Abraham​—Un Hòmber Ku A Stima

Abraham su doló ta insoportabel. Sara, su kasá stimá, a fayesé. Segun ku e hòmber di edat akí ta despedí di su esposa, e ta kòrda kon dushi e ku su kasá a biba. Lágrima di tristesa i doló ta basha for di su wowo. (Génesis 23:1, 2) E lágrimanan akí no ta un señal di debilidat ni motibu di bèrgwensa; mas bien, nan ta evidensia di un ekselente kualidat di Abraham—su amor.

KIKO TA AMOR? Amor ta un sintimentu di apego òf afekto profundo pa un otro persona. Un persona ku ta stima ta demostrá su amor ku echo, asta si esei ta rekerí sakrifisio.

KON ABRAHAM A DEMOSTRÁ AMOR? Abraham a stima su famia. Sin duda, Abraham tabata un hòmber okupá. Apesar di esei, nunka el a neglishá e nesesidat emoshonal i spiritual di su famia. De echo, Yehova tabatin konfiansa ku Abraham lo a asumí su responsabilidat komo kabes di kas i guia su famia spiritualmente. (Génesis 18:19) Papiando ku Abraham, Yehova a hasi menshon spesífiko di e amor ku Abraham a demostrá; el a referí na Isak komo e ‘yu ku Abraham a stima mashá.’—Génesis 22:2.

Un otro suseso ku ta duna evidensia ku Abraham a stima su famia ta e manera ku el a reakshoná ora su esposa stimá, Sara, a muri. Abraham a yora Sara su morto mashá. Maske e tabata un hòmber fuerte i baronil, e no tabatin bèrgwensa di ekspresá su tristesa. Abraham a demostrá suavedat i fortalesa na un manera balansá.

Abraham a demostrá su amor pa Dios. Henter su bida a mustra ku el a stima Dios. Kon asina? Kòrda kiko Beibel ta bisa na 1 Huan 5:3: “Amor pa Dios ta nifiká ku nos ta kumpli ku su mandamentunan.” Di akuerdo ku e definishon ei, Abraham tabata un ekselente ehèmpel di un persona ku a stima Dios.

Kada bes ku Yehova a manda Abraham hasi algu, el a obedesé mesora. (Génesis 12:4; 17:22, 23; 21:12-14; 22:1-3) Sea ku e mandamentu tabata difísil òf fásil pa obedesé òf ku e tabata sa e motibu òf nò, Abraham semper a obedesé Dios. Sí, pa Abraham, e faktornan ei tabata insignifikante. Kiko ku Dios tabata ke pa e hasi, e tabata dispuesto pa hasi. Abraham a mira kada un mandamentu komo un oportunidat pa demostrá su amor na Yehova.

LÈS PA NOS: Nos por imitá Abraham mustrando tierno kariño na otro hende, spesialmente na nos famia. I nunka nos mester laga preshon di bida pone ku nos no tin tempu pa nos sernan kerí.

Ademas, ta bon pa nos kultivá un amor sinsero pa Yehova. E amor ei por tin gran influensia riba nos bida. Kon asina? E por motivá nos pa kambia nos aktitut, nos manera di papia i nos kondukta pa asina nos por agradá Yehova.—1 Pedro 1:14-16.

Ta bèrdat ku no ta tur biaha ta fásil pa obedesé Yehova su mandamentunan. Pero nos por tin sigur ku Esun ku a yuda Abraham—Esun ku a yam’é “mi amigu”—lo sostené nos tambe. (Isaías 41:8) Ademas su Palabra, Beibel, ta primintí ku ‘lo e hasi nos firme i fuerte.’ (1 Pedro 5:10) Esei ta loke Abraham su bon Amigu a primintí. Ki un promesa maravioso!

[Kuadro na página 10]

Hende Hòmber Sa Yora?

Hopi hende ta pensa ku nò. Kisas nan lo keda sorprendí ora nan lesa den Beibel ku Abraham a yora. Pero Beibel ta menshoná vários otro hòmber fiel ku a yega di yora, por ehèmpel Hose, David, apòstel Pedro, e ansianonan di e kongregashon di Efeso i asta Hesus. (Génesis 50:1; 2 Samuel 18:33; Lukas 22:61, 62; Huan 11:35; Echonan 20:36-38) Ta bisto anto ku Beibel no ta siña ku hende hòmber no por yora.