuma transfushon di sanger. Un di e promé kosnan ku el a bisa mi ora el a bini serka mi ta: ‘Ki ko’i kèns esaki ta ku bo no ke tuma sanger!’ Na e momento ei i na otro okashon, mi a hasi orashon den mi mes na Yehova i mi a sinti un pas i trankilidat. Mi a sinti mi fuerte manera un baranka. Aunke mi tabata débil debí ku mi preshon di sanger tabata abou, mi a logra splika klaramente e motibunan bíbliko pakiko mi no ta aseptá sanger.”

¹⁹ Tin biaha Dios ta perkurá e yudansa nesesario mediante un kompañero kristian ku ta duna nos animashon òf pa medio di kuminda spiritual na e tempu oportuno. Probablemente bo a yega di tende un ruman bisa: “E artíkulo akí ta nèt loke mi tabatin mester. Ta pa mi mes nan a skirbié!” Sí, sin importá den ki sirkunstansia nos ta òf ki nesesidat nos tin, Yehova ta demostrá su amor pa nos basta nos ta konfia den dje. Al fin i al kabo, nos ta su “karnénan” ku el a skohe pa karga su nòmber.​—Sal. 100:3; Juan 10:16; Echo. 15:​14, 17.

20. Dikon sirbidónan di Yehova lo biba den siguridat ora Satanas su mundu yega na su fin?

²⁰ Durante ‘e dia di e furia di Yehova’ ku ta aserkando rápidamente, tur kos ku hende den e mundu di Satanas ta pone konfiansa den dje lo ser destruí. Pues, ni nan oro, plata òf otro kosnan balioso lo no por protehá nan riba e dia ei. (Sof. 1:18; Pro. 11:4) Na e tempu ei, Yehova, nos “Baranka eterno,” lo ta e úniko refugio. (Isa. 26:4) P’esei anto, laga nos demostrá nos pleno konfiansa den Yehova for di awor. Kon nos por hasi esei? Nos tin ku kana obedientemente den su kamindanan hustu, proklamá su mensahe di Reino apesar di apatia òf oposishon i tira tur nos karga òf ansiedatnan riba dje. I segun ku nos ta hasi e kosnan akí, siguramente nos lo “biba trankil [“den siguridat,” NW], sin miedu di maldat.”​—Pro. 1:33.

[Nota]

Bo Por Splika?

Kon nos por demostrá ku nos ta konfia den Dios

• ora nos haña nos ku tentashon pa hasi malu?

• ora nos haña nos ku apatia òf oposishon?

• ora di trata ku ansiedat?

[Plachi na página 17]

Nos lo ta felis ora nos ta biba segun e normanan di Dios

[Plachi na página 19]

Yehova ta e “Baranka eterno”