Armagedon​—Kiko Nan Sa Bisa Ku E Ta?

“I nan a reuní nan tur huntu na e lugá ku na lenga hebreo yama Armagedon.”—REVELASHON 16:16, Beibel Santu.

KIKO ta bini na bo mente ora bo tende e palabra “Armagedon”? Probablemente bo ta imaginá bo mes un katástrofe enorme. Aunke Beibel ta menshoná e palabra “Armagedon” ún biaha so, medionan di komunikashon i lidernan religioso sí ta us’é vários biaha.

E konseptonan ku hende en general tin di Armagedon ta kuadra ku loke Beibel ta siña? Esei ta un bon pregunta. Dikon? Pasobra ora bo haña sa e bèrdat tokante Armagedon, esei por libra bo di miedu innesesario, yuda bo mira futuro ku optimismo i kambia bo punto di bista di Dios.

Siguientemente, nos lo analisá tres pregunta i kompará e konsepto ku hende en general tin enkuanto Armagedon ku loke Beibel ta siña realmente.

1. ARMAGEDON TA UN DESASTER KU HENDE TA KOUSA?

Hopi bes, periodista- i ekspertonan ta usa e palabra “Armagedon” pa deskribí desasternan ku hende ta kousa. Por ehèmpel, ta e palabra ei nan a usa pa deskribí e Promé i Segunda Guera Mundial. Despues di e dos gueranan ei, hende tabatin miedu pa Merka i Union Soviétiko no usa nan armanan nuklear kontra otro. Medionan di komunikashon a yama e konflikto ku lo por a surgi debí na esei “un Armagedon nuklear.” Awendia, ekspertonan ta spièrta hende tambe pa un “Armagedon di klima” pasobra nan tin miedu ku polushon lo kousa kambionan drástiko den e klima di planeta Tera.

E konsepto akí ta enserá ku: Futuro di tera i di tur loke tin bida ta dependé di hende. Anto, si gobernantenan no tuma desishon sabí, planeta Tera lo sufri daño permanente.

Loke Beibel ta siña: Dios lo no permití hende destruí tera. Beibel ta duna nos e siguransa ku Yehovaa no a krea tera “pa e keda bashí.” Mas bien, el a form’é “pa e wòrdu habitá.” (Isaías 45:18) Pues, en bes di laga hende kaba ku nos planeta, Dios lo “kaba ku esnan ku ta kaba ku e tera.”—Revelashon 11:18.

2. ARMAGEDON TA UN DESASTER NATURAL?

Tin biaha, periodistanan ta usa e palabra “Armagedon” pa deskribí un desaster natural grandi. Por ehèmpel na aña 2010, tabatin un artíkulo ku a papia di “‘Armagedon’ na Haiti.” E artíkulo ei a papia di e sufrimentu, e daño i di e mortonan ku e temblor fuerte akí a kousa. Reportero i trahadónan di pelíkula ta usa e palabra akí no solamente pa referí na susesonan ku a tuma lugá kaba sino tambe pa referí na esnan ku nan ta teme ku lo sosodé. Por ehèmpel, nan ta usa e palabra “Armagedon” pa deskribí e efektonan imaginario di un asteroide ku ta dal den planeta Tera.

E konsepto akí ta enserá ku: Armagedon ta tuma lugá pa kasualidat i lo mata tantu hende malbado komo esnan inosente. I bo no por hasi masha kos pa protehá bo mes.

Loke Beibel ta siña: Armagedon no ta un suseso ku lo destruí hende pa loko. Mas bien, ta e malbadonan so lo ser destruí. Sí, Beibel ta primintí ku pronto “e malbado lo no t’ei mas; maske kuantu bo buska su lugá, e lo no t’ei.”—Salmo 37:10.

3. DIOS LO DESTRUÍ TERA NA ARMAGEDON?

Hopi hende religioso ta kere ku lo tin un konfrontashon final entre bon i malu ku lo kaba ku nos planeta. Un enkuesta ku Princeton Survey Research Associates a hasi na Merka a mustra ku 40 porshento di e adultonan ku a partisipá den e enkuesta ta kere ku mundu lo kaba den “un guera na Armagedon.”

E konsepto akí ta enserá ku: Nunka no tabata e intenshon pa hende keda biba pa semper riba tera ni pa nos planeta eksistí pa semper. I ku Dios a krea hende pa nan muri tardi òf trempan.

Loke Beibel ta siña: Beibel ta mustra bon kla ku Dios “a establesé tera riba su fundeshinan, pa asina esei no kita for di su lugá nunka mas.” (Salmo 104:5) Anto relashoná ku e habitantenan di mundu, Beibel ta bisa: “E hustunan lo heredá e tera, i lo biba den dje pa semper.”—Salmo 37:29.

Ta bisto anto ku Beibel ta kontradisí e konseptonan ku hende en general tin di Armagedon. Pero awor, kiko ta e bèrdat?

[Nota]