Hasi Esfuerso pa Mantené Pas

“Laga nos buska e kosnan ku ta trese pas.”​—ROM. 14:19.

1, 2. Dikon Yehova su pueblo sí tin pas?

TA DIFÍSIL pa haña berdadero pas den e mundu djawe. Asta hende di e mesun pais i ku ta papia e mesun idioma hopi biaha no ta uní. Nan ta dividí pa motibu di religion, polítika, edukashon i klase sosial. Pero Yehova su pueblo sí ta uní aunke nan ta bini di “tur nashon i tur tribu i pueblo i lenga.”​—Rev. 7:9.

² Tin vários motibu pakiko e pueblo di Dios tin pas. E motibu prinsipal ta ku nos “tin pas ku Dios,” pasobra nos a pone fe den su Yu Hesukristu, kende a sakrifiká su bida pa nos. (Rom. 5:1; Efe. 1:7) Ademas, nos tin pas pasobra Yehova ta duna su sirbidónan leal spiritu santu, loke na su turno ta produsí pas, ku ta un aspekto di e fruta di spiritu. (Gal. 5:22) Un otro motibu pakiko nos tin pas i union ta debí ku nos “no ta [parti] di mundu.” (Juan 15:19) P’esei komo Yehova su pueblo, nos no ta partisipá den polítika ni den guera; nos a ‘bati nos spada na plug.’​—Isa. 2:4.

3. Kiko e pas ku nos tin ta motivá nos pa hasi, i kiko nos lo trata den e artíkulo akí?

³ E pas ku nos tin no ta djis pasobra nos ta evitá di hasi otro daño. Nos ta “stima otro” maske nos ta bini di diferente lugá i tin diferente kustumber i manera di pensa. (Juan 15:17) Nos pas ta motivá nos pa “hasi bon na tur hende, i spesialmente na esnan ku ta di e famia di fe.” (Gal. 6:10) E pas ku nos tin ku Yehova i ku nos rumannan ta algu masha presioso ku nos mester protehá. P’esei, laga nos ban wak awor kon nos por mantené pas den kongregashon asta ora surgi problema.

Ora Tin Problema

4. Kiko nos por hasi pa mantené pas ora nos ofendé un hende?

⁴ Disipel Santiago a skirbi: “Nos tur ta trompeká na hopi manera. Si un hende no ta trompeká den loke e ta bisa, e ta un hende perfekto.” (Sant. 3:2) P’esei tin biaha por surgi problema entre miembronan di kongregashon debí na diferensia di opinion òf mal komprondementu. (Fil. 4:​2, 3) Pero ora esei sosodé, nan mester por resolvé e problema i mantené pas den kongregashon. Por ehèmpel, wak kiko Hesus a konsehá nos pa hasi si nos a ofendé un hende.​—Lesa Mateo 5:​23 i 24.

5. Kiko nos por hasi pa mantené pas ora un hende ofendé nos?

⁵ Awor, kiko si un hende a ofendé nos? Nos mester spera pa e persona ei bin pidi nos despensa? Promé Korintionan 13:5 ta bisa: “[Amor] no ta warda renkor.” P’esei, ora un hende ofendé nos, nos ta pordoná i lubidá e malu ku e hende a hasi debí ku nos ke mantené pas. (Lesa Efesionan 4:32.) Esaki ta e mihó kos pa hasi ora ta trata di problemanan chikitu, pasobra di e manera ei nos lo keda uní ku nos rumannan i nos lo tin pas mental. Un proverbio bíbliko ta bisa ku ta bunita di nos parti “pa laga un ofensa pasa.”​—Pro. 19:11.

6. Kiko nos mester hasi si nos no por pasa por haltu di un ofensa?

⁶ Awor, kiko si nos no por pasa por haltu di e ofensa? Klaru ku no ta sabí pa papia ku otro hende tokante e asuntu ya ku redu lo por kita pas di e kongregashon. Kiko nos por hasi pa resolvé e problema? Mateo 18:15 ta bisa: “Si bo ruman peka kontra bo, bai i mustr’é su falta entre abo kuné so; si e skucha bo, bo a gana bo ruman.” Maske Mateo 18:​15-17 ta konta pa piká serio, nos por apliká e prinsipio di versíkulo 15 den otro situashonnan tambe. Pues, ora nos tin un problema ku un hende, ta mihó pa papia kuné den privá tokante e asuntu. Klaru ku nos mester papia kuné na un manera bondadoso i hasi esfuerso pa rekonsiliá kuné.a

7. Dikon nos mester resolvé problema lihé?

⁷ Apòstel Pablo a skirbi: “Rabia, ma no hasi piká; no laga solo baha riba boso rabiá, i no duna Diabel oportunidat.” (Efe. 4:​26, 27) I Hesus a bisa: “Pura drecha asuntu ku bo atversario.” (Mat. 5:25) Pues pa nos mantené pas, nos mester solushoná problema lihé. Dikon? Pasobra si nos no hasi esei, e problema lo bira mas grandi. Ta meskos ku un herida; si nos no trat’é lihé, e ta kue infekshon i bira mas grandi. Pues, nunka nos no mester laga orguyo, envidia ni amor pa plaka òf kos material stroba nos di solushoná un problema mesora.​—Sant. 4:​1-6.

Ora Mas Hende Ta Enbolbí

8, 9. (a) Ki diskushon tabatin den e kongregashon na Roma? (b) Kon Pablo a korigí nan?

⁸ Tin bes un problema den kongregashon ta enbolbé mas ku dos persona. Esei ta loke a sosodé den promé siglo na Roma. Tabatin un diskushon entre e kristiannan di orígen hudiu i esnan ku no tabata di orígen hudiu. Algun kristian ku tabatin un konsenshi débil no kier a hasi sierto kosnan aunke e Skritura no a prohibí nan di hasi e kosnan ei. I nan tabata husga esnan ku konsenshi fuerte. I esnan ku konsenshi fuerte tabata menospresiá esnan ku konsenshi débil. Pero henter e diskushon akí tabata tokante asuntunan personal, esta asuntunan di konsenshi. Ki konseho Pablo a duna e kongregashon?​—Rom. 14:​1-6.

⁹ E kristiannan ku un konsenshi fuerte tabata sa ku nan no mester a obedesé e Lei di Moisés mas. Pero esnan ku un konsenshi débil tabata pensa ku ta malu pa kome kosnan ku e Lei a prohibí. Pablo a korigí nan tur. El a bisa esnan ku tabatin un konsenshi fuerte pa no menospresiá esnan ku konsenshi débil. (Rom. 14:​2, 10) Nan aktitut lo por a trompeká esnan ku konsenshi débil. P’esei, Pablo a urgi nan: “No destruí e trabou di Dios pa motibu di kuminda. . . . Ta bon pa no kome karni ni bebe biña, òf hasi kualke kos ku ta hasi bo ruman trompeká.” (Rom. 14:​14, 15, 20, 21) Anto Pablo a bisa esnan ku tabatin un konsenshi débil pa no husga esnan ku tabatin un punto di bista diferente. (Rom. 14:13) Pablo a bisa ‘kada un di nan pa no pensa mas di su mes ku e mester pensa.’ (Rom. 12:3) Despues ku el a kaba di korigí nan tur, el a bisa: “Asina anto, laga nos buska e kosnan ku ta trese pas i edifikashon di otro.”​—Rom. 14:19.

10. Kon nos lo por resolvé diferensia di opinion awe?

¹⁰ Kon e kongregashon na Roma a reakshoná? Sin duda nan a aseptá Pablo su konseho i a hasi e kambionan nesesario. Awe, ora tin konflikto den kongregashon, nos tambe por resolvé esei na un manera amoroso si nos hasi loke Beibel ta bisa. Meskos ku e kristiannan na Roma, si tin un problema den kongregashon awe, tur esnan enbolbí mester hasi kambio pa “tene pas ku otro.”​—Mar. 9:50.

Kon Ansianonan Por Yuda

11. Kiko un ansiano mester hasi si un hende bin kont’é un problema ku e tin ku un otro kristian?

¹¹ Kiko si un ruman tin un problema ku un miembro di famia òf ku un otro kristian i ke papia ku un ansiano tokante e asuntu? Proverbionan 21:13 ta bisa: “Esun ku sera su orea pa sklamashon di e pober, e tambe lo sklama, ma lo no wòrdu kontestá.” Un ansiano sigur lo no “sera su orea” i keda sin skucha un hende ku ta pidi yudansa. Pero e mester tene kuenta tambe ku e spièrtamentu akí: “Esun ku ta promé pa pleita su kaso ta parse hustu, te ora ku un otro bin interog’é.” (Pro. 18:17) Un ansiano mester skucha bondadosamente, pero e mester tene kuidou pa no tuma parti pa esun ku ta bin kont’é e problema. Ora e kaba di skucha e persona, e por puntr’é si el a papia tokante e asuntu ku esun ku a ofend’é. Ademas, e ansiano lo por mustr’é loke Beibel ta bisa enkuanto kon pa mantené pas ku nos rumannan.

12. Menshoná tres ehèmpel ku ta mustra ku ta peligroso pa aktua lihé sin skucha e otro banda di e medaya.

¹² Sí, ta peligroso pa aktua lihé sin skucha e otro banda di e medaya. Nos lo bai trata tres ehèmpel bíbliko ku ta mustra esei. E promé ku nos lo trata ta e kaso di Potifar. Su esposa a gañ’é ku Hosé a purba viol’é. Potifar a ker’é, i el a rabia asina tantu ku el a laga sera Hosé den prizòn. (Gén. 39:​19, 20) Rei David tambe a kai den e trampa ei. Ora Ziba, un sirbidó di Mefi-boset, a bisa David ku Mefi-boset tabata yuda David su enemigunan, David a ker’é. I sin investigá e asuntu, el a bisa Ziba: “Mira, tur loke ta pertenesé na Mefi-boset ta di bo.” (2 Sam. 16:4; 19:​25-27) E di tres ehèmpel ta di Rei Artaherhes. E enemigunan di e hudiunan a gañ’é ku e hudiunan tabata rekonstruí e murayanan di Yerusalèm pasobra nan kier a rebeldiá kontra e Imperio Perso. E rei a bai nan tras i a ordená e hudiunan pa stòp ku e konstrukshon. Komo konsekuensia, e trabou di rekonstruí e tèmpel di Dios a para. (Esd. 4:​11-13, 23, 24) Pues, ta sabí pa ansianonan kristian sigui e konseho ku Pablo a duna Timoteo i no saka konklushon promé ku nan haña sa tur e echonan.​—Lesa 1 Timoteo 5:​21 i 22.

13, 14. (a) Kiko nos mester kòrda ora dos hende tin un problema ku otro? (b) Kiko por yuda ansianonan husga un situashon na un manera korekto?

¹³ Beibel ta bisa: “Si un hende ta kere ku e sa algu, ainda e no sa manera e mester sa.” (1 Kor. 8:2) Asta ora un persona a tende ámbos banda di medaya, tòg e mester kòrda ku kisas e no ta na haltura di tur detaye. Ademas, kisas e no sa tur kos tokante e dos personanan ku tin problema ku otro. Ansianonan mester tene masha kuidou ora nan ta husga un situashon. Nan no mester bai tras di mentira i rumor ni laga hende manipulá nan. Dios su Hues nombrá, Hesukristu, ta husga ku hustisia. E no ta “husga segun loke su wowo ta mira, ni hasi desishon segun loke su orea ta tende.” (Isa. 11:​3, 4) Mas bien, Hesus ta laga Yehova su spiritu santu gui’é. Ansianonan kristian tambe mester laga Dios su spiritu santu guia nan.

¹⁴ Promé ku ansianonan husga un asuntu, nan mester pidi Yehova den orashon pa spiritu santu. I nan ta laga Dios su spiritu santu guia nan mediante e Palabra di Dios i e publikashonnan di “e esklabo fiel i prudente.”​—Mat. 24:45.

Nos Mester Mantené Pas Kueste Loke Kueste?

15. Si un kristian ta na haltura di un piká grave, ki ora e mester informá e ansianonan tokante e asuntu?

¹⁵ Beibel ta bisa nos pa hasi esfuerso pa mantené pas. Pero Beibel ta bisa tambe: “E sabiduria di ariba primeramente ta puru, despues pasífiko.” (Sant. 3:17) Pues, ta mas importante pa nos ta puru, òf limpi, den Dios su bista ku mantené pas. Esei ta nifiká ku nos ta laga Dios su normanan enkuanto bon i malu guia nos den nos bida. Pues, si un kristian sa ku un ruman a kometé un piká grave, e mester animá e ruman ei pa konfesá su piká na e ansianonan. (1 Kor. 6:​9, 10; Sant. 5:​14-16) Si e ruman no konfesá su piká, e kristian ku ta na haltura di e piká mester informá e ansianonan. Si e kristian no hasi esei djis pa e mantené pas ku esun ku a peka, e ta bira un kómplise.​—Lesa Levítiko 5:1.

16. Kiko nos por siña di e akshon ku Jehú a tuma kontra Rei Joram?

¹⁶ Jehú a hasi algu ku ta mustra ku ta mas importante pa hasi loke ta bon ku mantené pas ku un hende ku ta praktiká piká. Dios a manda Jehú pa kastigá e famia di Rei Akab. E rei malbado Joram, yu di Akab i Jezabel, a sali den su garoshi pa bai topa ku Jehú i a puntr’é: “Ta na pas bo ta bini, Jehú?” Jehú a kontest’é: “Kon por tin pas, tanten ku e fornikashonnan di bo mama Jezabel i su bruherianan ta asina hopi?” (2 Rei. 9:22) E ora ei Jehú a span su bog i a tira Joram un flecha den su kurason. Meskos ku Jehú, ansianonan tambe mester tuma akshon kontra un pekadó ku no a arepentí. Nan no ta keda sin tuma medida djis pa mantené pas ku e pekadó. Ansianonan ta ekspuls’é pa e kongregashon por sigui tin pas ku Dios.​—1 Kor. 5:​1, 2, 11-13.

17. Kiko tur kristian mester hasi pa mantené pas?

¹⁷ Mayoria di biaha, e problemanan ku surgi entre rumannan no ta enbolbé piká grave. Pues ta mihó pa mustra amor i lubidá e fayonan chikitu ku nos rumannan ta kometé. E Palabra di Dios ta bisa: “Esun ku tapa un transgreshon ta buska amor, ma esun ku ripití un asuntu ta separá amigunan íntimo.” (Pro. 17:9) Si nos hasi loke Beibel ta bisa, nos lo mantené pas den kongregashon i nos lo keda ku un bon relashon ku Yehova Dios.​—Mat. 6:​14, 15.

Dios Ta Bendishoná Esnan Ku Ta Mantené Pas

18, 19. Kon Yehova ta bendishoná nos ora nos ta hasi esfuerso pa mantené pas?

¹⁸ Yehova ta bendishoná nos ora nos ta hasi esfuerso pa mantené pas. Nos ta disfrutá di un relashon íntimo ku Yehova i nos ta mantené e kongregashon uní. Ora nos ta promové pas den kongregashon, lo ta mas fásil pa nos mantené pas ku e hendenan ku nos ta prediká e mensahe di “pas” na dje. (Efe. 6:15) Nos lo ta mihó prepará pa mustra ‘kariño na tur hende i pa mustra pasenshi ora ku nos wòrdu tratá inhustamente.’​—2 Tim. 2:24.

¹⁹ Kòrda tambe ku si nos hasi esfuerso pa mantené pas awor, nos ta entrená nos mes pa futuro. Beibel ta bisa ku ‘lo tin un resurekshon di tantu e hustunan komo e inhustunan.’ (Echo. 24:15) Den futuro, Yehova lo resusitá miónes di hende di diferente background, temperamento i personalidat. Sí, lo e resusitá hende ku a biba den diferente époka, desde komienso di historia humano padilanti. (Luk. 11:​50, 51) Lo ta un gran onor pa siña esnan ku a ser resusitá pa stima pas. Pues, e entrenamentu ku nos ta haña awor lo yuda nos bon durante e tempu ei!

[Nota]

Kiko Bo A Siña?

• Kiko nos por hasi pa mantené pas ora nos ofendé un hende?

• Kiko nos por hasi pa mantené pas ora un hende ofendé nos?

• Kiko nos mester kòrda ora dos hende tin problema ku otro?

• Splika dikon nos no mester mantené pas kueste loke kueste.

[Plachinan na página 25]

Yehova ta stima esnan ku ta pordoná libremente